Hao, Social Media Spoelem Pikinini blo Iu?—Hao Bible Savve Helpem Parents

“Hem wanfala emergency hao staka young pipol garem mentol health problem, and main samting wea kosim nao hem social media.”—Dr. Vivek Murthy, U.S. surgeon general, New York Times, June 17, 2024.

Hao nao parents savve protectim olketa pikinini from olketa danger blo social media? Bible hem givim practical advaes.

Wat parents savve duim

Tingim raonem olketa Bible principle hia.

“Man wea wise ting raonem each step blo hem.”—Proverbs 14:15.

From social media savve influencim pikinini lo nogud wei, no feel olsem iu mas allowim hem for iusim social media. Bifor iu allowim hem for iusim social media, mek sure hem kontrolem hemseleva for followim taem limits, hem continue for frens witim gud pipol, and hem avoidim information wea savve spoelem hem.

• Iu savve lanem samfala nara information, readim olketa article “Waswe, Pikinini blo Mi Shud Iusim Social Media?” and “Teachim Teenager blo Iu lo Hao for Iusim Social Media.”

“Iusim gud taem bilong iufala.”—Ephesus 5:16.

If iu allowim pikinini for iusim social media, mekem rules lo hao for iusim, and explainim hao rules hia bae helpem hem for keep sef. Lukluk for eni change lo wei blo hem wea showim iu shud mekem limit for hem accessim social media.

• Iusim whiteboard video Mas Wise Taem Iu Iusim Social Network for helpem pikinini understandim hem important for garem limits.

Samfala nara information

Bible sei iumi stap lo taem wea “evri samting hem hard tumas.” (2 Timothy 3:1-5) Nomata olsem, hem givim practical advaes wea savve helpem iumi for cope. Wanfala list blo winim 20 Bible article for parents and olketa pikinini hem lo disfala article abaotem olketa teenager wea garem mentol health problem.