Hao Olketa Telephone Join Tugeta

FROM MAN WEA RAET FOR WEKAP! LONG JAPAN

LONG Japan, wanfala kantri wea namba bilong olketa telephone hem semsem witim namba bilong pipol, olketa mekem winim 300 million telephone kol evriday. And tu, Japan kasem samting olsem wan million telephone kol from olketa nara kantri evriday, and datfala namba hem semsem tu witim namba bilong telephone kol wea pipol long Japan mekem for pipol long olketa nara kantri.

Maet, iu wanfala tu wea iusim telephone klosap evriday, nomata kaen telephone wea iusim or no iusim wire. From world distaem garem olketa niu samting, staka pipol getius for iusim telephone evritaem. Bat waswe, enitaem iu ting raonem hao nao iu savve herem voice bilong man wea iu ringim long telephone?

Join tugeta Thru Long Telephone Company

First samting, telephone bilong iu mas join go long wanfala Telephone company. Sapos iu followim wire wea go aot from wanfala telephone, bae iu lukim hem go long wanfala plug wea joinim datfala wire witim olketa wire long haos.a Sapos iu followim datwan go moa, bae iu lukim hem join go long wanfala wire wea moa big wea kasem post aotsaed or wea stap anda long graon, wea go long telephone office witim olketa nara wire. Olketa wire long disfala office hem join go long nara building wea kasem wire bilong staka moa telephone. So taem iu ringim wanfala fren long sem taon, voice hem travel go daon long wire kasem telephone bilong fren bilong iu.

Waswe long telephone wea no iusim wire? Hao nao olketa join go long narawan? Hem klosap semsem olsem telephone wea iusim wire. Wanfala “wire” wea man no savve lukim, wanfala radio wave, joinim telephone bilong iu go long building wea olketa nara telephone join go long hem. Bat waswe sapos iu story witim samwan long nara kantri?

Olketa Big Wire Akrosim Sea

For joinim tufala kantri witim wanfala big wire hem barava bigfala waka. Diswan minim wei for putim wanfala big wire anda long sea, wea akrosim olketa barava deep ples and maunten and wea long bilong hem kasem planti thousand kilometer. Bat, diswan nao wei wea olketa telephone kol midolwan olketa kantri hem start. Firstfala telephone wire wea olketa putim akros long Atlantic Ocean olketa finisim long 1956.b Hem joinim Scotland witim Newfoundland and hem savve karem 36 telephone kol. Long 1964 olketa putim firstfala wire midolwan long Japan and Hawaii. Datwan savve karem 128 telephone kol. Olketa putim planti nara wire anda long sea wea joinim planti nara kantri and island.

Olketa wanem difren kaen wire nao olketa putim long botom bilong sea for olketa telephone kol? Long firstaem, olketa iusim coaxial wire wea garem wanfala copper wire long midol and wanfala aluminium or copper wire long aotsaed. Olketa putim last wire olsem long 1976, and hem savve karem 4,200 telephone kol. Bat, long olketa year bilong 1980 olketa start for iusim fibre-optic wire. Olketa putim first wan long olketa wire hia midolwan long tufala kantri long 1988, and hem savve karem 40,000 telephone kol long semtaem from hem iusim digital technology. Kam kasem distaem, namba bilong olketa telephone kol wea olketa wire savve karem hem kamap moa big. Samfala wire wea akrosim Atlantic Ocean savve karem 200 million telephone kol!

Hao nao olketa putim olketa telephone wire anda long sea? Olketa putim long botom bilong sea. Klosap long saedsea, olketa iusim wanfala machine for digim wire hia go daon anda long graon and putim kava long hem. Kava hia protectim wire mekem olketa fishing net or anchor no savve brekem. So taem iu ringim fren bilong iu long nara kantri, maet wanfala long olketa wire hia karem go voice bilong iu akrosim deep sea.

Olketa Wire wea Man No Savve Lukim Joinim Olketa Farawe Ples

Bat, wire anda long sea hem no only wei for joinim olketa kantri and island. Olketa iusim tu wanfala “wire” wea man no savve lukim—wanfala radio wave. Kaen wave olsem, wea olketa savve kolem tu microwave, mekem olketa farawe ples savve mekem telephone kol. From microwave travel long stret laen nomoa olsem laet from wanfala torch, mas no eni samting stap wea bae blokem datwan, olsem wanfala hae maunten. From earth hem raon, olketa no savve iusim microwave for joinim olketa kantri wea stap long narasaed long world. For joinim olketa kantri olsem needim olketa satellite.

Sapos olketa putim satellite long space wea stap 35,800 km antap long equator, long wanem olketa kolem wanfala geostationary orbit, gogo bilong hem for raonem earth wanfala taem bae 24 hour wea semsem witim haomas hour hem tekem earth for tan raon wanfala taem. So diswan mekem hem olowe stap antap long sem area bilong earth. From disfala satellite savve lukim klosap haf long earth, olketa station long earth—ples wea sendem aot and kasem olketa microwave—wea savve lukim disfala satellite savve sendem and kasem olketa telephone kol. So, hao nao tufala ples wea stap farawe from each other savve join tugeta thru long wanfala satellite?

Wanfala station long earth wea savve lukim wanfala satellite sendem microwave signal go long datfala satellite. Olketa kolem diswan wanfala uplink. Taem satellite herem datfala microwave, radio bilong hem changem frequency bilong datfala wave and sendem go bak, mekem nara station savve herem. Olketa kolem diswan downlink. Long wei olsem, tufala station long earth wea no savve lukim each other savve story thru long satellite.

Olketa sendem firstfala telephone satellite, INTELSAT 1, wea nara nem bilong hem Early Bird long space long 1965. Distaem, samting olsem 200 telephone satellite, wea klosap evriwan hem geostationary, go ahed waka, wea joinim planti ples tugeta raonem full world. Olketa iusim olketa satellite hia no for joinim olketa telephone raonem full world nomoa bat tu for television, radio, lukluk long weather, and olketa nara samting. Witim staka radio for changem frequency olketa satellite savve kasem and sendem planti difren kaen signal long semtaem. Olsem example, datfala Early Bird hem fit for kasem and sendem wanfala television signal and 240 telephone kol long semtaem. Datfala INTELSAT VIII series, wea hem start for waka long 1997, savve provaedem thrifala television program and kasem 112,500 telephone kol long semtaem.

Waswe, Iu Luksavve?

Olketa change hia barava daonem kost for ringim man long nara kantri. Maet distaem iu savve story moa witim olketa fren and famili member wea stap long nara kantri. Hao nao iu fit for luksavve sapos telephone kol bilong iu hem go thru long wire anda long sea or wanfala satellite?

For saed bilong wanfala satellite, long bilong datfala wire wea man no savve lukim (wea insaed diswan hem datfala uplink and downlink) hem kasem samting olsem 70,800 km. Datwan hem klosap semsem witim haomas kilometer for travel full wei raonem earth tufala taem. Nomata fast bilong olketa microwave hem semsem olsem fast bilong laet, hem tekem klosap quarter second for lusim wanfala earth station go long narawan thru long satellite. Hem minim, voice bilong iu kasem nara man wea iu ringim klosap quarter second bihaen iu tok, and hem semsem taem datfala man story kam long iu. So voice bilong nara man bae delay for haf second. From iu no getius long wei wea toktok bilong iu and man wea iu ringim hem delay lelebet, maet iu faendem hao iutufala story long semtaem. Sapos iu herem hem olsem, maet iu story thru long wanfala satellite. Bat, sapos iu ringim datfala sem man long difren taem, maet iu no herem datfala delay. Maet diswan bikos iu story thru fiber-optic wire wea go anda long sea. Wanfala machine long telephone company nao bae disaedem sapos kol bilong iu go thru long satellite or wire wea go anda long sea.

For keepim gud olketa wire, station, and satellite, mekem iumi savve isi for story witim man wea stap long difren ples, needim hard waka and savve bilong planti difren wakman. So next taem iu ringim wanfala fren tingim evri samting hia wea mekem iu fit for duim.

[Olketa footnote]

[Piksa long page 22, 23]

(Lukim pablikeson for olketa nara information)

OLKETA RADIO WAVE

Uplink

Downlink

[Piksa long on page 22, 23]

(Lukim pablikeson for olketa nara information)

OLKETA WIRE ANDA LONG SEA

Phone wea no iusim wire

[Piksa long page 22]

Olketa fiber-optic wire savve karem 200 million telephone kol

[Piksa long page 23]

Crew bilong Space Shuttle waka long INTELSAT VI

[Credit Line]

NASA foto

[Piksa long page 23]

Olketa ship putim and lukaftarem olketa wire

[Credit Line]

Courtesy TyCom Ltd.