Jesus Chusim Saul

Saul hem citizen blo Rome wea born lo Tarsus. Hem wanfala Pharisee wea savve gud lo Law blo olketa Jew, and hem heitim olketa Christian. Hem tekem olketa Christian man and woman from haos blo olketa and putim olketa lo prison. Hem even standap and lukluk taem wanfala grup wea kros tumas stonem disaepol Stephen gogo hem dae.

Nomata Saul arrestim olketa Christian lo Jerusalem, hem still no satisfae yet. So hem askem hae priest for sendem hem go lo taon blo Damascus, mekem hem savve faendem and arrestim olketa Christian wea stap lo there. Taem Saul klosap kasem datfala taon, wanfala laet from skae hem shaen braet lo hem and hem foldaon lo graon. Then hem herem wanfala voice hem sei: ‘Saul, why nao iu persecutim mi?’ Saul ask olsem: ‘Iu hu ia?’ Datfala voice hem sei: ‘Mi Jesus. Go lo Damascus, and wanfala man bae talem iu wat for duim.’ Semtaem nomoa, Saul hem blind nao, and olketa holem hand blo hem and leadim hem go lo datfala taon.

Lo Damascus, wanfala faithful Christian stap wea nem blo hem Ananias. Jesus story lo hem insaed wanfala vision: ‘Go lo haos blo Judas lo wanfala street wea olketa kolem lo Straight, and luk for Saul.’ Ananias hem sei: ‘Lord, mi herem staka story abaotem disfala man! Hem putim staka disaepol blo iu lo prison!’ Bat Jesus hem sei: ‘Go lo hem. Mi chusim Saul for preachim gud nius lo staka nation.’

So Ananias go nao, hem faendem Saul and sei lo hem: ‘Saul, brata blo mi, Jesus nao sendem mi for mekem iu lukluk moa.’ Semtaem nomoa, Saul savve lukluk nao. Hem lane abaotem Jesus and kamap follower blo hem. Afta hem baptaes, hem start for preach lo olketa sinagog, witim olketa nara Christian. Tingim, masbi olketa Jew sapraes tumas for lukim Saul hem teachim pipol abaotem Jesus, iaman? Olketa sei: ‘Hao, ino disfala man nao savve arrestim olketa disaepol blo Jesus?’

For thri years, Saul preach lo olketa pipol wea stap lo Damascus. Bat olketa Jew heitim Saul and mekem plan for killim hem dae. Olketa brata savve abaotem datfala plan and helpem hem for ranawe. Olketa putim hem insaed wanfala basket and daonem hem thru lo wanfala window lo wall blo datfala taon.

Taem Saul go lo Jerusalem, hem laek for joinim olketa brata and sista lo there. Bat olketa fraetem hem. Then wanfala kaen disaepol wea nem blo hem Barnabas tekem Saul go lo olketa aposol and talem lo olketa dat Saul hem barava change nao. Start lo datfala taem Saul strong for preachim gud nius witim kongregeson lo Jerusalem. Bihaen, nem blo hem change for Paul.