¿Wɨapnam miyooxpaʼt jempɨk wiñtyi moj in̈kuyujkaʼ Bibliajom?

1. ¿Juʼuts mu inin̈jaam jesɨk moj in̈kuyujkaʼ jempɨk in̈kejpa jeʼm Biblia?

JEMPƗK moj tan̈kuyujkataʼm Bibliajom tsaam ikukak tañityi. Jesɨk tanjoodon̈ataʼm iga Dios iñɨɨyi Jehová, moj tan̈kunuʼktaʼm (Is. 42:8). Jesɨk tan̈kutɨʼɨyɨytyaʼm tyi naspa jesɨk takaʼataʼmpa, dyam maaj tan̈kɨɨn̈taʼm jempɨk kaʼaneyajum (Ecl. 9:10). Y jesɨk tan̈kuyujkataʼm iga Dios iwatpa iga yɨʼp Nas tsɨʼyiñ juʼuts tuum paraíso, dyam tan̈yaʼktaʼm iga numaaj wɨap idyɨk tañitytyaʼm 70 u 80 amtyɨy, tamaymaywattaʼm tanjoodon̈ataʼm iga taitytyaʼmpa juchixkej (Sal. 37:29; 90:10).

2. Mex iga dende pekam sɨʼ tan̈kuyooxataʼm Jehová, ¿tyiʼiga tayooxpaʼttaʼmpanam jempɨk moj tan̈kuyujkataʼm Bibliajom? (2 Pedro 1:​12, 13).

² Mex iga dende pekam sɨʼ tan̈kuyooxataʼm Jehová, odoy tan̈kujaʼamaytyaʼmiñ iga jempɨk moj tan̈kuyujkataʼm Bibliajom wɨapnam tayooxpaʼttaʼm. Jesɨk jeʼm apóstol Pedro ijay jeʼm wɨstenpɨk carta, ijaʼyay jempɨk iwɨjoodon̈yajam idyɨk yɨʼpyaj an̈kejayoʼoyiyaj y dyaʼ idyɨk ichakneyaj (maayɨʼ 2 Pedro 1:​12, 13). Iyooxpaʼttoʼoba idyɨk jeʼm tɨwɨtam iga odoy iaʼmchiʼiyajiñ iga imɨgoyayyajiñ jempɨk nɨʼman̈tayayajpa iga ikupɨkyajpa Dios (2 Ped. 2:​1-3). Jeʼyukmɨ iga wɨaiñ iyaʼachɨyyaj y odoy mɨgoyayyajtaiñ, akjɨɨsyajta weeñi an̈kejayoʼoyiyaj jempɨk ikuyujkaneyajum idyɨk.

3. ¿Juutypɨk tayooxpaʼttaʼmpa siiga mojpa tan̈kujɨɨstaʼm jempɨk moj tan̈kuyujkataʼm Bibliajom?

³ Dyatyi ijoo juʼtsan̈am tiempo sɨʼ tan̈kuyooxataʼm Jehová, jempɨk moj tan̈kuyujkataʼm Bibliajom wɨapnam tayooxpaʼttaʼm. Tan̈kujɨɨstaʼmiñ tuum yoomoʼ kun jeʼm iyommaanɨk. Mex iga tumtyi wiʼkkuy iwatyajpa y jeʼtyim ingredientes ikukomayyajpa, wɨapsɨ iga jeʼm yoomoʼ maaj iwɨpudaʼyba iga dende pekam iwatpa wiʼkkuy. Jeempɨktyim naspa kun jempɨk mojpa ikuyujkayaj jeʼm Biblia, wɨapsɨ iga ikutɨʼɨyɨyyajpa weeñi an̈kejayoʼoyiyaj jesɨk imayyajpa tuum texto. Pero jempɨk pekam sɨʼ ikuyooxayaj Jehová wɨap ipaʼtyaj tun̈gak an̈kejayoʼoyiyaj iga iyooxpaʼtyajpa. ¿Tyiʼiga ? Iga dende jesɨk chin̈yaj hasta sɨɨ, wɨapsɨ iga kukakneyaj iityi o dyam iwatyajpa jeʼm yooxakuy jempɨk jaʼy iwatyaj. Jesɨk tan̈kujɨɨstaʼmpa jempɨk moj tan̈kuyujkataʼm, tayooxpaʼttaʼmpa tanjɨɨstaʼm juutypɨknam wɨap tan̈watkiʼpstaʼm sɨɨ. Yɨʼp kuyujijom tan̈kɨʼpin̈taʼmpa juutypɨk jempɨk pekam sɨʼ ikuyooxayaj Jehová wɨapnam iyooxpaʼtyaj tukuteen an̈kejayoʼoyiyaj mojwɨʼɨp ikuyujkayaj Bibliajom.

JEHOVÁ IWATNEʼ ITYUMPƗY

4. ¿Juutypɨk takagayñetaʼm tañityi tanjoodon̈ataʼm iga Jehová jeʼam jempɨk iwatneʼ ityumpɨy?

⁴ Hebreos 3:4 nɨmpa: «Dios iwat it́u̱mpɨy jém it́yajwɨɨp». Tanjoodon̈tam iga jempɨk iwat yɨʼp nas y ityumpɨy tyityam ity, iniity joodon̈oʼoyi y tsaam pɨɨmiɨy. Iga jeʼ tawatnetaʼm tsaam tawɨixpɨktaʼmpa. Ixunba iga tawɨnɨgaytyaʼmiñ y ijoodon̈ jempɨk wɨap tawɨwadaytyaʼm. ¿Juutypɨk ikukakneʼ tañityityam yɨʼp an̈kejayoʼoyi? Tayooxpaʼtnetaʼm tanjoodon̈ataʼm tyiʼiga taitytyaʼm yɨʼɨm y tsaam tamaymaytyam.

5. ¿Tyi tan̈kejaytyaʼmpa tanjoodon̈ataʼm iga Jehová tawatnetaʼm? (Isaías 45:​9-12).

⁵ Jesɨk tanjoodon̈ataʼm iga Jehová iwatneʼ ityumpɨy tan̈kejaytyaʼmpa iga odoy tanakujiʼptamtaiñ. Tanjɨɨstaʼmiñ jempɨk iñaskaʼ Job. Wiñtyi najɨɨsta iyaʼak y moj nakupujtaaji iga jeʼ tsaam iwɨwatpa, pero Jehová ikjɨɨs iga numaaj jeʼ jempɨk iniity ityumpɨy jeʼm pɨɨmi (Job 38:​1-4). Yɨʼp iyooxpaʼt iga ikaguiñ ijɨɨxi y ikutɨʼɨyɨy iga Jehová juchixkej iwɨwatpa. Jeʼtyim jɨɨxi ijaykunuʼk jeʼm profeta Isaías. Jeʼ nɨm: «¿Wɨɨ iga iñɨʼmaʼyiñ jeʼm suʼun̈nas jempɨk iwatneʼ ‹¿Tyi sɨʼ in̈wat?›?» (maayɨʼ Isaías 45:​9-12).a

6. ¿Tyiʼiga wɨɨ iga tan̈kujɨɨstaʼmiñ iga Jehová iniity joodon̈oʼoyi y tsaam pɨɨmiɨy? (Aʼmɨtyim jeʼm imágenes).

⁶ Tuum tɨɨwɨ iga pekam sɨʼ ikuyooxa Jehová, wɨap ijɨɨs iga dyam nasuntaap iga ijɨɨxian̈chiʼiñ ikuyukmɨ jeʼm In̈maatyi (Job 37:​23, 24). Iga odoy iñaskaiñ jeempɨk wɨɨ iga ikujɨɨxiñ iga Jehová iniity joodon̈oʼoyi y tsaam pɨɨmiɨy (Is. 40:22; 55:​8, 9). Yɨʼp iyooxpaʼtpa iga odoy nakujiʼptaiñ y ikutɨʼɨyɨʼyiñ iga jeʼm Jehová ijɨɨxi maaj wɨɨ que jempɨk jeʼ ijɨɨspa.

7. ¿Tyi iyooxpaʼt Rahela iga iwɨpɨktson̈iñ jeʼm kukaki iwatwɨʼɨp jeʼm Jehová iorganización?

⁷ Jeʼm yoomtɨwɨ Rahela iga ity Eslovenia iyooxpaʼt ikujɨɨs iga Jehová iwatneʼ ityumpɨy, jeʼyukmɨ iwɨpɨktson̈ jempɨk nɨm jeʼm Jehová iorganización. Jeʼ nɨmpa: «Uxan̈ tan̈kaʼ an̈wɨpɨktson̈ jeʼm jɨɨxi ipɨkyajpaʼap jeʼm tɨwɨtam Kumun Nayooxaoyyajpaʼap. Mex iga anaʼmneum idyɨk jeʼm Informe 8 del 2023, tsaam agaʼman̈jak jesɨk anaʼm iga jeʼm tɨɨwɨ jempɨk sɨʼ iknas jeʼm najɨʼyoʼoyi ikyonneʼ in̈wiixi. Jeʼyukmɨ anan̈wejpaʼt Jehová iga ayooxpaʼdyiñ an̈wɨpɨktson̈ yɨʼp kukaki». Rahela ikutɨʼɨyɨy iga jempɨk iwatneʼ jeʼm sɨn̈ y jeʼm nas, iwɨjoodon̈ juutypɨk ijɨɨxian̈chiʼiba jeʼm iorganización. Siiga mich tan̈kaʼ in̈wɨpɨktson̈ tuum joomipɨk kutɨʼɨyɨyoʼoyi o tuum jɨɨxi iga ipɨkpa jeʼm Jehová iorganización, toopɨ tiempo iga in̈kujɨɨxiñ iga Jehová iniity joodon̈oʼoyi y tsaam pɨɨmiɨy (Rom. 11:​33-36).

TYIʼIGA IAʼMCHIʼIBA DIOS IGA TAYAʼACHATAʼMIÑ

8. ¿Juutypɨk tayooxpaʼtnetaʼm tan̈kutɨʼɨyɨytyaʼm tyiʼiga Dios iaʼmchiʼiñeʼ iga tayaʼachataʼmiñ?

⁸ ¿Tyiʼiga iaʼmchiʼiba Dios iga tayaʼachataʼmiñ? Jempɨk dyaʼ ipadayyajpa ikutson̈oʼoyi joʼyyajpa kun Dios o nɨmyajpa iga dyaʼ i Dios (Prov. 19:3). Pero mich in̈kuyujkaneum iga Jehová dyaʼ tayaʼachwattaʼmpa. Tantumpɨytyam tatsaamiataʼmpa, tamɨmnetaʼmpa y takaʼataʼmpa iga tatan̈kaɨykɨʼɨwiñtyaʼm. In̈kuyujkanetyim iga Jehová iaʼmchiʼiñeʼ iga jaʼyan̈yaj iixpɨkyajiñ y ikutɨʼɨyɨyyajiñ tyityam iwatpa iga iktogoyba jeʼm yaʼachaaji (2 Ped. 3:​9, 15). Y yɨʼp miyooxpaʼtneʼ iga majtyim in̈kunuʼguiñ.

9. ¿Juchix wɨɨ iga tan̈kujɨɨstaʼmiñ tyiʼiga Jehová iaʼmchiʼiba iga tayaʼachataʼmiñ?

⁹ Nasuntaap iga tanan̈joʼktaʼmiñ iganam Jehová iktogoyba jeʼm yaʼachaaji. Jesɨk tanaitytyaʼmpa kobakpiijiyaj, tamalwadaytyamtaap o kaʼaba algun i iga tantoytyaʼmpa, wɨapsɨ iga tanakwaʼktamtaap tyiʼiga Jehová dyatyi iktogoyba jeʼm yaʼachaaji (Hab. 1:​2, 3). Jesɨk jeex tanan̈jaamtaʼm tan̈kujɨɨstaʼmiñ tyiʼiga Jehová iaʼmchiʼiba iga yaʼachayajiñ jempɨk dyaʼ imalwatyajpa (Sal. 34:19).b Tan̈kujɨɨstaʼmiñtyim iga Jehová ijɨɨsneum iga iñunta aktogoyba jeʼm yaʼachaaji.

10. Okmɨ iga kaʼ jeʼm Anne iaapa, ¿tyi iyooxpaʼt iga odoy pɨɨmi an̈yaʼguiñ?

¹⁰ Iga tanjoodon̈tam tyiʼiga Dios iaʼmchiʼiba iga tayaʼachataʼmiñ, tayooxpaʼttaʼmpa iga tanyaʼachɨytyaʼmiñ. Anne iga ity jeʼm isla de Mayotte, jeʼ nɨmpa: «Jesɨk kaʼ anaapa pɨɨmi an̈yaʼk, pero tsaam ayooxpaʼt anjɨɨs iga Jehová dyaʼ tayaʼachwattaʼmpa, jeʼ iktogoytyoʼoba ityumpɨy jempɨk tayaʼachwattaʼmpa y iktsukumpa jempɨk kaʼaneyajum. Jesɨk an̈kujɨɨspa yɨʼpyaj an̈kejayoʼoyiyaj agaʼman̈jakpa iga tsaam wɨam anan̈jaam».

11. Iga tanjoodon̈tamam tyiʼiga Jehová iaʼmchiʼiba iga tayaʼachataʼmiñ, ¿juutypɨk tayooxpaʼttaʼmpa iga majnam taputtaʼmiñ jeʼm an̈matkuy?

¹¹ Iga tanjoodon̈tamam tyiʼiga Dios iaʼmchiʼiba iga tayaʼachataʼmiñ, tayooxpaʼttaʼmpa iga duroj taputtaʼmiñ jeʼm an̈matkuy. Okmɨ iga Pedro in̈mat tyiʼiga Dios dyanam iktogoyñeʼ jempɨk imalwatyajpa, jeʼ nɨm: «Wɨ̱ iga taŋwɨ̱wattámiñ juuts ixunpa Dios» (2 Ped. 3:11). Tuum manera iga «taŋwɨ̱wattámiñ juuts ixunpa Dios» jeʼ iga taputtaʼmiñ jeʼm an̈matkuyjom. Juʼutstyim Jehová, tantoytyaʼmpa tun̈gakyaj y tansuntaʼmpa iga ityyajiñtyim jeʼm jomnaxyukmɨ. Jeʼ sɨʼ iaʼmchiʼ iga jempɨk ityyaj juuty miitytyaʼm ipɨkyajiñ ijɨɨxi iga ikoosteñayyajiñ. Y mich wɨap iñyooxpaʼtyaj iga iixpɨkyajiñ Jehová wiñtyi iga nuʼkpa jeʼm aktogoyoʼoyi (1 Cor. 3:9).

TAITYTYAʼMUM «JÉM ÍŊAŊPƗGAM JA̱MA»

12. ¿Tyi tan̈kupɨktaʼmpa jesɨk tanaʼmtaʼmpa tyityam iwatyajpa jempɨk ityyaj «jém íŋaŋpɨgam ja̱ma»?

¹² Jeʼm Biblia iwɨan̈matpa tyityam iwatyajpa idyɨk jempɨk ityyajpa «jém íŋaŋpɨgam ja̱ma» (2 Tim. 3:​1-5). Jesɨk tanaʼmtaʼmpa tyityam iwatyajpa tun̈gakyaj y juʼutspɨk jɨɨxi ikwiñkejyajpa, tan̈wɨkupɨktaʼmpa iga jeʼm Dios In̈maatyi dyaʼ mɨgoʼyba (2 Tim. 3:​13-15).

13. ¿Tyityam wɨɨ iga tanakwaʼktamtaiñ? (Lucas 12:​15-21).

¹³ Iga tanjoodon̈tamam iga taitytyaʼmum jeʼm in̈an̈pɨgam jaama, tsaam tayooxpaʼttaʼmpa tan̈wɨpɨktaʼm tantiempo. Jeempɨgam in̈kej Jesús en Lucas 12:​15-21 (maayɨʼ). ¿Tyiʼiga nɨʼmaytya jeʼm ricojpɨk pɨɨxiñ iga dyaʼ iwɨpɨk ijɨɨxi? Iga numaaj sɨʼ idyɨk ityegueda iga iktuʼmpa jaʼyan̈ tumiñ y dyaʼ idyɨk sɨʼ ijɨɨs jempɨk Dios ixunba. ¿Tyiʼiga nasuntaap idyɨk iga iwɨpɨguiñ itiempo? Dios iñɨʼmay: «¿Que d́a iñjo̱doŋ iga yɨ́bam tsuu micaaba?». ¿Tyi tan̈kejaytyaʼmpa? Dyaʼ jaʼyñeʼ nuʼkpa jeʼm aktogoyoʼoyi. Jeʼyukmɨ tanakwaʼktamtaiñ: «Jeʼm jɨɨxi ampɨkpaʼap, ¿ikwiñkejpa iga maaj anteguedaap an̈kuyooxa Dios? ¿Sɨʼ ananmajan̈chiʼiyaj ammanɨktam iga maaj ityeguedayajiñ ikuyooxayaj Dios? ¿Sɨʼ ampɨk ampɨɨmi, antiempo y antumiñ para aɨch o iga maaj anteguedaap an̈kuyooxa Dios?».

14. Juʼuts iñaskaʼ Miki, ¿tyiʼiga wɨɨ iga tanjɨɨskupaknetaʼmiñ iga taitytyaʼmum jeʼm in̈an̈pɨgam jaama?

¹⁴ Iga tanjoodon̈tamam iga taitytyaʼmum jeʼm in̈an̈pɨgam jaama tayooxpaʼttaʼmpa iga tan̈wɨpɨktaʼmiñ tanjɨɨxi. Jeempɨgam iwat tuum yoomtɨwɨ iga iñɨɨyi Miki, jeʼ nɨmpa: «Jesɨk aput preparatoria tsaam idyɨk anɨktoʼoba universidad, an̈kuyujkatoʼoba idyɨk zoología iga an̈wɨixpɨkyajtoʼoba jeʼm animatyaj. Pero akuyooxaoytyoʼobatyim idyɨk juʼuts precursora regular y anɨktoʼoba juuty nasuntaap yooxpadoʼoyi. Weeñi tɨwɨtam iga pekam sɨʼ ikuyooxayaj Jehová anɨʼmayyaj iga an̈wɨjɨɨxiñ siiga wɨap an̈wat ikwɨstɨk, an̈kuyujkaʼ tuum carrera y an̈kuyooxaoy juʼuts precursora. Ayooxpaʼtyaj an̈kutɨʼɨyɨy iga dyam jaʼyñeʼ nuʼkpa jeʼm aktogoyoʼoyi y jeʼm jomnaxyukmɨ wɨap an̈kuyujkaʼ ityumpɨy jempɨk an̈kusuʼnɨʼyba. Jeʼyukmɨ moj an̈kuyujkaʼ algun tyi iga dyaʼ idyɨk ananɨgaʼyba jaʼyan̈ tiempo. Yɨʼp ayooxpaʼt ampaʼt tuum yooxakuy iga wɨaiñ an̈kuyooxaoy juʼuts precursora regular y maaj okmɨ wɨa mu annɨk Ecuador iga jeem nasuntaap idyɨk yooxpadoʼoyi. Sɨɨ Miki jaʼayɨyñeum y jeʼm iwɨdyaaya kuyooxaoʼyba juʼuts superintendente de circuito.

15. ¿Tyi tan̈kejaytyaʼmpa jempɨk iñaskaʼ Santiago? (Aʼmɨtyim jeʼm imágenes).

¹⁵ Odoy tan̈yaʼktaʼmiñ siiga tun̈gakyaj dyaʼ iwɨpɨktson̈yajpa jeʼm wɨtampɨk an̈maatyi. Tanjɨɨstaʼmiñ iga wɨapnam ikakyaj ijɨɨxi. Jeempɨgam iñaskaʼ Santiago jeʼm Jesús ichɨñtyɨɨwɨ. Iaʼm jutsa mu imɨja Jesús, jesɨk tsɨʼy juʼuts Mesías y juʼtspɨy wɨan̈kejayoʼyba idyɨk. Pero ininɨgay watyña amtyɨy iga ikwiñkejiñ fe en Jesús. Jeʼyukmɨ tsɨʼy juʼuts ikuyujkɨʼɨwiñ okmɨ iga Jesús aktsukumta. Y tsaam iwɨkuyooxa Dios (Juan 7:5; Gál. 2:9).c Odoy tanjɨɨstaʼmiñ iga dyam sɨʼ ikakyaj ijɨɨxi jeʼm tanfamiliares iga sɨɨ dyaʼ ikumaton̈yajpa jeʼm wɨtampɨk an̈maatyi. Duroj tanjooyaytyaʼmiñ jempɨk dyanam ikumaton̈yajtoʼoba jeʼm wɨtampɨk an̈maatyi. Tanjɨɨskupaknetaʼmiñ iga taitytyaʼmum jeʼm in̈an̈pɨgam jaama. Jeʼyukmɨ odoy tantsaktaʼmiñ iga taputtaʼmpa jeʼm an̈matkuyjom. Jempɨk inin̈madayyajpa sɨɨ, wɨap iyooxpaʼtyaj iga ikakyajiñ ijɨɨxi jesɨk iaʼmyajpa iga tsukumpam jeʼm mɨjpɨk yaʼachaaji.d

TANAKWIÑKEJTAʼMIÑ AGRADECIMIENTO POR JEMPƗK TAN̈KEJAYTYAʼMPA JEHOVÁ

16. ¿Juutypɨk miwɨwadayñeʼ jempɨk Jehová min̈kejayñeʼ? (Aʼmɨtyim jeʼm recuadro «Pɨɨkɨ iga wɨaiñ iñyooxpaʼt tun̈gakyaj»).

¹⁶ Usan̈ de jempɨk tan̈kejaytyaʼmpa Jehová watneta para jempɨk dyanam iixpɨkyajpa tyi in̈kejpa jeʼm Biblia. Juʼuts jeʼm najɨʼyoʼoyi tan̈kumaton̈tampaʼap tumtum semana, weeñi an̈kejayoʼoyiyaj y videos de jw.org, y weeñi totjaayiyaj watneyajta para jempɨk dyaʼ jeʼ Testigos. Pero tantumpɨytyam tayooxpaʼttaʼmpa iga majnam tantoytyaʼmiñ Jehová, tan̈kupɨgaytyaʼmiñ jeʼm In̈maatyi y majnam tawɨan̈kejayoytyaʼmiñ kun jeʼm Biblia (Sal. 19:7).

17. ¿Juutypɨk tayooxpaʼttaʼmpa jempɨk wiñtyi moj tan̈kuyujkataʼm Bibliajom?

¹⁷ Jempɨk pekam sɨʼ tan̈kuyooxataʼm Jehová tsaam tamaymaytyam jesɨk tan̈madaytyamtaap tuum joomipɨk an̈kejayoʼoyi. Pero tantsoowaixtyaʼmpa jempɨk moj tan̈kuyujkataʼm Bibliajom. Juʼuts tan̈kɨʼpin̈netaʼm tantumpɨytyam tawɨwadaytyaʼmpa jempɨk Jehová tan̈kejaytyaʼmpa. A veces tan̈kaʼ tampɨktson̈taʼm tuum joomipɨk kutɨʼɨyɨyoʼoyi, wɨap tanjɨɨstaʼm iga maaj wɨɨ jempɨk tanɨmtaʼmpa o juutypɨk tan̈wattaʼmpa algun tyi. Pero nasuntaap iga odoy tanakujiʼptamtaiñ y tanjɨɨstaʼmiñ iga jempɨk in̈jakpa jeʼm organización jeʼ Jehová iga iniity joodon̈oʼoyi y tsaam pɨɨmiɨy. Jesɨk tayaʼachataʼmpa o yaʼachaap algun i iga tantoytyaʼmpa, nasuntaap iga tanan̈joʼktaʼmiñ y tanjɨɨstaʼmiñ tyiʼiga Jehová iaʼmchiʼiñeʼ iga tayaʼachataʼmiñ. Y jesɨk tampɨktaʼmpa tanjɨɨxi iga juutypɨk tampɨktaʼmpa tantiempo y tantumiñ odoy tan̈kujaʼamaytyaʼmiñ iga taitytyaʼmum jeʼm in̈an̈pɨgam jaama y dyam jaʼyñeʼ nuʼkpa jeʼm aktogoyoʼoyi. Tanjɨɨskupaknetaʼmiñ jempɨk Jehová tan̈kejaytyaʼmpa iga tan̈wɨpɨktaʼmiñ tanjɨɨxi y odoy tanjagan̈tsaktaʼmiñ.