LESON 26

Why Nao Olketa Nogud Samting Happen and Pipol Safa?

Lo Printed Buk

Taem no gud samting happen, hem wei blo iumi for laek savve why nao diswan hem happen? Iumi hapi tumas for savve Bible garem ansa for datfala kwestin!

1. Wat nao Satan duim wea mekem olketa nogud samting for happen lo world?

Satan bighed and againstim God. Satan laek for rulim nara pipol so hem mekem first man and woman, Adam and Eve, for joinim hem for againstim God. Hao nao hem duim datwan? Hem laea lo Eve. (Jenesis 3:1-5) Hem mekem Eve for tingse Jehovah no laekem hem for kasem gud samting, and iumi olketa man bae hapi go moa sapos iumi no obeyim God. Taem Satan sei lo Eve bae hem no dae, datwan hem firstfala laea. Dastawe, Bible kolem Satan “man for laea and hem dadi bilong wei for laea.”—John 8:44.

2. Wat nao Adam and Eve disaed for duim?

Jehovah kaen tumas lo Adam and Eve. Hem sei for tufala kaikaim frut blo evri tree lo garden blo Eden and wanfala tree nomoa hem stopem. (Jenesis 2:15-17) Bat, tufala disaed for kaikaim frut blo datfala tree. Bible sei Eve “tekem samfala frut long tri ya an hemi kaikaim.” Bihaen, Adam “tu hemi kaikaim.” (Jenesis 3:6) Tufala no obeyim God. From Adam and Eve perfect, hem isi nomoa for tufala duim stret samting. Bat from tufala disaed for no obeyim God, tufala sin and rejectim raet blo God for talem tufala stret samting and samting wea no stret. Disison blo tufala mekem tufala kasem barava nogud samting.—Jenesis 3:16-19.

3. Hao nao disison blo Adam and Eve affectim iumi?

From Adam and Eve sin, tufala pasim diswan lo evri pikinini blo tufala. Bible story olsem abaotem Adam: “Sin hem kasem evriwan long world bikos long wanfala man nomoa. From olketa sin, olketa dae, dastawe evriwan dae.”—Rome 5:12.

Iumi kasem olketa nogud samting bikos lo olketa difren reason. Samfala taem iumi kasem olketa nogud samting bikos iumi mekem rong disison. Samfala taem iumi safa bikos lo rong disison blo narawan. Samfala taem iumi kasem olketa nogud samting bikos samting wea iumi no expectim hem happen.—Readim Ecclesiastes 9:11, NW.

DIG GO MOA

Bae iumi storyim why God no kosim olketa nogud samting wea happen lo world distaem and feeling blo hem taem iumi safa.

4. Man wea kosim olketa nogud samting wea happen

Staka pipol sei God nao kontrolem full world. Hao nao tingting blo iu abaotem datwan? Pleim VIDEO.

VIDEO: Hu Nao Kontrolem Evri Samting lo World? (1:24)

Readim James 1:13 and 1 John 5:19, then discussim tugeta kwestin hia:

Hao, God nao kosim olketa nogud samting wea happen and mekem pipol safa?

5. Wat nao happen start taem Satan kontrolem disfala world?

Pleim VIDEO.

VIDEO: Why Nao God Letem Wei for Safa Gohed?—Part blo Video (3:07)

Readim Jenesis 3:1-6, then discussim tugeta olketa kwestin hia:

Wat nao Satan talem for laea lo Eve?—Lukim verse 4 and 5.
Wat nao Satan talem for mekem iumi tingse Jehovah no laekem iumi olketa man for kasem gud samting?
Wat nao Satan talem for mekem iumi tingse iumi olketa man no needim Jehovah for rulim iumi for hapi?

Readim Ecclesiastes 8:9 (NW), then discussim tugeta kwestin hia:

Start from taem wea Jehovah no kontrolem disfala world, wat nao gohed for happen?

Olketa piksa: Olketa piksa wea showim olketa samting wea happen lo earth start from taem wea God wakem earth go kasem Paradaes lo future. A. Paradaes lo earth wea garem staka tree and grass wea luk naes tumas. B. For staka handred year wea man rulim world, pipol no garem peace, war gohed, pollution kamap big, and staka false religion stap. Samfala gavman lo world wea stap lo piksa hem gavman blo Egypt, China, Greece, Rome, Great Britain, and United States. C. Pipol stap lo Paradaes lo future.

Adam and Eve perfect and stap lo Paradaes. Bat tufala followim Satan and no obeyim Jehovah
Bihaen Satan, Adam and Eve no obeyim God, evriwan sin, safa, and dae
Jehovah bae finisim sin, evri nogud samting, and dae. Then, iumi bae perfect moa and stap lo Paradaes

6. Jehovah tingim iumi taem iumi safa

Hao, God tingim iumi tu taem iumi safa? Tingim samting wea King David and aposol Peter talem. Readim Sams 31:7 and 1 Peter 5:7, then discussim tugeta kwestin hia:

Hao nao tingting blo iu taem iu savve Jehovah tingim iumi and lukim olketa nogud samting wea kasem iumi?

7. God bae finisim evri nogud samting wea kasem iumi

Readim Aesaea 65:17 and Revelation 21:3, 4, then discussim tugeta kwestin hia:

Taem iu savve Jehovah bae finisim evri nogud samting wea kasem iumi olketa man, hao nao datwan comfortim iu?

Maet iu laek for savve

Taem Satan talem firstfala laea, hem spoelem tumas nem blo Jehovah and mekem pipol tingse Jehovah hem ruler wea no followim justice and no garem love. Klosap nao Jehovah bae finisim evri nogud samting wea kasem iumi, and datwan bae pruvim lo evriwan hem nomoa fit for rul. Samting wea important tumas lo disfala universe hem for mekhae lo nem blo Jehovah.—Matthew 6:9, 10.

SAMFALA SAVVE TALEM: “God mekem nogud samting for kasem pipol for testim olketa.”

Wat nao bae iu talem?

MAIN POINT

Satan, and Adam and Eve nao main wan wea kosim olketa nogud samting wea happen lo world. Jehovah tingim iumi tumas taem iumi safa and klosap nao bae hem finisim datwan.