Waswe, Olketa Jehovah’s Witness Olketa Zionist?

Nomoa. Olketa Jehovah’s Witness olketa Christian. Samting mifala bilivim hem followim wanem Bible talem. Long tingting bilong samfala religion, Bible profesi sei olketa Jew bae hipap long Palestine, bat Olketa Jehovah’s Witness no biliv olsem. Olketa biliv diswan hem samting wea join witim politik nomoa and hem no samting wea Bible story abaotem. Bible no mekhae long eni gavman bilong olketa man, and hem no sei pipol long wanfala tribe or kantri winim pipol from olketa nara tribe or kantri. Wastaoa magasin bilong Olketa Jehovah’s Witness hem sei: “Bible no sapotim Zionism.”

Encyclopædia Britannica hem sei Zionism hem nem wea olketa givim for wei wea olketa Jew garem goal for garem kantri bilong olketa seleva long Palestine. Zionism hem join witim religion and politik. Olketa Jehovah’s Witness no sapotim Zionism or wei wea diswan hem join witim politik.

Organization bilong Olketa Jehovah’s Witness no join insaed long politik, wea diswan minim tu mifala no sapotim Zionism. Kam kasem distaem staka samting showimaot Olketa Jehovah’s Witness no teksaed long politik, and from diswan mifala kasem bigfala persecution long samfala kantri. Mifala bilivim Kingdom bilong God long heven nomoa savve mekem peace kamap long earth. No eni gavman or organization bilong olketa man fit for duim datwan.

Olketa Jehovah’s Witness long evri kantri biliv strong iumi mas obeyim olketa law bilong gavman. Mifala no againstim olketa gavman, and no join insaed war.