Hao Bible Savve Helpem Iumi for Garem Open Mind
“Wei for garem open mind savve mekem peace for kamap.”—UNESCO Declaration of Principles on Tolerance, 1995.
Nomata olsem, wei for no garem open mind savve producem wei for no showim respect and heit for kamap. Result blo diskaen feeling hem staka taem showaot lo heit speech, discrimination, and violence.
Bat pipol garem difren idea abaotem wat nao hem minim for garem open mind. Samfala biliv dat pipol wea garem open mind mas talemaot personal appruvol blo olketa lo evri difren kaen practice and behavior. Others bilivim, and Bible tu storyim datwan, dat pipol wea garem open mind respectim dat each wan garem raet for chusim own value and biliv blo hem, even if olketa seleva no appruvim olketa value and biliv hia.
Hao, Bible savve helpem pipol for garem open mind lo taem wea iumi stap?
Pruv dat Bible sapotim wei for garem open mind
Bible promotim wei for garem open mind. Hem sei: “Showimaot long evriwan, iufala no ova tumas.” (Philippi 4:5) Bible encouragem iumi for tingim feeling blo others, respectim olketa and treatim olketa fair. Pipol wea applyim advaes hia maet no agree or followim olketa value blo others, bat olketa letem datfala person for behave followim choice blo hemseleva.
Nomata olsem, Bible storyim dat God hem garem olketa standard saed lo human behavior. Hem sei: “[God] hem bin talem iu finis samting wea gud.” (Micah 6:8) Bible storyim advaes wea kam from God for helpem pipol enjoyim best laef.—Isaiah 48:17, 18.
God no givim authority lo iumi for judgem others. Bible sei dat “God nomoa hem givim law and hem nomoa judge . . . So hem no stret for iu judgem narawan.” (James 4:12) God allowim each wan lo iumi freedom for mekem own choices wea result blo hem bae depend nao lo wat iumi chusim.—Deuteronomy 30:19.
Wat Bible talem abaotem respect
Bible sei iumi shud “respectim evriwan.” (1 Peter 2:17, New Jerusalem Bible) So olketa wea chus for live followim olketa Bible standard treatim evri pipol witim respect, nomata wat nao biliv blo olketa or wat kaen laefstael olketa garem. (Luke 6:31) Diswan no minim olketa wea followim Bible bae agree witim evri biliv or opinion blo others or bae olketa sapotim evri disison wea others mekem. Instead for olketa rude or no showim respect lo others, bae olketa traem best for followim example blo Jesus lo hao hem treatim others.
For example, wantaem Jesus meetim wanfala woman wea religion blo hem Jesus no agree witim. Woman hia stap witim wanfala man wea hem no hasband blo hem—kaen laefstael wea Jesus no acceptim. Nomata olsem, Jesus story witim respect lo datfala woman.—John 4:9, 17-24.
Olsem Jesus, olketa Christian willing for explainim reason for olketa biliv blo olketa lo eniwan wea willing for lisin, bat olketa duim datwan witim “bigfala respect.” (1 Peter 3:15) Bible talem olketa Christian for no forcem opinion blo olketa lo others. Hem sei dat follower blo Christ “mas no raoa, bat hem mas kaen long evriwan,” wea datwan minim tu for kaen lo pipol wea garem difren biliv.—2 Timothy 2:24.
Wat Bible talem abaotem heit
Bible talem iumi for “waka hard for stap gud witim nara pipol.” (Hebrew 12:14) Man wea laekem peace bae rejectim heit. Nomata hem no duim eni samting wea bae againstim biliv blo hem, bae hem traem best for stap lo peace witim others. (Matthew 5:9) Bible encouragem tu olketa Christian for lovem olketa enemy blo olketa taem olketa kaen lo eniwan wea treatim olketa nogud.—Matthew 5:44.
Hem tru, Bible talem dat God “heitim,” or hem “barava heitim” eni akson wea no showim respect lo narawan or wea spoelem others. (Proverbs 6:16-19) Bat lo hia Bible iusim disfala word “heit” for describem strong feeling for no laekem bad tings wea man duim. Bible showim dat God hem willing for forgivim and helpem pipol wea laek for changem wei blo olketa and live followim olketa standard blo hem.—Isaiah 55:7.
Olketa Bible verse wea sapotim wei for garem open mind and respect
Titus 3:2: “No forcem tingting . . . long narawan, and for kaen long evriwan.”
Man wea no forcem tingting blo hem lo narawan hem kaen lo others wea garem difren opinion, and diswan promotim respect for stap between pipol.
Matthew 7:12: “Samting wea iufala laekem pipol for duim long iufala, sem samting nao iufala mas duim long olketa.”
Iumi evriwan appreciatim taem others treatim iumi witim respect and tingim opinion and feeling blo iumi. For lanem moa samting abaotem hao for applyim disfala famous golden rul wea Jesus teachim, lukim article “What Is the Golden Rule?”
Joshua 24:15: “Iufala seleva chusim tuday hu nao bae iufala worshipim.”
Taem iumi respectim raet blo others for mekem own choices blo olketa, iumi promotim peace.
Acts 10:34: “God hem no favorim eniwan.”
God hem no discriminatim eniwan bikos lo culture, gender, nationality, reis, or baekgraon blo hem. Olketa wea laek for followim example blo God showim respect for evriwan.
Habakkuk 1:12, 13: “Hard tumas for [God] letem wicked fasin for gohed.”
Nomata God garem open mind bat hem garem limit. Hem bae no letem wicked behavior blo olketa man for continue forever. For lanem moa samting, watchim video Why Nao God Letem Wei for Safa Gohed?
Rome 12:19: “Letem God nao for judgem olketa, bikos olketa Holy Raeting talem finis: ‘Jehovaha hem sei, mi nao bae changem bak nogud samting.’”
Jehovah God no givim authority lo eniwan for pei bak. Hem bae mek sure dat evriwan bae kasem justice lo taem wea hem markem. For lanem moa samting, readim article “Hao, Enitaem Bae Justice Stap lo World?”
a Jehovah hem nem blo God. (Psalm 83:18) Lukim article “Hu Nao Jehovah?”