Helpem Teenager Bilong Iu Grow Ap Gud

1, 2. Wanem nao olketa challenge and hapi wea olketa teenage year savvy bringim?

FOR garem wanfela teenager long haos hem different tumas from way for garem wanfela faev-year-old or ten-year-old pikinini. Olketa teenage year savvy bringim kam olketa challenge and problem, but, they savvy bringim hapi and reward tu. Olketa example olsem Joseph, David, Josiah, and Timothy showim aot hao young pipol savvy duim gudfela samting and they savvy fren gud withim Jehovah. (Genesis 37:2-11; 1 Samuel 16:11-13; 2 Kings 22:3-7; Acts 16:1, 2) Planti teenager distaem duim olsem tu. Maet iu savvy long samfela.

² But for samfela, olketa teenage year they taem bilong enikaen problem. Olketa young wan garem different kaen feeling. Olketa teenage boy and girl maet want for kamap moa independent, and maet they no laekem way wea dadi and mami putim olketa rul for them. But, from olketa young wan olsem no garem bigfela savvy yet, they needim loving help and patient fasin from dadi and mami. Yes, olketa year wea pikinini hem teenager they taem bilong hapi, but they taem for konfius tu—for olketa teenager and for dadi and mami. Hao nao iumi savvy helpem olketa young wan long olketa year olsem?

3. Long wanem way nao dadi and mami savvy givim olketa young wan bilong them gudfela chance long laef?

³ Dadi and mami wea followim kaonsel bilong Bible bae givim olketa young wan best chance for winim olketa hardfela samting wea maet kamap taem they grow for full-grown man. Long evritaem and long evri kantri, taem dadi and mami withim olketa teenager followim olketa Bible principle, they kasem blessing.—Psalm 119:1.

HONEST AND STRETFELA WAY FOR STORY TUGETA

4. Why nao way for story tugeta hem barava important long olketa teenage year?

⁴ Bible hem say: “Olketa plan savvy kamap no gud taem pipol no story tugeta.” (Proverbs 15:22) Sapos way for story gud tugeta hem samting wea iu need for duim taem olketa pikinini small yet, hem barava moa important long olketa teenage year—taem olketa young wan no spendem tumas taem long haos but moa taem withim olketa skul fren or otherfela young wan wea sem age olsem them. Sapos way for toktok tugeta no stap—honest and stretfela way for story tugeta midlwan long olketa pikinini and dadi and mami hem no stap—bae olketa teenager kamap olsem stranger long haos. So hao nao for keepim way for story tugeta hem open?

5. Hao nao olketa teenager kasem encouragement for ting long way for story tugeta withim dadi and mami?

⁵ Olketa teenager and dadi and mami mas duim part bilong them long diswan. Hem tru, olketa young wan maet faendem hem moa hard for story withim dadi and mami bilong them winim taem wea they small. Nomata olsem, rememberim hao “taem gudfela way for lead hem no stap, olketa pipol bae fall daon; but salvation hem stap taem planti man for givim kaonsel they stap.” (Proverbs 11:14) Olketa toktok hia fitim olketa wea young and olketa olo tu. Olketa teenager wea meanim diswan bae luksavvy hao they needim help from samwan wea garem savvy, bikos they face-im olketa samting wea moa hard winim bifor. They mas luksavvy hao dadi and mami bilong them wea believe, they pipol wea fit for givim kaonsel bikos they kasem moa experience long laef and they showim aot loving care for planti year finis. So, long disfela part long laef bilong them, olketa wisefela teenager bae no tan awe from dadi and mami.

6. Wisefela and loving dadi and mami bae garem wanem tingting long way for story tugeta withim olketa teenager bilong them?

⁶ For keepim open way for story gud tugeta, diswan meanim dadi or mami bae trae hard for free taem datfela teenager hem need for story. Sapos iu wanfela dadi or mami, mek sure iuseleva stap ready and willing for story. Diswan maet no easy. Bible say “taem for stap kwaet and taem for story” hem stap. (Ecclesiastes 3:7) Taem teenager bilong iu laek for story, maet hem taem wea iu laek for stap kwaet. Maet iu markem datfela taem for study seleva, rest, or work raonem haos. But, sapos young wan bilong iu want for story withim iu, trae for change-im olketa plan bilong iu and listen. Sapos no moa, maet hem bae no trae for story moa withim iu. Tingim example bilong Jesus. Long wanfela taem, hem markem taem for rest. But taem olketa pipol kam hipap raonem hem for listen long hem, hem no rest but hem start for teachim them. (Mark 6:30-34) Planti teenager luksavvy hao dadi and mami bilong them garem busy living, but they need for savvy dadi and mami stap for them sapos they needim them. So, stap ready and showim aot way for meanim them.

7. Wanem nao olketa dadi and mami mas stap klia long hem?

⁷ Trae for ting go back long taem iu wanfela teenager, and no lusim fasin bilong iu for laflaf tu! Dadi and mami need for enjoyim way for stap withim olketa pikinini bilong them. Taem they garem free taem, wanem nao dadi and mami duim? Sapos evritaem they want for iusim free taem bilong them for duim samting wea famili no join insaed, olketa teenage pikinini bilong them bae kwiktaem luksavvy long datwan. Sapos olketa young wan ting say olketa skul fren bilong them ting moa hae long them winim dadi and mami bilong them, bae they garem problem.

WANEM FOR STORY ABAOT

8. Hao nao iu savvy mekem olketa pikinini ting hae long honest fasin, way for work hard, and klinfela fasin?

⁸ Sapos dadi and mami no teachim finis long olketa pikinini bilong them way for ting hae long honest fasin and for work hard, they mas duim diswan taem pikinini they teenager. (1 Thessalonians 4:11; 2 Thessalonians 3:10) Hem important tu for mek sure olketa pikinini bilong them barava believe strong hao hem important for garem klin fasin long living. (Proverbs 20:11) Strongfela way wea dadi or mami savvy teachim olketa samting hia hem long way for showim aot example. Long sem way wea waef savvy “winim” hasband “no long toktok, but thru long fasin bilong waef bilong them,” so olketa young wan tu savvy learnim olketa stretfela principle thru long fasin bilong dadi and mami bilong them. (1 Peter 3:1) But, example hem no inaf, bikos olketa pikinini lukim planti badfela example aotsaed long famili and planti otherfela samting stap tu for pullim them. So, dadi and mami wea care need for savvy long tingting bilong teenager long olketa samting wea they lukim and herem, and diswan meanim they mas story gud tugeta.—Proverbs 20:5.

9, 10. Why nao dadi and mami mas teachim pikinini bilong them long saed bilong sex, and hao nao they savvy duim diswan?

⁹ Diswan hem barava tru long saed bilong sex. Dadi and mami, waswe, iu feel shame for story abaotem sex withim olketa pikinini bilong iu? Nomata sapos iu feel shame, trae hard for story withim them, bikos olketa young wan bilong iu bae herem diswan from samwan. Sapos they no herem from iu, hu nao savvy wanem kaen rongfela story bae they herem? Insaed long Bible, Jehovah no haedem olketa samting long saed bilong sex, so dadi and mami mas olsem tu.—Proverbs 4:1-4; 5:1-21.

¹⁰ Iumi hapi tumas from Bible talem kliafela samting for guide-im iumi long saed bilong sex, and Watchtower Society hem pablisim planti gudfela information wea show aot hao diswan hem still fitim disfela taem bilong iumi. Waswe, bae iu iusim information hia? For example, waswe, iu savvy review withim son or dota bilong iu long olketa chapter abaotem kaen samting olsem long Volume 1 and 2 Questions Young People Ask—Answers That Work? Bae iu hapi long samting wea kamaot from diswan.

11. Wanem nao best way for dadi and mami teachim olketa pikinini bilong them hao for servim Jehovah?

¹¹ Wanem nao barava important samting wea dadi and mami and olketa pikinini mas story abaot? Aposol Paul raet olsem abaot diswan: “Go ahed for stretem tingting bilong [olketa pikinini bilong iu] and givim discipline bilong Jehovah.” (Ephesians 6:4) Olketa pikinini need for go ahed for learn abaotem Jehovah. Main samting nao, they need for learn for love-im hem, and they mas want for servim hem. Long diswan tu, iu savvy teachim them from example wea iu showim aot. Sapos olketa young wan lukim dadi and mami bilong them love-im God ‘withim whole heart bilong them and withim whole soul bilong them and withim whole mind bilong them’ and diswan hem bringim gudfela fruit insaed living bilong dadi and mami bilong them, diswan savvy muvim them for duim sem samting tu. (Matthew 22:37) Long sem way tu, sapos young pipol lukim dadi and mami bilong them garem balance tingting long saed bilong material samting and putim Kingdom bilong God firstaem, diswan bae helpem them for mekem grow sem kaen tingting.—Ecclesiastes 7:12; Matthew 6:31-33.

12, 13. Wanem nao olketa point wea iu mas tingim for mekem famili study hem gudfela?

¹² For havem famili Bible study evri week hem nambawan help for teachim olketa spiritual fasin long young pipol. (Psalm 119:33, 34; Proverbs 4:20-23) Hem important tumas for duim study olsem evritaem. (Psalm 1:1-3) Dadi, mami and olketa pikinini mas agree hao famili study mas kam first long otherfela samting, and no otherfela samting nao kam first. And tu, for mekem famili study go ahed gud, each wan mas ting long famili study long gudfela way. Wanfela dadi hem say: “Secret bilong diswan hem for conductor for mekem evriwan showim aot respect long taem bilong famili study—wea evriwan relax but no olabaot. Hem maet no easy evritaem for balance-im diswan long stretfela way, and olketa young wan needim way for change-im tingting bilong them samfela taem. Sapos evri samting no go ahed gud long wan or tufela taem, no givap but luk go long next taem.” Disfela sem dadi talem hao taem hem prea bifor each study, hem askim Jehovah for helpem evriwan insaed long study for garem stretfela tingting long diswan.—Psalm 119:66.

¹³ For conductim famili study hem responsibility bilong dadi and mami wea believe. Hem tru, samfela dadi or mami maet no garem savvy for teach, and maet hem hard for they faendem olketa way for mekem famili study interesting. Nomata olsem, sapos iu love-im olketa teenager bilong iu ‘long samting iu duim and long truth,’ iu bae want for helpem them long humble and honest way for grow long spiritual way. (1 John 3:18) Maet they complain samfela taem, but planti taem they bae luksavvy long way wea iu barava interest long them.

14. Hao nao iu savvy followim Deuteronomy 11:18, 19 taem iu story abaotem olketa spiritual samting long olketa teenager?

¹⁴ Famili study hem no only taem for story abaotem olketa important spiritual samting. Waswe, iu rememberim komand bilong Jehovah for olketa dadi and mami? Hem say: “Iufela mas putim olketa toktok bilong mi insaed long heart bilong iufela and soul bilong iufela and taemap olsem saen long hand bilong iufela, and putim them long forhed bilong iufela. Iufela mas teachim them tu long olketa son bilong iufela, taem iu sidaon long haos bilong iu and taem iu wakabaot long road and taem iu lay daon and taem iu get ap.” (Deuteronomy 11:18, 19; lukim tu Deuteronomy 6:6, 7.) Diswan no meanim dadi and mami mas preach evritaem long olketa pikinini bilong them. But wanfela loving hed bilong famili mas evritaem lukaotem chance for buildim ap spiritual saed bilong famili bilong hem.

DISCIPLINE AND RESPECT

15, 16.(a) Wanem nao discipline? (b) Hu nao garem responsibility for givim discipline, and hu nao garem responsibility for followim datwan?

¹⁵ Discipline hem training wea stretem narawan, and insaed diswan hem way for story tugeta. Discipline meanim way for stretem winim way for panisim—but maet way for givim panis insaed diswan tu. Olketa pikinini bilong iu needim discipline taem they young, and from they teenager distaem, they still needim discipline long samfela way, maet they needim long bigfela way. Olketa wisefela teenager savvy hao diswan hem tru.

¹⁶ Bible hem say: “Eniwan wea kranky hem no respectim discipline bilong dadi bilong hem, but eniwan wea listen long reproof hem wise.” (Proverbs 15:5) Iumi learnim planti samting from disfela scripture. Hem show aot hao olketa pikinini mas kasem discipline. Wanfela teenager kanduit for “listen long reproof” sapos no eniwan givim datwan long hem. Jehovah givim responsibility for givim discipline long dadi and mami, and main wan nao dadi. But, teenager nao garem responsibility for listen long datfela discipline. Hem bae learnim moa samting and no mekem planti mistek tumas sapos hem followim wisefela discipline bilong dadi and mami bilong hem. (Proverbs 1:8) Bible hem say: “Man wea rejectim discipline bae poor and no garem honor, but man wea acceptim reproof bae kasem glory.”—Proverbs 13:18.

17. Wanem way for balance nao dadi and mami need for garem taem they givim discipline?

¹⁷ Taem they disciplinim olketa teenager, dadi and mami need for balance. They mas stap klia long way for hard tumas long diswan go kasem taem they mekem pikinini bilong them feel kros, and maet spoelem tu way wea olketa pikinini trustim themseleva. (Colossians 3:21) But long semtaem dadi and mami mas no letem olketa young wan for free tumas wea mekem olketa misstim important training. Way for free tumas savvy bringim trabel. Proverbs 29:17 hem say: “Disciplinim son bilong iu and hem bae bringim rest long iu and mekem soul bilong iu hapi for gud.” But, verse 21 hem say: “Sapos man hem easy tumas long servant bilong hem from taem hem young yet, taem hem kamap moa old bae hem kamap man wea no ting hae long samting.” Nomata disfela verse hem story abaotem wanfela servant, hem barava fitim eni young wan insaed long famili.

18. Discipline hem prove-im wanem samting? Taem dadi and mami evritaem givim discipline wea stret, diswan helpem them for misstim wanem?

¹⁸ Tru samting nao hem olsem, proper discipline hem prove-im love wea dadi or mami garem for pikinini bilong hem. (Hebrews 12:6, 11) Sapos iu wanfela dadi or mami, iu savvy hao hem hard for evritaem givim discipline wea stret and balance. From iu wantim peace, maet iu ting hem moa easy for letem teenager wea bighed for duim samting wea hem wantim. But go-go, dadi or mami wea duim diswan bae kasem wanfela famili wea olabaot.—Proverbs 29:15; Galatians 6:9.

WORK AND PLAY

19, 20. Hao nao dadi and mami savvy deal long wisefela way withim hapitaem for olketa teenager bilong them?

¹⁹ Long taem bifor, olketa pikinini mas help for work insaed long haos or long farm. Distaem, planti teenager garem planti taem wea dadi or mami no lukaotem olketa. For passim taem hia, disfela world provide-im staka samting long saed bilong hapitaem. Taem iumi joinim datwan withim way wea world hem nating ting hae long olketa mark bilong Bible long saed bilong fasin, diswan savvy bringim bigfela trabel.

²⁰ So, wisefela dadi or mami hem fit for mekem lastfela decision long saed bilong hapitaem. But, no forget hao datfela teenager hem go ahed for grow ap. Long each year, hem laekem iu for ting long hem moa olsem full-grown man or woman. So, hem wise for dadi or mami for letem pikinini choosim hapitaem taem hem kamap moa old—only sapos olketa samting wea hem choosim show aot hem muv ahed for kamap moa mature long spiritual way. Samfela taem, wanfela teenager maet no choose long wisefela way long saed bilong music, olketa fren, and otherfela samting. Taem diswan happen, hem gud for story withim teenager abaotem diswan mekem hem bae choosim beta samting long future.

21. Hao nao way for balance-im taem wea wanfela teenager spendem long hapitaem hem protectim hem?

²¹ Haomas taem nao iu mas markem for hapitaem? Long samfela kantri, tingting bilong olketa teenager hem for garem hapitaem olawe. So, wanfela young wan maet planim schedule bilong hem for havem “gud taem” evritaem. Dadi and mami nao mas teachim them for spendem taem long otherfela samting, olsem taem withim famili, study seleva, kampani withim olketa wea mature long spiritual way, olketa Kristian meeting, and work long haos. Diswan bae mekem “olketa hapitaem bilong laef distaem” for no aotem Word bilong God.—Luke 8:11-15.

22. Wanem nao teenager savvy balance-im withim hapitaem bilong hem?

²² King Solomon hem say: “Mi savvy hao no eni samting for olketa hem winim way for hapi and for duim gudfela samting long full laef bilong man; and tu hao evri man mas kaikai and drink and lukim gudfela samting from evri hard work bilong hem. Hem nao present from God.” (Ecclesiastes 3:12, 13) Yes, way for hapi hem part bilong laef wea balance. But way for work hard tu hem insaed diswan. Planti teenager distaem no learnim way for satisfy from hard work or feeling for respectim seleva wea man savvy kasem taem hem deal withim wanfela problem and stretem datwan. Samfela no garem chance for kasem savvy for work wea bae supportim them long living bilong them bihaen. Diswan nao hem wanfela bigfela challenge for dadi and mami. Waswe, bae iu mek sure young wan bilong iu hem garem olketa chance olsem? Sapos iu win for teachim teenager bilong iu long gudfela samting wea savvy kamaot from way for work hard and for enjoyim datwan tu, hem bae mekem grow gudfela tingting wea bae helpem hem long full laef bilong hem.

FROM TEENAGER FOR KAMAP FULL GROWN

23. Hao nao dadi and mami savvy encouragim olketa teenager bilong them?

²³ Nomata iu kasem olketa problem withim teenager bilong iu, disfela scripture hem tru tumas: “Love hem nating savvy fail.” (1 Corinthians 13:8) No stop for showim aot love wea iu garem. Askim iuseleva, ‘Waswe, mi praisim each pikinini long way wea hem deal withim olketa problem or winim hardfela samting? Waswe, mi iusim olketa chance for showim aot love and way for ting hae long olketa pikinini bilong mi, bifor olketa chance hia finis?’ Nomata samfela taem iufela no meanim gud each other, sapos teenager hem feel sure long love bilong iu, hem bae showim aot love for iu tu.

24. Wanem principle bilong Bible nao hem tru long way for luk aftarem olketa pikinini, but wanem nao iumi mas tingim?

²⁴ Hem tru, taem olketa pikinini grow ap for full-grown man, go-go bae they mas decide-im olketa important samting seleva. Samfela taem dadi and mami maet no laekem samting wea they decide-im. Waswe sapos pikinini bilong olketa decide for no go ahed for servim Jehovah God? Diswan savvy happen. Samfela spirit son bilong Jehovah tu rejectim kaonsel bilong hem and go againstim hem. (Genesis 6:2; Jude 6) Olketa pikinini they no machine, wea iu savvy mekem them duim wanem iu laekem. They pipol wea garem free will, wea mas givim ansa front long Jehovah for olketa samting wea they decide-im. Nomata olsem, Proverbs 22:6 hem wanfela trufela toktok: “Trainim wanfela boy long way wea hem stret; nomata taem hem kamap olo, hem bae no lusim datwan.”

25. Wanem nao best way for dadi and mami say thankiu long Jehovah for privilege for garem pikinini?

²⁵ So showim bigfela love long olketa pikinini bilong iu. Duim best bilong iu for followim olketa Bible principle taem iu trainim them. Showim aot gudfela example long way for followim God. Sapos olsem, bae iu givim best chance long olketa pikinini bilong iu for grow ap olsem full-grown wan wea balance and wea fraet long God. Diswan nao best way for dadi and mami say thankiu long Jehovah for privilege for garem pikinini.