Sawas Sang Rehn Sapwellimen Koht Tohnleng Kan

EKEI aramas kin nda me re kamehlele soahng kante me re kak kilang. Ahpw met sapwung. Mie soahng tohto me kitail sohte kak kilangki masatail. Ke kak ndahdo ehu?—

Ia duwen kisinieng me kitail kin esingengki? Ke kak kehn?— Kauwada pehmwen oh peuk. Mie mehkot ke kehn?— Eri ke sou kehn ahpw ke sohte kak kilang kisiniengo?—

Kitail koasoiapenehr duwen ngehn akan me kitail sohte kak kilang. Kitail sukuhlkier me ekei mwahu oh ekei suwed. Ndahdo ngehn mwahu kan me kitail sohte kak kilang.— Siohwa Koht, Sises oh tohnleng mwahu teikan. Mie tohnleng suwed?— Paipel mahsanih me mie. Ndaiong ie dahme ke sukuhlkier duwen tohnleng suwed kan.—

Ehu me kitail ese iei me tohnleng mwahu oh suwed akan koaros kehlail sang kitail. Sounpadahk Lapalapo ketin wehwehki laud duwen tohnleng kan. Met pwehki ih emen tohnleng mwohn eh ipwidi pohn sampah. E ketiketier rehn tohnleng teikan nanleng. Ihme kahrehda e ketin ese tohnleng rar kei. Mie eden tohnleng pwukat koaros?—

Eri kitail sukuhlkier me Koht ketikihong eden usu kan. Kahrehda kitail kak ese me pil mie eden tohnleng koaros. Oh kitail ese me irail kin kak koasoipene pwehki Paipel mahsanih me mie “mahsen en tohnleng kan.” (1 Korint 13:1) Dahme ke leme tohnleng kan kin koasoia? Re kin koasoia kitail me mi nin sampah?—

Kitail ese me iengen Sehdan tohnleng kan de ngehn suwed kan kin kasonge kitail en sapeikiong Siohwa. Kahrehda re kin koasoia ia duwen arail pahn wia met. Irail men kitail en duwehte irail pwe Siohwa en sohla poakohng kitail. Ahpw ia duwen sapwellimen Koht tohnleng lelepek kan? Ke lemeleme me irail kin koasoia kitail?— Ei re kin wia met. Irail men sewese kitail. I pahn padahkihong uhk ia duwen ekei sapwellimen Koht tohnleng kan ar kin sewese aramas me poakohng Siohwa oh kin papah ih.

Karasepe, mahso mie ohl emen me adaneki Daniel me kin mihmi Papilon. Aramas tohto me mi wasao sohte kin poakohng Siohwa. Irail pil wiahda kosonned ehu me re pahn kaloke irail akan me kin kapakapohng Siohwa Koht. Ahpw Daniel sohte uhdihsang eh kapakapohng Siohwa. Ke ese dahme re wiahiong Daniel?—

Aramas suwed akan me kahrehda Daniel eh lekdekiong nan pwoaren laion. Daniel mi rehn laion kei me men mwenge. Ke ese dahme wiawi?— Daniel nda: “Koht ketin poaronehdo sapwellime tohnleng me kakuhpene ewen laion kat.” E sohte mwahn ohla! Tohnleng kan kak wia soahng kapwuriamwei kan ong irail me kin papah Siohwa.​—Daniel 6:18-22.

Pil mie pak ehu me Piter mi nan imweteng. Taman me Piter iei kompoakepahn Sounpadahk Lapalapo, Sises Krais. Ekei aramas sohte mwahuki Piter eh kin padahkihong irail me Sises iei sapwellimen Koht Ohl. Kahrehda irail salihedi Piter. Mie sounpei kan me sinsile Piter en dehr tangasang nan imweteng. Mie me kak sewese ih?—

Piter wie memeir nanpwungen silepe riemen oh peh kan selkihdi selmete. Ahpw Paipel mahsanih: ‘Sapwellimen Siohwa tohnleng men ahpw kesihnenda wasao, oh marain ehu ahpw dakerada nan imwetengo. Tohnlengo ahpw koledi pwopwen Piter oh itik oh pangenda oh nda, “Mwadang uhda!”’

Ni ahnsowohte selmete ko pwupwudisang pehn Piter! Tohnlengo eri ndaiong ih: ‘Likouda oh pirehdi omw suhten oh iangiehda.’ Silepe ko sohte kak kauhirahdi pwehki tohnlengo kin sewese Piter. Ira eri lel ni wenihmw mete ehu oh mehkot kapwuriamwei wiawi. Wenihmwo pein ritida! Tohnlengo kapitala Piter pwe en kak doulahte oh wia doadoahk en kalohk.​—Wiewia 12:3-11.

Ia duwe, sapwellimen Koht tohnleng kan pil kak sewese kitail?— Ei irail kak. Met wehwehki me re sohte pahn mweidohng kitail en lelohng apwal?— Soh, tohnleng kan sohte kin irehkitailsang apwal ma kitail kin wia mehkot sapwung. Ahpw mehnda ma kitail sohte wia mehkot sapwung, kitail pil kak lelohng apwal. Siohwa sohte ketin padahkihong tohnleng kan en irehdi apwal en dehr wiawi. Ahpw, Koht ketikihong irail doadoahk kesempwal ehu.

Paipel kin mahsanih duwen tohnleng men me kin padahkihong aramas wasa koaros nin sampah en kaudokiong Koht. (Kaudiahl 14:6, 7) Ia duwen tohnlengo eh kin padahkihong irail met? E kin werdihdo sang nanleng pwe aramas koaros en kak rong ih?— Soh, sapwellimen Sises tohnpadahk kan pohn sampah kin koasoiaiong meteikan duwen Koht, oh tohnleng kan kin kahluwa arail doadoahk. Tohnleng kan kin tehk mwahu pwe irail akan me uhdahn men esehla duwen Koht en kak iang rong. Kitail kak iang doadoahk en kalohk wet oh tohnleng kan pahn sewese kitail.

Ahpw ia duwen ma aramas akan me sohte kin poakohng Koht kin kahrehiong kitail nan apwal? Ia duwen ma re salihdi kitail nan imweteng? Tohnleng kan pahn kapitkitaila?— Re kak, ahpw re sohte kin ahnsou koaros wia met.

Sapwellimen Sises tohnpadahk Pohl pil kin sensel mahs. E seiloak pohn sohp ehu ahnsou me melimel laud wiawi. Ahpw tohnleng kan sohte mwadang kapitala ih. Met pwehki mie aramas akan me anahne rong duwen Koht. Tohnleng men ndaiong ih: “Ke dehr masak; ke uhdahn pahn uh mwohn Sihsar.” Pohl pahn wisikla rehn Sihsar, kaunen sampah ni ahnsowo pwehn kalohk ong ih. Tohnleng ko kin ahnsou koaros ese ia wasa Pohl kin mi ie oh kin sewese ih. Irail pahn pil sewese kitail ma kitail kin papah Koht ni mehlel.​—Wiewia 27:23-25.

Mie pil ehu doadoahk kesempwal me tohnleng kan pahn wia oh re pahn wia met ni ahnsou keren. Sapwellimen Koht ahnsoun kasorehla aramas suwed akan uhdahn kerendohr. Koaros me sohte kin kaudokiong Koht mehlelo pahn kasohrala. Irail kan me kin nda me re sohte kamehlele tohnleng kan pwehki re sohte kak kilang irail pahn esehda ia uwen arail sapwung.​—2 Deselonika 1:6-8.

Ia wehwehn met ong kitail?— Ma kitail kin ehuiong sapwellimen Koht tohnleng kan, irail pahn sewese kitail. Ahpw ia duwe, kitail kin ehuiong irail?— Ei, ma kitail kin papah Siohwa. Oh ma kitail kin papah Siohwa, kitail pahn padahkihong meteikan en pil papah ih.