Chapter Naen
Hu Nao Bae Rulim World?
1-3. Storyim dream and olketa vision wea Daniel lukim long firstfala year long rul bilong Belshazzar.
BARAVA interesting profesi bilong Daniel hem tekem iumi go bak long firstfala year bilong King Belshazzar bilong Babylon. Longtaem nao Daniel hem prisoner long Babylon, bat hem nating wikdaon long faithful fasin bilong hem for Jehovah. Distaem wea hem winim 70 year, datfala faithful profet lukim “wanfala dream and olketa vision insaed hed bilong hem taem hem long bed.” And olketa vision hia mekem hem fraet tumas!—Daniel 7:1, 15.
2 “Lukim long there!” Daniel hem talem. “Fofala wind bilong heven mekem bigfala sea kamap raf. And fofala maeti animal kamaot from sea, each wan hem difren from narawan.” Olketa animal hia mekem man sapraes! First wan hem wanfala lion wea garem wing, and mek-tu hem olsem wanfala bear. Then wanfala leopard wea garem fofala wing and fofala hed! Mek-foa animal wea barava strong hem garem bigfala iron teeth and tenfala horn. Midolwan long tenfala horn bilong hem wanfala “smol” horn kamaot wea garem “eye olsem eye bilong man” and “mouth wea talemaot enikaen bigfala idea.”—Daniel 7:2-8.
3 Then vision bilong Daniel tan go long heven. Man From Taem Bifor Kam hem sidaon witim glory olsem Judge long Kot long heven. “Planti thousand thousand go ahed for servem hem, and ten thousand taems ten thousand go ahed for standap front long hem.” Hem givim nogud judgment for olketa animal hia, and hem tekaotem rul from olketa and finisim mek-foa animal. Rul for olowe ovarem “evri pipol, nation and languis” hem go long “samwan wea olsem son bilong man.”—Daniel 7:9-14.
4. (a) Daniel askem stretfala information from hu nao? (b) Why nao samting wea Daniel lukim and herem long datfala naet hem important long iumi?
4 “And mi,” Daniel hem talem, “spirit bilong mi wari insaed bikos long diswan, and olketa vision insaed hed bilong mi start for mekem mi fraet.” So hem askem from wanfala angel “stretfala information long evri samting hia.” Datfala angel talem hem “mining bilong olketa samting hia.” (Daniel 7:15-28) Iumi interest tumas long samting wea Daniel lukim and herem long datfala naet, bikos hem abaotem olketa samting wea happen long future long world kam kasem taem bilong iumi, taem “samwan wea olsem son bilong man” hem kasem paoa for rul ovarem evri “pipol, nation and languis.” Witim help from Word bilong God and spirit bilong hem, iumi tu savve minim olketa vision bilong profesi hia.a
FOFALA ANIMAL KAMAOT FROM SEA
5. Wanem nao raf sea hem piksarem?
5 “Fofala maeti animal kamaot from sea,” Daniel hem talem. (Daniel 7:3) Wanem nao datfala raf sea hem piksarem? Planti year bihaen, aposol John lukim wanfala wild animal wea garem sevenfala hed hem kamaot from “sea.” Datfala sea hem piksarem “pipol and tribe and nation and languis”—bigfala sekson bilong olketa man wea stap farawe from God. So, sea hem samting wea fit for piksarem planti man wea go difren from God.—Revelation 13:1, 2; 17:15; Isaiah 57:20.
6. Wanem nao fofala animal piksarem?
6 “And olketa maeti animal hia,” angel bilong God talem, “bikos olketa fofala, bae fofala king nao standap from earth.” (Daniel 7:17) Hem klia tumas hao angel showimaot fofala animal wea Daniel lukim olsem “fofala king.” So, fofala animal hia piksarem fofala world paoa. Wanem nao fofala paoa hia?
7. (a) Wanem nao samfala wea raet abaotem Bible sei abaotem vision bilong Daniel abaotem fofala animal and dream bilong Nebuchadnezzar abaotem wanfala maeti image? (b) Wanem nao each wan long fofala metal part bilong datfala image hem piksarem?
7 Olketa wea raet abaotem Bible joinim vision bilong Daniel abaotem fofala animal witim dream bilong Nebuchadnezzar abaotem wanfala maeti image. Olsem example, The Expositor’s Bible Commentary hem sei: “Chapter 7 [bilong Daniel] hem semsem witim chapter 2.” The Wycliffe Bible Commentary hem sei: “Planti agree hao fofala Gentile rul . . . hem semsem long hia [long Daniel chapter 7] olsem long [Daniel] chapter 2.” Fofala world paoa wea fofala metal long dream bilong Nebuchadnezzar piksarem olketa nao Rul Bilong Babylon (gold hed), Media-Persia (silver chest and hand), Greece (copper bele and top part long leg), and Rul Bilong Rome (iron leg).b (Daniel 2:32, 33) Letem iumi lukim hao nao olketa kingdom hia semsem witim fofala maeti animal wea Daniel lukim.
BARAVA RAF OLSEM LION, KWIKTAEM OLSEM EAGLE
8. (a) Hao nao Daniel story abaotem firstfala animal? (b) Wanem rul nao firstfala animal hem piksarem, and hao nao diswan duim samting olsem lion?
8 Daniel lukim olketa animal wea barava difren evribit! Taem hem story abaotem wanfala, hem sei: “First wan hem olsem wanfala lion, and hem garem wing bilong wanfala eagle. Mi lukluk go kasem taem olketa pullimaot wing bilong hem, and olketa liftimap from earth and mekem hem standap long tufala leg olsem man, and olketa givim heart bilong man long hem.” (Daniel 7:4) Disfala animal hem piksarem sem rul wea gold hed bilong datfala maeti image hem piksarem, World Paoa Bilong Babylon (607-539 B.C.E.). Olsem wanfala “lion” wea savve kaikaim man, long raf wei Babylon kaikaim olketa nation, and pipol bilong God tu. (Jeremiah 4:5-7; 50:17) Olsem hem garem wing bilong eagle, disfala “lion” speed go for win.—Lamentations 4:19; Habakkuk 1:6-8.
9. Hao nao datfala animal wea olsem lion hem change, and long wanem wei nao diswan affectim hem?
9 Gogo, olketa “pullimaot” wing bilong datfala lion wea difren evribit. Klosap long end long rul bilong King Belshazzar, Babylon lusim wei wea hem speed for win and rul olsem lion ovarem olketa nation. Hem ran nomoa olsem man long tufala leg. Taem olketa givim hem “heart bilong man,” hem kamap wik. From hem no garem “heart bilong lion,” Babylon no savve duim samting olsem king “midolwan long olketa animal bilong bush.” (Markem 2 Samuel 17:10; Micah 5:8.) Narafala maeti animal winim hem.
HANGRE TUMAS OLSEM BEAR
10. Wanem laen bilong olketa ruler nao datfala “bear” hem piksarem?
10 “Lukim long there!” Daniel hem talem, “narafala animal, mek-tu, hem olsem wanfala bear. And wansaed bilong hem hae ap, and thrifala bone stap long mouth wea hem baetem long teeth bilong hem; and diswan nao wanem olketa talem long hem, ‘Standap, kaikaim planti meat.’” (Daniel 7:5) King wea datfala “bear” piksarem hem nao sem wan wea silver chest and hand bilong maeti image hem piksarem—olketa ruler bilong Media-Persia (539-331 B.C.E.) wea start witim Darius bilong Media and Cyrus the Great and finis witim Darius III.
11. Wei wea tokpiksa bear hem hae ap long wansaed and garem thrifala bone long mouth hem minim wanem samting?
11 Wansaed bilong datfala tokpiksa bear “hem hae ap,” maet hem redy for attakim and bossim olketa nation and keepim paoa long world. Or maet diswan for showimaot hao olketa ruler bilong Persia bae winim rul from King Darius bilong Media. Thrifala bone wea datfala bear baetem maet minim thrifala saed wea hem go for winim olketa ples. Datfala “bear” bilong Media-Persia go long north for kasholem Babylon long 539 B.C.E. Then hem go long west thru long Asia Minor and insaed long Thrace. Last ples, datfala “bear” go long south for winim Egypt. From datfala namba thri hem samfala taem minim strong, thrifala bone maet minim tu greedy fasin bilong datfala bear for win.
12. Wanem nao kamaot from wei wea tokpiksa bear obeyim komand for: “Standap, kaikaim planti meat”?
12 Datfala “bear” attakim olketa nation followim olketa toktok hia: “Standap, kaikaim planti meat.” Taem hem distroem Babylon for fitim will bilong God, Media-Persia hem fit for duim wanfala gudfala samting for pipol bilong Jehovah. And hem duim! (Lukim “Wanfala King Wea Kaen,” long page 149.) Thru long Cyrus the Great, Darius I (Darius the Great), and Artaxerxes I, Media-Persia letem free olketa Jew prisoner long Babylon and helpem olketa for buildim moa temple bilong Jehovah and fixim wall bilong Jerusalem. Gogo, Media-Persia rul ovarem 127 distrik, and hasband bilong Queen Esther, Ahasuerus (Xerxes I), hem “king from India go kasem Ethiopia.” (Esther 1:1) Nomata olsem, narafala animal hem redy for kamap.
FAST OLSEM LEOPARD WEA GAREM WING!
13. (a) Wanem nao mek-thri animal hem piksarem? (b) Storyim wei wea mek-thri animal hem fast tumas and ples wea hem rulim.
13 Mek-thri animal hem “olsem wanfala leopard, bat hem garem fofala wing bilong bird long baksaed bilong hem. And animal hia garem fofala hed, and olketa givim wei for rul long hem.” (Daniel 7:6) Olsem samting wea hem piksarem—datfala copper bele and top part long leg bilong image insaed dream bilong Nebuchadnezzar—disfala leopard wea garem fofala wing and fofala hed hem stand for olketa ruler bilong Macedonia, or Greece, start long Alexander the Great. Olsem wanfala leopard wea savve muv fast tumas, Alexander muv thru long Asia Minor, long south go long Egypt, and long west go kasem spialaen bilong India. (Markem Habakkuk 1:8.) Rul bilong hem moa big winim datfala “bear,” bikos Rul Bilong Macedonia, Greece, and Persia nao insaed long hem.—Lukim “Young King Hem Winim World,” long page 153.
14. Hao nao datfala “leopard” hem kasem fofala hed?
14 Datfala “leopard” kasem fofala hed bihaen Alexander hem dae long 323 B.C.E. Gogo fofala general bilong hem changem hem long olketa difren sekson bilong rul bilong hem. Seleucus keepim Mesopotamia and Syria. Ptolemy kontrolem Egypt and Palestine. Lysimachus rul ovarem Asia Minor and Thrace, and Cassander tekem Macedonia and Greece. (Lukim “Bigfala Kingdom Hem Divaed,” long page 162.) Then wanfala niu danger hem kamap.
ANIMAL WEA MEKEM MAN FRAET HEM DIFREN
15. (a) Storyim lukluk bilong mek-foa animal. (b) Wanem nao mek-foa animal hem piksarem, and hao nao hem smasem and kaikaim evri samting?
15 Daniel story abaotem mek-foa animal olsem hem “mekem man fraet and wea luk nogud and barava strong.” Hem sei moa: “And teeth bilong hem iron, olketa big wan. Hem kaikaim and smasem, and eni samting wea stap yet hem purubutim witim leg bilong hem. And hem difren tumas from olketa narafala animal firstaem long hem, and hem garem tenfala horn.” (Daniel 7:7) Disfala animal hem start olsem paoa bilong politik and army bilong Rome. Hem isisi tekovarem fofala sekson bilong Rul Bilong Greece, and kasem year 30 B.C.E., Rome hem kamap nextfala world paoa long profesi bilong Bible. Rul Bilong Rome iusim army for kontrolem planti ples, gogo hem grow go kasem Britain thru long Europe, go raon long Mediterranean, and winim Babylon go kasem Gulf Bilong Persia.
16. Wanem information nao angel talem abaotem mek-foa animal?
16 From hem want for mek sure long mining bilong disfala animal wea “mekem man fraet tumas,” Daniel lisin gud taem angel minim long hem: “And tenfala horn [bilong hem], tenfala king bae kamap from datfala kingdom; and narawan moa bae kamap bihaenem olketa, and hem bae difren from olketa first wan, and hem bae daonem thrifala king.” (Daniel 7:19, 20, 24) Wanem nao “tenfala horn” hia or “tenfala king”?
17. Wanem nao “tenfala horn” bilong mek-foa animal hem piksarem?
17 Taem Rome kamap moa rich and fasin kamap moa dirty bikos long olabaot living bilong olketa wea rul, hem start for go daon olsem strongfala paoa witim army. Gogo, wei wea army bilong Rome no strong hem showaot klia. Datfala strongfala rul hem divaed for kamap planti kingdom. From planti taem Bible iusim namba ten for minim wei for kasem full namba, “tenfala horn” bilong mek-foa animal stand for evri kingdom wea kamap taem Rome hem divaed.—Markem Deuteronomy 4:13; Luke 15:8; 19:13, 16, 17.
18. Hao nao Rome go ahed for rulim Europe for planti handred year bihaen olketa aotem lastfala king bilong hem?
18 Bat, World Paoa Bilong Rome hem no finis taem olketa aotem lastfala king bilong Rome long 476 C.E. For planti handred year, pope bilong Rome garem paoa long saed bilong politik, and main wei long saed long religion, for rulim Europe. Hem duim diswan thru long feudal system, wea klosap evri pipol long Europe stap anda long wanfala lord, then long wanfala king. And evri king luksavve long paoa bilong pope. So Holy Rul Bilong Rome, witim pope long Rome olsem main part, hem rulim world long taem bilong history wea olketa kolem Dark Ages.
19. Wanem nao wanfala man for raetem history talem abaotem wei wea Rome hem difren from olketa rul firstaem long hem?
19 Hu nao savve denyim wei wea mek-foa animal hem “difren from evri narafala kingdom”? (Daniel 7:7, 19, 23) Man for raetem history H. G. Wells raet olsem abaotem diswan: “Disfala niu paoa bilong Rome . . . hem difren from eniwan long olketa bigfala rul wea kamap firstaem long hem. . . . [Hem] joinim tugeta klosap evri Greek pipol long world, and hem no garem staka Hamite and Semite pipol olsem olketa narafala rul firstaem long hem . . . Kasem datfala taem hem wanfala niu samting long history . . . Rul Bilong Rome hem samting wea grow, niu kaen wei for grow wea olketa no planim; pipol bilong Rome no savve olketa insaed long wanfala bigfala experiment.” Bat, mek-foa animal hia bae grow moa.
WANFALA SMOL HORN WINIM OLKETA NARAWAN
20. Wanem nao angel talem abaotem wei wea wanfala smol horn hem grow kamaot long hed bilong mek-foa animal?
20 “Mi lukluk long olketa horn,” Daniel hem talem, “and, lukim! narafala horn, smol wan, hem kamaot from midolwan long olketa, and hem pullimaot thrifala first horn front long hem.” (Daniel 7:8) Angel sei olsem long Daniel abaotem disfala horn wea grow: “Narawan moa bae kamap bihaenem olketa [tenfala king], and hem bae difren from olketa first wan, and hem bae daonem thrifala king.” (Daniel 7:24) Hu nao disfala king, wanem taem nao hem kamap, and hu nao thrifala king wea hem daonem?
21. Hao nao Britain kamap tokpiksa smol horn bilong mek-foa animal?
21 Lukim olketa samting wea happen. Long 55 B.C.E., General Julius Caesar bilong Rome attakim Britain bat hem fail for startim wanfala ples for olketa stap long there. Long 43 C.E., King Claudius start for winim south Britain. Then, long 122 C.E., King Hadrian start for buildim wanfala wall from Tyne River go kasem Solway Firth, wea markem spialaen bilong Rul Bilong Rome long north saed. Long start bilong mek-faev century, army bilong Rome lusim datfala island. Wanfala man for raetem history hem sei: “Long mek-sixtin century, England hem smolfala rul nomoa. Hem no rich olsem Netherlands. Hem no garem staka pipol olsem France. Army bilong hem (and navy tu) no big olsem bilong Spain.” Long datfala taem Britain hem smolfala kingdom nomoa, wea tokpiksa smol horn bilong mek-foa animal hem piksarem. Bat, datwan bae change.
22. (a) Wanem nao nara thrifala horn bilong mek-foa animal wea “smol” horn hem winim? (b) Bihaen, Britain hem kamap wanem?
22 Long 1588, Philip II bilong Spain hem startim Spanish Armada againstim Britain. Disfala navy wea garem 130 ship, wea karem winim 24,000 man, hem sail thru long English Channel, bat navy bilong Britain winim hem and strongfala wind and raf sea bilong Atlantic finisim hem. Wanfala man for raetem history sei disfala samting wea happen hem “markem wei wea navy bilong England hem moa strong winim Spain.” Long mek-17 century, Netherlands startim olketa shipping company wea big winim evriwan long world. Bat, from Britain start for rulim staka narafala kantri, hem winim datfala kingdom. Long mek-18 century, Britain and France faet long North America and India, wea lead go for Agreement Bilong Paris long 1763. Man wea raet, William B. Willcox hem sei disfala agreement “luksavve long niufala position bilong Britain olsem main paoa insaed Europe wea affectim world aotsaed long Europe.” Taem Britain winim evribit Napoléon bilong France long 1815 C.E., diswan strongim moa paoa bilong hem. So, “thrifala king” wea Britain “daonem” olketa hem Spain, Netherlands, and France. (Daniel 7:24) From diswan, Britain kamap paoa wea rulim staka kantri and garem bigfala bisnis. Tru nao, datfala “smol” horn grow for kamap wanfala world paoa!
23. Long wanem wei nao tokpiksa smol horn hem “kaikaim full earth”?
23 Angel talem Daniel hao mek-foa animal, or mek-foa kingdom, bae “kaikaim full earth.” (Daniel 7:23) Datwan hem fitim province bilong Rome wea olketa kolem Britannia bifor. Gogo hem kamap Rul Bilong Britain and hem “kaikaim full earth.” Long wantaem, disfala rul hem rul ovarem wanfala long evri fofala land bilong earth, and wanfala long evri fofala man.
24. Wanem nao wanfala man for raetem history hem talem abaotem wei wea Rul Bilong Britain hem difren?
24 Long sem wei wea Rul Bilong Rome hem difren from olketa world paoa bifor, king wea “smol” horn piksarem tu bae “difren from olketa first wan.” (Daniel 7:24) Man for raetem history H. G. Wells raet olsem abaotem Rul Bilong Britain: “No eni samting olsem hem stap bifor. First and main part bilong disfala rul hem ‘republic gavman wea garem king’ bilong United British Kingdoms . . . No eni sekson for plan and no eni man tingim disfala idea bilong wei wea Britain rul long bigfala wei. Anda long diswan olketa hipimap planti kantri wea go ahed for change and difren evribit from olketa rul bifor.”
25. (a) Long distaem, hu nao insaed long tokpiksa smol horn? (b) Long wanem wei nao “smol” horn garem “eye olsem eye bilong man” and “mouth wea talemaot enikaen bigfala idea”?
25 Rul Bilong Britain hem no only samting wea insaed long datfala “smol” horn. Long 1783, Britain agree for givim independence long 13-fala territory bilong hem long America. Gogo United States of America hem kamap partner bilong Britain, and bihaen World War II hem kamap strongfala nation long earth winim evriwan. Hem fren gud yet witim Britain. Datfala world paoa bilong England-America nao kamap datfala ‘horn wea garem eye.’ Tru nao, disfala world paoa hem lukluk long evri samting, and hem kleva tumas! Hem “talemaot enikaen bigfala idea,” long wei wea hem talemaot olketa law for planti pipol long world and duim waka olsem mouth, or “giaman profet,” bilong hem.—Daniel 7:8, 11, 20; Revelation 16:13; 19:20.
SMOL HORN AGAINSTIM GOD AND OLKETA HOLY WAN
26. Wanem nao angel talemaot abaotem toktok and samting wea tokpiksa horn duim long Jehovah and olketa servant bilong hem?
26 Daniel go ahed for storyim vision wea hem lukim, hem sei: “Mi lukluk taem datfala horn faet againstim olketa holy wan, and hem winim olketa.” (Daniel 7:21) Angel bilong God talem profesi olsem abaotem datfala “horn,” or king: “Hem bae tok againstim Most Hae, and hem bae go ahed for againstim olketa holy wan bilong Most Hae Wan. And hem bae trae for changem olketa taem and law, and olketa bae stap anda long hem for wanfala taem, and olketa taem and haf taem.” (Daniel 7:25) Hao nao and long wanem taem nao disfala part bilong profesi hem fulfill?
27. (a) Hu nao “olketa holy wan” wea “smol” horn persecutim? (b) Hao nao tokpiksa horn trae for “changem olketa taem and law”?
27 “Olketa holy wan” wea “smol” horn—World Paoa Bilong England-America—persecutim olketa nao anointed follower bilong Jesus long earth. (Romans 1:7; 1 Peter 2:9) Planti year bifor World War I, remnant bilong olketa anointed wan hia talemaot long pablik hao 1914 bae end bilong “taem bilong olketa nation wea set finis.” (Luke 21:24) Taem war hem start long datfala year, hem showaot klia hao datfala “smol” horn no lisin long disfala warning, bikos hem go ahed for attakim olketa anointed “holy wan.” World Paoa Bilong England-America againstim tu wei wea olketa trae for duim samting (or, “law”) wea Jehovah askem olketa witness bilong hem for preachim gud nius bilong Kingdom evriwea long world. (Matthew 24:14) So datfala “smol” horn trae for “changem olketa taem and law.”
28. Hao long nao datfala “wanfala taem, and olketa taem and haf taem”?
28 Angel bilong Jehovah story abaotem wanfala taem bilong profesi wea hem nao “wanfala taem, and olketa taem and haf taem.” Hao long nao datwan? Olketa wea raet abaotem Bible agree hao disfala toktok hem minim thri and haf taem—total bilong wanfala taem, tufala taem, and haf taem. From “sevenfala taem” wea Nebuchadnezzar kamap mentol hem sevenfala year, datfala thri and haf taem hem thri and haf year.c (Daniel 4:16, 25) An American Translation hem sei: “Bae olketa givim olketa go long hem for wanfala year, tufala year, and haf year.” Transleison bilong James Moffatt hem sei: “For thrifala year and haf year.” Datfala sem sekson bilong taem hem stap long Revelation 11:2-7, wea sei olketa witness bilong God bae preach witim kaleko bilong sorre for 42 month, or 1,260 day, and then bae olketa dae. Wanem taem nao diswan hem start and finis?
29. Wanem taem and hao nao datfala thri and haf year bilong profesi hem start?
29 For olketa anointed Christian, World War I hem wanfala taem bilong test. Long end bilong 1914, olketa weit for kasem persecution. Tru nao, yeartext for 1915 hem kwestin bilong Jesus for olketa disaepol bilong hem, “Waswe, iufala fit for drinkim kap bilong mi?” Hem kam from Matthew 20:22 long King James Version. Dastawe, start long December 1914, datfala smol sekson bilong olketa witness preach “witim kaleko bilong sorre.”
30. Hao nao World Paoa Bilong England-America againstim olketa anointed Christian long World War I?
30 Taem wei for saportim war kamap strong tumas, pipol againstim olketa anointed Christian long bigfala wei. Pipol putim samfala long prison. Samfala nogud bigman long gavman barava spoelem olketa man olsem Frank Platt long England and Robert Clegg long Canada. Long February 12, 1918, British Dominion bilong Canada hem tambuim mek-seven volume bilong Studies in the Scriptures, wea garem title The Finished Mystery, and olketa tract tu wea garem title The Bible Students Monthly. Long month bihaen, U.S. Department Bilong Justice sei wei for givimaot datfala mek-seven volume hem againstim law. Wanem nao kamaot from diswan? Olketa lukaotem buk hia long olketa haos, tekem, and arrestim olketa worshiper bilong Jehovah!
31. Wanem taem and hao nao datfala “wanfala taem, and olketa taem and haf taem” hem finis?
31 Wei for againstim olketa anointed wan bilong God hem kasem worse taem long June 21, 1918, taem olketa judgem president J. F. Rutherford, and olketa important member bilong Watch Tower Bible and Tract Society long giaman wei and sendem olketa long prison. From hem plan for “changem olketa taem and law,” datfala “smol” horn killim dae preaching waka wea organize. (Revelation 11:7) So datfala “wanfala taem, and olketa taem and haf taem” bilong profesi hem finis long June 1918.
32. Why nao iumi fit for sei “smol” horn no finisim evribit “olketa holy wan”?
32 Bat “olketa holy wan” no finis evribit taem “smol” horn againstim olketa. Olsem profesi insaed buk bilong Revelation hem talem, bihaen shortfala taem bilong no eni waka, olketa anointed Christian laef bak and duim waka moa. (Revelation 11:11-13) Long March 26, 1919, president bilong Watch Tower Bible and Tract Society and olketa wea waka witim hem kamaot from prison, and bihaen, olketa aotem evri giaman judgment againstim olketa. Stretawe bihaen, anointed remnant start for organize moa for waka. Bat, wanem nao bae happen long datfala “smol” horn?
MAN FROM TAEM BIFOR KAM HEM STARTIM KOT
33. (a) Hu nao Man From Taem Bifor Kam? (b) Wanem nao ‘olketa buk wea olketa openem’ long Kot long heven?
33 Bihaen hem storyim fofala animal, eye bilong Daniel lusim datfala mek-foa animal and luk go long heven. Hem lukim Man From Taem Bifor Kam hem sidaon long nambawan throne bilong hem olsem Judge. Datfala Man From Taem Bifor Kam hem nao Jehovah God. (Psalm 90:2) Taem Kot long heven hem sidaon, Daniel lukim “olketa openem olketa buk.” (Daniel 7:9, 10) From Jehovah stap olowe, hem savve long full history bilong olketa man wea olsem hem raetem finis insaed wanfala buk. Hem lukluk finis long fofala tokpiksa animal and savve judgem olketa from samting wea hem lukim.
34, 35. Wanem nao bae happen long datfala “smol” horn and olketa rul wea olsem animal?
34 Daniel sei moa: “Long datfala taem mi lukluk bikos long saond bilong enikaen bigfala idea wea datfala horn hem talem; mi lukluk go kasem taem wea olketa killim dae datfala animal and finisim evribit body bilong hem and burnim long fire. Bat for olketa narafala animal, olketa tekaotem rul bilong olketa, and givim lelebet moa taem for olketa laef for wanfala taem and wanfala season.” (Daniel 7:11, 12) Datfala angel talem Daniel: “Kot hem sidaon, and gogo olketa tekaotem rul bilong hem, for spoelem hem and finisim hem evribit.”—Daniel 7:26.
35 From order bilong Nambawan Judge, Jehovah God, datfala horn wea tokspoelem God and againstim “olketa holy wan” bilong hem bae kasem sem samting olsem Rul Bilong Rome wea persecutim olketa firstfala Christian. Rul bilong hem bae no go ahed. Rul bilong olketa smolfala “king” wea olsem horn wea kamaot from Rul Bilong Rome bae no go ahed tu. Bat, waswe long olketa rul wea kamaot from olketa rul bifor wea olsem animal? Olsem profesi talem, olketa kasem laef for lelebet moa taem for “wanfala taem and wanfala season.” Territory bilong olketa go ahed for garem pipol kam kasem taem bilong iumi. Olsem samfala example, Iraq hem stap long territory bilong Babylon bifor. Persia (Iran) and Greece stap yet distaem. Olketa nation bilong olketa world paoa hia wea stap yet distaem olketa part long United Nations. Olketa kingdom hia bae finis tu taem lastfala world paoa hem finis evribit. Evri gavman bilong man bae finis evribit long “war bilong bigfala day bilong God Almighty.” (Revelation 16:14, 16) Sapos olsem, hu nao bae rulim world?
RUL FOR OLOWE STAP LONG FRONT!
36, 37. (a) “Samwan wea olsem son bilong man” hem minim hu nao, and wanem taem nao and why nao hem go long Kot long heven? (b) Wanem nao start long 1914 C.E.?
36 “Mi go ahed for lukim olketa vision long naet, and, lukim long there!” Daniel hem talem. “Witim olketa cloud bilong heven samwan wea olsem son bilong man hem kam; and hem kam long Man From Taem Bifor Kam, and olketa tekem hem klosap long dat Wan.” (Daniel 7:13) Taem hem stap long earth, Jesus Christ kolem hemseleva “Son bilong man” for showimaot wei wea hem klos long olketa man. (Matthew 16:13; 25:31) Jesus sei olsem long Sanhedrin, or hae kot bilong olketa Jew: “Iufala bae lukim Son bilong man hem sidaon long raet saed bilong paoa and kam witim olketa cloud bilong heven.” (Matthew 26:64) So long vision bilong Daniel, dat wan wea kam, wea olketa man no savve lukim, and wea go long Jehovah God hem nao Jesus Christ wea resurrect and kasem glory. Wanem taem nao diswan hem happen?
37 God mekem wanfala covenant for wanfala Kingdom witim Jesus Christ, olsem hem mekem wanfala witim King David. (2 Samuel 7:11-16; Luke 22:28-30) Long taem wea “taem bilong olketa nation wea set finis” hem end long 1914 C.E., Jesus Christ, wea hem kam from laen bilong King David, fit for kasem datfala Kingdom rul. Profesi buk bilong Daniel hem sei: “Hem kasem paoa for rul and honor and kingdom, mekem evri pipol, nation and languis mas servem hem. Rul bilong hem for olowe and hem bae no finis, and kingdom bilong hem bae no eniwan spoelem.” (Daniel 7:14) So datfala Messiah Kingdom hem start long heven long 1914. Bat, samfala moa tu kasem paoa for rul.
38, 39. Hu nao bae kasem paoa for rul olowe ovarem world?
38 “Olketa holy wan bilong Most Hae Wan bae kasem kingdom,” datfala angel talem. (Daniel 7:18, 22, 27) Jesus Christ nao main holy wan. (Acts 3:14; 4:27, 30) Olketa nara “holy wan” wea share insaed datfala rul nao 144,000 faithful Christian wea spirit anointim, wea bae rul long Kingdom witim Christ. (Romans 1:7; 8:17; 2 Thessalonians 1:5; 1 Peter 2:9) Olketa resurrect from dae olsem spirit wea kanduit dae for rul witim Christ long Maunt Zion long heven. (Revelation 2:10; 14:1; 20:6) From diswan, Christ Jesus and olketa anointed Christian wea resurrect bae rulim world bilong olketa man.
39 Taem hem story abaotem rul bilong Son bilong man and “olketa holy wan” wea resurrect, angel bilong God hem sei: “Datfala kingdom and datfala rul and datfala glory bilong olketa kingdom anda long heven olketa givim long pipol wea olketa holy wan bilong Most Hae Wan. Kingdom bilong olketa hem kingdom for olowe, and evriwan bae servem and obeyim olketa tu.” (Daniel 7:27) Olketa man wea obey bae kasem olketa blessing anda long datfala Kingdom!
40. Hao nao iumi savve kasem gudfala samting from wei for tingting strong long dream and olketa vision bilong Daniel?
40 Daniel no savve long evri nambawan wei wea olketa vision wea God givim long hem bae fulfill. Hem sei: “Kam kasem distaem diswan hem finis nao. For mi, Daniel, tingting bilong mi mekem mi barava fraet tumas, and lukluk bilong mi change nao; bat disfala samting mi keepim insaed long heart bilong mi.” (Daniel 7:28) Bat, iumi stap long taem wea iumi savve minim hao olketa samting wea Daniel lukim hem fulfill. Wei for tingting strong long disfala profesi bae strongim faith and wei wea iumi barava sure hao Messiah King bilong Jehovah nao bae rulim world.
[Olketa Footnote]
a For minim gud and no talem sem samting moa, bae iumi storyim Daniel 7:15-28 long semtaem wea iumi storyim each verse bilong olketa vision long Daniel 7:1-14.
b Lukim Chapter 4 bilong disfala buk.
c Lukim Chapter 6 bilong disfala buk.
WANEM NAO IU LANEM?
• Each wan long ‘fofala maeti animal wea kamaot from sea’ hem piksarem wanem?
• Hu nao insaed long “smol” horn?
• Hao nao tokpiksa smol horn hem againstim “olketa holy wan” long World War I?
• Wanem nao bae happen long tokpiksa smol horn and olketa rul wea olsem animal?
• Wanem gudfala samting nao iu kasem taem iu tingting strong long dream and olketa vision bilong Daniel abaotem “fofala maeti animal”?
[Box/Piksa long page 149-152]
WANFALA KING WEA KAEN
WANFALA Greek man for raet long mek-faev century B.C.E. story abaotem hem olsem wanfala kaen and gudfala king. Bible kolem hem “anointed wan” bilong God and “wanfala bird for hunting” wea kam from “ples wea sun kamap.” (Isaiah 45:1; 46:11) Disfala king nao hem Cyrus the Great, bilong Persia.
Cyrus hem start for kasem bignem long samting olsem 560/559 B.C.E. taem hem changem dadi bilong hem Cambyses I for kamap king bilong Anshan, wanfala taon or distrik long Persia bifor. Anshan hem stap anda long King Astyages bilong Media. Cyrus go againstim rul bilong Media and win kwiktaem bikos army bilong Astyages saed witim hem. Then olketa long Media start for loyal long Cyrus. Bihaen datwan, olketa bilong Media and Persia faet tugeta anda long hem. Hem nao wei wea rul bilong Media-Persia kamap and gogo mekem rul bilong hem kamap big from Aegean Sea go kasem Indus River.—Lukim map.
Witim tufala army bilong Media and Persia wea join tugeta, firstaem Cyrus go long wanfala area wea trabol start for kamap—west saed long Media wea King Croesus bilong Lydia hem tekova long samfala territory bilong Media. Cyrus go long east spialaen bilong Rul Bilong Lydia long Asia Minor, and hem winim Croesus and tekova long kapitol bilong hem, Sardis. Then Cyrus tekova long samfala taon long Ionia and mekem full Asia Minor stap anda long Rul Bilong Media-Persia. From diswan hem kamap main enemy bilong Babylon and king bilong hem, Nabonidus.
Then Cyrus mekredy for feisim maeti Babylon. And from datfala taem hem start for join insaed long Bible profesi wea fulfill. Thru long profet Isaiah, klosap 200 year bifor, Jehovah hem sei Cyrus nao ruler wea bae winim Babylon and mekem olketa Jew kamap free from wei for olsem prisoner. From hem kasem disfala waka firstaem, Bible kolem Cyrus “anointed wan” bilong Jehovah.—Isaiah 44:26-28.
Taem Cyrus kam for attakim Babylon long 539 B.C.E., hem feisim barava hardfala samting. From datfala taon garem olketa bigfala wall and waed and deep drain bilong river Euphrates wea raonem, luk olsem hem hard tumas for eniwan go insaed. Long ples wea Euphrates hem go thru long Babylon, wanfala barava hae wall wea garem olketa maeti copper gate hem stap long saed bilong river. Hao nao Cyrus bae tekem Babylon?
Winim 100 year bifor, Jehovah talemaot bae “bigfala trabol kasem wata bilong hem” and “hem bae kamap drae.” (Jeremiah 50:38) Long wei wea profesi talem, Cyrus changem gogo bilong wata bilong Euphrates River tu-thri kilometer north long Babylon. Then army bilong hem go daon followim river, klaemap smol hill wea wall stap long hem, and go insaed datfala taon bikos olketa copper gate bilong hem open nomoa. Olsem “wanfala bird for hunting” wea kwiktaem attak, disfala ruler wea kam from “ples wea sun kamap”—from east—kasholem Babylon insaed wanfala naet!
For olketa Jew long Babylon, wei wea Cyrus win hem minim olketa bae kamap free from wei for prisoner and 70 year wea homland bilong olketa stap emti hem finis nao. Olketa mas hapi tumas taem Cyrus talemaot wanfala toktok wea letem olketa for go bak long Jerusalem and buildim temple moa! Cyrus givim bak long olketa tu olketa dish bilong temple wea Nebuchadnezzar tekem go long Babylon, hem letem olketa for tekem timba from Lebanon, and givim selen from haos bilong king for peim kost bilong building.—Ezra 1:1-11; 6:3-5.
Long planti wei Cyrus hem kaen and deal long gudfala wei witim pipol wea hem winim. Maet wanfala reason for diskaen fasin hem religion bilong hem. Luk olsem Cyrus followim olketa teaching bilong profet Zoroaster bilong Persia and worshipim Ahura Mazda—wanfala god wea olketa sei hem creator bilong evri gudfala samting. Insaed buk bilong hem The Zoroastrian Tradition, Farhang Mehr raet olsem: “Zoroaster sei God hem perfect long saed bilong fasin. Hem talem pipol hao Ahura Mazda hem no laek for pei bak bat hem followim justice so pipol mas no fraet long hem bat lovem hem.” Wei for bilivim wanfala god wea garem gudfala fasin and followim justice maet affectim fasin bilong Cyrus and encouragem kaenfala fasin and wei for deal semsem witim evriwan.
Bat, datfala king no laekem tumas weather long Babylon. Hem barava hot tumas long hem. So nomata Babylon hem taon bilong king long datfala rul, and main ples bilong religion and kastom, hem savve stap long there long coldfala season nomoa. Tru nao, bihaen hem winim Babylon, Cyrus go bak long summer kapitol bilong hem, Ecbatana, wea hae bilong hem 1,900 meter winim sea level, long botom bilong Maunt Alwand. Long there, hem laekem olketa naesfala summer wea balancem coldfala season. Cyrus buildim tu wanfala naes haos long firstfala kapitol bilong hem, Pasargadae (klosap long Persepolis), wea stap 650 kilometer long southeast bilong Ecbatana. Hem savve rest long datfala haos.
So hem nao wei wea Cyrus garem nem olsem wanfala kaen king, bat wea no fraet. Rul bilong hem for 30 year hem finis taem hem dae long 530 B.C.E. taem hem leadim army. Son bilong hem Cambyses II nao changem hem for rul long Persia.
WANEM NAO IU LANEM?
• Hao nao Cyrus bilong Persia kamap “anointed wan” bilong Jehovah?
• Wanem nambawan samting nao Cyrus duim for pipol bilong Jehovah?
• Hao nao Cyrus deal witim pipol wea hem winim?
[Map]
(For formatted text, lukim pablikeson)
RUL BILONG MEDIA-PERSIA
MACEDONIA
Memphis
EGYPT
ETHIOPIA
Jerusalem
Babylon
Ecbatana
Susa
Persepolis
INDIA
[Piksa]
Grev bilong Cyrus, long Pasargadae
[Piksa]
Karving long haos bilong Cyrus long Pasargadae
[Box/Piksa long page 153-161]
YOUNG KING HEM WINIM WORLD
SAMTING olsem 2,300 year go finis, wanfala general bilong army wea garem white hair and wea just winim 20 year hem standap saed long Mediterranean Sea. Hem lukluk strong long wanfala island-taon wea klosap wan kilometer from there. From olketa no letem hem for go insaed long there, datfala general wea kros tumas hem disaed strong for winim datfala taon. Wanem nao plan bilong hem for attak? Buildim wanfala road wea go kasem datfala island and sendem army bilong hem for againstim datfala taon. Olketa start finis for buildim datfala road.
Bat wanfala message from king bilong Persia hem kasem datfala young general. From hem want for mek peace, datfala ruler bilong Persia offerim hem barava spesol samting: 10,000 talent long gold (winim naen billion dollar long selen distaem), for hem maritim wanfala dota bilong king, and rul ovarem full west saed long Rul Bilong Persia. Datfala general bae kasem evri samting hia sapos hem givim bak famili bilong king wea hem kasholem.
Datfala komanda wea mas disaed for acceptim or rejectim disfala offer hem Alexander III bilong Macedonia. Waswe, bae hem acceptim? “Datwan hem wanfala barava important taem for world bifor,” man for raetem history Ulrich Wilcken hem talem. “Yes, samting wea kamaot from wanem hem disaedem hem affectim living thru long Middle Ages kam kasem taem bilong iumi, long East and long West.” Bifor iumi lukim ansa bilong Alexander, letem iumi lukim wanem nao evri samting wea lead go long disfala important taem.
MAN FOR WIN HEM BORN
Alexander hem born long Pella, Macedonia, long 356 B.C.E. Dadi bilong hem King Philip II, and mami bilong hem, Olympias. Hem teachim Alexander hao olketa king bilong Macedonia kam from Hercules, wanfala son bilong Greek god Zeus. Olympias sei laen dadi bilong Alexander hem Achilles, man wea datfala poem Iliad, bilong Homer, hem storyim. From dadi and mami bilong hem lanem hem for win and kasem glory olsem king, young Alexander no interest long olketa narafala samting. Taem olketa askem hem sapos hem laek for ran long resis long Olympic Games, Alexander sei hem bae ran sapos hem resis witim olketa king. Goal bilong hem for duim bigfala samting winim dadi bilong hem and kasem glory thru long olketa samting wea hem duim.
Taem hem kasem 13 year, Alexander skul anda long Greek savveman Aristotle, wea helpem hem for interest long olketa idea, medicine, and science. Iumi no sure hao nao olketa teaching bilong Aristotle hem affectim wei bilong Alexander for tingting. “Maet hem fitim for sei tufala hia no agree long planti samting,” wanfala savveman bilong mek-20 century, Bertrand Russell hem talem. “Olketa idea bilong Aristotle long saed bilong politik join witim wei wea evri Greek taon mas rulim seleva, wea disfala idea gogo for finis.” Wanfala prince wea barava wantem tumas for buildim bigfala rul bae no laekem idea for evri taon garem smolfala gavman wea rulim seleva. Maet Alexander daotem tu idea bilong Aristotle for deal witim olketa wea no Greek olsem slave, bikos hem tingim wanfala rul wea evriwan stap gud tugeta.
Bat, no eni daot stap abaotem wei wea Aristotle mekem grow interest bilong Alexander for read and lane. Long full laef bilong hem, Alexander interest tumas for read, hem laekem tumas for readim olketa raeting bilong Homer. Pipol sei hem baeheartim datfala Iliad—poem wea garem 15,693 laen.
Seknomoa teaching from Aristotle hem finis long 340 B.C.E. taem datfala prince wea 16 year go bak long Pella for rulim Macedonia taem dadi bilong hem no stap. And datfala prince wea bae rul hem kwiktaem for showimaot klia savve bilong hem for faet. Philip hapi tumas taem hem kwiktaem winim bighed Maedi tribe bilong Thrace, hem kwiktaem tekovarem main taon bilong olketa, and givim nem Alexandroúpolis, nem bilong hemseleva long datfala ples.
GO AHED FOR WIN
Taem pipol killim dae Philip long 336 B.C.E., Alexander wea 20 year hem start for rul long Macedonia. Alexander go insaed Asia long Hellespont (wea distaem hem Dardanelles) long spring bilong 334 B.C.E. and witim smol army wea garem 30,000 soldia wea wakabaot and 5,000 soldia wea raedem horse, hem start for tekovarem olketa kantri. Olketa engineer, surveyor, architect, scientist, and man for raetem history go witim army bilong hem.
Long Granicus River long northwest saed bilong Asia Minor (wea distaem hem Turkey), Alexander winim firstfala faet bilong hem againstim olketa bilong Persia. Long taem bilong coldfala season, hem winim western Asia Minor. Long nextfala autumn, mek-tu important faet witim olketa bilong Persia hem kamap long Issus, long southeast saed bilong Asia Minor. Witim army wea garem haf million man, King Darius III bilong Persia kam for meetim Alexander. Darius wea trustim seleva tumas tekem kam tu mami, waef, and olketa narafala member long famili bilong hem mekem olketa savve lukim taem hem win. Bat olketa bilong Persia no redy for attak bilong olketa long Macedonia wea kwiktaem and strong. Army bilong Alexander winim evribit army bilong Persia, and Darius ranawe, and leavim famili bilong hem long hand bilong Alexander.
Alexander no aftarem olketa bilong Persia wea ranawe bat hem march go south long saedsea bilong Mediterranean, and tekova long olketa strongfala ship bilong Persia. Bat island-taon bilong Tyre hem stand strong long datfala attak. From hem want for winim Tyre, Alexander startim wanfala attak wea go ahed for sevenfala month. Long taem bilong datfala attak Darius talem peace offering wea iumi storyim long firstaem. From offer hia hem big tumas, Parmenio, man for givim advaes long Alexander wea hem trustim tumas, hem sei olsem: ‘Sapos mi Alexander, bae mi acceptim.’ Bat Alexander ansa bak: ‘Mi tu bae acceptim, sapos mi Parmenio.’ Alexander nating want for acceptim datfala offer, and hem go ahed long datfala attak and finisim evribit datfala praod taon bilong sea long July 332 B.C.E.
Alexander no attakim Jerusalem, wea sarenda long hem, bat hem go long south and winim Gaza. From hem les long rul bilong Persia, Egypt welkamim hem olsem man for sevem hem. Long Memphis hem mekem sakrifaes long Apis, wanfala buluka god, and mekem olketa priest bilong Egypt hapi. Hem startim tu taon bilong Alexandria, wea bihaen kamap semsem witim Athens olsem main ples for kasem savve and distaem hem garem yet datfala nem.
Then, Alexander tan long northeast, hem muv thru long Palestine and go long Tigris River. Long year 331 B.C.E., hem faetem mek-thri bigfala faet witim olketa bilong Persia, long Gaugamela, klosap long Nineveh wea finis evribit. Long hia 47,000 man bilong Alexander winim army bilong Persia wea maet garem 250,000 man! Darius ranawe and bihaen pipol bilong hemseleva killim hem dae.
From hem win long bigfala wei, Alexander tan go long south and tekem Babylon, datfala kapitol bilong Persia. Hem tekova tu long olketa kapitol long Susa and Persepolis, tekem staka richfala samting bilong Persia and burnim bigfala haos bilong Xerxes. Gogo, kapitol long Ecbatana hem foldaon. Then disfala man wea kwiktaem tumas for win hem tekova long narafala part long rul bilong Persia, go kasem east long Indus River, wea distaem hem Pakistan.
Taem hem akrosim Indus, long area wea stap long spialaen long Taxila, wanfala province bilong Persia, Alexander meetim wanfala strong enemy, King Porus bilong India. Alexander faetem mek-foa and lastfala faet againstim hem long June 326 B.C.E. Army bilong Porus garem 35,000 soldia and 200 elephant, wea mekem olketa horse bilong olketa bilong Macedonia fraet tumas. Datfala faet hem raf tumas and staka soldia dae, bat army bilong Alexander winim. Porus hem sarenda and joinim hem.
Winim eitfala year go pas from taem wea army bilong Macedonia go insaed long Asia, and olketa soldia feel taed and homsik. From faet witim Porus hem raf tumas, olketa want for go bak long hom. Nomata firstaem hem no laekem, Alexander followim wanem olketa laekem. Greece hem kamap world paoa nao. From olketa Greek pipol stap long olketa kantri wea olketa winim, Greek languis and kastom hem go kasem evri ples bilong datfala rul.
MAN BIHAENEM SHIELD
Samting wea holem tugeta army bilong Macedonia long olketa year wea hem win hem nao fasin bilong Alexander. Bihaen olketa faet, Alexander savve visitim olketa wea garekil, lukluk long kill bilong olketa, praisem olketa soldia for strongfala samting wea olketa duim, and honorim olketa witim selen fitim wanem olketa duim. For olketa wea dae long faet, Alexander arrangem spesol samting taem olketa berem olketa. Dadi and mami and pikinini bilong olketa man wea dae no need for peim tax and duim waka. For hapitaem bihaen long olketa faet, Alexander arrangem olketa game and resis. Long wantaem, hem arrangem tu for olketa man wea just marit for go bak and stap witim waef bilong olketa long taem bilong coldfala season, long Macedonia. Olketa samting olsem mekem olketa man bilong hem lovem and tinghae long hem.
Taem hem raet abaotem marit bilong Alexander long Princess Roxana bilong Bactria, Greek man for raet, Plutarch sei olsem: “Hem barava lovem hem, and long semtaem marit hia mekem hem fit for kasem goal bilong hem. Pipol wea hem winim feel hapi for lukim hem chusim wanfala waef from midolwan long olketa, and olketa tinghae tumas long hem from olketa lukim hao long only samting wea hem lovem tumas, hem bossim seleva go kasem taem hem maritim girl hia long wei wea fitim law.”
Alexander respectim tu marit bilong narafala pipol. Nomata waef bilong King Darius stap olsem prisoner bilong hem, hem mek sure olketa deal witim hem long gudfala wei. Olsem tu, taem hem herem tufala soldia bilong Macedonia spoelem waef bilong samfala stranger, hem givim order for killim dae tufala sapos olketa faendem tufala guilty.
Olsem mami bilong hem, Olympias, Alexander hem strong long religion. Hem savve mekem sakrifaes bifor and bihaen olketa faet and askem olketa man bilong hem wea duim divination abaotem mining bilong difren saen. Hem askem tu man bilong Ammon, long Libya, wea savve story witim heathen god. And long Babylon hem followim instruction bilong olketa long Chaldea abaotem sakrifaes, main wan nao long Bel (Marduk) god bilong Babylon.
Nomata Alexander hem balance long kaikai, gogo hem ova tumas long drink. Hem savve story tumas taem hem drinkim wine and tok praod long olketa samting wea hem duim. Wanfala barava nogud samting wea Alexander duim nao hem killim dae fren bilong hem Clitus, taem hem full drunk and kros tumas. Bat Alexander hem barava feel nogud tumas long hemseleva so for thrifala day hem leidaon long bed bilong hem, and hem no kaikai or drink. Gogo olketa fren bilong hem switim hem for kaikai.
Taem olketa year go pas, wei wea Alexander laekem tumas for kasem glory mekem hem duim olketa narafala nogud samting. Hem start for bilivim olketa giaman story and panisim pipol long barava nogud wei. Olsem example, from hem bilivim story wea sei Philotas hem insaed long plan for trae for killim hem dae, Alexander talem olketa for killim dae hem and dadi bilong hem Parmenio, wea hem man for givim advaes and wea hem trustim bifor.
ALEXANDER LUS NAO
No longtaem bihaen hem kam bak long Babylon, Alexander kasem malaria, and hem nating kamap gud from datwan. Long June 13, 323 B.C.E., bihaen hem laef for 32 year and 8 month nomoa, Alexander hem lus long main enemy, dae.
Hem olsem wanem samfala savveman bilong India talem: “O King Alexander, each man hem garem smolfala part bilong earth nomoa olsem iumi standap long hem; and iu man wea olsem olketa narafala man, bat iu duim staka samting and no givap, iu go long evri ples bilong disfala earth farawe from hom bilong iu, mekem iuseleva kasem trabol, and mek trabol long narafala pipol tu. Bat klosap nao iu bae dae, and earth wea iu bae kasem nao olketa bae berem iu long hem.”
WANEM NAO IU LANEM?
• Wanem nao history bilong Alexander the Great?
• Bihaen hem start for rul long Macedonia, wanem nao Alexander and army bilong hem duim?
• Story abaotem samfala faet wea Alexander winim.
• Wanem nao iumi savve talem abaotem fasin bilong Alexander?
[Map]
(For formatted text, lukim pablikeson)
OLKETA KANTRI WEA ALEXANDER WINIM
MACEDONIA
EGYPT
Babylon
Indus River
[Piksa]
Alexander
[Piksa]
Aristotle and student bilong hem Alexander
[Full-page piksa]
[Piksa]
Piksa long medal wea olketa tingse hem Alexander the Great
[Box/Pictures on page 162, 163]
BIGFALA KINGDOM HEM DIVAED
BIBLE talem profesi abaotem kingdom bilong Alexander the Great, taem hem sei bae hem brekdaon and divaed “bat no long laen bilong hem.” (Daniel 11:3, 4) Fitim diswan, bihaen 14 year wea Alexander hem dae long 323 B.C.E., olketa killim dae tufala son bilong hem Alexander IV and Heracles.
Kasem year 301 B.C.E., fofala general bilong Alexander kasem paoa long bigfala rul wea komanda bilong olketa hem buildim. General Cassander rulim Macedonia and Greece. General Lysimachus tekem Asia Minor and Thrace. Seleucus I Nicator tekem Mesopotamia and Syria. And Ptolemy Lagus, or Ptolemy I, rulim Egypt and Palestine. So, fofala Greek kingdom kamaot from wanfala bigfala kingdom bilong Alexander.
Long fofala Greek kingdom hia, rul bilong Cassander nao hem short tumas. Tu-thri year bihaen Cassander kasem paoa, laen bilong hem finis, and long 285 B.C.E., Lysimachus tekova long part bilong Rul Bilong Greece long Europe. Fofala year bihaen, Lysimachus dae long faet witim Seleucus I Nicator, and diswan mekem hem rulim bigfala part long olketa territory bilong Asia. Seleucus kamap first wan long laen bilong olketa Seleucid king long Syria. Hem startim Antioch long Syria and mekem datwan niufala kapitol bilong hem. Olketa killim dae Seleucus long 281 B.C.E., bat olketa king long laen bilong hem rul go kasem 64 B.C.E. taem General Pompey bilong Rome mekem Syria kamap wanfala province bilong Rome.
Long fofala sekson bilong rul bilong Alexander, kingdom bilong Ptolemy nao hem stap for barava longtaem. Ptolemy I tekem title bilong king long 305 B.C.E. and kamap firstfala king bilong Macedonia, or Pharaoh, bilong Egypt. Hem mekem Alexandria kamap kapitol, and stretawe startim planti building project long taon. Wanfala bigfala building bilong hem nao Library Bilong Alexandria. For lukaftarem disfala bigfala project, Ptolemy tekem kam from Greece wanfala savveman bilong Athens, Demetrius Phalereus. Olketa sei, kasem first century C.E., datfala library garem wan million scroll. Rul long laen bilong Ptolemy go ahed long Egypt kasem taem Rome winim long 30 B.C.E. Then Rome changem Greece for kamap world paoa.
WANEM NAO IU LANEM?
• Hao nao bigfala rul bilong Alexander divaed?
• Kasem wanem taem nao olketa king long laen bilong Seleucus rul long Syria?
• Wanem taem nao kingdom bilong Ptolemy long Egypt hem finis?
[Map]
(For formatted text, lukim pablikeson)
RUL BILONG ALEXANDER WEA DIVAED
Cassander
Lysimachus
Ptolemy I
Seleucus I
[Olketa Piksa]
Ptolemy I
Seleucus I
[Diagram/Piksa long page 139]
(For formatted text, lukim pablikeson)
OLKETA WORLD PAOA LONG PROFESI BILONG DANIEL
Datfala maeti image (Daniel 2:31-45)
Fofala animal kamaot from sea (Daniel 7:3-8, 17, 25)
BABYLONIA from 607 B.C.E.
MEDIA-PERSIA from 539 B.C.E.
GREECE from 331 B.C.E.
ROME from 30 B.C.E.
ENGLAND-AMERICA WORLD PAOA from 1763 C.E.
WORLD WEA DIVAED LONG POLITIK long taem bilong end
[Full-page piksa long page 128]
[Full-page piksa long page 147]