Kodon Kan Nan Sampah

MA ARAMAS men pahn alu kohdohng uhk oh aramaso reirei mehlel leldahla denso en ihmw, dahme ke pahn lemeleme? Aramaso pahn emen kodon! Mie ansoukis me mie kodon nan sampah. Paipel kasansalehda me sahmarail iei tohnleng ko sang nanleng. Ahpw iaduen met kak wiawi?

Tamataman, tohnleng suwed Sehdan me kin soupisekki wia mehkan me pahn kahpwal ong aramas. Menet kin pil song en kalowehdi tohnleng en Koht akan pwe ren pil wia me suwed. Kadekadeo, ekei irail tohnleng pwukat duhkiong Sehdan. Re uhdi sang arail doadoahk ong Koht me Koht ketikihong irail en wia nanleng. Irail eri kohdihdo sampah oh ale ong irail paliwar en aramas. Ke ese dahme kahrehda?

Paipel koasoaia me pwehki nain Koht ohl ko kilang serepein kasehlel nan sampah oh men mi rehn serepein pwukat. Irail eri kohdihdo sampah oh pwoudkihda lih pwukat. Paipel koasoaia me met sapwung, pwehki Koht ketin wiahda tohnleng kan en mour nanleng.

Eri ni ansou me irail tohnleng pwukat wiaiong arail pwoud kan seri kan, seri pwukat kaidehn duwehte uhdahn seri. Ni tapin arail ipwidi ele mwein re sohte nohn weksang seri teikan. Ahpw irail kin kekeirada oh laudla, laud sang mehteikan, oh kehlail sang, lao re wiahla lapalahn ohl kei, kodon.

Irail kodon pwukat me inenen lemei. Pwehki irail me laud oh kehlail, re kin wia mehkan me suwed oh kamadake aramas. Re wia soahng koaros me suwed ong aramas kan pwe aramas kan en pil wia me suwed duwehte irail.

Ihnok mehlahr, ahpw mie emen ohl nan sampah me men wia me mwahu. Ohl menet iei Noah. E kin ansou koaros wia mehkan me Koht mwahuki ih en wia.

Ehu rahn Koht padahkiong Noah me ansou lelehr e pahn kasohrala aramas suwed koaros. Ahpw Koht pahn doarehla Noah, ah peneinei oh mahn tohto. Kitail pahn kilang duen en Koht ah ketin wia mehpwukat.