Waswe, Iu Barava Tinghae Long Olketa Olo Brata and Sista?
TAEM pipol bilong Israel bifor insaed wanfala covenant witim Jehovah, olketa kasem disfala komand: “Front long gray hair iu mas standap, and iu mas showimaot iu tingim olo man, and iu mas fraet long God bilong iu.” (Leviticus 19:32) For respectim olketa olo hem wanfala holy responsibility, wea join witim wei for stap anda long God. Nomata olketa Christian distaem no stap anda long law bilong Moses, datwan remindim iumi hao olketa olo servant bilong Jehovah barava important and spesol long hem. (Proverbs 16:31; Hebrews 7:18) Waswe, iumi garem sem tingting olsem Jehovah? Waswe, iumi barava tinghae long olketa olo Christian brata and sista bilong iumi?
Man wea Barava Tinghae Long Olo Fren Bilong Hem
Wanfala story from Bible wea mekhae long wei for showimaot respect long olketa olo hem long mek-tu buk bilong Kings. Hem wanfala story abaotem hao profet Elisha wea moa young bae kamap profet bihaen profet Elijah. Tingim samting wea happen long lastfala day bilong Elijah olsem wanfala profet long ten tribe kingdom bilong Israel.
Long datfala day, Jehovah talem datfala olo profet for travel from Gilgal go long Bethel, then from Bethel go long Jericho, and from Jericho go long Jordan River. (2 Kings 2:1, 2, 4, 6) Long datfala gogo wea hem 50 kilometer, thrifala taem Elijah encouragem Elisha for stop for followim hem. Bat, olsem young Ruth staka handred year bifor hem no willing for lusim Naomi, Elisha tu no willing for lusim datfala olo profet. (Ruth 1:16, 17) Elisha talemaot thrifala taem: “Front long Jehovah and front long iu mi promis, bae mi no lusim iu.” (2 Kings 2:2, 4, 6) Kasem datfala taem, Elisha helpem Elijah for samting olsem sixfala year finis. Nomata olsem, hem barava want for serve witim Elijah for olowe. And datfala story sei moa: “Taem olketa go ahed for wakabaot and story tugeta, lukim! . . . Elijah hem go ap.” (Verse 11) Elijah and Elisha tufala story gogo kasem barava end long ministry bilong Elijah long Israel. Luk olsem datfala young profet barava wantem tumas for kasem planti instruction and encouragement from datfala olo profet wea garem moa savve. Hem klia, hem barava tinghae long olo fren bilong hem.
‘Olsem Olketa Dadi and Olketa Mami’
Hem no hard for savve why nao Elisha lovem datfala olo profet olsem wanfala fren—olsem wanfala spiritual dadi tu. (2 Kings 2:12) Just bifor assignment bilong Elijah long Israel hem finis, hem sei long Elisha: “Askem wanem mi mas duim for iu bifor olketa tekem mi awe from iu.” (Verse 9) So go kasem end, Elijah showimaot hem ting hevi long spiritual saed bilong man wea bae changem hem and wei wea waka bilong God mas go ahed.
Distaem, hem barava gud tumas for lukim olketa olo brata and sista showimaot semkaen interest olsem olketa dadi and mami taem olketa willing for sharem savve and wisdom bilong olketa witim olketa young wan. Olsem example, olketa volunteer wea serve for longfala taem long olketa branch office bilong Olketa Jehovah’s Witness barava willing for helpem olketa niu member bilong Bethel famili for kasem savve wea olketa needim for duim service bilong olketa. Olsem tu, olketa traveling overseer and waef bilong olketa wea visitim olketa kongregeson for staka year finis hapi for sharem bigfala savve bilong olketa witim olketa wea kasem training for kamap traveling minister. Witim datwan, long olketa kongregeson bilong Olketa Jehovah’s Witness raonem full world, iumi garem olketa olo brata and sista wea faithful for servem Jehovah for staka year finis and barava hapi for sharem wisdom and savve witim olketa niu member long Kongregeson.—Proverbs 2:7; Philippians 3:17; Titus 2:3-5.
Wei wea olketa olo Christian hia showimaot interest from heart bilong olketa barava mekem iumi hapi tumas for showimaot respect long olketa. So, iumi barava want for followim example bilong Elisha for barava tinghae long olketa olo brata and sista bilong iumi. Olsem aposol Paul remindim iumi, iumi laek go ahed for deal witim “wanfala olo man . . . olsem hem dadi “ and “olo woman olsem mami.” (1 Timothy 5:1, 2) Taem iumi duim olsem, long bigfala wei iumi saportim wei wea Christian kongregeson long full world hem waka gud and muv ahed.
[Piksa long page 30]
Elisha want for waka witim Elijah for olowe
[Olketa Piksa long page 31]
Olketa Young wan kasem gud samting from olketa olo Christian brata and sista