Waka Bilong Saul for Preach Mekem Fasin for Heit Kamap

OLKETA Jew long Damascus no savve minim samting wea happen. Hao nao disfala man wea strong tumas long Jew religion hem kamap wanfala apostate? Disfala man hem Saul, wea persecutim olketa follower bilong Jesus long Jerusalem. Hem kam long Damascus for persecutim olketa disaepol wea stap long there. Bat distaem hem preachim hao datfala man wea pipol sei hem wanfala criminal and olketa killim hem dae from olketa sei hem againstim God, hem nao Messiah! Luk olsem Saul krangge nao.—Acts 9:1, 2, 20-22.

Maet gudfala reason stap for diswan. Olketa narawan wea gogo witim Saul from Jerusalem maet story abaotem samting wea happen long road. Taem olketa klosap kasem Damascus, seknomoa wanfala braet laet shaen raonem olketa, and evriwan foldaon long graon. Olketa herem tu wanfala voice. Gogo taem Saul standap, olketa narawan nao holem hand bilong hem and leadim hem go long Damascus, from hem kamap blind. Bat olketa narawan olraet nomoa.—Acts 9:3-8; 26:13, 14.

Man wea Againstim Kamap Man for Sapotim

Wanem nao kasem Saul long road wea gogo for Damascus? Waswe, from olketa gogo farawe or sun hot tumas dastawe hem kamap wik? Pipol distaem wea daotem story hia garem samfala difren idea abaotem wanem nao happen long hem. Samfala sei hem konfius, hem dream krangge, mind and feeling bilong hem no stedy from conscience bilong hem barava feel nogud, or maet hem kasem sik epilepsy.

Samting wea happen, Jesus Christ nao story witim Saul insaed long datfala braet laet. Diswan for mekem Saul bilivim hao Hem nao Messiah. Samfala piksa showimaot Saul foldaon from wanfala horse taem diswan happen. Nomata maet datwan hem tru, Bible talem nomoa hao hem “foldaon long graon.” (Acts 22:6-11) Nomata hao Saul foldaon, datwan hem smol samting nomoa sapos iumi markem witim wei wea hem lusim hae position bilong hem. Hem mas luksavve wanem olketa follower bilong Jesus preach abaotem hem tru. No eni wei nao, Saul mas joinim olketa. Hem change from man wea strong for againstim message bilong Jesus for kamap man wea strong for sapotim datwan. Taem hem lukluk moa and hem baptaes, “Saul gohed for kasem moa paoa and hem mekem olketa Jew wea stap long Damascus sapraes fogud taem hem pruvim long kliafala wei hao diswan nao hem Christ.”—Acts 9:22.

Plan for Killim Hem Dae Fail

Wea nao Saul, wea nara nem bilong hem Paul, hem go bihaen hem kamap follower bilong Christ? Taem hem raet go long olketa long Galatia, hem sei: “Mi go long Arabia, and mi kam bak moa long Damascus.” (Galatians 1:17) For sei “Arabia” savve minim hem go long eni ples long Arabian Peninsula. Samfala savveman sei maet Paul go long wilderness bilong Syria or long olketa nara ples wea part long Nabataean kingdom bilong Aretas IV. Luk olsem Saul go long ples wea kwaet for ting raonem olketa samting bihaen hem baptaes, olsem Jesus duim bihaen hem baptaes.—Luke 4:1.

Taem Saul go bak long Damascus, “olketa Jew story tugeta for killim hem dae.” (Acts 9:23) Governor wea waka for King Aretas long Damascus raraon insaed datfala taon for kasholem Saul. (2 Corinthians 11:32) Bat taem olketa enemy plan for killim dae Saul, olketa disaepol bilong Jesus mekem plan for helpem Saul ranawe.

Olketa wea duim diswan nao Ananias and olketa disaepol wea stap witim Saul bihaen hem kamap wanfala Christian.a (Acts 9:17-19) Maet samfala wea help tu, hem olketa wea biliv from Saul preach long olketa long Damascus. Acts 9:25 sei: “Long naetaem, olketa disaepol bilong hem putim hem insaed wanfala basket and daonem hem thru long wanfala hol long wall.” Disfala toktok “olketa disaepol bilong hem” maet minim olketa wea Saul teachim. Luk olsem wei wea ministry bilong hem win nao mekem pipol barava kros go moa long hem.

Leson for Iumi

Taem iumi ting raonem olketa samting wea happen bihaen Saul kamap Christian and baptaes, hem klia long iumi hao hem no letem nogud tingting bilong pipol for spoelem hem. And tu, hem nating givap taem pipol barava strong for againstim hem. Waka for preach nao barava important long Saul.—Acts 22:14, 15.

Waswe, iu wanfala wea start luksavve distaem hao hem barava important for preachim gud nius? Sapos olsem, iu savve hao evri tru Christian mas preach abaotem Kingdom. Iu shud no sapraes sapos samfala taem pipol les long ministry bilong iu. (Matthew 24:9; Luke 21:12; 1 Peter 2:20) Saul showimaot nambawan example for deal witim wei wea pipol againstim hem. God bae hapi long olketa Christian wea gohed strong long olketa test and no givap. Jesus sei long olketa disaepol bilong hem: “Evri pipol bae heitim iufala from nem bilong mi.” Bat, hem encouragem olketa olsem: “Iufala bae sevem soul bilong iufala sapos iufala gohed strong.”—Luke 21:17-19.

[Footnote]

[Piksa long page 28]

Saul “foldaon long graon” taem Jesus story kam long hem

[Piksa long page 29]

Saul ranawe taem olketa Jew plan for killim hem dae long Damascus