Niufala Schedule for Olketa Kongregeson Meeting
1, 2. Wanem change long olketa meeting nao bae start long January 2009?
1 Long week long April 21-27, 2008, evri brata and sista evriwea long world herem wanfala spesol announcement olsem. “Start long January 1, 2009, Kongregeson Buk Study bae kamap long semtaem wea iumi savve hipap for Theocratic Ministry Skul and Service Meeting. Nem bilong Kongregeson Buk Study bae change for kamap Kongregeson Bible Study.”
2 Schedule for Disfala Meeting Evri Week: Taem for disfala meeting, witim olketa song and prea, baebae hem 1 hour and 45 minute. Meeting bae start witim song and prea (5 min.), then bihaen Kongregeson Bible Study (25 min.). Theocratic Ministry Skul bae kamap bihaen datwan (30 min.). Then, wanfala song (5 min.) for startim Service Meeting (35 min.). Meeting hem finis witim song and prea (5 min.). For mekem iu redi gud for olketa meeting hia, schedule for Kongregeson Bible Study, Theocratic Ministry Skul, and Service Meeting bae kamap evri month long Kingdom Ministry Bilong Iumi.
3. Hao nao for duim Kongregeson Bible Study?
3 Kongregeson Bible Study: Wei for duim disfala meeting bae hem olsem wei for duim Wastaoa Study. No need for reviewim wanem iumi lanem lastfala week. Bat hem gud for talem lelebet toktok abaotem study for startim disfala meeting. Diswan bae givim inaf taem for evriwan talem shortfala ansa. Presiding overseer bae markem difren elder for duim disfala meeting evri week.
4. Long wanem wei nao Service Meeting bae change?
4 Service Meeting: Service Meeting bae semsem nomoa bat bae garem olketa shortfala part. Olketa announcement bae evritaem faev minute nomoa. Diswan shud givim inaf taem for olketa important announcement and samfala leta from branch. Olketa announcement olsem field service, klining, accounts report, and olketa leta wea iumi savve kasem evritaem from branch office, no readim kam bat putim long notice board for olketa brata and sista readim. Olketa wea garem olketa part long program shud redi gud and no ovataem and followim wanem Service Meeting Schedule talem.
5. Long week wea circuit overseer hem kam, wanem nao schedule for olketa kongregeson meeting?
5 Visit Bilong Circuit Overseer: Schedule long week wea circuit overseer kam bae no change. Theocratic Ministry Skul and Service Meeting bae kamap firstaem long Tuesday and then wanfala song. Bihaen datwan circuit overseer bae givim tok for 30-minute. Olsem iumi savve duim evritaem circuit overseer hem kam, Kongregeson Bible Study bae kamap long narafala evening, then wanfala song and bihaen datwan service tok bilong circuit overseer. Meeting bae finis witim wanfala song and prea.
6. Wanem nao waka bilong grup overseer?
6 Olketa Grup for Preaching Waka: Body of elders nao bae markem olketa grup overseer for lukaftarem olketa grup for preaching waka and shepherdim man wanwan long datfala grup. Taem wanfala ministerial servant mas duim datfala waka, hem bae kamap wanfala “grup servant.”
7. Wanem nao bae kamaot from niufala schedule for olketa kongregeson meeting bilong iumi?
7 Disfala meeting bae kamap nambawan taem for enjoyim staka spiritual kaikai wea bae strongim wei wea iumi fren witim Jehovah. Diswan bae helpem iumi for preach and teach gudfala, and lane hao for duim gudfala preaching waka.—Eph. 4:13, 14; 2 Tim. 3:17.
8. Hao nao wei for redi gud firstaem bae helpem iumi and olketa narawan?
8 Wei for redi gud firstaem for olketa meeting hia bae helpem iumi for barava herehere gud long olketa main point long evri meeting. Iumi evriwan bae garem chance for talem ansa, for mekem iumi strongim narawan. (Rom. 1:11, 12; Heb. 10:24) Wanem iumi laekem tumas nao hem for ‘evriwan lukim iumi kamap gud’ for “iusim word bilong truth long stretfala wei.”—1 Tim. 4:15; 2 Tim. 2:15.
9. Wanem nao iumi disaed for duim, and why nao olsem?
9 Iumi barava hapi long niufala schedule for olketa kongregeson meeting bilong iumi. Hem gud tumas for iumi followim wanem “datfala wakman wea faithful and wise” talem and barava followim Nambawan Shepherd bilong iumi taem hem redyim iumi for datfala big “trabol” wea distaem hem barava klosap.—Matt. 24:21, 45; Heb. 13:20, 21; Rev. 7:14.