KEEPIM
Conductim Olketa Bible Study wea Muv Ahed
Olketa key point from olketa article abaotem hao for conductim Bible study wea muv ahed wea kamap evri month long Kingdom Ministry Bilong Iumi hem insaed disfala insert. Evriwan need for keepim disfala insert and reviewim taem iumi conductim olketa Bible study. And tu, brata savve mekhae long olketa point hia long olketa meeting for field service, and olketa service overseer savve iusim olsem faondeson for tok bilong olketa taem olketa visitim olketa buk study grup.
Part 1: Wanem Nao Wanfala Bible Study?
Sapos iu evritaem story witim samwan abaotem olketa Bible subject nomata hem for shortfala taem long each visit, and iu duim diswan long wei for iusim Bible and wanfala pablikeson for studyim Bible, datwan hem wanfala Bible study. Iu savve reportim diswan olsem study long report pepa bihaen iu conductim thrifala taem wea insaed diswan hem taem wea iu showim hao for duim diswan, and tu, sapos luk olsem datfala study bae gohed.—km 7/04 p. 1.
Olketa Pablikeson for Iusim
◼ Wanem Nao God Mas Kasem From Iumi?
◼ Savvy wea Lead Go Long Laef Olawe
◼ Worshipim Datfala Only Tru God
◼ Iumi savve iusim, Iu Savve Kamap Fren Bilong God! for study witim pipol wea no skul gud or no read gud.
Part 2: Prepare for Conductim Study
Iumi need for teachim disfala information long wei wea bae affectim heart bilong student. For duim diswan iumi need for prepare gud and tingim best wei for teachim information hia long datfala student.—km 8/04 p. 1.
Hao for Prepare
◼ Lukluk gud long title bilong datfala chapter or leson, olketa subheding, and eni piksa wea stap.
◼ Lukaotem olketa ansa for olketa kwestin wea stap and andalaenem nomoa olketa main word or toktok.
◼ Disaedem olketa scripture for readim long taem bilong study. Raetem shortfala note abaotem scripture long saed long paragraf.
◼ Preparem shortfala review long olketa main point for end bilong study.
Mekem Leson Fitim Student
◼ Prea abaotem datfala student and need bilong hem.
◼ Trae for tingim olketa point wea maet student faendem hard for minim or acceptim.
◼ Askem iuseleva: Wanem nao hem need for minim or kamap moabeta long hem mekem hem savve muv ahed long spiritual wei? Hao nao mi savve kasem heart bilong hem?
◼ Sapos iu need for duim, preparem wanfala tokpiksa, samfala point for mekem mining hem klia, or samfala kwestin wea bae helpem student for minim gud wanfala point or scripture.
Part 3: Iusim Bible Long Gudfala Wei
Main goal bilong iumi for conductim olketa Bible study hem for “mek disaepol” thru long wei for helpem pipol for minim and acceptim olketa teaching bilong Bible and followim long laef bilong olketa. (Matt. 28:19, 20; 1 Thess. 2:13) Dastawe, man wea conductim study mas iusim Bible.—km 11/04 p. 4.
Teach From Word Bilong God
◼ Showim student hao for faendem samfala scripture long Bible bilong hem.
◼ Readim and story raonem olketa scripture wea pruvim wanem iumi bilivim.
◼ Askem olketa kwestin. Winim wei for explainim olketa scripture long student, askem hem nao for explainim long iu.
◼ Mekem hem simpol. Stap klia long wei for trae explainim evri part bilong wanfala scripture. Storyim nomoa wanem iu need for storyim for mekem point hem klia.
◼ Storyim hao for followim. Helpem student for luksavve hao samfala scripture barava fitim hem.
Part 4: Teachim Student for Prepare
Student wea readim leson firstaem, andalaenem olketa ansa, and tingim hao for talem ansa long toktok bilong hemseleva, bae muv ahed kwiktaem long spiritual wei. Dastawe, taem wanfala Bible study hem kamap evritaem and gohed gud, showim student hao for prepare long wei for preparem wanfala leson witim hem. For staka student, hem gud for preparem full chapter or leson witim olketa.—km 12/04 p. 1.
Andalaenem and Raetem Short Toktok
◼ Explainim long hem hao for faendem ansa for olketa kwestin wea stap.
◼ Showim long student buk bilong iu wea iu markem finis olketa main word and toktok.
◼ Helpem student for savve hao each scripture wea stap long paragraf hem sapotim wanfala point, and showim hem hao for raetem short toktok from scripture saed long paragraf.
Lukluk Long Information and Duim Review
◼ Showim student hao for lukluk long title bilong chapter or leson, olketa subheding, and olketa piksa bifor hem start for preparem gud.
◼ Encouragem student for reviewim olketa main point bifor hem finis for prepare.
Part 5: Disaedem Firstaem Haomas Information for Studyim
Haomas information for studyim bae depend long savve and living bilong teacher and student.—km 1/05 p. 1.
Strongim Faith
◼ Hem barava moa important for helpem student minim gud wanem hem lanem winim wei for trae storyim tumas samting insaed shortfala taem.
◼ Iusim taem wea iu needim for helpem student minim and acceptim wanem hem lanem.
◼ Iusim inaf taem for story gud raonem olketa main point and scripture wea olketa nao faondeson for samting iumi teachim.
No Storyim Difren Samting
◼ Sapos lelebet wei bilong student hem for story tumas abaotem olketa samting bilong hemseleva, iumi savve talem hem hao bae iumi storyim datwan bihaen study hem finis.
◼ No story nating long taem bilong study. No ova tumas for storyim olketa nara point or experience wea maet join witim point long paragraf bat wea no insaed datfala information, bikos diswan savve mekem student no kasem gud stretfala savve abaotem olketa main teaching bilong Bible.
Part 6: Taem Student Askem Kwestin
Taem iu startim finis wanfala Bible study, hem gud for studyim olketa Bible teaching followim order bilong olketa chapter long buk wea iufala study insaed, no just chusim eni difren subject nomoa each week. Diswan bae helpem student buildim faondeson bilong stretfala savve and muv ahed long spiritual wei.—km 2/05 p. 6.
Luksavve
◼ Iu savve ansarem kwestin semtaem wea man askem sapos olketa kwestin hem join witim study.
◼ Iu savve ansarem long narafala taem olketa kwestin wea no join long study or wea iu need for duim research long olketa. Hem bae helpem iu for remember sapos iu raetem olketa kwestin olsem.
◼ Sapos student faendem hem hard for acceptim wanfala teaching, hem gud for storyim nara information wea barava explainim gud wanem Bible talem abaotem datfala subject.
◼ Sapos student still no acceptim datwan, story abaotem datwan long narataem bat gohed witim study.
No Ova Tumas
◼ Sapos iu no savve ansarem kwestin bilong hem, stap klia long wei for talem tingting bilong iuseleva.
◼ Isisi showim student hao for duim research.
Part 7: Wei for Prea Long Study
For olketa Bible student muv ahed long spiritual wei, olketa barava needim blessing bilong Jehovah. Dastawe, hem barava fitim for startim and endim wanfala Bible study witim prea.—km 3/05 p. 4.
Taem wea Iu Savve Start for Talem Prea
◼ Plande taem iumi savve prea witim pipol wea biliv long God long first study.
◼ Saed long nara pipol, maet iumi need for luksavve wanem taem nao bae best for start for prea.
◼ Iu savve iusim Psalm 25:4, 5 and 1 John 5:14 for helpem student lukim why nao iumi prea.
◼ Iu savve iusim John 15:16 for explainim why nao hem important for prea long Jehovah thru long Jesus Christ.
Samting Iu Savve Talem Insaed Prea
◼ Hem fitim for praisem Jehovah for instruction wea hem givim.
◼ Talem toktok wea showimaot iumi interest long datfala student.
◼ Talem toktok wea showimaot iumi tinghae long organization wea Jehovah iusim distaem.
◼ Askem Jehovah for blessim wei wea student trae hard for followim samting wea hem lanem.
Part 8: Leadim Olketa Student Kam Long Organization
Goal bilong iumi taem iumi duim Bible study hem no for lanem student olketa teaching nomoa, bat hem for helpem hem for kamap part long Christian kongregeson. Iusim lelebet taem each week long study for storyim wanfala point abaotem organization bilong Jehovah.—km 4/05 p. 8.
Meeting Bilong Kongregeson
◼ Helpem olketa for savve abaotem each kongregeson meeting. Start from firstaem wea iufala start for study, invaetem olketa for kam long meeting.
◼ Sharem olketa interesting point wea kamap long olketa meeting.
◼ Hem gud for explainim and mekem olketa interest long Memorial, olketa assembly, and visit bilong circuit overseer.
◼ Iusim olketa piksa insaed olketa pablikeson bilong iumi for helpem olketa lukim wanem nao happen long olketa meeting.
◼ Encouragem olketa for readim datfala brochure Olketa Witness Bilong Jehovah—Wan Mind for Duim Will Bilong God Evriwea Long World.
Iusim Olketa Video for Mekem Grow Wei for Tinghae Long Organization Bilong Jehovah
◼ Jehovah’s Witnesses—The Organization Behind the Name
◼ Our Whole Association of Brothers
◼ United by Divine Teaching
◼ To the Ends of the Earth
Part 9: Redim Student for Duim Enitaem Witnessing
Taem olketa Bible student start for showimaot faith long samting olketa lanem, olketa barava laek for story long narawan abaotem datwan.—km 5/05 p. 1.
Encouragem Olketa for Givim Witness
◼ Waswe, samfala famili member or fren stap wea savve join long study?
◼ Waswe, eni wakfren, skul fren or eniwan hem savve long hem showimaot interest tu?
Trainim Olketa for Storyim Biliv Bilong Olketa
◼ Long taem bilong study, askem student, “Hao nao bae iu iusim Bible for explainim long famili bilong iu disfala Bible truth?”
◼ Helpem student for minim hao taem iumi story long nara pipol abaotem God and olketa plan bilong hem, iumi need for showimaot respect and kaenfala fasin.
◼ Datfala brochure, Olketa Witness Bilong Jehovah—Wan Mind for Duim Will Bilong God Evriwea Long World, savve helpem olketa fren and famili member for minim biliv bilong iumi wea stap long Bible and waka bilong iumi.
Part 10: Trainim Student for Duim Haos-Tu-Haos Ministry
Taem olketa elder disaedem hao wanfala Bible student hem fit for kamap anbaptaes pablisa, hem savve tekpart long waka for preach witim kongregeson.—km 6/05 p. 1.
Prepare Tugeta
◼ Showim niu pablisa wea nao hem savve faendem olketa idea for startim story.
◼ Helpem hem for chusim wanfala isi idea wea fitim territory.
◼ Encouragem hem for iusim Bible long ministry.
◼ Practice tugeta. Showim hem hao for ansarem long gudfala wei kaen toktok wea plande taem pipol savve talem.
Preaching Tugeta
◼ Letem student lukluk taem iu storyim subject wea iutufala preparem tugeta.
◼ Tingim fasin and savve bilong student. Samfala taem, maet firstaem hem gud for niu pablisa readim and storyim wanfala scripture.
◼ Helpem niu pablisa for garem schedule for share long ministry evri week.
Part 11: Helpem Olketa Student for Duim Return Visit
Wei for prepare for duim wanfala return visit hem start long firstfala kol. Encouragem student for barava interest long olketa wea hem story witim olketa. Gohed for trainim student for askem kwestin wea bae mekem haosholder talem tingting bilong hem. Trainim hem tu for lisin, and for luksavve long olketa samting wea haosholder wari long hem.—km 7/05 p. 1.
Prepare for Go Bak
◼ Reviewim moa firstfala story bilong iutufala witim haosholder, and helpem student for chusim wanfala subject wea haosholder bae interest long hem.
◼ Preparem wanfala short story witim student for hem iusim wanfala scripture and wanfala paragraf insaed pablikeson.
◼ Redim kwestin for askem long end bilong story wea bae lead go long next visit.
Mas Go Bak Long Olketa wea Interest
◼ Encouragem student for go bak kwiktaem long evriwan wea interest.
◼ Helpem student for luksavve long need for gohed for go bak long olketa wea hard for kasem olketa.
◼ Showim student hao for mekem arrangement for go bak, and helpem hem for luksavve hao hem important for followim promis bilong hem for go bak.
Part 12: Helpem Olketa Student for Startim and Conductim Olketa Bible Study
Hem barava important for followim Jesus long wei wea iuseleva showimaot gudfala example long ministry. Taem student lukim example bilong iu, bae hem minim hao goal for duim olketa return visit hem for startim olketa Bible study.—km 8/05 p. 1.
Askem Haosholder Sapos Hem Laek for Study
◼ Explainim long student hao iumi no need for talem evri samting abaotem study arrangement.
◼ Plande taem hem moabeta for showim nomoa hao for duim study long wei for duim wan or tufala paragraf from pablikeson for studyim.
◼ Reviewim and practice for duim wanfala long olketa idea for startim Bible study.—km 8/05 p. 8; km 1/02 p. 6.
Trainim Student for Kamap Teacher
◼ Encouragem student for joinim Theocratic Ministry Skul.
◼ Invaetem olketa niu pablisa for go witim iu long samfala Bible study wea maet hem savve share lelebet for teach.