Jehovah Bae Nating Forgetim Iu
OLKETA Christian long Judaea kasem barava nogud wei wea pipol againstim olketa, and olketa mas no letem wei bilong pipol wea stap raonem olketa for aftarem material samting, for affectim olketa. Aposol Paul encouragem olketa taem hem talem moa toktok bilong Jehovah for olketa Israelite taem olketa redi for go insaed Promis Land. Paul raet olsem: “Mi bae nating lusim iu and bae nating forgetim iu.” (Hebrews 13:5; Deuteronomy 31:6) Iumi sure disfala promis barava strongim olketa Christian long Judaea wea Paul raetem datfala leta for olketa.
Datfala sem promis shud strongim iumi for deal witim olketa wari wea kamap from iumi stap long olketa “nogud taem wea hard for deal witim.” (2 Timothy 3:1) Sapos iumi trust long Jehovah and duim samting followim datwan, bae hem strongim iumi nomata long barava hard taem. For lukim wei wea Jehovah savve duim samting followim disfala promis, iumi storyim taem wea seknomoa man lusim waka bilong hem for selen.
Feisim Samting wea Seknomoa Kamap
Namba bilong pipol wea no garem waka for selen hem kamap big evriwea long world. Wanfala magasin long Poland storyim hao long tingting bilong staka pipol, wei for no garem waka hem “wanfala long olketa barava hard samting for pipol long community.” Olketa rich kantri tu kasem disfala problem. Olsem example, long 2004, nomata midolwan long olketa member bilong Organization for Economic Cooperation and Development, namba bilong pipol wea no garem waka “hem winim 32 million, wea hem hae winim taem bilong Great Depression long olketa year bilong 1930.” Long Poland, Central Statistical Office listim thri million pipol wea no garem waka long December 2003, wea datwan hem “18 percent bilong pipol wea kasem age wea fit for waka.” Wanfala information hem sei, long 2002, namba bilong olketa blak pipol long Africa wea no garem waka long South Africa hem 47.8 percent!
Wei wea seknomoa man lusim waka and layoff, hem isi for happen long pipol, and olketa servant bilong Jehovah tu insaed diswan. “Taem and samting wea iumi no expectim” savve kasem eniwan. (Ecclesiastes 9:11) Maet iumi talem toktok bilong David wea sei: “Heart bilong mi fulap witim wari.” (Psalm 25:17) Waswe, bae iu fit for deal witim olketa kaen nogud samting olsem? Olketa samting hia savve affectim feeling bilong iu, spiritual saed bilong iu, and material saed bilong iu. Sapos iu no garem waka, waswe, iu savve duim samting for kamap gud moa?
Deal Witim Hevi
Janusz Wietrzyński, wea hem wanfala doctor bilong mind talem hao “olketa man nao savve barava feel nogud taem olketa lusim waka,” from olketa ting olketa nao main wan for provaedem need bilong famili. Hem sei hao datwan savve mekem man kros or feel hem barava no wei nao. Wanfala dadi wea lusim waka bilong hem maet no tinghae long hemseleva and start for “raoa witim famili bilong hem.”
Adam, wea hem wanfala Christian dadi wea garem tufala pikinini, storyim feeling bilong hem taem hem lusim waka bilong hem, and hem sei olsem: “Hem isi tumas for mi feel nogud; evri samting mekem mi kros. Long naet mi dream nomoa abaotem waka and hao for provaed for olketa pikinini and waef bilong mi, wea waef tu seknomoa lusim waka bilong hem.” Ryszard and Mariola, wea hasband and waef, and wea garem wanfala pikinini, tufala garem big kaon long bank taem tufala lusim waka bilong tufala. Waef hem sei: “Mi wari evritaem, conscience bilong mi talem mi hao hem wanfala mistek for kaonem selen long bank. Mi gohed for blamem miseleva for datwan.” Taem iumi feisim olketa samting olsem, iumi maet isi for kros, wari, or feel nogud, and maet no savve kontrolem feeling bilong iumi. Sapos olsem, hao nao iumi savve kontrolem olketa nogud feeling wea maet iumi start for garem?
Bible givim iumi gudfala advaes long hao for keepim wei for no lus hope. Aposol Paul kaonselem iumi: “No wari long eni samting, bat long evri samting thru long prea and wei for barava ask, witim wei for sei thankiu, talem evri samting long God; and peace bilong God wea winim evri tingting bilong man bae protectim heart and tingting bilong iufala thru long Christ Jesus.” (Philippians 4:6, 7) Taem iumi prea long Jehovah iumi bae garem “peace bilong God,” wea hem nao mind wea garem peace wea kam from iumi putim faith long hem. Waef bilong Adam, Irena, hem sei: “Mifala talem Jehovah long prea abaotem samting wea kasem mifala and samting wea mifala bae duim for mekem laef bilong mifala moa simpol. Hasband bilong mi, wea hem man wea savve wari tumas, hem start for feel sure hao hem bae kasem nara waka.”
Sapos seknomoa iu lusim waka bilong iu for selen, iu garem chance for followim kaonsel hia bilong Jesus Christ long Sermon Long Maunten: “No gohed for wari abaotem soul bilong iufala saed long wanem iufala bae kaikaim or wanem iufala bae drinkim, or abaotem body bilong iufala saed long wanem iufala bae werem. . . . Gohed for lukaotem firstaem kingdom and raeteous fasin bilong hem, and iufala bae kasem olketa narafala samting hia.” (Matthew 6:25, 33) Ryszard and Mariola followim disfala kaonsel for deal witim feeling bilong tufala. Mariola hem sei: “Evritaem hasband bilong mi comfortim mi and strongim wei wea Jehovah bae no forgetim mifala.” Hasband bilong hem sei tu: “Wei wea mitufala gohed for prea tugeta mekem mifala fren gud go moa witim God and witim each other, wea datwan hem barava comfortim mitufala.”
Holy spirit bilong God tu savve helpem iumi. Hem savve mekem iumi garem fasin for kontrolem seleva, wea datwan savve helpem iumi for no wari tumas. (Galatians 5:22, 23) Maet hem bae no isi for iumi, bat Jesus promisim iumi hao “Dadi long heven bae barava givim holy spirit long olketa wea askem hem.”—Luke 11:13; 1 John 5:14, 15.
No Forgetim Spiritual Need Bilong Iu
Nomata wanfala Christian wea barava balance tu savve wari taem seknomoa hem lusim waka bilong hem. Nomata olsem, iumi shud no forgetim olketa spiritual need bilong iumi. Tingim example bilong Moses wea 40 year, wea full laef bilong hem change taem hem lusim haos bilong king and kamap wanfala shepherd, wea diswan hem waka wea olketa bilong Egypt ting daonem. (Genesis 46:34) Moses mas change fitim niu living wea hem garem. Insaed 40 year bihaen datwan, hem letem Jehovah for sheipim and redim hem for olketa niufala waka wea bae hem duim long future. (Exodus 2:11-22; Acts 7:29, 30; Hebrews 11:24-26) Nomata hem feisim olketa hard samting, Moses ting strong evritaem long spiritual samting, and willing for acceptim training from Jehovah. Iumi mas no letem olketa nogud samting for spoelem olketa spiritual samting bilong iumi!
Nomata wei for seknomoa lusim waka for selen hem barava nogud samting, hem gudfala taem for strongim wei wea iumi fren witim Jehovah God and pipol bilong hem. Adam wea iumi storyim finis, hem duim olsem. Hem sei: “Taem mi and waef bilong mi lusim waka bilong mitufala, mitufala nating ting for missim olketa Christian meeting or for isisi for share long preaching waka. Datfala tingting protectim mifala from wei for wari tumas abaotem nextfala day.” Ryszard garem sem feeling tu: “Sapos nomoa eni meeting and ministry, mifala hard for deal witim samting wea kasem mifala; mifala bae wari narawe. Wei for storyim spiritual samting witim olketa narawan nao strongim mifala, from olketa story hia hem mekem mifala tingim need bilong olketa narawan and no bilong mifala seleva.”—Philippians 2:4.
Tru nao, winim wei for warim waka for selen, trae for mekius long moa taem wea iu garem for duim olketa spiritual waka, duim study seleva, share long olketa waka long kongregeson, and for mekem ministry bilong iu kamap moa big. Winim wei for stap nating, iu bae garem “staka samting for duim long waka bilong Lord”—wea bae givim iu hapi and bae mekem eniwan wea lisin long message bilong Kingdom wea iu preach abaotem hapi tu.—1 Corinthians 15:58.
Provaedem Material Samting for Famili Bilong Iu
Bat, wei for fulap witim spiritual samting bae no fulimap bele bilong iumi. Iumi shud tingim disfala principle: “Tru nao, sapos eniwan no provaed for olketa relative bilong hem, and especially for olketa klos famili member, hem showimaot hem lusim biliv bilong hem and hem moa worse winim man wea no biliv long God.” (1 Timothy 5:8) Adam hem sei: “Nomata olketa brata bilong iumi long kongregeson willing for givim samting iumi needim long physical wei, hem responsibility bilong iumi olketa Christian for lukaotem waka for selen.” Iumi savve depend long sapot bilong Jehovah and pipol bilong hem, bat iumi mas no forgetim hao iumi need for go lukaotem waka.
Wanem nao iu savve duim? Adam hem sei: “No sidaon nating and tingse God bae duim wanfala mirakol for iu. Taem iu lukaotem waka, no hol bak for talem iu wanfala Jehovah’s Witness. Plande boss tinghae long datwan.” Ryszard givim disfala advaes: “Askem eniwan iu savve long hem sapos hem needim eni wakman, gohed chekim gavman department wea savve helpem pipol wea no garem waka for kasem waka, readim olketa advertisement olsem: ‘Laekem woman for lukaftarem wan wea cripple’; or, ‘Waka for short taem: Pikim strawberry.’ Gohed for lukaotem waka! Mas acceptim eni waka, nomata sapos iu no laekem datwan.”
Tru nao, ‘Jehovah hem man for helpem iu.’ Hem bae “nating lusim iu and bae nating forgetim iu.” (Hebrews 13:5, 6) Iu no need for wari tumas. David wea raetem psalm hem sei: “Letem Jehovah leadim gogo bilong iu, and depend long hem, and hem nao bae duim samting.” (Psalm 37:5) ‘For letem Jehovah leadim gogo bilong iumi’ hem minim iumi depend long hem and duim samting followim wei bilong hem, nomata long taem wea nogud samting kasem iumi.
Adam and Irena klinim window and ladder long olketa big building for sapotim tufala and iusim gud selen bilong tufala taem olketa peim samting. Olketa go evritaem tu for ask long wanfala gavman department wea savve helpem pipol for kasem waka. Irena hem sei: “Mifala evritaem kasem help long barava taem wea mifala needim.” Hasband bilong hem sei: “Mifala lukim bihaen hao olketa samting wea mifala prea abaotem hem no evritaem followim will bilong God. From diswan mifala lane for depend long wisdom bilong God and no savve bilong mifala seleva. Hem moabeta for patient and weit for help wea God bae provaedem.”—James 1:4.
Ryszard and Mariola duim samfala difren kaen waka and long semtaem tufala share tu for preach long olketa territory wea garem bigfala need. Ryszard hem sei: “Mifala kasem waka wea mifala needim long olketa taem wea evri kaikai bilong mifala finis nao. Mifala no acceptim waka wea man savve kasem big selen bat wea savve stopem mifala for duim olketa theocratic waka. Mifala chus for patient and weit for Jehovah nao duim samting for mifala.” Olketa sure hao Jehovah nao bihaenem wei wea olketa fit for rentim wanfala flat wea no kost tumas, and gogo, Ryszard kasem wanfala waka.
Hem barava nogud samting for lusim waka for selen, bat tingim datwan olsem chance for iuseleva lukim hao Jehovah bae no forgetim iu! Jehovah bae lukaftarem iu. (1 Peter 5:6, 7) Thru long profet Isaiah, hem promis olsem: “No lukluk olobaot, bikos mi God bilong iu. Mi bae strongim iu. Mi bae barava helpem iu.” (Isaiah 41:10) No letem eni samting wea seknomoa happen long iu, wea insaed diswan hem wei for lusim waka for selen, for spoelem iu. Duim evri samting wea iu fit for duim, and then leavim evri samting long hand bilong Jehovah. Weit for Jehovah nao duim samting, ‘nomata long kwaet wei tu.’ (Lamentations 3:26) Iu bae kasem staka blessing.—Jeremiah 17:7.
[Piksa long page 9]
Iusim taem wea iu garem for duim olketa spiritual waka
[Piksa long page 10]
Lane for iusim gud selen, and duim eni waka nomoa wea iu kasem