KUYUUJI 14
WAAÑI 8 Jehová es mi Refugio
«Kupin̈taʼamɨ iapaʼap in̈kuyooxataʼmpa»
«Ɨch y jempɨk ityyaj antɨkkɨʼɨm, an̈kuyooxataʼmpa Jehová» (JOS. 24:15).
AN̈KEJAYOʼOYI
Odoy tan̈kujaʼamaytyaʼmiñ tyiʼiga tampɨktaʼm jeʼm tanjɨɨxi iga tan̈kuyooxataʼmpa Jehová.
1. ¿Tyiʼiga Jehová ixunba iga tan̈kupɨktaʼmiñ? (Isaías 48:17, 18).
TANJAATUN̈ Jehová tsaam pɨɨmi tatoytyaʼmpa y ixunba iga tamaymayataʼmiñ sɨɨ y jeʼm tannɨgɨyoʼoyijom (Ecl. 3:12, 13). Tachiʼityaʼm jeʼm joodon̈oʼoyi iga wɨaiñ tan̈wattaʼm jaʼyan̈ tyidyin̈kej. Pero dyaʼ tachiʼityaʼm jeʼm jɨɨxi iga tanyaʼak tanan̈jaktamtaiñ iga tan̈kupin̈taʼmiñ tyi wɨɨ y tyi dyaʼ wɨɨ (Ecl. 8:9; Jer. 10:23). Jeʼ iwɨjoodon̈ iga siiga tamaymayatamtoʼoba wɨɨ iga tan̈kuyooxataʼmiñ y tan̈kupɨktaʼmiñ (maayɨʼ Isaías 48:17, 18).a
2. ¿Tyi ixunba jeʼm Wookkɨʼɨwiñ iga tan̈kupɨktaʼmiñ, y juutypɨk ikwiñkejneʼ Jehová iga tanyaʼak dyaʼ wɨap tanan̈jaktamta?
2 Jeʼm Wookkɨʼɨwiñ ixunba iga tan̈kupɨktaʼmiñ iga tamaymayataʼmpa siiga dyaʼ tan̈kuyooxataʼmpa Jehová y siiga tanan̈jaktamtaap tanyaʼak (Gén. 3:4, 5). Jehová iaʼmchiʼiñeʼ uxan̈ tiempo iga ityumpɨyyaj nan̈jakyajtaiñ iyaʼak iga jeempɨgam wɨap ikwiñkej iga jempɨk nɨm jeʼm Wookkɨʼɨwiñ jeʼ mɨgoʼoyi, y jempɨk sɨʼ tanaʼmtaʼm ikwiñkejpa iga dyaʼ sɨʼ iwɨnɨgayyaj. Jeʼm Biblia in̈matpa iga jaʼyan̈ pɨxiñtyam y yomtam ikuyooxayaj Jehová y maymayayaj, y jempɨk maaj maymaya jeʼ Jesucristo. Wiñtyi, tan̈kɨʼpin̈taʼmpa tyiʼiga ipɨk ijɨɨxi iga ikuyooxa Jehová. Okmɨ tanaʼmtaʼmpa tyiʼiga wɨɨ iga tan̈kuyooxataʼmiñ Jehová y tanaʼmtaʼmpatyim tyiʼiga tampɨktaʼm tanjɨɨxi iga tan̈kuyooxataʼmpa.
TYIʼIGA JESÚS IKUYOOXA JEHOVÁ
3. ¿Juʼp jɨɨxi ipɨk Jesús jesɨk jeʼm Wookkɨʼɨwiñ in̈kejay jeʼm an̈jagoʼoyi itywɨʼɨp yɨʼp naxyukmɨ?
3 Jesɨk Jesús jaʼy ityi yɨʼp Naxyukmɨ ikupin̈ iapaʼap ikuyooxaap. Okmɨ jesɨk jeʼ chin̈, jeʼm Wookkɨʼɨwiñ in̈kejay ityumpɨy jeʼm an̈jagoʼoyi itywɨʼɨp yɨʼp naxyukmɨ iga ichiʼiba siiga ikoosteñaʼyba. Pero Jesús iñɨʼmay: «Nɨcsɨm, miWoccɨɨwiñ. Nɨmpa jém Dios iŋma̱t́i: Jɨ̱staamɨ tanJa̱tuŋ Dios icut́um. Odoy cuyo̱xataamɨ tuŋgac» (Mat. 4:8-10). ¿Tyiʼiga ipɨk yɨʼp jɨɨxi? Tan̈kɨʼpin̈taʼmiñ.
4, 5. ¿Tyiʼiga Jesús ipɨk ijɨɨxi iga ikuyooxaap Jehová?
4 Jesús tsaam ityoyba Jehová, jeʼyukmɨ ipɨk ijɨɨxi iga ikuyooxaap (Juan 14:31; 8:28, 29; Apoc. 4:11). Iwɨjoodon̈ iga jeʼam jempɨk tachiʼiñetaʼm tañityityam y ityumpɨy jempɨk tanaitytyaʼm (Sal. 33:4; 36:9; Sant. 1:17). Jehová ni keman imɨgoyay y ityumpɨy jempɨk iniity idyɨk Jesús jeʼ ichiʼiñeʼ (Juan 1:14). Pero jeʼm Wookkɨʼɨwiñ tsaam mɨgoʼyba, jeʼyukmɨ tantumpɨytyam takaʼataʼmpa (Juan 8:44). Jesús iwɨixpɨkpa Jehová y iwɨixpɨkpatyim juʼuts jeʼm Wookkɨʼɨwiñ, jeʼyukmɨ ni keman ijɨɨs iga iwatpa idyɨk juʼuts jeʼm Wookkɨʼɨwiñ (Filip. 2:5-8).
5 Jesús iwɨjoodon̈ idyɨk iga tsaam yooxpadoʼyba siiga dyaʼ ijagan̈tsakpa Jehová (Heb. 12:2). Iga yɨʼɨmpɨgam ikkuaʼyaʼyba jeʼm iJaatun̈ iñɨɨyi y iktogoyba ityumpɨy jeʼm yaʼachaaji jempɨk jeʼm Wookkɨʼɨwiñ iwatneʼ.
TYIʼIGA WƗƗ IGA TAN̈KOOSTEÑAYTYAʼMIÑ JEHOVÁ
6, 7. ¿Tyiʼiga jaʼyan̈yaj dyaʼ ikuyooxayajpa Jehová, y tyiʼiga wɨɨ iga tan̈koosteñaytyaʼmiñ?
6 Yɨʼp jaama jaʼyan̈yaj dyaʼ ikuyooxayajpa Jehová iga dyaʼ iixpɨkyajpa. Dyatyim iixpɨgayyajpa jeʼm wɨtampɨk icualidades y ityumpɨy jempɨk Jehová iwatneʼ por jeʼeyaj. Jeʼam iñaskayaj jempɨk ityyaj idyɨk Atenas jesɨk jeʼm apóstol Pablo in̈maday jeʼm Dios In̈maatyi (Hech. 17:19, 20, 30, 34).
7 Pablo iwɨan̈maday jempɨk ityyaj Atenas iga jeʼm nuntapɨk Dios «tachiiba tamvida tantu̱mpɨyt́am. Tachiibat́im jém sa̱wa iga tasa̱upɨcpa. Tachiiba it́u̱mpɨy cosa». Iñɨʼmay iga jeʼ tachiʼiñetaʼm tañityi y tampɨɨmi. Iñɨʼmaytyim iga «de tu̱m pɨ̱xiñ ictsucum iga it́yaj it́u̱mpɨy jém naciónyaj jém it́yajwɨɨp icuwɨ̱t́i de yɨ́p naxyucmɨ». Jeʼyukmɨ iga jeʼ tawatnetaʼm wɨɨ iga tan̈koosteñaytyaʼmiñ (Hech. 17:25, 26, 28).
8. ¿Tyi jempɨk dyaʼ iwatpa Jehová?
8 Jehová in̈jakpa ityumpɨy y tawatnetaʼm, siiga jeʼ ixunba wɨap ityeguedɨy ityumpɨyyaj iga ikuyooxayajiñ. ¡Pero dyaʼ iwatpa jeempɨk! Jeʼ ixunba iga jaʼyan̈yaj maymayayajiñ y iniityyajiñ tuum wɨnanɨgoʼoyi kun jeʼ (1 Tim. 2:3, 4). Iga Jehová tsaam tatoytyaʼmpa ikwiñkejpa iga nunta ity. Jeʼyukmɨ tan̈kejaytyaʼmpa iga wɨaiñ tanan̈kejayyaj tun̈gakyaj jempɨk jeʼ iwatpa y juutypɨk iwatpa (Mat. 10:11-13; 28:19, 20). Ikuyukmɨ jeʼm kumunyaj jeʼm tɨwɨtam takuixtyaʼmpa iga pɨɨmi tatoytyaʼmpa (Hech. 20:28).
9. ¿Juutypɨk ikwiñkejpa Jehová jeʼm ityoyoʼoyi?
9 Jehová ikwiñkejayñeʼ ityoyoʼoyi jempɨk dyaʼ ikupɨkyajtoʼoba iga jeʼ ity. Dende wiñɨgam, jaʼyan̈yaj ipɨkneyaj ijɨɨxi iga iwatyajpa jempɨk ixunyajpa. Pero iga Jehová tsaam toyoʼyba ichiʼiñeyaj tyityam ityogoyayyaj iga wɨaiñ iityyaj y imaymayayaj (Mat. 5:44, 45; Hech. 14:16, 17). Jeʼyukmɨ wɨap iniityyaj ifamilia, wɨap imanɨgɨyyaj, iamigojɨyyaj y wɨap ipɨktson̈yaj jeʼm kumaykedoʼoyiyaj por jeʼm iyooxakuy (Sal. 127:3; Ecl. 2:24). Tan̈wɨkupɨktaʼmpa iga tanJaatun̈ Jehová tsaam tatoytyaʼmpa tantumpɨytyaʼm (Éx. 34:6). Sɨɨ tan̈kɨʼpin̈taʼmiñ tyiʼiga tampɨknetaʼm jeʼm jɨɨxi iga tan̈kuyooxataʼmpa Jehová y juutypɨk takumaykettaʼmpa.
TYIʼIGA TAN̈KUYOOXATAʼMPA JEHOVÁ
10. a) ¿Tyiʼiga tan̈kuyooxataʼmpa Jehová? (Mateo 22:37). b) ¿Juutypɨk miyooxpaʼtneʼ jeʼm Jehová iyaʼachan̈jamoʼoyi? (Salmo 103:13, 14).
10 Juʼutstyim Jesús tampɨknetaʼm tanjɨɨxi iga tan̈kuyooxataʼmpa Jehová iga tantoytyaʼmpa kun ityumpɨy tananmaj (maayɨʼ Mateo 22:37). Jesɨk maaj tañixpɨktaʼmpa Jehová maaj tan̈kusuʼnɨytyaʼmpa jeʼm icualidades. Jeʼ tsaam tayaʼachan̈jaamtaʼmpa. Jesɨk jeʼm israelitas dyaʼ kupɨgoyyaj, ñɨʼmayyajta: «Akuseettaʼamɨ y tsaktaʼamɨ iga immalwattaʼmpa» (Jer. 18:11). Jehová ijoodon̈ iga tapoʼtpoʼttam (maayɨʼ Salmo 103:13, 14).b Jesɨk in̈kujɨɨspa iga Jehová tsaam miyaʼachan̈jaampa, ¿miaʼmchiʼiba iga majtyim in̈kuyooxaiñ?
11. ¿Tyiʼiga duroj tan̈kuyooxataʼmiñ Jehová?
11 Tan̈kuyooxataʼmpatyim Jehová iga yɨʼbam jeʼm maaj wɨbɨk jɨɨxi iga wɨap tampɨktaʼm (Mat. 4:10). Siiga dyaʼ tanjagan̈tsaktaʼmpa Jehová tayooxpadoytyaʼmpa iga akkuaʼyaytyaiñ jeʼm iñɨɨyi, tanakwiñkejtaʼmpa iga jeʼm Wookkɨʼɨwiñ mɨgoʼyba y yɨʼɨmpɨgam tammaymaywattaʼmpa Jehová. Siiga yɨʼp jaama tan̈kupin̈taʼmpa iga tan̈kuyooxataʼmpa Jehová tanaitytyaʼmpa jeʼm an̈jogoʼoyi iga juchixkej tan̈kuyooxataʼmpa (Juan 17:3).
12, 13. ¿Tyi tan̈kejaytyaʼmpa jempɨk iñaskayaj Jane y Pam?
12 Dende tanxutyujom wɨap tantoytyaʼm Jehová y dyaʼ tanaʼmchiʼityaʼmpa iga yɨʼp toyoʼoyi kuyajiñ. Tanaʼmtaʼmpa jempɨk iñaskayaj wɨsteen yoomtɨwɨtam. Janec iniity idyɨk 11 iamtyɨy y Pam iniity idyɨk 10 jesɨk moj ikuyujkayaj jeʼm Biblia. Mex iga jeʼm ijaatun̈yaj dyaʼ idyɨk sɨʼ ikuyujkayaj jeʼm Biblia, aʼmchiʼiyajta iga in̈pɨʼtsyajiñ jeʼm Testigos, pero siiga duroj nɨkyajpa jeʼm iglesia juuty sɨʼɨyajpa jeʼm ijaatun̈yaj tumtum semana. Jane nɨmpa: «Jempɨk an̈kuyujkaʼ de jeʼm Biblia kun jeʼm Testigos ayooxpaʼt iga wɨaiñ anan̈an̈kamok jeʼm kutɨʼɨchiyaj kun jeʼm an̈compañeros, odoy ampɨguiñ jeʼm droga y odoy atan̈kawadyiñ sexualmente».
13 Jesɨk mɨjayajum ikwɨstɨkyaj moj ikuyooxayaj Jehová. Maaj okmɨ moj kuyooxaoyiyaj juʼuts precursoras y mojtyim ikuixyaj jeʼm ijaatun̈yaj iga tsaamiyajam idyɨk. Jesɨk Jane ijɨɨspa ityumpɨy jempɨk iñaskaneyaj, jeʼ nɨmpa: «An̈kutɨʼɨyɨy iga Jehová ni keman ijagan̈tsakpa jeʼm iamigos juʼuts nɨmpa 2 Timoteo 2:19, Jehová ‹iixpɨcpa jém imɨɨchipɨc›». Jesaneum, Jehová ikuixpa jempɨk ityoyba y ikuyooxaap.
14. ¿Juutypɨk wɨap tan̈kupujaytyaʼm jeʼm Jehová iñɨɨyi? (Aʼmɨtyim jeʼm imágenes).
14 Tayooxpadoytyamtoʼoba iga jeʼm Jehová iñɨɨyi akkuaʼytyaiñ. Kujɨɨsɨ iga iniity tuum iñamigo iga tsaam toyoʼyba y yaʼachan̈jamoʼyba. Tuum jaama in̈kumaton̈ba iga algun i ikujɨyba y mojpa nɨɨmi iga iñamigo tsaam malo y agui mɨgoʼyba. ¿Tyisɨ in̈watpa? ¿In̈kupujpa? Jeempɨktyim naspa jesɨk tan̈kumaton̈ba iga algun i sɨʼ ikumigoy Jehová, jɨkskɨy tan̈kupujpa y tannɨʼmaʼyba iga mɨgoʼyba ixɨʼ (Sal. 34:1; Is. 43:10). Kun jempɨk tan̈wattaʼmpa y tanɨmtaʼmpa tanakwiñkejtaʼmpa iga tan̈kuyooxatamtoʼoba Jehová kun ityumpɨy tananmaj.
¿In̈kupujaʼyba jeʼm Jehová iñɨɨyi? (Aʼmɨ jeʼm párrafo 14).d
15. ¿Juʼptam kumaykedoʼoyiyaj ipɨktson̈ jeʼm apóstol Pablo iga iwat kukakiyaj iityijom? (Filipenses 3:7, 8).
15 Tan̈wattaʼmiñ kukakiyaj tañityijom iga majnam tan̈kuyooxataʼmiñ Jehová. Jeʼm apóstol Pablo jeempɨgam iwat, jeʼ ichak ityumpɨy jempɨk iniity idyɨk iga moj ityun̈ɨy Cristo y moj ikuyooxa Jehová (Gál. 1:14). Yɨʼp iyooxpaʼt iga majtyim maymayaiñ y ipɨktson̈ jeʼm xaaja iga tsɨʼyba juʼuts an̈jagoʼoyi kun Cristo jemɨk sɨn̈yukmɨ. Pablo ni keman ijɨɨs jempɨk ichak iga ikuyooxa Jehová, taɨchtyam dyatyim tanjɨɨstaʼmpa jempɨk tantsaknetaʼm (maayɨʼ Filipenses 3:7, 8).
16. ¿Tyi tan̈kejaʼyba jempɨk iñaskaʼ Julia? (Aʼmɨtyim jeʼm imágenes).
16 Siiga tan̈kuyooxataʼmpa Jehová tamaymayataʼmpa sɨɨ y jeʼm tannɨgɨyoʼoyijom. Tanaʼmtaʼmiñ jempɨk iñaskaʼ jeʼm yoomtɨwɨ Julia. Dende ixutyujom wanba idyɨk en tuum iglesia. Okmɨ iixpɨk algun i iga in̈kejay iga majtyim wɨwañiñ. Dyaʼ maaj jaʼy tsaam idyɨk ixpɨktabam Julia y moj waañi en jeʼm conciertos. Iganam nɨkpa idyɨk jeʼm escuela juuty ikuyujkaʼaba iwan, tuum de jeʼm icompañero in̈kejay jeʼm Dios iñɨɨyi. Julia wɨskɨy a la semana moj ikuyujkaʼ jeʼm Biblia y maj okmɨ ipɨk ijɨɨxi iga ikuyooxaap Jehová, jeʼyukmɨ ichak iga wanba en jeʼm conciertos. Uxan̈ tan̈kaʼa iga ipɨk yɨʼp jɨɨxi. Jeʼ in̈matpa: «Jaʼyan̈yaj anɨʼmayyaj iga odoy antsaguiñ iga awanba, pero ɨch ampɨkneum idyɨk anjɨɨxi iga an̈kuyooxaap Jehová». Nasneum maaj de 30 amtyɨy iga ipɨk yɨʼp jɨɨxi, ¿juʼuts in̈jaam Julia? Jeʼ nɨmpa: «Tsaam pɨɨmi amaymay y an̈kupɨkpa iga jeʼm annɨgɨyoʼoyijom Jehová ikkupakpa ityumpɨy jempɨk an̈kusuʼnɨʼyba» (Sal. 145:16).
¡Maaj tamaymay siiga tan̈kuyooxaap Jehová! (Aʼmɨ jeʼm párrafo 16).e
SEGUIDO KUYOOXAAJƗ JEHOVÁ
17. Yɨʼp in̈an̈pɨgam jaama, ¿tyi tannaskataʼmpa jempɨk sɨʼ tan̈kuyooxataʼm Jehová? ¿Y tyi iñaskayajpa jempɨk dyaʼ sɨʼ ikuyooxayaj?
17 Taitytyamum jeʼm in̈an̈pɨgam jaama. Jeʼm apóstol Pablo ijaykunuʼk: «D́a jáyñe miñpa jém miñpáppɨc. D́a táŋcaa̱p» (Heb. 10:37). ¿Tyi nɨmtoʼoba yɨʼp an̈maatyi? Dyam jaʼyan̈ tiempo ity iga tun̈gakyaj ipɨkyajiñ ijɨɨxi iga ikuyooxayajpa Jehová (1 Cor. 7:29). Y siiga sɨʼbam tan̈kuyooxataʼm Jehová tanjoodon̈tam iga tanan̈an̈kamoktaʼmpa kutɨʼɨchiyaj.
18. ¿Tyi ixunba Jehová y Jesús iga tan̈wattaʼmiñ?
18 Jesús ianmajan̈chiʼ jaʼyan̈yaj iga tsɨʼyyajiñ juʼuts ikuyujkɨʼɨwiñyaj y ityun̈ɨyyajiñ (Mat. 16:24). Siiga dende pekam sɨʼ tan̈kuyooxataʼm Jehová odoy tasoʼpstaʼmiñ. Duroj tanteguedataʼmiñ iga tan̈kuyooxataʼmpa, mex iga uxan̈ tan̈kaʼ. Yɨʼp tayooxpaʼttaʼmpa iga tampɨktson̈taʼmpa jaʼyan̈ kumaykedoʼoyiyaj (Sal. 35:27).
19. ¿Tyi tan̈kejaʼyba jempɨk iñaskaʼ Gene?
19 Jaʼyan̈yaj ijɨɨsyajpa iga tsaam tan̈kaʼ siiga ikuyooxayajpa Jehová. Siiga mimañiñam, ¿iñjɨɨspa iga impatstogoʼyba algun tyi siiga in̈kuyooxaap Jehová? Tuum traytyipɨxiñ iga iñɨɨyi Gene in̈matpa: «An̈jɨɨspa idyɨk iga juʼuts Testigos dyaʼ wɨap tan̈wattaʼm jempɨk tan̈kusuʼnɨytyaʼmpa. Anaʼmpa idyɨk iga jaʼyan̈ traytyipɨxiñtyam jempɨk an̈waganamɨjaneyaj nɨkyajpa jeʼm sɨn̈aajiyaj, iwaganaputyajpa jeʼm woñtyam, imɨɨchkayajpa jeʼm mɨɨchi juuty an̈aayajpa, iganam ɨch anɨkpa idyɨk jeʼm an̈tuʼumaaji y aputpa jeʼm an̈matkuy». Iga iniity idyɨk yɨkxpɨk jɨɨxi, ¿juutypɨk imalwaday Gene? Jeʼ nɨmpa: «Moj an̈wat jempɨk jeʼeyaj iwatyajpa, por tuum tiempo keʼnam iga amaymay idyɨk, pero dyaʼ jesaneʼ. Moj anjɨɨs ityumpɨy jempɨk an̈kuyujkaneʼ idyɨk Bibliajom y anjɨɨstyim ityumpɨy jeʼm kumaykedoʼoyi iga wɨap ampɨktson̈ siiga an̈watkiʼpspa. Eybɨk moj an̈kuyooxa Jehová kun ityumpɨy ananmaj. Anjaampa iga dende jesɨgam Jehová akutson̈ayneʼ jeʼm anan̈wejpadoʼoyiyaj».
20. ¿Tyi wɨɨ iga tan̈wattaʼmiñ?
20 Tuum salmista iwanay Jehová: «Maymay jeʼm pɨɨxiñ jempɨk mich in̈kupin̈ba y inimiñba juuty miity iga idyiñ jeʼm iñtyɨkkɨʼɨm» (Sal. 65:4). Juʼutstyim Josué tanɨmtaʼmiñ: «Ɨch y jempɨk ityyaj antɨkkɨʼɨm, an̈kuyooxataʼmpa Jehová» (Jos. 24:15).
WAAÑI 28 Cómo hacernos amigos de Jehová
a Isaías 48:17, 18 17 Yɨʼɨmpɨgam nɨmpa Jehová, jeʼm miJuyputnewɨʼɨp, jeʼm Santo de Israel: «Ɨch, Jehová, iñDios, jempɨk min̈kejaʼyba iga miwɨnɨgaʼyiñ, jempɨk min̈kejaʼyba jeʼm tun̈ juuty wɨɨ iga miñɨguiñ». 18 ¡Meʼega mich in̈kupɨkpa jeʼm anan̈kiʼmayoʼoyiyaj! Jesɨk, jaʼyan̈aap impaz juʼuts tuum nɨʼtun̈, y jeʼm iñjusticia, jeex jesɨk lapatspa jeʼm lamar.
b Salmo 103:13, 14 13 Juʼutstyim tuum jaatun̈ iga ikwiñkejaʼyba yaʼachan̈jamoʼoyi jeʼm imanɨktam, Jehová ikwiñkejaʼybatyim yaʼachan̈jamoʼoyi jempɨk ikupɨkyajpa. 14 Jehová iwɨjoodon̈ juutypɨk tawat, ijɨɨspatyim iga tapoʼtpoʼt.
c Weeñi nɨɨyiyaj kukagayñeyajta.
d JEMPƗK NASPA IXƗʼ EN JEʼM IMÁGENES: Tuum yoomoʼ naspa ixɨʼ juuty nawattaap jeʼm mɨjpɨk an̈tuʼumaaji y ikumaton̈ba iga tun̈gakyaj sɨʼ ikujɨyyaj jeʼm Testigos. Okmɨ nuʼkpa juuty ity jeʼm carrito iga ikumaton̈ba jeʼm Dios In̈maatyi.
e JEMPƗK NASPA IXƗʼ EN JEʼM IMAGEN: Yɨʼp imagen ikwiñkejpa jeʼm kukaki iwatwɨʼɨp Julia iga ikuyooxaap Jehová.