Part 7—Conductim Olketa Bible Study wea Muv Ahed
Wei for Prea Long Study
1. (a) Why nao hem fitim for startim and endim wanfala Bible study witim prea? (b) Hao nao iu savve startim diswan long wanfala Bible study?
1 For olketa Bible student muv ahed long spiritual wei, olketa barava needim blessing bilong Jehovah. (1 Cor. 3:6) Dastawe, hem barava fitim for startim and endim wanfala Bible study witim prea. Plande taem iumi savve duim diswan witim pipol wea biliv long God long first study. Saed long nara pipol, maet iumi need for luksavve wanem taem nao bae best for start for duim diswan. Iu savve iusim Psalm 25:4, 5 and 1 John 5:14 for helpem student lukim why nao hem important for prea, and tu, iusim John 15:16 for explainim why nao hem important for prea long Jehovah thru long Jesus Christ.
2. Sapos wanfala brata wea baptaes or wanfala man wea hem anbaptaes pablisa go witim wanfala sista for duim Bible study, hu nao shud prea?
2 Hu nao wan wea shud prea long wanfala Bible study? Sapos wanfala brata wea baptaes hem go witim wanfala sista long wanfala study, brata nao shud prea, and sapos sista conductim datfala Bible study, sista hia shud kavarem hed bilong hem. (1 Cor. 11:5, 10) Long narasaed, sapos wanfala anbaptaes pablisa wea hem wanfala man hem go witim wanfala sista for duim Bible study, sista nao shud prea. Datfala sista shud kavarem hed bilong hem taem hem prea and taem hem conductim study.
3. Olketa wanem samting nao fitim iumi for talem taem iumi prea witim Bible student long study?
3 Samting Iu Savve Talem Insaed Prea: Olketa prea long Bible study no need for long, bat iu shud askem and talem samfala important samting. Iu shud prea for God blessim datfala study and talem thankiu for olketa tru samting wea student lanem, and tu, hem fitim for praisem Jehovah for instruction wea hem givim. (Isa. 54:13) Iumi savve talem tu samfala toktok wea showimaot iumi interest long datfala student and hao iumi tinghae long organization wea Jehovah iusim distaem. (1 Thess. 1:2, 3; 2:7, 8) Wei for askem Jehovah for blessim wei wea student hem trae hard for followim samting wea hem lanem savve helpem hem for lukim hao hem important for kamap ‘man wea followim datfala word.’—Jas. 1:22.
4. Wanem nao olketa gudfala samting wea kamaot from wei for startim and endim study witim prea?
4 Plande gud samting kamaot from olketa prea olsem. Jehovah hem givim blessing bilong hem. (Luke 11:13) Prea hem strongim long student hao wei for studyim Word bilong God hem serious samting. Taem student hem lisin long olketa prea bilong iumi, datwan teachim hem hao for prea tu. (Luke 6:40) And tu, taem iumi prea from heart wea fulap witim love for God and wei for tinghae long olketa nambawan fasin bilong hem, iumi helpem student for mekem grow gudfala wei for fren witim Jehovah.