No Busy Tumas Long Nara Samting Long “Taem Bilong Gud Nius”
FOFALA leprosy man ting raonem wanem olketa bae duim. Taem olketa standap long gate bilong taon, no eniwan givim eni samting long olketa. Army bilong Syria stopem eniwan for no tekem go kaikai long pipol long Samaria mekem olketa hangre. Nomata sapos fofala leprosy man hia go long Samaria, olketa no savve peim eni kaikai from hem hae tumas. Wanfala long Samaria kaikaim finis pikinini bilong hem.—2 Ki. 6:24-29.
Olketa leprosy man tingting olsem, ‘Iumi go long ples wea olketa soldia bilong Syria stap! Iumi go nomoa.’ Taem hem dark lelebet long evening, olketa go nao. Taem olketa kasem long there, hem kwaet tumas. No eni soldia hem security. Olketa horse and donkey stap, bat nomoa eni soldia. Fofala hia lukluk go insaed long wanfala tent. Olketa lukim staka kaikai and drink, bat olketa no lukim eniwan. Olketa kaikai and drink nao. Olketa lukim tu gold, silver, kaleko, and olketa barava spesol samting. Olketa tekem olketa samting wea olketa laekem, go haedem, and kam bak for tekem samfala samting moa. No eniwan stap long there nao. Jehovah duim mirakol wea mekem hem here olsem wanfala army hem kam. Datwan mekem olketa long Syria ranawe. Man savve tekem nomoa eni samting wea hem laekem!
Olketa leprosy man tekem olketa spesol samting and go haedem olketa. Bat taem olketa tingim pipol long Samaria wea hangre, conscience bilong olketa pokem olketa nao. Olketa sei long olketa seleva: “Iumi duim nogud samting ia. Tuday hem taem bilong gud nius!” Olketa leprosy man hia kwiktaem go bak long Samaria and talem gud nius abaotem wanem olketa faendem.—2 Ki. 7:1-11.
Iumi tu stap long “taem bilong gud nius.” Jesus storyim wanfala important “saen wea bae showimaot . . . world hem gogo for finis.” Hem sei: “Olketa bae talemaot disfala gud nius abaotem kingdom long evri ples long world mekem pipol long evri kantri mas herem. Bihaen datwan nao, world bae finis.” (Matt. 24:3, 14) Wanem tingting nao iumi mas garem long diswan?
Samting wea Iumi Warim Savve Spoelem Iumi
From olketa leprosy man hapi tumas long wanem olketa faendem, olketa no kwiktaem tingim pipol long Samaria. Olketa tingting nomoa long wanem olketa seleva savve kasem. Waswe, samting olsem savve kasem iumi tu? Wanfala saen wea showimaot world gogo for finis hem “olketa taem bilong bigfala hangre.” (Luke 21:7, 11) Jesus talem olketa disaepol: “Iufala mas lukluk gud long iufala seleva nogud wei for kaikai tumas and drink tumas witim wei for wari abaotem hao for kasem need bilong iufala mekem iufala for no garem stretfala tingting.” (Luke 21:34) Iumi olketa Christian mas no warim tumas olketa samting wea iumi duim evriday wea bae mekem iumi no tingim hao iumi stap long “taem bilong gud nius.”
Blessing, wanfala Christian sista hem no letem samting wea hemseleva laekem for mekem hem wari. Hem pioneer, hem finis skul, and gogo hem maritim wanfala brata wea waka long Bethel and hem tu go waka long Benin Bethel. Hem sei: “Mi laekem tumas waka for klinim rum.” Blessing hapi taem hem ting go bak long 12-fala year wea hem duim full-taem service and hem hapi bikos hem gohed tingting strong long “taem bilong gud nius” distaem.
Luksavve Long Olketa Samting wea Savve Weistim Taem
Taem Jesus sendem 70 disaepol for preach, hem talem olketa: “Staka samting nao stap for harvestim, bat no staka wakaman stap for duim datwan. So askem man wea ownim planteison for sendem go olketa wakaman for harvestim planteison bilong hem.” (Luke 10:2) Sapos man no kwiktaem harvestim planteison wea redi finis bae samfala kaikai nogud nao. Hem semsem tu taem iumi duim preaching waka, sapos iumi no preach, pipol savve dae tu. So Jesus sei moa: “Iufala mas no stop tu for story witim eniwan wea iufala meetim long road.” (Luke 10:4) Long Greek languis disfala toktok “story” hem no minim for “hello” nomoa long man, bat hem minim tu taem wea tufala fren lukim tufala and tufala sekhand and story story. Dastawe Jesus talem olketa disaepol for no duim olketa samting wea weistim taem bat for iusim gud taem bilong olketa. Olketa mas no isisi for preachim message bikos hem barava important.
Samting wea no important savve weistim tumas taem bilong man. Longfala taem kam pipol weistim staka taem for lukluk television. Bat waswe long mobile phone and computer? Taem olketa duim research long 1,000 pipol long Britain, olketa lukim hao “long wanfala day, man savve story long telephone for 88 minute, 62 minute long mobile phone, 53 minute for sendem e-mail long computer and 22 minute for text message long mobile phone.” Sapos iumi kaontem taem wea olketa iusim for duim olketa samting hia long wanfala day, hem bae tufala taem winim hour wea auxiliary pioneer duim insaed wanfala day! Haomas taem nao iu iusim for duim olketa samting hia?
Ernst and Hildegard Seliger lukluk gud long hao olketa iusim taem bilong tufala. Tufala kaontem year wea tufala evriwan stap long olketa raf prison and Communist prison hem winim 40 year. Tufala garem hope for go long heven. Bihaen tufala kamaot from prison, tufala pioneer go kasem taem tufala dae.
From staka pipol raetem leta long Ernst and Hildegard, tufala mas iusim staka taem sapos olketa laek for readim olketa leta hia and raet go bak long olketa. Bat wanem hem important long tufala nao hem for duim olketa samting for worshipim Jehovah.
Iumi evriwan hapi taem olketa long famili and fren raet kam long iumi and ringim iumi. Olketa samting olsem hem gud nomoa. Iumi kasem gud samting taem iumi duim difren samting. Nomata olsem, hem bae gud sapos iumi no iusim tumas taem for duim olketa samting wea stopem iumi for no preachim gud nius.
Duim Gud Waka for Preachim Gud Nius
Hem gud tumas for laef long “taem bilong gud nius.” Iumi no laek olsem fofala leprosy man wea firstaem olketa tingim nomoa olketa seleva then bihaen olketa sei: “Iumi duim nogud samting ia.” Long sem wei tu, hem nogud sapos iumi duim nomoa olketa samting wea iumiseleva laekem or olketa samting wea iusim tumas taem and iumi no savve duim ministry nao.
Aposol Paul showimaot gudfala wei for duim ministry. Bihaen 20 year wea hem duim ministry, hem sei: “Mi barava preachim gud disfala gud nius abaotem Christ.” (Rom. 15:19) Paul no letem eni samting stopem hem for gohed strong for preach. Iumi tu laek gohed strong for talemaot message abaotem Kingdom long “taem bilong gud nius” distaem.
[Piksa long page 28]
Blessing no letem samting wea hemseleva laekem stopem hem for duim full-taem service
[Piksa long page 29]
Ernst and Hildegard Seliger lukluk gud long hao olketa iusim taem bilong tufala