Faith Bilong Noah Judgem World

WASWE, iu savve abaotem Noah, wanfala man wea fraet long God and wea buildim wanfala ark for sevem laef long taem wea flood kavarem full world? Nomata disfala story hem barava old, staka million pipol savve long hem. Bat, samting wea staka no luksavve nao hem wei wea laef bilong Noah garem mining for iumi evriwan.

Why nao iumi shud interest long disfala story wea hem planti thousand year old? Waswe, eni samting long taem bilong Noah hem semsem witim taem bilong iumi? Sapos olsem, hao nao example bilong hem savve helpem iumi?

Datfala World Long Taem Bilong Noah

Olketa date long Bible markem 2970 B.C.E olsem taem wea Noah hem born—126 year bihaen Adam hem dae. Kasem taem bilong Noah, earth hem fulap witim raf fasin, and klosap evri pikinini from laen bilong Adam chus for followim bighed example bilong hem. Dastawe “Jehovah hem lukim hao nogud fasin bilong man hem big tumas long earth and evri wei bilong tingting long heart bilong hem nogud evritaem.”—Genesis 6:5, 11, 12.

Hem no bighed fasin bilong olketa man nomoa wea mekem Jehovah no hapi. Story long Genesis talem: “Olketa son bilong trufala God start for lukluk long olketa dota bilong man, hao olketa luk naes tumas; and olketa start for tekem samfala olsem waef for olketa seleva, evriwan wea olketa chusim. . . . Olketa Nephilim stap long earth long datfala taem, and bihaen long datfala taem tu, taem olketa son bilong trufala God go ahed for sleep witim olketa dota bilong man and givim boy pikinini long olketa, olketa nao olketa maeti man bilong bifor, olketa man wea garem bignem.” (Genesis 6:2-4) Sapos iumi markem olketa verse hia witim toktok wea aposol Peter raetem, bae hem showimaot hao “olketa son bilong trufala God” hem nao olketa angel wea no obey. Olketa Nephilim nao olketa mix pikinini bilong olketa woman and olketa apostate angel wea kamap olsem man.—1 Peter 3:19, 20.

“Nephilim,” or “olketa Feller,” hem minim olketa man wea mekem nara man foldaon. Olketa savve daonem and bossim olketa man, and sin bilong dadi bilong olketa hem olsem olketa nogud dirty fasin bilong Sodom and Gomorrah. (Jude 6, 7) Olketa mekem barava nogud wicked fasin for kamap long earth.

“No Garem Blame Midolwan Long Pipol Long Datfala Taem”

From wicked fasin kasem evriwea God disaed strong for distroem olketa man. Bat story from Bible hem sei: “Noah mekem Jehovah hapi. . . . Noah hem wanfala raeteous man. Hem no garem blame midolwan long pipol long datfala taem. Noah wakabaot witim trufala God.” (Genesis 6:8, 9) Hao nao hem savve ‘wakabaot witim God’ insaed wanfala world wea no followim God wea fit nomoa for distroe?

Iumi sure Noah mas lanem staka samting from dadi bilong hem Lamech, wanfala man wea garem faith and wea stap taem Adam laef yet. Taem hem kolem son bilong hem Noah (wea olketa ting hem minim “Rest,” or “Comfort”), Lamech talem disfala profesi: “Diswan bae givim comfort long iumi from waka bilong iumi and pain bilong hand bilong iumi wea kam from graon wea Jehovah cursim.” Datfala profesi hem fulfill taem God aotem datfala curse wea stap long graon.—Genesis 5:29; 8:21.

For garem parents wea fraet long God hem no minim olketa pikinini bae garem spiritual fasin, from man wanwan mas mekem wei for hemseleva fren witim Jehovah. Noah ‘wakabaot witim God’ taem hem go ahed for aftarem wanfala gogo wea God appruvim. Samting wea Noah lanem abaotem God muvim hem for servem Hem. Faith bilong Noah nating seksek taem God talem hem purpose bilong hem ‘for finisim evri flesh insaed flood.’—Genesis 6:13, 17.

From hem barava trustim hao disfala disaster bae happen, Noah obeyim komand bilong Jehovah: “Mekem wanfala ark for iuseleva from timba bilong wanfala tree wea garem resin. Iu bae mekem olketa rum insaed datfala ark, and iu mas kavarem insaed and aotsaed witim tar.” (Genesis 6:14) For followim olketa plan bilong God for datfala ark hem no isi samting. Nomata olsem, “Noah go ahed for duim evri samting wea God komandim hem.” For tok stret, “hem barava duim olsem.” (Genesis 6:22) Noah duim diswan witim help bilong waef bilong hem and olketa son bilong tufala Shem, Ham, and Japheth and olketa waef bilong olketa. Jehovah blessim kaen faith olsem. Hem wanfala barava nambawan example for olketa famili distaem!

Wanem nao insaed wei for buildim ark? Jehovah talem Noah for buildim wanfala barava big, thri-story, timba box, wea wata mas no savve go insaed, long bilong hem 133 meter and waed bilong hem 22 meter and hae bilong hem 13 meter. (Genesis 6:15, 16) Kaen ship olsem bae garem sem spes olsem wanfala container ship for karem kago distaem.

Datwan hem wanfala barava bigfala samting for duim! Luk olsem diswan minim olketa mas katem planti thousand tree, and pullim go long ples wea olketa bae buildim ark, and mas katem olketa for kamap flat timba or beam. Hem minim tu olketa mas buildim scaffolding, wakem olketa pin or peg, kasem tar for mekem hem no leak, faendem olketa container and tul, and samfala samting moa. Waka hia maet minim hem mas deal witim olketa bisnisman and peim samfala samting and waka bilong olketa man wea tekem kam olketa samting hia. Hem luk olsem olketa needim savve olsem carpenter mekem olketa savve mekem olketa timba fit gud and buildim strong. And tingim hao disfala construction hem go ahed for samting olsem 50 or 60 year!

Then Noah bae mas tingting long wei for preparem inaf kaikai for olketa and olketa animal tu. (Genesis 6:21) Bae hem mas hipimap and leadim staka animal go insaed ark. Noah hem duim evri samting wea God komandim, and gogo waka hem finis. (Genesis 6:22) Blessing bilong Jehovah nao mekem hem win evribit.

“Wanfala Man wea Preach Abaotem Raeteous Fasin”

Semtaem hem buildim ark, Noah talemaot wanfala warning and servem God witim faithful fasin olsem “wanfala man wea preach abaotem raeteous fasin.” Bat pipol “nating lisin gogo flood hem kam and swipim olketa go.”—2 Peter 2:5; Matthew 24:38, 39.

Taem man tingim barava nogud spiritual living long datfala taem, hem isi for luksavve hao maet olketa neiba barava mekfani and tokspoelem famili bilong Noah. Pipol masbi ting olketa barava krangge stret. Nomata olsem, Noah hem win for givim famili bilong hem spiritual encouragement and saport, from olketa nating followim raf, nogud fasin and bighed fasin bilong olketa wea no followim God wea stap long datfala taem. Thru long toktok and samting wea hem duim, wea showimaot faith bilong hem, Noah judgem world bilong datfala taem.—Hebrews 11:7.

Stap Sef Thru Long Flood

No longtaem bifor bigfala rain hem start, God talem Noah for go insaed ark wea olketa buildim finis. Taem Noah witim famili and olketa animal go insaed finis, “Jehovah hem satem door,” diswan stopem wei for herem pipol laflaf and mekfani long olketa. Taem flood kam, olketa angel wea no obey lusim body bilong olketa olsem man and missim wei for distroe. Bat waswe long olketa narawan? Tru nao, evri samting wea laef long drae graon aotsaed long ark, insaed diswan hem olketa Nephilim, finis evribit! Noah and famili bilong hem nomoa stap laef.—Genesis 7:1-23.

Noah and famili bilong hem stap for wan year and tenfala day insaed ark. Olketa busy for feedim and givim wata long olketa animal, klinim aot rabis and kaontem olketa day. Genesis raetem barava taem olketa difren part bilong Flood happen, olsem hao olketa long wanfala ship savve raetem long buk bilong olketa, wea showimaot hao disfala record hem barava stret.—Genesis 7:11, 17, 24; 8:3-14.

Taem insaed ark, iumi sure Noah leadim famili bilong hem long wei for storyim olketa spiritual samting tugeta and for sei thankiu long God. Hem klia hao history bilong laef bifor flood hem go ahed for stap thru long Noah and famili bilong hem. Olketa trufala story or olketa raeting abaotem history wea olketa garem bae helpem olketa taem olketa story raonem long taem olketa insaed ark.

Noah and famili bilong hem mas barava hapi for step antap drae graon moa! First samting hem duim nao hem buildim wanfala altar and duim waka olsem wanfala priest for famili bilong hem, for offerim olketa sakrifaes long Datwan wea sevem olketa.—Genesis 8:18-20.

“Olsem Taem Bilong Noah”

Jesus Christ sei: “Olsem taem bilong Noah, so taem wea Son bilong man stap moa bae olsem tu.” (Matthew 24:37) Distaem, olketa Christian tu olketa man for preachim raeteous fasin, olketa encouragem pipol for repent. (2 Peter 3:5-9) Taem iumi tingim hao tufala samting hia hem lelebet semsem, maet iumi ting wanem nao tingting bilong Noah bifor flood kam. Waswe, enitaem hem feel preaching bilong hem iusles? Waswe, enitaem hem taed? Bible no talem. Samting wea hem talem iumi nao hem wei wea Noah obeyim God.

Waswe, iu savve lukim hao living bilong Noah hem semsem witim bilong iumi? Hem obeyim Jehovah nomata hem kasem hard taem and wei wea pipol againstim hem. Dastawe Jehovah judgem hem olsem raeteous. Famili bilong Noah no barava savve wanem taem nao God bae mekem Flood kamap, bat olketa savve bae hem kam. Faith long Word bilong God strongim Noah thru long olketa year wea hem barava waka hard and duim preaching waka wea maet luk olsem no kasem eni gudfala samting nomoa. Tru nao Bible talem iumi: “Thru long faith Noah, bihaen God givim hem warning abaotem olketa samting wea hem no lukim yet, showimaot wei for fraet long God and wakem wanfala ark for sevem famili bilong hem; and thru long disfala faith hem judgem world, and hem kasem promis bilong raeteous fasin wea kam from faith.”—Hebrews 11:7.

Hao nao Noah kasem kaen faith olsem? Luk olsem hem tek-taem for ting raonem evri samting wea hem savve abaotem Jehovah and letem disfala savve for leadim hem. Iumi feel sure, Noah story long God thru long prea. Tru nao, wei wea gogo hem barava savve gud long Jehovah mekem hem ‘wakabaot witim God.’ Olsem hed bilong famili, Noah hapi for mek-taem for lukaftarem gud famili bilong hem. Insaed diswan hem wei for lukaftarem spiritual saed bilong waef, thrifala son, and olketa dota-in-law bilong hem.

Olsem Noah, olketa tru Christian distaem savve hao Jehovah bae klosap nao for finisim disfala system wea no followim God. Iumi no savve long datfala day or hour, bat iumi luksavve hao wei for followim faith and wei for obey bilong disfala “man wea preach abaotem raeteous fasin” bae “keepim soul laef.”—Hebrews 10:36-39.

[Box long page 29]

Waswe Hem Really Happen?

Olketa savveman kolektem samting olsem 270 kastom story abaotem flood from klosap evri tribe and nation. “Man savve faendem story bilong flood evriwea long world,” hem nao wanem savveman Claus Westermann sei. “Olsem story bilong creation, hem main part long kastom bilong iumi. Hem barava savve mekem man sapraes: evriwea long earth mifala faendem olketa story abaotem big flood long bifor.” Samting wea explainim diswan? Man for story Enrico Galbiati sei: “Wei wea kastom story abaotem flood kamap olowe insaed olketa difren and farawe pipol hem saen hao olketa story hia garem faondeson long really samting wea happen long history.” Samting wea moa important for olketa Christian winim tingting bilong olketa savveman, hem nao wei wea Jesus story abaotem flood olsem wanfala samting wea really happen insaed history bilong man.—Luke 17:26, 27.

[Box long page 30]

Olketa Nephilim Insaed Kastom Story?

Olketa kastom story abaotem wei for fren midolwan olketa god and olketa man—and olketa “maeti man” or “haf god” wea born kam from wei for fren hia—hem kamap evritaem insaed religion bilong olketa long Greece, Egypt, Ugarit, Hurrian, and Mesopotamia. Olketa god insaed kastom story bilong Greece garem body olsem man and barava luk naes. Olketa savve kaikai, drink, sleep, duim sex, raoa, faet, switim man, and rape. Nomata olketa sei olketa holy, olketa savve giaman and duim criminal fasin. Olketa sei olketa maeti man olsem Achilles olketa haf god and haf man and garem paoa for duim samting wea winim strong bilong olketa man bat olketa no garem wei for kanduit dae. So, toktok long Genesis wea story abaotem olketa Nephilim showim hao start bilong olketa kastom story hia maet tru.