Chapter Six
Kwestin wea Iumi Evriwan Mas Feisim
1, 2. (a) Wanem kwestin nao Satan mekem kamap long Eden? (b) Hao nao datfala kwestin showaot long samting wea hem talem?
IU INSAED long wanfala barava important kwestin wea feisim olketa man. Ansa wea iu givim bae disaedem wanem future nao bae iu kasem for olowe. Disfala kwestin hem kamap taem bighed fasin kamap long Eden. Long datfala taem, Satan askem Eve: “Waswe, hem really tru God talem iu for no kaikai from evri tree bilong garden?” Eve ansa hao God sei, wanfala tree nao “Iu mas no kaikai from hem . . . mekem iu no savve dae.” Then Satan accusim Jehovah for sei hem laea, taem Satan sei laef bilong Eve or Adam no depend long wei for obey long God. Satan sei God hem holem bak gud samting from olketa wea hem creatim—wei wea olketa fit for markem standard bilong olketa seleva long living. Satan talem klia: “God hem savve hao long day wea iu kaikai from hem, eye bilong iu bae open and iu bae kamap olsem God, savve long gud and nogud samting.”—Genesis 3:1-5.
2 Really, Satan hem sei hem moabeta for olketa man disaed seleva and no need for obeyim olketa law bilong God. So, hem challengem wei bilong God for rul. Diswan mekem wanfala barava important kwestin kamap abaotem sovereign rul bilong God long universe, wea minim, raet bilong God for rul. So kwestin wea kamap hem: Wanem nao hem moabeta for olketa man, wei bilong Jehovah for rul or wei for rul wea independent from hem? Jehovah fit for stretawe killim dae Adam and Eve, bat datwan bae nating stretem kwestin long gudfala wei abaotem hu nao fit for sovereign ruler. Taem hem letem living bilong olketa man for go ahed, God mekem olketa luksavve wanem nao kamaot from wei for independent from hem and olketa law bilong hem.
3. Wanem mek-tu kwestin nao Satan mekem kamap?
3 Attak bilong Satan long raet bilong Jehovah for rul hem no finis witim datfala samting wea happen long Eden. Hem putim daot tu long wei wea nara pipol loyal long Jehovah. Diswan hem kamap mek-tu kwestin wea join long klos wei witim first wan. Olketa pikinini bilong Adam and Eve and evri spirit son bilong God, nomata firstborn Son wea Jehovah lovem tumas tu insaed long disfala challenge. Example, long taem bilong Job, Satan sei olketa wea servem Jehovah duim olsem, no from olketa lovem God and wei bilong hem for rul, bat from olketa selfish reason nomoa. Hem sei taem olketa kasem hard samting, evriwan bae followim selfish feeling bilong olketa.—Job 2:1-6; Revelation 12:10.
Samting wea History Showimaot
4, 5. Wanem nao history showimaot abaotem wei wea man disaedem gogo bilong hemseleva?
4 Wanfala important point insaed kwestin abaotem sovereign rul hem diswan: God no creatim olketa man for garem gudfala living wea separate from rul bilong hem. Hem mekem olketa long wei wea olketa mas followim olketa raeteous law bilong hem for kasem gud samting. Profet Jeremiah sei: “Mi savve, O Jehovah, wei bilong man hem no bilong hem. Hem no bilong man wea wakabaot for disaedem gogo bilong hem. Stretem mi, O Jehovah.” (Jeremiah 10:23, 24) So Word bilong God encouragem man for: “Trust long Jehovah witim full heart bilong iu and no depend long savve bilong iuseleva.” (Proverbs 3:5) Long sem wei wea God mekem man for mas stap anda olketa physical law for stap laef, hem mekem tu olketa law saed long fasin, wea sapos olketa obeyim bae olketa garem peace long living.
5 Tru tumas, God savve hao sapos olketa man no stap anda long rul bilong hem bae olketa no savve win long wei for kontrolem olketa seleva. Long iusles wei for independent from rul bilong God, olketa man mekem olketa difren system saed long politik, selen and religion. Olketa difren system hia mekem pipol raoa evritaem witim each other, and samting wea kamaot from diswan nao raf fasin, war, and dae. “Man hem bossim man and spoelem hem.” (Ecclesiastes 8:9) Datwan nao happen long full history bilong olketa man. Olsem Word bilong God talem firstaem, olketa wicked man and man for laea go ahed for “kamap worse.” (2 Timothy 3:13) And long mek-20 century wea olketa man barava muv ahed saed long science and olketa bisnis kamap big tumas, olketa trabol wea worse winim eni nara taem hem happen. Toktok bilong Jeremiah 10:23 hem barava kamap tru—olketa man no savve disaedem gogo bilong olketa seleva.
6. Hao nao God bae klosap finisim wei wea olketa man independent from hem?
6 Barava nogud samting wea kamaot from wei for independent from God hem showimaot evribit hao rul bilong olketa man hem nating savve win. Wei bilong God for rul hem only wei for kasem hapi, wan mind, healthy, and laef. And Word bilong God showimaot hao wei wea Jehovah letem olketa man for rulim seleva hem klosap for finis. (Matthew 24:3-14; 2 Timothy 3:1-5) Klosap nao hem bae duim samting saed long olketa man for apim rul bilong hem ovarem earth. Bible profesi sei: “Long taem bilong olketa king hia [olketa rul bilong man distaem] God bilong heven bae startim wanfala kingdom [long heven] wea bae nating savve finis. And datfala kingdom bae no go long eni narafala pipol [no enitaem moa olketa man bae rulim earth]. Hem bae smasem and finisim evri kingdom hia [wea stap distaem], and hemseleva nao bae stap olowe.”—Daniel 2:44.
Stap Laef for Go Insaed Niu World Bilong God
7. Taem rul bilong God finisim rul bilong man, hu nao bae laef?
7 Taem rul bilong God finisim rul bilong man, hu nao bae laef? Bible ansa olsem: “Olketa wea raeteous bae stap long earth, and olketa wea no garem blame bae stap long hem. Bat olketa wicked pipol [olketa wea no saportim wei wea God garem raet for rul], olketa bae finis evribit from earth.” (Proverbs 2:21, 22) Man wea raetem psalm talem disfala toktok wea klosap semsem tu: “Lelebet taem nomoa, and wicked wan bae finis . . . Olketa raeteous wan seleva bae kasem earth, and olketa bae stap olowe long hem.”—Psalm 37:10, 29.
8. Hao nao God bae vindicatem evribit sovereign rul bilong hem?
8 Bihaen system bilong Satan hem distroe, God bae mekem niu world bilong hem kamap, wea bae finisim evribit nogud raf fasin, war, poor living, safa, sik, and dae wea mekem olketa man olsem slave for planti thousand year. Bible storyim long barava naes wei olketa blessing wea olketa man wea obey bae kasem: “Hem [God] bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.” (Revelation 21:3, 4) Thru long Kingdom gavman bilong hem long heven wea Christ hem rul insaed, God bae vindicatem (givim reason, or pruvim) raet bilong Hem for Sovereign bilong iumi, wea minim Ruler bilong iumi.—Romans 16:20; 2 Peter 3:10-13; Revelation 20:1-6.
Hao Samfala Ansarem Datfala Kwestin
9. (a) Hao nao olketa wea loyal long Jehovah ting long toktok bilong hem? (b) Hao nao Noah pruvim loyal fasin bilong hem, and hao nao example bilong hem savve helpem iumi?
9 Insaed long history, olketa faithful man and woman pruvim wei wea olketa loyal long Jehovah olsem Sovereign. Olketa savve hao wei for stap laef hem depend long wei for lisin and obeyim hem. Noah hem wanfala man olsem. So God sei long Noah: “Hem kasem taem nao for evri man mas finis . . . Mekem wanfala ark for iuseleva.” And Noah followim instruction bilong Jehovah. Nomata olketa kasem warning, pipol bilong datfala taem go ahed long living bilong olketa olsem no eni big samting bae happen. Bat Noah buildim wanfala bigfala ark and go ahed busy for preach abaotem olketa raeteous wei bilong Jehovah long nara pipol. Record hem sei: “Noah go ahed for duim evri samting wea God komandim hem. Hem barava duim olsem.”—Genesis 6:13-22; Hebrews 11:7; 2 Peter 2:5.
10. (a) Hao nao Abraham and Sarah saportim sovereign rul bilong Jehovah? (b) Hao nao example bilong Abraham and Sarah savve helpem iumi?
10 Abraham and Sarah tu gudfala example olsem pipol wea saportim sovereign rul bilong Jehovah, and duim evri samting wea hem komandim long tufala. Tufala stap long Ur bilong olketa Chaldea, wanfala richfala taon. Bat taem Jehovah talem Abraham for go long narafala kantri, wea hem no savve abaotem, Abraham “go followim evri samting wea Jehovah talem long hem.” For sure Sarah hem garem isi living—hem garem haos, olketa fren, and relative. Nomata olsem, hem stap anda long Jehovah and hasband bilong hem and go long land bilong Canaan, nomata hem no savve wanem kaen living nao bae hem garem long there.—Genesis 11:31–12:4; Acts 7:2-4.
11. (a) Moses hem saportim sovereign rul bilong Jehovah nomata wanem samting? (b) Hao nao example bilong Moses savve helpem iumi?
11 Moses hem narawan wea saportim sovereign rul bilong Jehovah. And hem duim diswan nomata hem kasem barava hard samting—taem hem mas feis-tu-feis witim Pharaoh bilong Egypt. Diswan no minim Moses hem trustim hemseleva. Tru nao, hem daotem savve bilong hemseleva for toktok gud. Bat hem obeyim Jehovah. From Jehovah saportim hem and brata bilong hem Aaron helpem hem, Moses talem moa and moa toktok bilong Jehovah long bighed Pharaoh. Samfala son bilong Israel tu tok strong againstim Moses. Nomata olsem, Moses loyal for duim evri samting wea Jehovah komandim hem, and thru long hem, Israel sev and kamaot from Egypt.—Exodus 7:6; 12:50, 51; Hebrews 11:24-27.
12. (a) Wanem nao showimaot wei for loyal long Jehovah hem minim moa samting winim wei for duim samting wea God raetem finis? (b) Hao nao wei for luksavve long diskaen loyal fasin hem helpem iumi for followim 1 John 2:15?
12 Olketa wea loyal long Jehovah no tingse only samting wea olketa mas obeyim nao hem wanem God raetem finis. Taem waef bilong Potiphar trae for switim Joseph for duim adultery witim hem, no eni komandment stap yet wea God raetem for tambuim adultery. Nomata olsem, Joseph savve abaotem marit arrangement wea Jehovah startim long Eden. Hem luksavve hao wei for duim sex witim waef bilong nara man hem samting wea bae mekem God no hapi. Joseph no interest for testim haomas nao God letem hem for olsem olketa bilong Egypt. Hem keepim wei bilong Jehovah taem hem ting raonem wei wea God deal witim olketa man and then hem barava followim wanem hem luksavve hem will bilong God.—Genesis 39:7-12; Psalm 77:11, 12.
13. Hao nao Devil showaot olsem wanfala for laea from samting wea (a) Job duim? (b) thrifala Hebrew duim?
13 Nomata sapos olketa kasem bigfala test, olketa wea really savve long Jehovah no tanawe from hem. Satan sei sapos Job, nomata Jehovah tinghae long hem, lusim evri material samting or kasem nogud health, hem bae lusim God. Bat Job hem pruvim Devil hem man for laea, nomata Job seleva no savve why nao olketa bigfala trabol kasem hem. (Job 2:9, 10) Planti handred year bihaen, from hem trae yet for pruvim toktok bilong hem, Satan mekem king bilong Babylon wea kros tumas for sei hem bae killim dae long fire thrifala young Hebrew sapos olketa no baodaon for worshipim wanfala image wea king hem putim. From olketa mas chusim wei for obeyim komand bilong king or wei for obeyim law bilong Jehovah for no worshipim idol, olketa talemaot klia hao olketa servem Jehovah and hem nao Barava Hae Sovereign bilong olketa. Wei for faithful long God hem moa important long olketa winim laef bilong olketa seleva!—Daniel 3:14-18.
14. Hao nao iumi wea no perfect savve pruvim iumi really loyal long Jehovah?
14 Waswe, from olketa example hia, fitim iumi for sei hao wei for loyal long Jehovah minim man mas perfect, or man wea duim mistek hem barava fail? Nomoa nao! Bible talem iumi hao Moses hem foldaon samfala taem. Nomata Jehovah no hapi, hem no rejectim Moses. Olketa aposol bilong Jesus Christ tu garem olketa wik point. From hem tingim hao iumi born witim wei for no perfect, Jehovah hem hapi sapos iumi no min for ting nating long will bilong hem long eni wei. Sapos wik point hem mekem iumi duim rong fasin, hem important for iumi barava repent and no letem datfala rong for kamap part long wei bilong iumi. Long wei olsem iumi showaot iumi really lovem samting wea Jehovah sei hem gud and heitim samting wea hem sei hem nogud. Long faondeson bilong faith bilong iumi long sakrifaes bilong Jesus wea kavarem sin, iumi savve garem klin wei for stap front long God.—Amos 5:15; Acts 3:19; Hebrews 9:14.
15. (a) Hu long evri man nao keepim perfect wei for faithful long God, and wanem nao diswan pruvim? (b) Samting wea Jesus duim hem helpem iumi long wanem wei?
15 Nomata olsem, waswe, perfect wei for obeyim sovereign rul bilong Jehovah hem samting wea olketa man kanduit for duim? Ansa bilong diswan hem wanfala “holy secret” for samting olsem 4,000 year. (1 Timothy 3:16) Adam, nomata hem perfect taem God creatim hem, hem no showim perfect example bilong fasin for lovem God. So hu nao fit for duim diswan? No eniwan long olketa pikinini bilong hem wea sin fit for duim. Only man wea duim diswan hem Jesus Christ. (Hebrews 4:15) Samting wea Jesus duim pruvim hao Adam, wea insaed gudfala ples, fit for keepim perfect wei for faithful sapos datwan nao wanem hem want for duim. Rong hia, hem no from God wakem creation long nogud wei. So Jesus Christ nao example wea iumi laek for followim saed long wei for obeyim law bilong God and tu for showimaot hao iumi wanwan savve lovem Jehovah, Sovereign bilong Universe.—Deuteronomy 32:4, 5.
Wanem Nao Ansa Bilong Iumi Wanwan?
16. Why nao iumi mas evritaem luk aot gud long tingting bilong iumi abaotem sovereign rul bilong Jehovah?
16 Iumi wanwan distaem feisim kwestin abaotem hu nao fit for sovereign bilong universe. Sapos iumi talemaot klia hao iumi stap long saed bilong Jehovah, Satan bae targetim iumi. Hem mekem hevi kamap from evri saed and bae go ahed for duim olsem go kasem end bilong disfala wicked system bilong hem. Iumi mas evritaem luk aot gud. (1 Peter 5:8) Fasin bilong iumi showimaot hu nao iumi saed witim long kwestin abaotem sovereign rul bilong Jehovah and mek-tu kwestin abaotem faithful fasin wea man garem long God taem hem kasem test. Iumi insaed danger sapos iumi tingim fasin for no loyal olsem no important from hem normal samting nomoa long world. Wei for keepim faithful fasin minim iumi mas waka hard for followim olketa raeteous wei bilong Jehovah long evri part bilong living.
17. Wanem samting abaotem start bilong wei for laea and steal nao shud mekem iumi stap klia long olketa?
17 Olsem example, iumi mas nating followim Satan, wea hem “father bilong laea.” (John 8:44) Iumi mas talem tru samting long evri samting wea iumi duim. Long system bilong Satan, planti taem young pipol no talem tru samting long dadi and mami bilong olketa. Bat olketa Christian young wan stap klia long diswan, and pruvim Satan hem laea taem hem sei pipol bilong God bae lusim faithful fasin taem olketa kasem test. (Job 1:9-11; Proverbs 6:16-19) Long narasaed samting wea man duim long bisnis savve showimaot sapos hem stap long saed bilong “father bilong laea” and no long saed bilong God bilong truth. Iumi stap klia long kaen samting olsem. (Micah 6:11, 12) And, no enitaem wei for steal hem stret, nomata sapos man hem needim samting or datwan wea man steal from hem rich. (Proverbs 6:30, 31; 1 Peter 4:15) Nomata sapos datwan hem normal samting nomoa long ples wea iumi stap or pipol ting nating long hem, wei for steal hem againstim olketa law bilong God.—Luke 16:10; Romans 12:2; Ephesians 4:28.
18. (a) Long end bilong datfala Thousand Year Rul bilong Christ, wanem test nao bae kasem evri man? (b) Wanem fasin nao iumi mas mekem grow distaem?
18 Insaed long datfala Thousand Year Rul bilong Christ, Satan and olketa demon bilong hem bae stap insaed long hol wea deep tumas, and bae hem no fit for spoelem olketa man. Datwan bae gud tumas! Bat bihaen long datfala wan thousand year, olketa bae kamap free for lelebet taem. Satan and olketa wea followim hem bae mekem hevi kamap for olketa man wea kamap perfect and wea go ahed for loyal long God. (Revelation 20:7-10) Sapos iumi garem privilege for stap laef long datfala taem, wanem nao bae iumi duim saed long kwestin abaotem sovereign bilong universe? Bikos evri man bae perfect long datfala taem, eniwan wea no loyal bae olsem from hem min for duim and bae hem dae for olowe. Hem important tumas for iumi mekem grow distaem wei for obeyim eni instruction wea Jehovah givim long iumi, thru long Word or organization bilong hem! Sapos iumi duim olsem, bae iumi showimaot trufala wei for worshipim hem olsem Sovereign bilong Universe.
Review
• Wanem nao bigfala kwestin wea iumi evriwan mas feisim? Wanem nao mekem iumi insaed long diswan?
• Wanem nao important samting abaotem olketa wei wea olketa man and woman bilong bifor pruvim loyal fasin long Jehovah?
• Why nao hem important for honorim Jehovah witim fasin bilong iumi evriday?