Kwestin Box

◼ Wanem Nao Samfala Samting wea Iumi Savve Duim for Helpem Olketa Pioneer?

Long 2009 service year, klosap 800,000 brata and sista nao duim regular and spesol pioneer waka evriwea long world. Olketa hia wea duim full taem service iusim staka taem, strong, and material samting bilong olketa for talemaot gud nius abaotem Kingdom. (Prov. 3:9) Jehovah barava hapi long hard waka bilong olketa! Hao nao iumi savve showimaot tingting bilong Jehovah and helpem olketa pioneer for hapi and gohed long pioneer waka?

Hem gud for tingim wanem for talem mekem iumi savve encouragem olketa pioneer for gohed long pioneer waka. (Prov. 25:11) Waswe, iumi savve changem schedule bilong iumi for waka witim olketa long ministry? Taem iumi waka witim olketa long ministry, maet olketa savve kam long trak bilong iumi or maet iumi savve peim fare bilong olketa. And sapos iumi go tugeta long trak bilong olketa, maet iumi savve givim contribution for peim eni expenses. (1 Cor. 13:5; Phil. 2:4) Iumi savve showimaot iumi tingim olketa and sapotim olketa sapos samfala taem iumi askem olketa for kam kaikai witim iumi long haos.​—1 Pet. 4:​8, 9.

Bible hem storyim promis bilong Jehovah for provaedem need bilong olketa wea evritaem Kingdom hem first samting long laef bilong olketa. (Ps. 37:25; Matt. 6:​33) Jehovah hem savve duim diswan taem hem iusim olketa Christian brata and sista. (1 John 3:​16-​18) Bat olketa pioneer no expectim olketa narawan nao for sapotim olketa saed long selen. And maet olketa no talem olketa narawan taem olketa needim samting. Bat iumi savve helpem olketa faithful pioneer for “garem samting wea [olketa] needim” taem iumi luksavve long need bilong olketa and redi for helpem olketa.​—2 Cor. 8:​14, 15.

Taem Phoebe, wanfala Christian wea strong for talemaot gud nius long first century from kongregeson long Cenchreae hem go long Rome, Paul encouragem olketa brata long there: “Hem wanfala holy wan wea followim Lord, so . . . welkamim hem. Helpem hem long eni samting wea hem needim.” (Rom. 16:​1, 2) Iumi garem chance tu for showimaot love and sapotim olketa regular and spesol pioneer long kongregeson bilong iumi wea no givap for talemaot gud nius.​—Acts 5:​42.