Waswe, Iu Barava Followim Christ?

“Olsem iufala duim kam finis, . . . gohed for barava followim gud datfala wei.”​—1 THESS. 4:1.

1, 2. (a) Staka pipol long taem bilong Jesus lukim hem duim olketa wanem nambawan samting? (b) Why nao taem wea iumi stap long hem, hem important?

WASWE, enitaem iu tingting olsem, ‘Ating hem mas naes tumas sapos mi stap long taem wea Jesus stap long disfala earth!’ Sapos iu garem big sik, maet iu tingim hao Jesus bae mekem iu gud bak. Or maet iu barava laek tumas for lukim Jesus and herehere long hem mekem iu lane from hem or lukim samfala mirakol wea hem duim. (Mark 4:​1, 2; Luke 5:​3-9; 9:​11) Sapos iu stap taem Jesus duim olketa nambawan samting hia, hem mas naes tumas! (Luke 19:37) Olketa man wea laef long datfala taem nomoa lukim olketa nambawan samting wea Jesus duim. Then Jesus duim bigfala samting taem hem “dae olsem sakrifaes” wanfala taem nomoa.​—Heb. 9:​26; John 14:19.

² Nomata olsem, taem wea iumi stap long hem tu hem important. Why nao olsem? Iumi stap long taem wea Bible talem finis hem “taem bilong end” and “olketa last day.” (Dan. 12:​1-4, 9; 2 Tim. 3:1) Long taem hia tu, Jesus torowem Satan go aot from heven. Klosap nao Jesus bae taengem hem and torowem hem long “datfala hol wea deep tumas.” (Rev. 12:​7-9, 12; 20:​1-3) Long disfala taem tu, iumi duim nambawan waka for talemaot “gud nius abaotem kingdom” long full world, and story long pipol abaotem Paradaes wea bae kamap. Iumi bae no duim moa disfala waka long eni narataem.​—Matt. 24:14.

3. Taem Jesus klosap go bak long heven, wanem nao hem talem olketa disaepol for duim, and why nao olsem?

³ Taem Jesus klosap go bak long heven, hem talem olketa disaepol olsem: “Iufala bae talem pipol abaotem mi long Jerusalem and long evri ples long Judea and long Samaria and long evri farawe ples long earth.” (Acts 1:8) Gogo waka hia for teachim pipol bae kasem full world. Why nao pipol bilong God duim disfala waka? For teachim staka pipol moa for kamap disaepol bilong Christ bifor end hem kam. (Matt. 28:19, 20) Wanem nao iumi mas duim sapos iumi laek for duim waka wea Jesus talem?

4. (a) Toktok wea Peter talem long 2 Peter 3:​11, 12 mekhae long wanem samting? (b) Iumi mas luksavve long wanem samting?

⁴ Tingim disfala toktok wea aposol Peter talem. Hem sei: “Iufala mas tingting gud abaotem laef bilong iufala. Iufala mas stap holy and gohed duim samting from iufala barava lovem God taem iufala weitim and tingim evritaem day bilong Jehovah wea bae kam!” (2 Pet. 3:​11, 12) Toktok bilong Peter mekhae long wei for iumi mas gohed lukaot long olketa last day distaem for mekem iumi duim nomoa olketa samting wea showimaot iumi lovem God. Wanfala samting hia nao hem for preachim gud nius. Taem iumi lukim olketa brata bilong iumi long full world gohed strong for duim preaching waka wea Christ talem iumi for duim, iumi hapi tumas! Bat iumi luksavve iumi mas no letem olketa hevi from world bilong Satan and olketa samting wea body bilong iumi wea sin hem laekem for mekem iumi isisi for duim waka bilong God. Iumi bae storyim wanem iumi savve duim mekem iumi gohed followim Christ.

Hapi for Duim Waka wea God Talem

5, 6. (a) Wanem nao olketa Christian long Jerusalem duim dastawe Paul praisem olketa, and hem talem olketa for keakea long wanem? (b) Why nao iumi mas no isisi long waka bilong God?

⁵ Taem aposol Paul raet for olketa Christian long Jerusalem, hem praisem olketa from olketa gohed strong and no givap nomata pipol spoelem olketa. Hem sei: “Gohed for tingim taem wea iufala lanem truth, and nomata iufala kasem bigfala test and iufala safa, iufala winim datwan and stand strong.” Tru tumas, Jehovah no forgetim wanem olketa duim for showimaot faith long hem. (Heb. 6:​10; 10:32-​34) Olketa naesfala toktok wea Paul talem for praisem olketa Hebrew Christian hia mas barava encouragem olketa. Nomata olsem, Paul talem tu wanfala samting wea evri man mas keakea long hem. Datwan nao savve mekem olketa for isisi long waka bilong God. Hem sei olketa Christian mas keakea for no “talem excuse” mekem olketa no duim waka bilong God.​—Heb. 12:25.

⁶ Toktok wea Paul talem for olketa no “talem excuse” for no duim waka bilong God, hem fitim olketa Christian distaem tu. Iumi luksavve iumi mas tinghae long waka bilong God and no letem eni samting mekem iumi isisi long datwan. (Heb. 10:39) Tru tumas, taem iumi duim holy waka bilong God, datwan savve mekem iumi and nara pipol for laef or for dae.​—1 Tim. 4:​16.

7, 8. (a) Wanem nao bae helpem iumi for gohed strong for duim waka bilong God? (b) Sapos iumi start for isisi distaem, wanem nao iumi mas tingim abaotem Jehovah and Jesus?

⁷ Wanem nao savve helpem iumi for no talem excuse for no duim waka bilong God? Hem important for iumi ting raonem evritaem wanem iumi promisim long Jehovah taem iumi dedicate long hem. Iumi promis long Jehovah iumi bae duim wanem hem laekem and datwan nao bae first samting long laef bilong iumi. And iumi laek gohed for duim wanem iumi promisim. (Readim Matthew 16:24.) Dastawe hem gud for iumi ting raonem olketa kwestin hia: ‘Waswe, mi strong yet distaem for duim wanem mi promisim long God olsem long taem wea mi baptaes? Or waswe, mi start for isisi lelebet distaem?’

⁸ Sapos iumi luksavve iumi no strong tumas distaem for duim waka bilong God, hem gud for iumi ting raonem toktok wea profet Zephaniah talem wea savve encouragem iumi. Hem sei: “Iu no wikdaon. Jehovah wea hem God bilong iu hem stap witim iu. From hem garem bigfala paoa hem bae sevem iu. Hem bae hapi fogud long iu.” (Zeph. 3:​16, 17) Profet Zephaniah talem toktok hia firstaem for strongim olketa Israelite taem olketa lusim Babylon for go bak long Jerusalem. Nomata olsem, disfala promis savve strongim pipol bilong God distaem tu. From waka wea iumi duim hem bilong Jehovah, iumi mas tingim hao Jehovah and Son bilong hem nao helpem iumi and strongim iumi for barava duim datfala waka. (Matt. 28:20; Phil. 4:​13) Sapos iumi gohed strong for duim waka bilong God, hem bae blessim iumi and helpem iumi gohed for kamap strongfala Christian.

‘Kingdom Nao Mas First Samting Long Laef Bilong Iumi’

9, 10. Wanem nao main point long tokpiksa bilong Jesus abaotem bigfala feast? Wanem nao iumi savve lanem from tokpiksa hia?

⁹ Taem Jesus kaikai long haos bilong wanfala bigman bilong olketa Pharisee, hem storyim tokpiksa abaotem wanfala big feast. Long tokpiksa hia, hem storyim hao olketa difren wan garem chance for rul long Kingdom long heven. Hem storyim tu enikaen “excuse” wea samfala talem. (Readim Luke 14:16-​21.) Olketa man wea kasem invitation talem excuse for no kam. Wanfala sei hem peim wanfala pis land and hem mas go lukim datwan. Narawan sei hem peim samfala buluka and hem laek for go chekim olketa. Narawan moa sei: “Mi just marit nomoa ia, so mi hard for kam nao.” Olketa man hia talem excuse wea barava no fitim. Man wea peim pis land or samfala animal savve chekim gud firstaem bifor hem peim, so hem no need for chekim kwiktaem bihaen hem peim. And hem no fitim for man wea just marit for no go long disfala important feast! Dastawe man wea invaetem olketa hem barava kros long olketa!

¹⁰ Evri pipol bilong God savve lane from disfala tokpiksa bilong Jesus. Wanem nao iumi savve lanem? Iumi mas no letem eni samting wea iumiseleva laekem olsem wanem Jesus storyim long tokpiksa for kamap first samting long laef bilong iumi and iumi forgetim nao waka bilong God. Sapos wanfala Christian busy tumas for duim wanem hemseleva laekem, bae gogo hem start for isisi long ministry wea hem duim. (Readim Luke 8:​14.) Sapos iumi no laek for olsem, iumi mas followim kaonsel bilong Jesus. Hem sei: “So evritaem kingdom and olketa samting wea God sei hem stret mas first samting long laef bilong iufala.” (Matt. 6:​33) Hem barava encouragem iumi taem iumi lukim pipol bilong God wea young or olo olketa obeyim datfala kaonsel! Staka brata and sista changem samfala samting long laef bilong olketa mekem olketa savve duim staka samting moa long ministry. Olketa seleva lanem hao taem kingdom hem first samting long laef bilong olketa, olketa hapi tumas.

11. Wanem story long Bible nao showimaot hem important for iumi strong for duim waka bilong God witim full heart?

¹¹ Tingim King Jehoash long Israel bifor. Samting wea happen long laef bilong hem showimaot hem important tumas for man strong for duim waka bilong God. From Jehoash fraet nogud Syria kam faetem Israel and winim olketa, hem go krae long Elisha. Profet Elisha talem hem for sutim go wanfala arrow go aot long window wea feisim Syria. Datwan showimaot Jehovah savve helpem Israel for winim Syria. Wanem Elisha talem shud barava strongim king. Then Elisha talem Jehoash for tekem olketa arrow and hitim graon. Jehoash hitim graon thrifala taem. Elisha kros tumas taem hem lukim diswan bikos hem savve sapos Jehoash hitim graon faevfala or sixfala taem, datwan showimaot “olketa bae barava winim Syria.” From datwan, Jehoash bae win lelebet nomoa long thrifala faet. From Jehoash no strong for duim wanem Elisha talem, hem no win long bigfala wei. (2 Kings 13:14-​19) Wanem nao iumi savve lanem from datfala story? Jehovah bae blessim iumi nomoa sapos iumi strong for duim waka bilong hem witim full heart.

12. (a) Wanem nao savve helpem iumi for gohed strong for duim waka bilong God nomata iumi kasem hard taem? (b) Storyim wanem gud samting nao iuseleva kasem from iu strong for duim ministry.

¹² Olketa hard taem wea iumi kasem savve mekem iumi for luksavve sapos iumi ting⁠hae long waka bilong God and strong yet for duim datwan. Staka brata and sista kasem hard taem saed long selen. Samfala moa wea sik big olketa sorre bikos olketa no fit for duim staka samting long waka bilong Jehovah. Nomata olsem, iumi evriwan savve duim samfala samting mekem iumi gohed strong and barava followim Christ. Plis lukim samfala idea and scripture long disfala box “Wanem Nao Savve Helpem Iu for Gohed Followim Christ?” Tingim wanem nao iu savve duim for barava followim olketa idea hia. Sapos iu duim olketa samting hia, iu bae kasem staka gud samting. Taem iumi strong for duim ministry, iumi bae gohed gud for worshipim Jehovah, iumi hapi, and stap gud. (1 Cor. 15:58) Nara samting tu, taem iumi strong for duim waka bilong God, iumi bae “tingim evritaem day bilong Jehovah wea bae kam.”​—2 Pet. 3:​12.

Lukluk Gud Long Iuseleva

13. Wanem nao bae mekem iumiseleva luksavve sapos iumi duim ministry witim full soul?

¹³ Hem gud for iumi luksavve haomas hour wea iumi duim long ministry no showimaot sapos iumi duim ministry witim full soul or nomoa. Living bilong iumi evriwan hem no semsem. Jehovah savve hapi tumas long man wea duim nomata wan or tufala hour nomoa long preaching for wanfala month sapos hem nao wanem hem fit for duim from hem sik. (Markem witim Mark 12:41-​44.) Sapos iumi laek for luksavve sapos iumi duim waka bilong God witim full soul, iumi mas lukluk gud long living bilong iumi and wanem iumi fit for duim. From iumi followim Christ, iumi laek for garem sem tingting olsem hem. (Readim Romans 15:5; 1 Cor. 2:​16) Wanem nao important samting long laef bilong Jesus? Hem talem olsem long staka pipol long Capernaum: “Mi mas talemaot gud nius abaotem kingdom bilong God, . . . bikos hem nao why God sendem mi kam.” (Luke 4:​43; John 18:37) From Jesus strong for duim ministry, datwan savve helpem iumi for lukluk gud long iumiseleva for lukim sapos iumi fit for duim samfala samting moa long ministry.​—1 Cor. 11:1.

14. Wanem nao iumi savve duim mekem iumi duim samfala samting moa long ministry?

¹⁴ Taem iumi lukluk gud long iumiseleva, maet iumi luksavve iumi savve duim samfala hour moa long ministry. (Matt. 9:37, 38) Staka thousand young wan bilong iumi wea finis long secondary skul duim samfala samting moa long ministry and olketa hapi from olketa pioneer. Waswe, iu laek for hapi olsem olketa tu? Samfala brata and sista lukluk gud long living bilong olketa and olketa disaed for go stap long nara ples long kantri bilong olketa, or long narafala kantri wea needim samfala pablisa moa. Samfala lanem nara languis mekem olketa savve preach long pipol wea iusim languis hia. Nomata maet hem no isi for duim samfala samting moa long ministry, iumi bae kasem staka blessing and maet helpem staka pipol tu for “kasem stretfala savve abaotem truth.”​—1 Tim. 2:​3, 4; 2 Cor. 9:6.

Olketa Example Long Bible wea Iumi Savve Followim

15, 16. Olketa hu nao strong for followim Christ wea iumi savve followim example bilong olketa?

¹⁵ Wanem nao samfala wea kamap aposol duim taem Christ askem olketa for followim hem? Bible sei olsem abaotem Matthew: “Hem getap and lusim evri samting bilong hem and hem go followim Jesus.” (Luke 5:​27, 28) Taem Peter and Andrew fishing, Bible sei olsem abaotem tufala: “Semtaem nomoa, tufala lusim olketa net hia and followim hem nao.” Then Jesus lukim James and John witim dadi bilong tufala olketa wakem net wea brek. Wanem nao tufala duim taem Jesus askem olketa for followim hem? “Semtaem nomoa, tufala lusim dadi insaed long boat and go followim hem nao.”​—Matt. 4:​18-​22.

¹⁶ Wanfala man wea showimaot gudfala example tu hem Saul wea kamap aposol Paul. Nomata long bifor hem barava againstim pipol wea followim Christ, hem lusim nogud wei bilong hem and Jehovah “chusim” hem for talemaot nem bilong Christ long pipol. “Long semtaem tu [Paul] go preach long olketa sinagog abaotem Jesus and talem long pipol Jesus hem Son bilong God.” (Acts 9:​3-​22) And nomata Paul kasem hard taem and pipol spoelem hem, hem gohed strong for duim ministry.​—2 Cor. 11:23-​29; 12:15.

17. (a) Wanem nao iu laek for duim mekem iu followim Christ? (b) Olketa wanem blessing nao iumi kasem from iumi duim wanem Jehovah laekem witim full heart and strong?

¹⁷ Iumi tu laek followim gudfala example wea olketa disaepol hia showimaot for no mekem excuse bat duim samting kwiktaem for followim Christ. (Heb. 6:​11, 12) Wanem gud samting nao iumi kasem taem iumi gohed trae hard for barava followim Christ? Iumi hapi for duim wanem God laekem and iumi satisfae from iumi duim samfala samting moa long ministry and long kongregeson. (Ps. 40:8; readim 1 Thessalonians 4:1.) Tru tumas, taem iumi barava trae hard for followim Christ, iumi kasem olketa nambawan blessing wea stap for olowe olsem iumi feel gud, iumi satisfae, iumi hapi, God hapi long iumi, and iumi garem hope for kasem laef olowe.​—1 Tim. 4:​10.

Waswe, Iu Tingim Yet?

• Wanem important waka nao God talem iumi for duim, and iumi mas ting hao long waka hia?

• Wanem nao evri man mas keakea long hem, and why nao olsem?

• Wanem nao iumi wanwan shud lukluk gud long hem?

• Wanem nao bae helpem iumi for gohed followim Christ?

[Box/​Piksa long page 27]

Wanem Nao Savve Helpem Iu for Gohed Followim Christ?

▪ Readim Bible evriday and ting raonem wanem iu readim.​—Ps. 1:​1-3; 1 Tim. 4:​15.

▪ Prea staka taem for holy spirit bilong God helpem iu and leadim iu.​—Zech. 4:6; Luke 11:​9, 13.

▪ Fren witim olketa wea strong for duim ministry witim full heart.​—Prov. 13:20; Heb. 10:24, 25.

▪ Luksavve iumi stap long taem wea world hem gogo for finis.​—Eph. 5:​15, 16.

▪ Luksavve long olketa nogud samting wea man kasem from hem “talem excuse.”​—Luke 9:​59-​62.

▪ Ting raonem evritaem wanem iu promisim long Jehovah taem iu dedicate long hem and staka blessing wea iu bae kasem bikos iu worshipim Jehovah and barava followim Christ.​—Ps. 116:12-​14; 133:3; Prov. 10:22.