Green Initiative wea Benefitim Olketa Brata and Sista and Planet blo Iumi

Mifala Olketa Jehovah’s Witness savve dat klosap nao Jehovah God bae duim samting for sevem planet blo iumi wea pipol spoelem. (Revelation 11:18) Nomata olsem, mifala duim samting distaem tu for kea for planet blo iumi. For example, mifala implementim staka green initiative taem mifala designim olketa facility blo mifala.

Olketa green initiative, or green solution, hem olketa project wea mifala garem goal for reducim olketa negative impact lo environment. Wat nao samfala green initiative wea mifala implementim? And hao nao datwan helpem mifala for iusim gud olketa donation wea iufala givim?

Solution for Mekem Assembly Hall No Hot Tumas

Taem olketa first buildim Matola Assembly Hall lo Mozambique, tufala saed blo hem open nomoa and hem garem kapa ruf. Bikos ruf hem kapa, datwan mekem assembly hall hia hem barava hot. Wanfala brata sei: “Bikos hem hot, mifala swet tumas! Lo end blo program, olketa brata and sista savve kwiktaem go aotsaed for fresh air and cold daon.” Wat nao mifala savve duim for olketa brata and sista garem comfortable ples for worship?

Mifala disaed for iusim green solution: installim olketa fan wea iusim paoa blo wind, and insulation. Insulation hem reducim heat from sun, and olketa fan providem fresh air for flow kam insaed building. Olketa fan no iusim electricity bat iusim wind and natural air wea flow for aotem hot air wea stap insaed lo building. Olketa fan hia kost blo hem samting olsem $50 each.a

Solution hia hem barava impruvim quality blo air insaed datfala Assembly Hall. From fresh air hem flow kam insaed lo building, diswan katem daon moisture and mold. And tu, no staka carbon dioxide build ap olsem bifor and moa oxygen hem flow kam insaed lo building. Result, olketa wea attendim olketa assembly savve concentrate and feel comfortable. Brata wea story lo antap hem sei moa: “Distaem, mifala no kwiktaem go aotsaed taem program finis. Instead, mifala stay insaed assembly hall during lo lunch brek, and gohed story witim evriwan. Bikos lo changes wea olketa mekem lo ruf blo building, mifala feel olsem mifala sidaon cold andanit wanfala naes big tree!”

Accessim Wanfala Renewable Source blo Energy

Lo staka facility blo mifala raonem world, mifala installim olketa photovoltaic (PV) system. Olketa system hia iusim solar panel for convertim sunlaet, wanfala renewable source blo energy, for kamap electricity. Result blo datwan, mifala no depend tumas lo electricity wea iusim fuel. Olketa PV system no producem tumas pollution and helpem mifala for sevem olketa donated funds.

Lo 2022, mifala installim wanfala PV system lo Slovenia branch office. Hem provaedem 30 percent lo electricity wea datfala building iusim. If happen datfala PV system producem moa electricity winim wat branch office hia needim, bae olketa connectim surplus electricity hia go lo paoa station for lokol community iusim. Kost blo disfala PV system hem $360,000. Nomata olsem, insaed fofala year nomoa, selen wea olketa sevem hem winim amount wea olketa spendem for datfala PV system, bikos electricity bill blo branch office hem katdaon.

Lo 2024, mifala installim olketa PV panel and wanfala big battery for datwan lo Sri Lanka branch office. Kost blo datfala project hem abaot $3 million, and system hia provaedem 70 percent blo electricity wea branch hia needim. Insaed thri years, selen wea mifala sevem bae winim amount wea mifala spendem for datfala PV system. Lo 2024 tu, mifala installim wanfala PV system lo Netherlands branch office. Kost blo hem $1.1 million and hem provaedem 35 percent blo electricity for datfala branch. Insaed naen years, selen wea mifala sevem bae winim amount wea mifala spendem for datfala PV system.

Mifala installim tu olketa PV system lo olketa remote transleison office (RTO) lo Mexico. Wanfala example: Tarahumara (Central) RTO lo Chihuahua. Lo winter season, temperature savve drop for below 0 degrees Celsius (32°F), and lo summer season, hem savve reachim ova 40 degrees Celsius (104°F)! Bat, bikos lo hae kost blo electricity, olketa brata and sista no laek iusim heating and cooling system. Brata Jonathan, wea waka lo datfala RTO, hem sei: “Lo winter mifala iusim olketa thik blanket and thik wool kaleko for keepim mifala seleva warm, and lo summer season mifala openem olketa window bikos hem hot tumas.”

Lo 2024, mifala installim wanfala PV system lo datfala RTO. Kost blo hem $21,480, bat insaed faev years, selen wea mifala sevem bae winim amount wea mifala spendem for datfala PV system. Distaem olketa brata and sista blo iumi savve iusim heating and cooling system winim bifor. Jonathan sei: “Mifala barava enjoyim for duim olketa assignment blo mifala, and moa productive lo waka blo mifala. Lo semtaem, mifala hapi for savve dat organization blo mifala hem iusim gud selen blo hem and lo wei wea protectim environment.”

Kolektem Rain Wata

Lo Africa, samfala Kingdom Hall no garem wata wea hem reliable. From datwan, olketa brata and sista mas wakabaot for samfala kilometer for karem kam wata lo Kingdom Hall blo olketa. Lo olketa nara Kingdom Hall, olketa peim wata wea trak nao bae deliverim, bat hem expensive and hem kosim damage lo environment.

For helpem olketa brata and sista garem access lo wata, mifala installim olketa ruf gutter and olketa big wata tank lo staka Kingdom Hall lo olketa difren ples lo Africa. Bifor olketa installim equipment hia, olketa brata studyim gud weather and climate lo each area, mekem olketa savve designim best wei for kolektem wata for datfala Kingdom Hall. Kost blo evriting hia for each Kingdom Hall hem between $600 and $3,000. Nomata olsem, staka taem olketa equipment hia reducim operating expenses blo olketa Kingdom Hall, bikos olketa brata no need for peim wata moa.

Olketa brata and sista benefit from olketa rain wata system hia. Sista Noemia, from Mozambique, hem sei: “Lo bifor, mifala savve wakabaot farawe for tek wata. Taem mifala arrive lo Kingdom Hall, mifala taed finis. And bikos wata hem hard, hem no isi for maintainim gud hygiene. Distaem, evriwan savve wasim hand blo olketa. Mifala savve go lo Kingdom Hall and enjoyim meeting bikos mifala no taed olsem bifor. Mifala barava thankiu for datwan!”

Hao nao organization blo mifala fit for peim kost blo olketa project hia wea mifala implementim olketa green initiative? Mifala iusim olketa donation wea pipol givim for waka blo mifala raonem world, lo olketa difren wei, lo donate.jw.org. Thankiu tumas for generous donation blo iufala!