HELP FOR FAMILI | LUKAFTAREM PIKININI
Olketa Pikinini and Social Media—Part 1: Waswe, Pikinini Blo Mi Shud Iusim Social Media?
Wanfala survey hem showimaot 97 percent lo olketa teenager iusim social media. Waswe, pikinini blo iu laek for joinim tu? Sapos olsem, hem gud for iu ting raonem samfala samting hia.
Lo disfala article
Hao pikinini blo iu iusim taem blo hem
Wanfala website HelpGuide sei: “Hao olketa designim olketa social media platform, hem for tekem staka taem blo iu, for iu online evritaem, and chekim screen blo iu evritaem for olketa update.”
“Mi tingse mi chekim social media for tu thri minute nomoa bat mi spendem staka hour for lukluk lo olketa post. Hem no isi for livim phone and duim eni nara samting wea savve helpem mi.”—Lynne, 20.
Askem iuseleva: Waswe, pikinini blo mi savve kontrolem hemseleva for followim taem wea mi markem for hem iusim social media? Waswe, pikinini blo mi hem fit for markem taem blo hemseleva and followim datwan?
Bible principle: “Lukluk gud long samting wea iufala duim, mekem iufala wise. . . Iusim gud taem bilong iufala.”—Ephesus 5:15, 16.
For letem pikinini iusim social media taem wea iu no trainim hem abaotem datwan, hem olsem iu letem hem for raedem wanfala horse bat hem no kasem training
Hao pikinini ting lo wei for fren
Datfala toktok “social media” hem minim for iu savve garem olketa frens or connect witim olketa pipol wea iu savve lo olketa. Samfala taem, olketa fren hia hem no olketa real frens.
“Mi lukim hao staka young pipol garem tingting wea no stret. Olketa tingse sapos olketa garem staka likes or followers, datwan minim staka pipol tingim olketa, nomata sapos olketa no savve gud lo olketa pipol hia.”—Patricia, 17.
Askem iuseleva: Waswe, pikinini blo mi garem mature tingting for luksavve dat for kamap popular online hem no important? Hao, hem savve fren gud witim pipol wea hem story feis tu feis witim?
Bible principle: “Fren blong yu, hemi lavem yu olowe. Brata blong yu, hemi helpem yu long hadtaem.”—Provebs 17:17, SIPB.
Hao hem affectim feeling blo pikinini
Olketa wea duim research faendaot why pipol iusim tumas social media hem bikos olketa feel lonely, wari, and even depress.
“For lukim olketa piksa blo wat olketa frens blo iu duim, bat iu no joinim olketa, datwan savve mekem iu feel nogud.”—Serena, 19.
Askem iuseleva: Waswe, pikinini blo mi garem mature tingting for stap klia lo wei for tingim seleva, compete, or for no letem wat hem lukim olketa narawan duim lo social media for affectim hem?
Bible principle: “Iumi mas no praod, no trae for winim narawan, and no jealous long narawan.”—Galatia 5:26.
Wei blo pikinini taem hem online
Social media savve mekem wei for cyberbullying kamap, sexting, and for lukluk lo pornography. Nomata if pikinini blo iu no garem olketa wei olsem, hem isi tumas for olketa samting hia for affectim pikinini blo iu.
“Mi luksavve social media savve isi tumas for mekem samwan go difren. Staka nogud toktok and olketa music wea no fitim hem stap lo there.”—Linda, 23.
Askem iuseleva: Waswe, pikinini blo mi garem mature tingting lo hao for iusim Internet lo wise wei? Waswe, pikinini blo mi savve kwiktaem for duim samting for rejectim olketa nogud samting wea kamap lo Internet?
Bible principle: “Iufala mas no storyim wei for durong, and no storyim tu evri difren kaen wei for no klin, or wei for greedy, . . . Hem no fitim tu for iufala duim nogud samting wea mekem narawan shame long wanem iufala duim. Hem no fitim for iufala talem rabis toktok, or olketa dirty toktok for mekfani.”—Ephesus 5:3, 4.
Hem shud joinim social media?
Social media hem no wanfala samting wea iu mas iusim for mekem iu garem hapi laef. Staka young wan hapi nomoa for no garem social media, samfala lo olketa iusim bifor bat then olketa disaed for stop.
“Taem mi lukim sista blo mi kasem nogud samting bikos lo social media, mi disaed for stop for iusim. Since datfala taem, mi hapi and feel dat mi garem staka samting moa for duim lo laef.”—Nathan, 17.
Tru samting abaotem diswan: Bifor iu letem pikinini blo iu for iusim social media, mek sure hem garem mature tingting for hem savve followim taem, keepim wei wea hem fren witim olketa narawan, and stap klia lo eni samting lo Internet wea no fitim.
Bible principle: “Man garem gudfala save, bae hemi tingim wei fo falom”—Provebs 14:15, SIPB.