Top Health Official Warnim Hao Social Media Affectim Young Pipol—Wat Nao Bible Talem Abaotem Datwan?

Lo May 23, 2023, wanfala top health official lo United States warnim pablik hao social media barava affectim staka young pipol.

• “Hem tru, social media maet garem benefits for samfala pikinini and teenager, bat staka evidence showim hao social media savve barava spoelem mentol and physical health blo olketa pikinini and teenager.”—Social Media and Youth Mental Health: The U.S. Surgeon General’s Advisory, 2023.

Datfala advisory storyim research wea explainim why iumi shud duim samting abaotem datwan.

• Olketa teenager wea 12 tu 15 years old “wea iusim moa than 3 hours lo wan day lo social media hae risk for kasem mentol health problems, and hem includim tu symptoms for depress and stress.”

• Olketa wea 14  years old wea “iusim staka taem lo social media no garem inaf sleep, narawan bullyim olketa online, ting daonem olketa seleva, feel iusles, and depress. Datwan happen staka taem lo olketa gele and no olketa boy.”

Hao nao parents savve protectim olketa pikinini from olketa nogud samting olsem? Bible givim practical advaes.

Wat parents savve duim

Parents disaed. Parents ting raonem olketa nogud samting wea savve happen, and disaedem if pikinini shud iusim social media or nomoa.

• Bible principle: “Tisim pikinini fo falom stretfala wei.”—Provebs 22:6, SIPB.

• For savve moa samting, readim article “Waswe, Pikinini blo Mi Shud Iusim Social Media?”

If iu allowim pikinini for iusim social media, luksavve lo olketa nogud samting wea savve happen, and monitorim online activities blo hem. Hao?

Protectim pikinini from olketa nogud samting. Trainim pikinini for luksavve lo olketa nogud samting and for avoidim datwan.

• Bible principle: “Iufala mas no storyim wei for durong, and no storyim tu evri difren kaen wei for no klin, or wei for greedy. . . . Hem no fitim tu for iufala duim nogud samting wea mekem narawan shame long wanem iufala duim. Hem no fitim for iufala talem rabis toktok, or olketa dirty toktok for mekfani.”—Ephesus 5:3, 4.

• For olketa practical idea, readim article “Teachim Teenager blo Iu lo Hao for Iusim Social Media.”

Setem limits. For example, garem olketa rul lo wat taem and hao long pikinini iusim social media.

• Bible principle: “Lukluk gud long samting wea iufala duim, mekem iufala wise. . . . Iusim gud taem bilong iufala.”—Ephesus 5:15, 16.

• Iusim whiteboard animation Mas Wise Taem Iu Iusim Social Network for helpem pikinini understandim why hem important for setem limits.