Purpose Bilong God Klosap for Kasem Nambawan End
Purpose bilong God for workim earth hem for hapi pipol stap insaed under long raeteous living. For go ahed for laef, olketa man mas obeyim olketa law bilong God, but firstfala man and woman no obey and kamap sinner, and kasem panis for dae. Diswan bringim sin and dae long evri pikinini bilong tufala.—Genesis 1:27, 28; 2:16, 17; 3:1-19; Romans 5:12.
God, wea nem bilong hem Jehovah, decide strong for aotem from disfala earth olketa samting wea kamaot from fasin for no obey and sin. Go-go hem luk long earth and lukim midlwan long olketa man, wanfala faithful man, Abram, wea Hem change-im nem bilong hem for kamap Abraham. God promisim Abraham hao pikinini bilong hem bae kamap wanfala bigfala nation and thru long datfala nation, God bae provide-im wanfala seed wea thru long hem evri famili long earth bae blessim olketa seleva.—Genesis 12:1-3; 18:18, 19; 22:18; Psalm 83:18; Hebrews 11:8-16.
Klosap long end bilong mek-16 century B.C.E., olketa pikinini bilong granson bilong Abraham, wea hem Jacob, or Israel, kamap 12-fala tribe wea stap olsem slave long Egypt. Jehovah sevem olketa Israelite hia from Egypt and mekem olketa kamap wanfala nation. Thru long Moses long Maunt Sinai, hem givim Law wea datfala nation mas live followim. Jehovah hem King, Judge, and Man Wea Givim Law bilong olketa. Nation bilong Israel kamap pipol wea God choosim, olketa witness bilong hem, wea organize for duim purpose bilong hem. Thru long olketa nao Messiah bae kam, wea bae startim wanfala kingdom for olowe for helpem pipol bilong evri nation.—Exodus 19:5, 6; 1 Chronicles 17:7-14; 1 Kings 4:20, 25; Isaiah 33:22; 43:10-12; Romans 9:4, 5.
Bihaen 1,500 year, or samting olsem 2,000 year bifor, God sendem only-born Son bilong hem from heven for kam daon long earth, for born from youngfala Jew girl, Mary. Nem bilong hem Jesus and hem bae kasem Kingdom wea God promisim long laen dadi bilong hem, David. Taem Jesus kasem 30 year, John the Baptizer baptaesim hem and hem start for talemaot Kingdom bilong God. Taem hem healim olketa sikman, hem showim aot way wea datfala Kingdom bae blessim olketa man. Thru long olketa tok piksa hem meanim samting wea evriwan wea laek for laef olowe mas duim. Then olketa killim dae Jesus long wanfala stake, wea perfect laef bilong hem olsem man kamap ransom for olketa man.—Matthew 1:18-24; 3:13-16; 4:17-23; 6:9, 10; chapter 13; 20:28; Luke 1:26-37; 2:14; 4:43, 44; 8:1; John 3:16; Acts 10:37-39.
Jesus meanim hao datfala Kingdom bilong Messiah bae start for rul long future yet, long taem bilong end bilong disfala system. Long datfala taem hem bae stap moa long heven olsem King wea rul and bae mekem pipol luksavvy hem stap moa taem hem duim samting long earth. Olketa samting wea happen long world showim aot iumi insaed disfala taem start kam from 1914. Olsem Jesus hem talem finis, olketa mas talemaot gud nius bilong Kingdom evriwea long earth for wanfala witness long evri nation. From diswan, pipol from evri nation hipap tugeta long saed bilong Kingdom bilong God. Olketa pipol hia bae winim end bilong disfala system and kasem laef olowe long earth under long Kingdom bilong Messiah.—Matthew, chapter 24 and 25; Revelation 7:9-17.
Planti church say olketa duim will bilong God distaem. But hao nao bae iu luksavvy long trufala Kristian kongregeson? Taem iu lukluk gud insaed Bible abaotem Kristian kongregeson wea stap long first century and then taem iu lukim hu nao long distaem hem followim datfala sem example.
• Wanem part nao Abraham and Israel garem insaed purpose bilong God?
• Wanem nao Jesus fulfillim thru long ministry bilong hem and thru long dae bilong hem?
• Wanem nao olketa samting wea bae happen olsem Bible profesi talem for markem taem bilong iumi?