“Talemaot Word Bilong God and No Fraet”
1 Waswe, iu hol bak for story abaotem faith bilong iu taem chance kamap long skul or wakples? Waswe, iu faendem hem hard for duim enitaem witnessing long olketa relative, neiba, or maet pipol wea iu no savve long olketa? Wanem nao bae helpem iumi for iusim olketa chance wea kamap for “talemaot word bilong God and no fraet”? —Phil. 1:14.
2 No Hol Bak: Waswe, bae iu hol bak for sapotim gudfala fren or relative bilong iu wea pipol talem laea toktok abaotem hem? Insaed plande thousand year finis, Satan talem olketa barava nogud and laea toktok abaotem gudfala Fren bilong iumi, Jehovah. Iumi garem spesol privilege for witness abaotem God bilong iumi wea hem nambawan! (Isa. 43:10-12) Bigfala love for Jehovah savve helpem iumi for no fraetem pipol and hem savve muvim iumi for no hol bak for witness abaotem truth.—Acts 4:26, 29, 31.
3 Evritaem tingim hao message wea iumi talemaot hem gud nius. Pipol savve kasem gud samting for olowe, sapos olketa obeyim datfala gud nius. Iumi bae no fraet for preach sapos iumi tingting strong abaotem gudfala samting wea pipol bae kasem from preaching waka bilong iumi, and no tingim nomoa wei wea iumi fraet or wei wea pipol againstim iumi.
4 Example wea Olketa Narawan Showimaot: Example bilong olketa narawan wea gohed faithful for preach abaotem God and no fraet savve strongim iumi. Olsem example, Enoch no fraet for talemaot judgment message bilong Jehovah long olketa sinner wea no followim God. (Jude 14, 15) Noah gohed faithful for preach long pipol wea no interest. (Matt. 24:37-39) Olketa Christian long first century wea “no skul gud and man nating” gohed for preach nomata olketa kasem raf persecution. (Acts 4:13, 18-20) Samfala taem olketa pablikeson bilong iumi garem laef story bilong olketa wea winim wei for fraet long man from wei wea olketa showimaot faith long Jehovah and olketa kamap pipol wea strong for preach.
5 Wei for ting raonem laef bilong staka faithful servant bifor wea win for deal witim olketa hard samting bae helpem iumi for no fraet. (1 Ki. 19:2, 3; Mark 14:66-71) Olketa “kasem strong from God bilong iumi” and no fraet for preach. Iumi tu savve olsem!—1 Thess. 2:2.