Hapi for Kasem Help Givim Samting From Heart
JEHOVAH, Dadi bilong iumi long heven, hem tingim iumi wanwan. Bible talem hem barava tingim evriwan wea worshipim hem. (1 Pet. 5:7) Wanfala samting wea showimaot Jehovah tingim iumi nao, hem helpem iumi long staka difren wei for gohed faithful long hem. (Isa. 48:17) Taem iumi kasem olketa problem, Jehovah laekem iumi for kasem gud samting from help wea hem givim. Law bilong Moses showimaot diswan.
Long Law bilong Moses, Jehovah givim samfala law for helpem “olketa wea safa,” olsem olketa pikinini wea no garem dadi and mami, olketa widow woman, and olketa stranger. (Lev. 19:9, 10; Deut. 14:29) Jehovah savve samfala pipol bilong hem bae needim help from olketa Christian brata and sista. (Jas. 1:27) Dastawe evriwan wea worshipim hem mas hapi for kasem help from olketa wea Jehovah iusim for helpem olketa. Taem samwan helpem iumi, iumi mas garem stretfala tingting long datwan.
Bat Bible storyim hao pipol bilong God savve givim samting tu. Tingim story abaotem datfala “widow woman wea poor tumas” wea Jesus lukim long temple long Jerusalem. (Luke 21:1-4) Luk olsem woman hia kasem gud samting from wanem Law hem talem for helpem olketa widow woman. Bat nomata woman hia poor, pipol savve tingim hem no from wanem hem kasem, bat from wanem hem givim. Masbi hem hapi tumas bikos Jesus sei “man wea givim samting bae hapi tumas winim man wea kasem samting.” (Acts 20:35) Sapos olsem, wanem nao iu savve “givim” long nara pipol mekem iu hapi?—Luke 6:38.
“Wanem Nao Mi Savve Givim Long Jehovah?”
Man wea raetem psalm hem tingting olsem: “Wanem nao mi savve givim long Jehovah for evri gudfala samting wea hem duim for mi?” (Ps. 116:12) Wanem gudfala samting nao Jehovah duim for hem? Jehovah strongim hem taem hem “wari fogud and barava sorre.” And Jehovah ‘sevem hem tu mekem hem no dae.’ Disfala man hia laek “givim samting” long Jehovah for olketa gud samting wea Jehovah duim for hem. Wanem nao hem savve givim? Hem sei: “Mi bae duim evri samting wea mi promisim long Jehovah.” (Ps. 116:3, 4, 8, 10-14) Hem disaed strong for duim evri samting wea hem promisim long Jehovah and for duim wanem Jehovah askem hem for duim.
Iu tu savve duim sem samting. Long wanem wei? Iu mas followim olketa law and toktok bilong God evriday. Dastawe, wei for worshipim Jehovah nao mas barava important long laef bilong iu. Holy spirit bilong God mas leadim iu long evri samting wea iu duim tu. (Eccl. 12:13; Gal. 5:16-18) Hem tru, iu hard for givim samting long Jehovah for thankiu long hem for evri samting wea hem duim for iu. Nomata olsem, “Jehovah hapi” taem hem lukim iu duim best bilong iu for worshipim hem. (Prov. 27:11) Hem barava spesol samting taem iumi savve duim olsem for mekem Jehovah hapi!
Helpem Kongregeson for Gohed Gud
Luk olsem iu kasem staka gud samting from Christian kongregeson. Long kongregeson iu kasem staka spiritual kaikai from Jehovah. Iu lanem truth wea mekem iu lusim olketa laea teaching bilong false religion. Iu lane abaotem God and plan bilong hem tu. (John 8:32) Long olketa meeting, assembly, and convention wea “datfala wakaman wea faithful and wise” redyim, iu kasem savve wea bae mekem iu fit for stap olowe long paradaes long earth wea no eni man bae safa or sorre. (Matt. 24:45-47) Tru tumas, iumi hard for tingim evri gudfala samting wea iumi kasem from kongregeson bilong God and wea iumi bae kasem bihaen! Wanem nao iu savve givim long kongregeson for evri gud samting wea iu kasem?
Aposol Paul hem sei: “Evri part long body olketa join gud tugeta and waka tugeta from evri joint givim wanem each wan needim fitim waka bilong each wan. Diswan mekem body hem gohed for grow mekem body savve buildimap hemseleva long love.” (Eph. 4:15, 16) Nomata toktok long datfala scripture hem abaotem evri anointed Christian wea olketa nao wanfala body, hem fitim tu evri Christian distaem. Tru tumas, evriwan long kongregeson savve helpem narawan for gohed gud and grow. Long olketa wanem wei?
Iumi trae hard for strongim olketa brata and sista for gohed worshipim God. (Rom. 14:19) Iumi savve helpem ‘body gohed for grow’ taem iumi letem holy spirit bilong God mekem iumi showim olketa gudfala wei long olketa brata and sista. (Gal. 5:22, 23) Nara samting tu, iumi savve lukaotem chance for “duim gudfala samting long evri pipol, bat main wan nao hem for duim diswan long olketa wea garem sem biliv olsem iumi.” (Gal. 6:10; Heb. 13:16) Nomata iumi young or olo, iumi evriwan long kongregeson savve duim samting for ‘buildimap body long love.’
Iumi savve iusim tu savve, strong, and selen bilong iumi for helpem preaching waka wea kongregeson duim. Jesus Christ hem sei: “Samting wea iufala kasem hem free nomoa.” So wanem nao iumi mas duim? Hem sei: “Iufala mas no askem selen for samting wea iufala duim.” (Matt. 10:8) Dastawe iumi mas duim best bilong iumi for preach abaotem Kingdom and teachim pipol for kamap disaepol. (Matt. 24:14; 28:19, 20) Waswe, samfala samting mekem hem no isi for iu duim disfala waka? Tingim datfala poor widow woman wea Jesus storyim. Hem givim lelebet samting nomoa. Nomata olsem, Jesus sei samting wea woman hia duim hem winim wanem olketa nara man duim. Hem givim best bilong hem.—2 Cor. 8:1-5, 12.
Garem Gudfala Tingting Taem Samwan Helpem Iu
Samfala taem maet iu needim kongregeson for helpem iu. Taem iu kasem hevi from samfala samting long world, hem gud for iu acceptim eni samting wea kongregeson savve duim for helpem iu. Jehovah givim kam olketa man wea fit and wea kaen for “lukaftarem kongregeson” and for helpem iu taem iu kasem hard taem. (Acts 20:28) Olketa elder and evriwan long kongregeson laek for strongim, helpem, and protectim iu taem iu kasem hard taem.—Gal. 6:2; 1 Thess. 5:14.
Bat iu mas garem gudfala tingting taem eniwan helpem iu. Tinghae evritaem long wanem olketa duim for iu. Taem nara brata or sista helpem iu, tingim diswan olsem God nao duim kaenfala samting long iu. (1 Pet. 4:10) Why nao hem important for iumi garem tingting olsem? Bikos iumi no laek olsem staka pipol long world wea no tinghae taem pipol givim samting long olketa.
Garem Stretfala Tingting and No Ova Tumas
Taem Paul raetem leta long kongregeson long Philippi, hem story olsem abaotem Timothy: “No eni nara man olsem Timothy wea barava laek tumas for savve sapos evri samting hem gohed gud long laef bilong iufala.” Then Paul sei moa: “Olketa narawan tingim olketa seleva nomoa, and no savve lukaftarem olketa samting wea Christ Jesus hem laekem.” (Phil. 2:20, 21) Taem iumi tingim datfala toktok wea Paul talem, wanem nao iumi savve duim mekem iumi no ‘tingim tumas iumiseleva nomoa’?
Taem iumi kasem hard taem and iumi askem olketa brata long kongregeson for helpem iumi, iumi mas no askem tumas samting long olketa. Why nao olsem? Tingim diswan: Taem seknomoa nogud samting kasem iumi, iumi bae hapi tumas sapos wanfala brata givim wanem iumi needim. Bat hem bae no stret sapos iumi talem hem for mas givim datwan long iumi. Nomata olketa brata evritaem hapi for helpem iumi, iumi mas garem stretfala tingting and no ova tumas long wanem iumi laekem olketa for duim for iumi, olsem long taem wea olketa garem for helpem iumi. Tru tumas, taem olketa brata and sista helpem iumi long hard taem wea iumi kasem, iumi laekem olketa for hapi for duim datwan.
Olketa brata and sista hapi and redi evritaem for helpem iu. Bat samfala taem maet olketa no fit for helpem iu. Sapos olsem, Jehovah bae strongim iu nomata wanem hard taem nao kasem iu, olsem hem strongim man wea raetem psalm.—Ps. 116:1, 2; Phil. 4:10-13.
So hapi long wanem Jehovah givim for helpem iu, olsem long taem wea iu kasem problem and iu wari fogud. (Ps. 55:22) Hem laekem iu for duim datwan. Bat hem laekem iu for ‘hapi tu taem iu givim samting.’ So givim samting wea iu fit for givim from ‘heart bilong iu’ for sapotim tru worship. (2 Cor. 9:6, 7) Taem iu duim olsem, iu bae hapi for kasem help and iu bae givim samting from heart.
[Piksa long page 31]
“Wanem nao mi savve givim long Jehovah for evri gudfala samting wea hem duim for mi?”
[Piksa long page 31]
[Piksa long page 31]
▪ Lukaotem chance for “duim gudfala samting long evri pipol”
▪ Strongim olketa brata and sista for gohed worshipim God
▪ Duim best bilong iu long waka for teachim pipol for kamap disaepol