Iumi Savve Givim Samting Long Jehovah
1 Waswe, iu savve hao olketa man fit for givim samting long God? Abel sakrifaesim olketa gudfala animal bilong hem long Jehovah, Noah and Job duim olsem tu. (Gen. 4:4; 8:20; Job 1:5) Olketa sakrifaes hia hem no for mekem Creator garem staka samting, from evri samting hia bilong hem finis. Bat olketa sakrifaes hia showimaot bigfala love wea olketa faithful man hia garem for God. Iumi tu savve iusim taem, strong, and eni nara samting wea iumi garem for givim long Jehovah “wanfala sakrifaes bilong praise.”—Heb. 13:15.
2 Taem: Barava fitim iumi for ‘baem bak’ taem from olketa nara samting, mekem iumi iusim samfala taem moa long preaching! (Eph. 5:15,16) Maet iumi savve markem taem for duim auxiliary pioneer for wanfala or tu-thri month long wanfala year. Maet iumi savve iusim samfala taem moa long olketa day wea iumi duim preaching. Taem iumi iusim nara 30 minute for preach evri week, datwan bae mekem iumi kasem samting olsem tufala hour moa long wanfala month!
3 Strong: For iumi garem strong taem iumi preach, iumi mas no duim hapitaem wea mekem iumi taed gogo iumi no givim full strong bilong iumi long Jehovah. Iumi mas no wari long olketa samting wea savve mekem heart bilong iumi “wikdaon,” wea mekem iumi no strong tumas for worshipim God. (Prov. 12:25) Nomata sapos iumi warim samfala samting, bae hem gud tumas sapos iumi ‘torowem hevi bilong iumi long Jehovah’!—Ps. 55:22; Phil. 4:6, 7.
4 Material Samting: Iumi savve iusim olketa material samting wea iumi garem for sapotim waka for preach. Paul talem olketa Christian long taem bilong hem for evritaem “markem samfala selen” mekem olketa garem samting for givim long olketa wea garem need. (1 Cor. 16:1, 2) Long sem wei tu, maet iumi savve markem samfala selen for givim long kongregeson and for Kingdom waka wea gohed evriwea long world. Jehovah hem tinghae long wanem iumi givim from heart, nomata sapos datwan hem smol nomoa.—Luke 21:1-4.
5 Jehovah hem givim staka samting long iumi. (Jas. 1:17) Iumi showimaot iumi tinghae long wanem hem duim taem iumi givim taem, strong, and eni nara samting wea iumi garem for worshipim hem. Taem iumi duim olsem hem mekem Jehovah hapi, “from [Hem] lovem man wea hapi for give.”—2 Cor. 9:7.