Why Nao Reading Hem Important for Olketa Pikinini—Part 2: Device or Printed Buk?

Wat nao pikinini blo iu laek iusim for read from, printed buk or electronic device?

Staka young wan bae chusim electronic device. Dr.  Jean M. Twenge,a hem sei: “Genereson wea growap witim wei for iusim device for click lo next link or scroll lo next page insaed tu thri seconds nomoa, olketa faendem hem hard for focus for readim buk.”

Hem tru, for read from wanfala electronic device hem garem olketa advantage. John wea 20 years old hem sei: “Skul wea mi attendim mifala iusim olketa digital buk. Mi savve iusim search feature for kwiktaem faendem information wea mi needim.”

Pipol wea iusim electronic device for read garem olketa nara tul for helpem olketa just lo wan click nomoa. For example, olketa savve click nomoa and faendem mining blo wanfala word, pleim audio, watchim video wea join witim wat olketa readim, or accessim extra information thru lo wanfala link. So hao, datwan minim olketa digital buk nao hem gud winim olketa printed reading buk?

Samfala pipol prefer for iusim olketa printed buk taem olketa duim deep study. Why nao olsem?

• Concentrate. Wanfala teenager wea nem blo hem Nathan sei: “Taem mi read from electronic device, staka taem olketa advertisement and olketa notification savve distractim mi from wat mi laek concentrate lo hem.”

  Karen, wea hem 20 years old, feisim similar challenge. Hem sei: “Taem mi read from wanfala phone or tablet, hem isi for mi go lo nara app or tempted for pleim game wea stap lo phone blo mi.”

  Bible principle: “Iusim taem blo iu lo best wei.”—Colossians 4:5, Phillips.

  Tingim diswan: Hao, pikinini blo iu savve kontrolem hemseleva taem hem read or study from wanfala digital device? If nomoa, hao nao iu savve helpem hem for lane for focus?

  Tip: Helpem pikinini blo iu for understandim dat if hem allowim tings lo device for distractim hem, bae hem tek longtaem for completim homwok blo hem, and bae hem no garem taem for duim olketa other activity.

• Comprehension. “Staka research showim dat pipol wea read from wanfala device no garem sem level lo comprehension olsem taem olketa read from wanfala printed buk,” hem nao wat datfala buk Be the Parent, Please hem talem.

  Wanfala reason nao pipol wea read from device savve read fast and no ting raonem wat olketa readim. Author Nicholas Carr hem sei: “Taem iumi read online, iumi laek for kasem staka information as quickly as possible.”b

  Samfala taem, for read fast hem garem benefit. Problem nao, Carr sei diswan “start for kamap main wei blo staka for read.” Endap, pikinini savve start for garem habit for read fast lo information and no understandim mining blo wat hem readim.

  Bible principle: “Lo evri samting wea iu waka hard for kasem, waka hard for kasem wei for minim samting.”—Proverbs 4:7.

  Tingim diswan: Hao nao iu savve helpem pikinini blo iu for duim moa research lo wanfala topic, whether hem lo printed buk or from device?

  Tip: Mas balance. Hem olraet for iusim printed buk or device. Tufala evriwan garem advantage. Samfala electronic feature hem savve help saed lo comprehension. So, mas reasonable taem iu storyim gud saed and nogud saed blo wei for read from electronic device or from wanfala printed buk. Iumi mas luksavve tu dat each pikinini hem difren.

• Rememberim. Ferris Jabr talem insaed lo wanfala article wea olketa pablisim lo Scientific American, dat wei for read from wanfala electronic device savve “mekem brain hem moa taed . . . and moa hard for rememberim wat iumi readim,” if iumi comparem datwan witim wei for read from printed buk.

  For example, wei for read from wanfala printed buk hem savve helpem iu for rememberim wanfala point, bikos iu piksarem lo mind blo iu wea lo page nao datfala point hem stap. Hem olsem wanfala “bookmark” lo mind blo iu for iu iusim bihaen.

  And tu, olketa wea duim research faendem dat staka taem olketa wea read from printed buk, olketa savve understandim gud olketa information hia and hem go daon deep. Olketa savve tingim bak olketa information hia bikos olketa barava lanem gud.

  Bible principle: “Protectim wisdom and ability for ting raonem samting.”—Proverbs 3:21.

  Tingim diswan: Hao, hem hard for pikinini blo iu understandim or rememberim wat hem readim or studyim? If olsem, hao nao iu savve helpem pikinini blo iu for impruvim study habit blo hem? If hem iusim printed buk, hao, iu ting datwan bae help?

  Tip: Tingim wat bae helpem pikinini blo iu for lanem samting winim wat hemseleva laek iusim for lane. Hem isi for pipol tingse olketa savve lane gud if olketa read from wanfala device.