KUYUUJI 23
WAAÑI 2 Tu nombre es Jehová
¿Tyiʼiga tanteguedataʼmiñ jeʼm Jehová iñɨɨyi?
«Mimichtyam mantestigos —nɨmpa Jehová—» (IS. 43:10).
AN̈KEJAYOʼOYI
Tyityam wɨap tan̈wattaʼm iga tan̈kujibaytyaʼmpa jeʼm Jehová iñɨɨyi y tanakwiñkejtaʼmpa iga jeʼ dyaʼ mɨgoyba.
1, 2. ¿Juutypɨk tanjoodon̈tam iga Jesús tsaam ityegueda jeʼm Jehová iñɨɨyi?
JESÚS tsaam ityegueda jeʼm Jehová iñɨɨyi y in̈kejay tun̈gakyaj. Juʼuts tan̈kɨʼpin̈taʼm jeʼm tun̈gak kuyujijom, Jesús nachiʼitya iga akkaʼataiñ iga wɨaiñ ikwiñkej iga Jehová dyaʼ mɨgoyba y juchixkej iwɨwatpa (Mar. 14:36; Heb. 10:7-9). Y jesɨk kuyajum jeʼm Mil Amtyɨy, jeʼ ikseedaʼyba iJaatun̈ jeʼm iAn̈jagoʼoyi iga kujiʼbaytyaiñ jeʼm Jehová iñɨɨyi (1 Cor. 15:26-28). Ityumpɨy jempɨk Jesús iwatneʼ y jempɨk iwatpanam por jeʼm Jehová iñɨɨyi ikwiñkejpa juʼtspɨy ityoyba iJaatun̈.
2 Jesús miñ yɨʼp Naxyukmɨ jeʼm iJaatun̈ iñɨɨyimɨ (Juan 5:43; 12:13). In̈kejay jeʼm ikuyujkɨʼɨwiñyaj jeʼm iJaatun̈ iñɨɨyi (Juan 17:6, 26). Jesɨk in̈kejay tun̈gakyaj y iwat jeʼm milagros iwɨakwiñkej iga Jehová jempɨk ichiʼiñeʼ idyɨk jeʼm joodon̈oʼoyi y jeʼm pɨɨmi iga wɨaiñ iwat ityumpɨy (Juan 10:25). Jesɨk sɨʼ idyɨk in̈wejpaʼt Jehová y ijɨykiʼm jeʼm ikuyujkɨʼɨwiñyaj, jeʼ nɨm: «Kuixyaajɨ ikuyukmɨ jeʼm iññɨɨyi» (Juan 17:11). Juʼuts tanaʼmtaʼm Jesús tsaam ityegueda jeʼm Jehová iñɨɨyi, jesɨk ¿tyiʼiga algun i wɨap iñɨm iga cristiano siiga dyaʼ iixpɨgaʼyba y dyaʼ ipɨgaʼyba jeʼm Jehová iñɨɨyi?
3. ¿Tyi tan̈kɨʼpin̈taʼmpa yɨʼp kuyujijom?
3 Juʼuts nuntapɨk cristianos tan̈watkiʼpstaʼmpa Jesús iga tsaam tanteguedataʼmpa jeʼm Jehová iñɨɨyi (1 Ped. 2:21). Yɨʼp kuyujijom tan̈kɨʼpin̈taʼmpa iga jempɨk in̈matyajpa jeʼm wɨtampɨk an̈maatyi ixpɨkyajtaap iga in̈matyajpa jeʼm Jehová iñɨɨyi (Mat. 24:14). Tan̈kɨʼpin̈taʼmpatyim tyiʼiga tanteguedataʼmiñ jeʼm Jehová iñɨɨyi.
«TSƗ́YYAJPA JUUTS JÉM DIOS IPƗXIÑT́AM»
4. a) ¿Tyi iñɨʼmay Jesús iga iwatyajiñ jeʼm ikuyujkɨʼɨwiñyaj? b) ¿Juʼptam akwagoʼoyiyaj tan̈kutson̈taʼmpa?
4 Wiñtyi iga Jesús nɨkpa sɨn̈yukmɨ iñɨʼmay jeʼm ikuyujkɨʼɨwiñyaj: «Mimicht́am impɨctsoŋtámpa jém Dios [iespíritu]. […] Iga wɨa̱p iniŋmadáy jém pɨxiñt́am t́it́am íñix iga ɨch aŋwatne. Mojpa iniŋmatta Jerusalén, icuwɨ̱t́i jém naxyucmɨ de Judea, hasta jém naxyucmɨ de Samaria, y hasta más juumɨ, icuwɨ̱t́i de yɨ́p naxyucmɨ» (Hech. 1:8). Jeʼyukmɨ jeʼm wɨtampɨk an̈maatyi dyaʼ numaaj an̈mattaap idyɨk Jerusalén, an̈mattaptyim idyɨk ikuwɨtyi naxyukmɨ y jaʼyan̈yaj wɨap idyɨk ichɨʼyyaj juʼuts Jesús ikuyujkɨʼɨwiñ (Mat. 28:19, 20). Jesús nɨm iga jeʼm ikuyujkɨʼɨwiñyaj in̈matyajpa idyɨk tyityam iaʼmyajpa iga iwatpa. ¿Nɨmtoʼoba iga jeʼm Jesús ikuyujkɨʼɨwiñyaj numaaj in̈matyajpa tyityam iaʼmyajpa iga jeʼ iwatpa? ¿O nasuntap iga iixpɨgayyajiñ jeʼm Jehová iñɨɨyi? Jeʼm capítulo 15 de Hechos tayooxpaʼttaʼmpa tan̈kutson̈taʼm yɨʼpyaj akwagoʼoyi.
5. ¿Juutypɨk ikwiñkej jeʼm apóstoles y jeʼm ancianos de Jerusalén iga ityumpɨyyaj iixpɨgayyajiñ jeʼm Jehová iñɨɨyi? (Aʼmɨtyim jeʼm imagen).
5 Jeʼm amtyɨy 49, jeʼm apóstoles y jeʼm ancianos de Jerusalén an̈tuʼumayaj iga ikɨʼpin̈yajpa tyi iwatyajpa idyɨk jempɨk dyaʼ jeʼ judíos iga wɨaiñ ichɨʼyyaj juʼuts cristianos. Jesɨk kuyaj jeʼm an̈tuʼumaaji Santiago, jeʼm Jesús ichɨɨñtyɨɨwɨ, nɨm: «Taŋmadáy jém Peto jutsa̱ miwɨ̱wadáy Dios jém tuŋgac pɨxiñt́am cuando moj ipɨctsoŋyaj jém Dios iŋma̱t́i. Cupiŋyajta̱t́im jute̱n de jeeyaj iga tsɨ́yyajpa juuts jém Dios ipɨxiñt́am». Ijɨykiʼm jempɨk nɨm jeʼm profeta Amós: «Aŋwatpa je̱mpɨc iga jém tuŋgac pɨxiñt́am imétsyajiñ Dios. Jesɨc it́u̱mpɨy jém cupiŋneta̱wɨɨp, jém d́apɨc de Israel, tsɨ́yyaj juuts ɨch ampɨxiñt́am» (Hech. 15:14-18). Yɨʼp nɨmtoʼoba iga in̈kejayyajpa tun̈gakyaj jeʼm Dios iñɨɨyi y iixpɨkyajtaap iga ininɨgayyajpa jeʼm Jehová iñɨɨyi.
Jeʼm apóstoles y jeʼm ancianos de Jerusalén ikutɨʼɨyɨyyaj iga jeʼm cristianos in̈kejyajpa idyɨk jeʼm Jehová iñɨɨyi. (Aʼmɨ jeʼm párrafo 5).
6, 7. a) ¿Tyiʼiga miñ Jesús yɨʼp naxyukmɨ? b) ¿Tyi jempɨk tsaam ityegueda Jesús jesɨk oy yɨʼp naxyukmɨ?
6 Tanjɨɨstaʼm iga jeʼm Jesús iñɨɨyi nɨmtoʼoba «Jehová kɨakpudoʼyba». Y jeempɨgam iwat Jehová, ikutsat Jesús iga ikɨakpudyiñ ityumpɨyyaj jempɨk iniityyaj fe. Jeʼyukmɨ Jesús miñ yɨʼp Naxyukmɨ iga ikɨan̈kot iityi iga tayojaytyaʼm jeʼm tantan̈kaʼ (Mat. 20:28). Kun tyityam iwat tampɨktson̈taʼmpa tuum ityi dyapɨk kuyajpa (Juan 3:16).
7 ¿Tyiʼiga nasuntaap idyɨk jeʼm kɨakpudoʼoyi? Iga Adán y Eva dyam ikupɨkyaj Jehová, y ipatstogoyyaj jeʼm ityi dyapɨk kuyajpa (Gén. 3:6, 24). Jesús dyaʼ numaaj miñ takɨakputtaʼm, miñtyim ikwiñkej iga jeʼm Wookkɨʼɨwiñ ikumɨgoyñeʼ Jehová (Gén. 3:4, 5). Jeʼyukmɨ nasuntaap idyɨk iga ityumpɨyyaj ijoodon̈ayajiñ iga Jehová tsaam toyoʼyba y dyaʼ imalwatneʼ. Jesús iwɨakkupak iyooxakuy iga in̈maday tun̈gakyaj tyityam iwatpa Jehová. Yɨʼɨmpɨgam ikwiñkej iga tsaam ityegueda iga kujiʼbaytyaiñ jeʼm Jehová iñɨɨyi.
¿Tyiʼiga algun i wɨap iñɨm iga cristiano siiga dyaʼ iixpɨgaʼyba y dyaʼ ipɨgaʼyba jeʼm Jehová iñɨɨyi?
8. ¿Tyi wɨɨ iga ikutɨʼɨyɨyyajiñ y ipɨktson̈yajiñ jempɨk tsɨʼyyajpa juʼuts Jesús ikuyujkɨʼɨwiñ?
8 Ityumpɨyyaj jempɨk tsɨʼyyajpa juʼuts Jesús ikuyujkɨʼɨwiñ, jeʼm judíos y jempɨk dyapɨk jeʼ judíos, wɨɨ iga ikutɨʼɨyɨyyajiñ y ipɨktson̈yajiñ iga Jehová jempɨk kɨakpudoʼyba ikuyukmɨ Jesús (Juan 17:3). Juʼutsyim Jesús ixpɨkyajtaap por jeʼm Dios iñɨɨyi. Pero nasuntaap iga ikutɨʼɨyɨyyajiñ tyiʼiga wɨɨ iga ikujiʼbayyajiñ jeʼm Jehová iñɨɨyi, siiga iwatyajpa jeempɨk nakɨakputyajtaap y ipɨktson̈yajpa jeʼm ityi dyapɨk kuyajpa (Hech. 2:21, 22). Jeʼyukmɨ ityumpɨy jempɨk tsɨʼyyajpa juʼuts Jesús ikuyujkɨʼɨwiñ wɨɨ iga iixpɨkyajiñ Jehová. Y jesɨk Jesús ikkuyaj jeʼm ian̈wejpadoʼoyi nɨm yɨʼɨmpɨk: «Aŋwɨ̱aŋquejáy jeeyaj iga icutɨɨyɨyyajiñ iga mii̱apaap mimich. Seguido anaŋquejáy[yaj]pa iga iniit́yajiñ jém wɨbɨc tóyooyi juuts mich antoypa aɨch» (Juan 17:26).
«MIMICHTYAM MANTESTIGOS»
9. ¿Juutypɨk tanakwiñkejtaʼmpa iga tsaam tanteguedataʼmpa jeʼm Jehová iñɨɨyi?
9 Juʼuts tan̈kɨʼpin̈netaʼm, iga tatsɨyñetamum juʼuts Jesús ikuyujkɨʼɨwiñ wɨɨ iga tan̈kujiʼbaytyaʼmiñ jeʼm Jehová iñɨɨyi (Mat. 6:9, 10). Kun tyityam tan̈wattaʼmpa tanakwiñkejtaʼmpa iga tsaam tanteguedataʼmpa jeʼm Jehová iñɨɨyi. ¿Tyi wɨap tan̈wattaʼm iga tan̈kujiʼbaytyaʼmpa jeʼm Jehová iñɨɨyi y tanakwiñkejtaʼmpa iga jeʼm Wookkɨʼɨwiñ ikumɨgoyñeʼ Jehová?
10. ¿Tyi jempɨk tammaytyaʼmpa en jeʼm capítulos 42 a 44 de jeʼm libro de Isaías? (Isaías 43:9; 44:7-9; aʼmɨtyim jeʼm imagen).
10 En jeʼm capítulo 42 a 44 de jeʼm libro de Isaías, tan̈kuyujkataʼmpa juutypɨk wɨap tan̈kujiʼbaytyaʼm jeʼm Jehová iñɨɨyi. En yɨʼpyaj capítulo Jehová iñɨʼmaʼyba jempɨk dyaʼ ikuyooxayajpa iga ikwiñkejyajiñ iga jeʼm dioses jempɨk ikoosteñayyajpa nunta ityyaj. Nɨmtyim iga ininɨkyajiñ testigos iga in̈matyajiñ tyityam nɨmyajpa jeʼm dios watyñaxyaj, pero ni i dyaʼ wɨap iwat jeempɨk (maayɨʼ Isaías 43:9;a 44:7-9).b
Taɨchtyam juʼuts Jehová itestigos, kun tyityam tan̈wattaʼmpa y tanɨmtaʼmpa tanakwiñkejtaʼmpa iga dyaʼ i tun̈gak Dios. (Aʼmɨ jeʼm párrafos 10 y 11).
11. Juʼuts nɨmpa Isaías 43:10-12, ¿tyi iñɨʼmaʼyba Jehová jeʼm iyooxakɨʼɨwiñyaj?
11 (Maayɨʼ Isaías 43:10-12).c Jehová iñɨʼmaʼyba jeʼm iyooxakɨʼɨwiñyaj: «Mimichtyam mantestigos[...] y ɨch aDios» y iñɨʼmaybatyim iga ikutson̈yajiñ yɨʼp akwagoʼoyi: «¿Ity tun̈gak Dios?» (Is. 44:8). Tanaitytyaʼm jeʼm wɨbɨk xaaja iga wɨap tan̈kutson̈taʼm yɨʼp akwagoʼoyi. Kun tyityam tan̈wattaʼmpa y tanɨmtaʼmpa tanakwiñkejtaʼmpa iga Jehová jeʼam jeʼm nuntapɨk Dios iga numaaj jeʼ iñɨɨyi Jehova. Tanakwiñkejtaʼmpatyim iga tantoytyaʼmpa Jehová y dyaʼ tanjagan̈tsaktaʼmpa, mex iga jeʼm Wookkɨʼɨwiñ takkamaytyaʼmpa kutɨʼɨchiyaj. Yɨʼɨmpɨgam wɨap tanyooxpadoytyaʼm iga kujiʼbaytyaiñ jeʼm iñɨɨyi.
12. ¿Juutypɨk kupak jeʼm jɨychagoʼoyi itywɨʼɨp en Isaías 40:3, 5?
12 Isaías ijɨychak iga algun i iwɨtsagaʼyba idyɨk «jeʼm Jehová ityun̈» (Is. 40:3; nota). ¿Juutypɨk kupak yɨʼp jɨychagoʼoyi? Juan jeʼm akchin̈oypaʼap, iwɨtsak jeʼm Jesús ityun̈, iga miñ y in̈mat jeʼm Jehová iñɨyiimɨ (Mat. 3:3; Mar. 1:2-4; Luc. 3:3-6). Isaías ijɨychaktyim: «Jeʼm Jehova ikujiʼboʼoyi akwiñkejtaap» (Is. 40:5). ¿Juutypɨk kupak yɨʼpyaj an̈matyiyaj? Jesɨk Jesús oy yɨʼp naxyukmɨ, kun jempɨk iwat ikwiñkej juʼuts Jehová, keʼnam jesɨk Jehová ketneʼ idyɨk naxyukmɨ (Juan 12:45).
13. ¿Juutypɨk wɨap tan̈watkiʼpstaʼm Jesús?
13 Juʼutsyim Jesús, tanan̈madaytyaʼmpa tun̈gakyaj jeʼm Jehová iñɨɨyi y ityumpɨy tyityam jeʼ iwatneʼ. Juʼuts Jehová itestigos wɨɨ iga tanan̈madayyajiñtyim tun̈gakyaj. Ityumpɨy jempɨk Jesús iwat ikujiʼbay jeʼm Jehová iñɨɨyi (Hech. 1:8). Jesús tsaam ityegueda in̈maday tun̈gakyaj jeʼm Jehová iñɨɨyi y taɨchtyam jeempɨktyim wɨɨ iga tan̈wattaʼmiñ (Apoc. 1:5). ¿Juutypɨknam wɨap tanakwiñkejtaʼm iga tanteguedataʼmpa jeʼm Jehová iñɨɨyi?
TANAKWIÑKEJTAʼMIÑ IGA TANTEGUEDATAʼMPA JEʼM JEHOVÁ IÑƗƗYI
14. Juʼuts nɨmpa Salmo 105:3, ¿juʼuts tanan̈jaamtaʼm jesɨk tanan̈mattaʼmpa jeʼm Jehová iñɨɨyi?
14 Tamaymaytyam tanan̈madaytyaʼm jeʼm Jehová iñɨɨyi (maayɨʼ Salmo 105:3).d Jehová tsaam imaymaywatpa jesɨk tanan̈madayyajpa tun̈gakyaj jeʼm iñɨɨyi (Jer. 9:23, 24; 1 Cor. 1:31; 2 Cor. 10:17). Yɨʼp nɨmtoʼoba iga tanan̈madayyajpa iga jeʼm tanDios jeʼ Jehová. Tsaam tamaymaytyam iga wɨap tan̈kujiʼbaytyaʼm jeʼm Jehova iñɨɨyi y tanakwiñkejtaʼm iga jeʼ dyaʼ mɨgoʼyba y juchixkej iwɨwatpa. Jeʼyukmɨ odoy tatsaʼataʼmiñ juuty tayooxataʼmpa, juuty takuyujtaʼmpa, jeʼm tantɨgan̈jom o juutykej iga taitytyaʼmpa iga tun̈gakyaj taixpɨkyajiñ juʼuts Jehová itestigos. Jeʼm Wookkɨʼɨwiñ ixunba iga odoy tanan̈madaytyaʼmiñ jeʼm Jehová iñɨɨyi (Jer. 11:21; Apoc. 12:17). Jeʼm Wookkɨʼɨwiñ y jempɨk ityun̈ɨyyajpa ixunyajpa iga tun̈gakyaj odoy ijoodon̈ayajiñ jeʼm Jehová iñɨɨyi (Jer. 23:26, 27). Pero iga tantoyaytyaʼmpa jeʼm Jehová iñɨɨyi juchixkej tan̈kujiʼbaytyamtoʼoba (Sal. 5:11; 89:16).
15. ¿Tyi nɨmtoʼoba iga tanan̈madayyajiñ tun̈gakyaj jeʼm Jehová iñɨɨyi?
15 Duroj tanan̈mattaʼmpa jeʼm Jehová iñɨɨyi (Joel 2:32; Rom. 10:13, 14). Iga tanan̈madayyajpa tun̈gakyaj jeʼm Jehová iñɨɨyi dyaʼ numaaj nɨmtoʼoba iga iixpɨgayyajiñ y ipɨgayyajiñ. Nɨmtoʼoba iga iixpɨkyajiñ juʼuts Dios ikupɨkyajiñ y ikuaʼmayyajiñ jeʼm iyooxpadoʼoyi y jeʼm ijɨɨxian̈chioʼoyi (Sal. 20:7; 99:6; 116:4; 145:18). Tanan̈kejayyajiñtyim tyi nɨmtoʼoba jeʼm Jehová iñɨɨyi y jeʼm wɨtampɨk cualidades iga iniity. Siiga tan̈wattaʼmpa jeempɨk tanyooxpaʼtyajpa iga ikakyajiñ iityi y nakɨakputyajtaiñ (Is. 12:4; Hech. 2:21, 38).
16. ¿Juutypɨk wɨap tanakwiñkejtaʼm iga jeʼm Wookkɨʼɨwiñ mɨgoʼyba?
16 Tanyaʼachɨytyaʼmpa jesɨk tayaʼachwattamtaap por jeʼm Jehová iñɨɨyi (Sant. 5:10, 11). Jesɨk tayaʼachwattamtaap iga dyaʼ tanjagan̈tsaktaʼmpa Jehová tanakwiñkejtaʼmpa iga jeʼm Wookkɨʼɨwiñ mɨgoyba. Jesɨk jaʼy ityi Job, jeʼm Wookkɨʼɨwiñ ikujɨy jeʼm Jehová iyooxakɨʼɨwiñyaj. Jeʼ nɨm: «Jeʼm pɨɨxiñ chioʼyba ityumpɨy jempɨk iniity iga dyaʼ kaʼatoʼoba» (Job 2:4). Kun yɨʼpyaj an̈maatyi sɨʼ idyɨk iñɨm iga jeʼm Jehová iyooxakɨʼɨwiñ numaaj ikuyooxayajpa jesɨk iwɨnɨgayyajpa, pero ijagan̈tsakyajpa idyɨk jesɨk in̈an̈kamokyajpa kutɨʼɨchiyaj. Iga Job dyaʼ ijagan̈tsak Jehová, ikwiñkej iga jeʼm Wookkɨʼɨwiñ mɨgoʼyba idyɨk ixɨʼ. Yɨʼp jaama wɨaptyim tanakwiñkejtaʼm iga dyaʼ tanjagan̈tsaktaʼmpa Jehová. Tan̈wɨkupɨknetaʼm iga jeʼ juchixkej takuixtyaʼmpa (Juan 17:11).
17. Juʼuts nɨmpa 1 Pedro 2:12, ¿juutypɨk wɨap tan̈kujiʼbaytyaʼm jeʼm Jehová iñɨɨyi?
17 Kun jempɨk tan̈wattaʼmpa tan̈kujiʼbaytyaʼmpa jeʼm Jehová iñɨɨyi (Prov. 30:9; Jer. 7:8-11). Iga tun̈gakyaj taixpɨktaʼmpa juʼuts Jehová itestigos, kun tyityam tan̈wattaʼmpa wɨap iwat iga ikujiʼpyajiñ o ikujɨyyajiñ Jehová (maayɨʼ 1 Pedro 2:12). Jeʼyukmɨ tan̈wattaʼmiñ juʼtspɨyam tawɨataʼmpa iga tan̈kujiʼptaʼmiñ Jehová kun tyityam tanɨmtaʼmpa o tyityam tan̈wattaʼmpa. Yɨʼɨmpɨgam tayooxpadoytyaʼmpa iga kujiʼbaytyaiñ jeʼm Jehová iñɨɨyi.
18. ¿Juutypɨk tanakwiñkejtaʼmpa iga tanteguedataʼmpa jeʼm Jehová iñɨɨyi? (Aʼmɨ jeʼm nota).
18 Tan̈kujiʼbaytyaʼmpa jeʼm Jehová iñɨɨyi mex iga tun̈gakyaj takujɨytyaʼmpa (Sal. 138:2). ¿Tyiʼiga tanɨmtaʼmpa jeempɨk? Iga tantoytyaʼmpa jeʼm Jehová iñɨɨyi y tan̈wattaʼmpa tyityam jeʼ ikusuʼnɨʼyba. Jeʼyukmɨ a veces tun̈gakyaj takuxiʼkkayajpa y takujɨyyajpa.e Jesɨk Jesús akkaʼata jaʼyan̈yaj iaʼmyaj juʼuts tuum pɨɨxiñ iga tsaam imalwatneʼ. Jeʼ nachiʼitya iga akkaʼataiñ iga wɨaiñ ikujiʼbaytya jeʼm Jehová iñɨɨyi. Juʼuts nɨmpa Hebreos 12:2-4, dyaʼ tsaʼa iga «accaata̱ juuts tu̱m malopɨc pɨ̱xiñ». Yɨʼp nɨmtoʼoba iga dyaʼ ityegueda jempɨk tun̈gakyaj ijɨɨsyajpa. Maaj ityegueda iwat jempɨk Dios ixunba (Mat. 26:39).
19. ¿Juʼuts tanan̈jaamtaʼm iga tan̈kuyooxataʼmpa Jehová?
19 Tamaymaytyam iga tan̈kuyooxataʼmpa Jehová y tanaʼmtaʼmpa juʼuts tuum mɨjpɨk xaaja iga taixpɨktamtaap juʼuts Jehová itestigo. Jeʼyukmɨ dyaʼ tanteguedataʼmpa siiga tun̈gakyaj takuxiʼkkataʼmpa o takujɨytyaʼmpa. Maaj tanteguedataʼmpa jeʼm Jehová iñɨɨyi y dyaʼ jempɨk tun̈gakyaj nɨmyajpa de taɨchtyam. Tan̈wɨpɨknetaʼm tanjɨɨxi iga duroj tan̈kujiʼbaytyaʼmpa jeʼm Jehová iñɨɨyi mex iga jeʼm Wookkɨʼɨwiñ dyaʼ ikusuʼnɨʼyba y takkaʼmaytyaʼmpa kutɨʼɨchiyaj. Juʼutstyim Jesús tanakwiñkejtaʼmpa iga tsaam tanteguedataʼmpa jeʼm Jehová iñɨɨyi.
WAAÑI 10 ¡Alabemos a nuestro Dios, Jehová!
a Isaías 43:9 Ityumpɨy jeʼm naciones an̈tuʼumayajiñ tumtyi an̈eymɨ y jeʼm tɨgan̈jujyaj an̈tuʼumayajiñtyim. ¿Iapaʼap wɨap tan̈maday yɨʼp? ¿Wɨap tan̈madayyaj jempɨk naspa? Inimiñyajiñ jeʼm itestigos iga ikwiñkejyajiñ iga dyaʼ sɨʼ imɨgoyyaj, ikumaton̈yajiñ y nɨmyajiñ: ‹¡jesaneum!›».
b Isaías 44:7-9 ¿Iapaʼap jeex juʼuts aɨch? ¡Anɨʼmaʼyiñ y akwiñkejaʼyiñ! In̈madyiñ tyityam dyaʼ jaʼyñeʼ naspa y in̈madyiñtyim tyityam naspa okmɨ, juʼuts ɨch an̈watneʼ dende wiñɨgam. 8 Odoy an̈jeʼktaʼamɨ; jeʼm kɨɨn̈ɨ odoy mikteeñan̈jaktaʼmiñ. ¿Dyaʼ manan̈madaytyaʼm wiñtyi tumtum de mimichtyam? ¿Dyaʼ manakjoodon̈ataʼm? Mimichtyam mantestigos. ¿Ity tun̈gak Dios? Dyaʼ, dyaʼ i tun̈gak Tsaʼa, dyaʼ anjoodon̈ iga ity tun̈gak›». 9 Ityumpɨy jempɨk iwatyajpa jeʼm dios watyñaxyaj, dyaʼ tyi kumeskuyyaj y jeʼm watyñaxyaj dyatyim tyi kumeskuyyaj. Iga tsɨʼyyajiñ juʼuts itestigos, yɨʼpyaj dyaʼ aʼmamoyyajpa y dyatyim tyi ijoodon̈yaj; jeʼyukmɨ, jempɨk iwatneyaj natsɨktsaʼawatyajtaap.
c Isaías 43:10-12 10 «Mimichtyam mantestigos —nɨmpa Jehová—, jɨʼ, micham manyooxakɨʼɨwiñ, jempɨk man̈kupin̈neʼ, iga añixpɨktaʼmiñ, an̈kupɨktaʼmiñ y in̈kutɨʼɨyɨytyaʼmiñ iga dyaʼ akakneʼ. Wiñtyi iga aidyiñ dyaʼ idyɨk ity ni tuum Dios y okmɨ dyatyim i ni tun̈gak. 11 Ɨch, ɨch annɨɨyi Jehová, y dyaʼ i tun̈gak juʼuts aɨch iga kɨakpudoʼyba». 12 «Ɨch jempɨk anɨm, akɨakpudoy y manakjoodon̈ataʼm jesɨk dyaʼ idyɨk ity tun̈gak dios. Jeʼyukmɨ mimichtyam mantestigos —nɨmpa Jehová—, y ɨch aDios.
d Salmo 105:3 Maymayataʼamɨ inin̈mattaʼm jeʼm iñɨɨyi. Maymayayajiñ jeʼm ianmaj jempɨk ikuaʼmyajpa Jehová.
e Job tsaam ityegueda juʼuts idyɨk iaʼmyajpa tun̈gakyaj jesɨk jeʼm tukuteen pɨxiñtyam iñɨʼmayyaj iga imalwatneʼ idyɨk. Jesɨk kaʼayaj jeʼm imanɨktam y ipatstogoy ityumpɨy tyityam iniity idyɨk dyaʼ nɨm iga Dios sɨʼ idyɨk iyaʼachwat (Job 1:22; 2:10). Pero jesɨk nɨʼmaytya iga imalwatneʼ moj nɨmi jaʼyan̈ tyidyin̈kej. Maaj ityegueda iga nakupujtaap iyaʼak y dyaʼ iga ikujiʼbaʼyba jeʼm Jehová iñɨɨyi (Job 6:3; 13:4, 5; 32:2; 34:5).