Kwestin From Reader
Wanem taem nao hem fitim for wanfala Christian woman kavarem hed bilong hem for spiritual reason?
“Evri woman wea prea or talem profesi taem hem no kavarem hed bilong hem mekem hed bilong hem kasem shame,” aposol Paul hem raet. Why nao olsem? Bikos long disfala principle bilong Bible abaotem hedship: “Hed bilong woman hem man.” Wei for prea or preach insaed Christian kongregeson hem responsibility bilong man. Dastawe, taem wanfala Christian woman duim samting saed long worship wea hasband bilong hem or man wea baptaes nao savve duim, hem shud kavarem hed bilong hem.—1 Corinthians 11:3-10.
Samfala taem wea wanfala Christian woman mas kavarem hed bilong hem maet kamap insaed marit bilong hem. Olsem example, taem famili hipap tugeta for Bible study or for kaikai, evritaem hasband nao lead long wei for teach and prea for olketa long God. Bat sapos hem man wea no biliv, waef nao savve duim responsibility hia. Dastawe, taem hem prea big for hemseleva and olketa narawan or taem hem conductim Bible study witim olketa pikinini bilong hem taem hasband bilong hem stap, hem fitim for wanfala Christian sista kavarem hed bilong hem. Sapos hasband bilong hem no stap, waef no need for kavarem hed bilong hem, from God givim hem paoa for teachim olketa pikinini bilong hem.—Proverbs 1:8; 6:20.
Bat, waswe sapos wanfala young son insaed famili hem wanfala servant bilong Jehovah God wea dedicate and baptaes finis? From son hia hem wanfala member bilong Christian kongregeson, hem shud kasem instruction from olketa brata long kongregeson. (1 Timothy 2:12) Sapos dadi bilong hem hem wan wea biliv, hem nao shud teachim son bilong hem. Bat, sapos datfala dadi hem no stap, then mami shud kavarem hed bilong hem sapos hem conductim Bible study witim disfala young son wea baptaes and olketa nara pikinini. Hem saed bilong hem sapos hem laek for askem son wea baptaes for prea long study or long taem for kaikai. Mami maet feel hao son hem no fit yet and maet chus for hemseleva nao offerim prea. Sapos hem chus for prea long taem olsem, hem shud kavarem hed bilong hem.
Olketa Christian woman maet need for kavarem hed taem olketa share long samfala waka bilong kongregeson. Olsem example, long meeting for field service long midol week maet olketa Christian sista nomoa stap, no eni brata wea baptaes. Samfala taem maet no eni brata wea baptaes stap long wanfala kongregeson meeting. Sapos wanfala sista hem need for duim waka wea wanfala brata nao shud duim long wanfala meeting wea kongregeson arrangem or meeting for field service, hem shud kavarem hed bilong hem.
Waswe, olketa Christian woman mas kavarem hed taem olketa toktok for transleitim or duim saen-languis long wanfala Bible tok or taem olketa readim olketa paragraf from wanfala buk long kongregeson meeting? Nomoa. Olketa sista wea duim disfala waka no duim long wei for lead or teach. Long sem wei, olketa sista wea tekpart long demonstration, talem experience, or duim student tok long Theocratic Ministry Skul no need for kavarem hed bilong olketa.
Nomata olketa man wea baptaes nomoa savve teach insaed kongregeson, waka for duim preaching and teaching aotsaed long kongregeson hem responsibility bilong olketa man and woman. (Matthew 24:14; 28:19, 20) So taem wanfala Christian woman hem story long pipol aotsaed abaotem Word bilong God hem no need for kavarem hed nomata wanfala Witness brata hem stap.
Bat, hem difren sapos sista conductim wanfala Bible study long wanfala haos followim schedule and wanfala dedicate brata hem long there. Diswan hem taem for teach wea olketa arrangem finis wea datwan wea conductim datfala study nao hem leadim. Long taem olsem, study hia kamap part bilong kongregeson arrangement. Sapos wanfala Witness sista wea baptaes conductim wanfala study olsem and wanfala Witness brata wea baptaes hem long there, fitim hem for kavarem hed bilong hem. Nomata olsem, datfala brata wea dedicate nao shud offerim prea. Wanfala sista no savve prea taem wanfala brata wea dedicate finis hem long there. Hem bae duim only sapos samfala gud reason stap, olsem example, sapos datfala brata garem physical problem wea mekem hem no savve toktok.
Maet wanfala man wea hem Kingdom pablisa wea no baptaes go witim wanfala Christian sista long wanfala hom Bible study. Sapos sista hia wantem, hem savve askem hem for conductim study. Bat from hem no fitim for datfala man for prea long Jehovah for disfala sista, hem fitim for sista hia nao prea long datfala study. Sapos sista hia nao conductim study or prea, hem bae need for kavarem hed bilong hem. Nomata datfala man wea pablisa hem no baptaes yet, pipol aotsaed ting long hem olsem hem part bilong kongregeson from wei wea hem duim preaching waka.
“Woman need for garem wanfala saen bilong paoa antap long hed bilong hem bikos long olketa angel,” aposol Paul hem raet. Tru nao, olketa Christian sista garem privilege for kamap gudfala example long planti million angel wea go ahed for stap anda long Jehovah long loyal wei. Hem barava fitim for olketa woman wea fraet long God for showimaot respect long wei for kavarem hed bilong olketa long taem wea fitim.
[Olketa Piksa long page 26]
Wei for kavarem hed hem wanfala saen bilong respect for hedship