Kahlemengih Tohnleng Lelepek kan

1-2. Ia duwen atail weksang tohnleng kan? (b) Ni ahl dah me kitail duwehte tohnleng kan?

NIN duwen sapwellimen Siohwa aramas akan, kitail wia kisehn peneinei limpoak ehu me kin kaudokiong ih. Met iangahki riatail Kristian kan sampah pwon oh tohnleng lelepek rar rar kei. (Dan. 7:​9, 10) Ni atail kin medewehla duwen tohnleng kan, ele kitail kin medewe ia duwen arail weksang kitail. Karasepe, tohnleng kan mihmihier ahnsou werei mwohn aramas akan ar kepikipikda. (Sohp 38:​4, 7) Irail uhdahn kehlailsang kitail. Irail pil sarawi oh wia me pwung laudsang kitail, pwehki kitail soh unsek.—Luk 9:26.

² Ahpw mendahki kitail weksang tohnleng kan ni ahl tohto, mie soahng tohto rehtail me duwehte tohnleng kan. Karasepe, duwehte tohnleng kan, kitail kak alasang sapwellimen Siohwa irair kaselel kan. Duwehte irail, kitail ahneki saledek en wiahda pilipil. Pil duwehte irail, mie pein adatail, mie atail irair kaselel kan, oh soangsoangen pwukoa kan. Oh duwehte tohnleng kan, kitail ahneki anahn en kaudokiong Sounkapikpatailo.—1 Pit. 1:12.

3. Dahme kitail kak sukuhlkihsang tohnleng lelepek kan?

³ Pwehki kitail duwehte tohnleng kan ni ahl tohto, arail mehn kahlemeng mwahu kan kak kangoange oh padahkihong kitail soahng kesempwal tohto. Nan iren onop wet, kitail pahn koasoiapene ia duwen atail kak kahlemengih en tohnleng lelepek kan ar aktikitik, arail poakohng aramas, arail dadaurete, oh arail kin doadoahk laud pwehn kolokolete mwakelekel en mwomwohdiso.

TOHNLENG KAN KIN AKTIKITIK

4. (a) Ia duwen tohnleng kan ar kin kasalehda aktikitik? (b) Dahme kahrehda tohnleng kan kin aktikitik? (Melkahka 89:7)

⁴ Tohnleng lelepek kan kin aktikitik. Mendahki irail uhdahn koahiek, kehlail, oh erpit, irail kin peikiong sapwellimen Siohwa kaweid kan. (Mel. 103:20) Ni arail kin wia arail pwukoa kan, re sohte kin suweiki dahme irail kak wia de uwen arail kehlail. Irail perenki wia kupwuren Koht mendahki meteikan sohte ese ederail.a (Sen. 32:​24, 29; 2 Nan. 19:35) Irail kin soikala ale kaping me warohngete Siohwa. Dahme kahrehda tohnleng kan uhdahn aktikitik? Pwehki irail poakohng Siohwa oh uhdahn wauneki.—Wadek Melkahka 89:7.

5. Ia duwen tohnleng men eh kasalehda aktikitik ni eh kapwungala wahnpoaron Sohn? (Pil kilang kilel.)

⁵ Medewehla dahme wiawi me kasalehda en tohnleng kan ar aktikitik. Mpen pahr 96, tohnleng men me kitail sehse edeo kasalehiong wahnpoaron Sohn kaudiahl kapwuriamwei ehu. (Kaud. 1:1) Ia duwen Sohn eh mwekidki kaudiahlo? E poaridi pwehn kaudokiong tohnlengo. Ahpw tohnleng loalopwoato mwadangete kauhdi oh nda: “Kanahieng! Ke dehr wia men! Ngehi ihte iengomw ladu men oh iengen riomw kan . . . Kaudokiong Koht!” (Kaud. 19:10) Tohnlengo uhdahn aktikitik! E sohte men ale kaping. E mwadangete ndaiong Sohn en kaudokiong Siohwa Koht. E sohte medewe me e kesempwalsang Sohn. Mendahki e papahkier Siohwa wereisang Sohn oh pil kehlailsang, e aktikitik oh ekerki Sohn ienge ladu. Oh mendahki e anahne kapwungala Sohn, e sohte wia met ni elen lemei. Ahpw, tohnlengo koasoiong ni kadek. Ele e wehwehki me Sohn poaridi pwehki e pwuriamweikihla kaudiahlo.

6. Ia duwen atail kak kahlemengih en tohnleng kan aktikitik?

⁶ Ia duwen atail kak kahlemengih en tohnleng kan aktikitik? Kitail pil kak kapwaiada atail pwukoa kan oh sohte suweiki dahme kitail kak wia de pil mwomwehda me dene mie atail koahiek tohrohr. (1 Kor. 4:7) Patehng met, kitail en dehr medewe me kitail mwahusang meteikan pwehki kitail papahkier Siohwa ahnsou werei de ahneki pwukoa kan me re sohte ahneki. Ni mehlel, uwen laud en atail kin doadoahk ong Siohwa anahne kahrehiong kitail en wiahkin kitail aramas tikitik kei. (Luk 9:48) Duwehte tohnleng kan, kitail kin men papah meteikan. Kitail en dehr song en kahrehiong irail en medewe me kitail kesempwalsang irail.

7. Ia duwen atail kak kasalehda aktikitik ni atail kin kapwungala de kaweid emen?

⁷ Kitail pil kak kasalehda aktikitik ma kitail anahne kapwungala de kaweid emen—iengatail Kristian men de neitail seri. Ni atail kin kaweid emen, ele kitail anahne koasoi ni inen. Ahpw duwehte tohnlengo me kapwungala Sohn ni kadek, kitail pil kak koasoi ni inen ahpw dehr kansensuwedihala me kitail kaweidiho. Ma kitail sohte kin medewe me kitail mwahusang meteikan, kitail pahn kihda kaweid kan sang nan Paipel ni elen wahu oh limpoak.—Kol. 4:6.

TOHNLENG KAN KIN POAKOHNG ARAMAS

8. (a) Nin duwen me Luk 15:10 mahsanih, ia duwen tohnleng kan ar kasalehda arail poakohng aramas? (b) Ia duwen tohnleng kan ar kin sewese kitail nan doadoahk en kalohk? (Pil kilang kilel ni kilin Kahn Iroir wet.)

⁸ Tohnleng kan sohte kin pohnsehsehla dahme kin wiawihong aramas de pil medewe me kitail sohte kesempwal. Ahpw re kin poakohng aramas. Irail kin perenda ni me dipan men eh koluhla, de ni emen me uhdihsang papah Siohwa pwurodo reh. Kitail pil kin perenda ni emen eh sukuhlki duwen Siohwa oh pilada en wiahda wekidekla kan nan eh mour pwehn papah Ih. (Wadek Luk 15:10.) Tohnleng kan pil kin sewese kitail nan atail doadoahk en kalohk. (Kaud. 14:6) Mendahki irail sohte kin koasoiong de kalohk ong aramas akan, irail kak kahluwahla sounkalohk men rehn emen me men sukuhlki duwen Siohwa. Ei mehlel, kitail sohte kak uhdahn nda me tohnleng kan kin kahluwaikitaillahng aramas emen. Met pwehki Siohwa pil kak ketin doadoahngki ahl teikan—duwehte sapwellime manaman—pwehn sewese aramas akan de pwehn kaweid sapwellime ladu kan. (Wiewia 16:​6, 7) Ahpw e kin ketin doadoahngkihte sapwellime tohnleng kan pwehn sewese kitail nan atail kalohk. Eri, ni atail kin kalohki rongamwahwo, kitail kak kamehlele me tohnleng kan pahn kin sewese kitail.—Menlau kilang koakono “Arail Kapakap kan Pasapengla.”b

9. Ia duwen atail kak kahlemengih en tohnleng kan ar poakohng aramas?

⁹ Ia duwen atail kak kahlemengih en tohnleng kan ar poakohng aramas? Ni atail kin rong pakairpen emen eh pwurodo nan mwomwohdiso, kitail kak perenkihda, duwehte tohnleng kan. Kitail kak kamehlelehiong riatailo me kitail poakohng oh me kitail perenki eh pahn pwurehng papah Siohwa. (Luk 15:​4-7; 2 Kor. 2:​6-8) Kitail pil kak kahlemengih tohnleng kan sang ni atail wia uwen atail kak nan doadoahk en kalohk. (Ekl. 11:6) Oh duwehte tohnleng kan ar kin sewese kitail en kalohki rongamwahwo, kitail pil kak rapahki ahl akan en sewese riatail Kristian kan nan kalohk. Karasepe, kitail kak wiahda koasoandi en iang emen me ahpwtehn tepida iang kalohk? De kitail kak sewese riatail Kristian men me mahlahr de me kohwahki soumwahu en iang kitail kalohk?

10. Dahme kitail kak sukuhlkihsang dahme wiawihong Sara?

¹⁰ Ia duwen ma atail irair kan kahrehiong kitail en sohte kak wia uwen me kitail men wia? Kitail kak rapahkihte ahl teikan pwehn iang tohnleng kan kalohk. Medewehla dahme wiawihong Sara,c sister men nan India. Mwurin eh pioneerki sounpar 20 samwa, Sara soumwahuda oh sohla kak alu. E uhdahn nsensuwedla. Ahpw pwehki sawas sang rie Kristian kan oh eh kin kaukaule wadek Paipel, Sara ekisekis pwurehng ahneki peren. Ei mehlel, e anahne wekidala eh koasoandi en kalohk pwehn mwahuong eh irairo. Pwehki eh sohte pil kak mwohdada oh nting kisinlikou, e kin kalohkte nan delepwohn. Eri e kin call irail kan me e kin pwurala rehrail, oh re kin padahkihong duwen ekei me pil men onop Paipel. Ia imwilahn met? Erein sounpwong keite, Sara kin onop Paipel rehn aramas 70! E sohte kak kelehpwki! Eri e wiahda koasoandi pwe ekei nan mwomwohdiso en onop rehn ekei tohnsukuhl ko. Met me tohto rehrail kin iang towehda atail mihting kan. Ia uwen en tohnleng kan ar perenki iang riatail Kristian kan doadoahk, duwehte Sara, me kin wia uwen arail kak nan kalohk!

TOHNLENG KAN KIN DADAURETE

11. Ia duwen tohnleng lelepek kan ar kasalehda arail dadaurete?

¹¹ Tohnleng lelepek kan kin wia mehn kahlemeng mwahu en dadaurete. Irail kin dadaur pahn wiewia sapahrek oh tiahk suwed en aramas akan sounpar kidkid kei. Irail kilang Sehdan oh tohnleng tohto teikan me nin tapio kin iang irail papah, ar uhwongada Siohwa. (Sen. 3:1; 6:​1, 2; Sud 6) Paipel kasalehda duwen tohnleng lelepek men me lelohng uhwong sang ngehn suwed kehlail men. (Dan. 10:13) Patehng met, sangete ni mwehin Adam oh Ihp, tohnleng kan kin kilang me me malaulaute me kin pilada en papah Siohwa. Ahpw mendahki met, tohnleng loalopwoat pwukat kin pousehlahte papah Siohwa ni peren oh ngoang. Irail ese me ni ahnsou me konehng, Koht pahn ketikihsang wiewia sapahrek koaros.

12. Dahme kak sewese kitail en dadaurete?

¹² Ia duwen atail kak kahlemengih en tohnleng kan dadaurete? Duwehte tohnleng kan, ele kitail kin kilang wiewia sapahrek. Ahpw kitail pil kamehlele me ni ahnsou me konehng, Siohwa pahn ketikihsang me suwed koaros. Eri duwehte tohnleng kan, kitail en “dehr uhdihsang wia dahme mwahu.” (Kal. 6:9) Koht pil ketin inoukihda en ketin sewese kitail en dadaur. (1 Kor. 10:13) Kitail kak kapakapki sapwellimen Siohwa manaman me kin sewese kitail en ahneki kanengamah oh peren. (Kal. 5:22; Kol. 1:11) Ia duwen ma ke lelohng uhwong? Likih Siohwa ni unsek, oh dehr masak. Siohwa pahn kin ahnsou koaros ketin sewese oh kakehlaka iuk.—Ipru 13:6.

TOHNLENG KAN KIN SAWAS PWE MWOMWOHDISO EN MWAKELEKELTE

13. Pwukoa tohrohr dahieu me tohnleng kan ahneki erein imwin rahn akan? (Madiu 13:​47-49)

¹³ Erein imwin rahn akan, Siohwa ketikihong tohnleng kan pwukoa tohrohr ehu. (Wadek Madiu 13:​47-49.) Aramas rar rar kei nan sampah pwon kin perenki rong duwen rongamwahwo. Ekei irail kin wiahda wekidekla kan pwehn wiahla Kristian mehlel kei, ahpw ekei soh. Tohnleng kan pwukoahki “katohrehsang me suwed kan rehn me pwung kan.” Met wehwehki me irail pwukoahki sewese pere mwakelekel en mwomwohdiso. E sohte wehwehki me mehmen me uhdihsang werekiong kitail pwehki kahrepe kan solahr kak pwurodo. Met pil sohte wehwehki me kahpwal kan uhdahn sohte pahn wiawi nan mwomwohdiso. Ahpw, kitail kak kamehlele me tohnleng kan kin doadoahk laud pwehn sewese mwomwohdiso en mwakelekelte.

14-15. Ia duwen atail kak alasang tohnleng kan oh kasalehda me kitail men mwomwohdiso en mwakelekelte? (Pil kilang kilel kan.)

¹⁴ Ia duwen atail kak kahlemengih en tohnleng kan ar kin nsenohki mwakelekel en nan mwomwohdiso? Kitail anahne nantihong pere atail nanpwungmwahu rehn Siohwa. Kitail kin wia met sang ni atail pilada werek mwahu kan me kin poakohng Ih oh soikala soahng koaros me kak kauwehla atail nanpwungmwahu reh. Ni ahl wet, kitail kin sewese atail mwomwohdiso en mwakelekelte. (Mel. 101:3) Kitail pil kak sewese riatail Kristian kan en lelepekohngete Siohwa. Karasepe, dahme kitail anahne wia ma riatail Kristian men wiahda dihp laud? Pwehki kitail poakohng riatailo, kitail pahn kangoange en koasoiong elder kan. Ma e sohte wia met, kitail pahn padahkihong elder kan dahme wiawi. Kitail men riatailo, me eh nanpwungmwahu rehn Siohwa ohlahr, en ale sawas ni ahnsou karuwaru!—Seims 5:​14, 15.

¹⁵ E kansensuwed me mwomwohdiso anahne kihsang nanpwungarail ekei me wiahda dihp laud. Nan soangen irair ko, kitail kin ‘uhdihsang atail werekiong’ irail.d (1 Kor. 5:​9-13) Koasoandi wet kin sewese kolokol mwakelekel en nan mwomwohdiso. Laudsang met, sang atail pilada en sohte werekiong irail kan me mwomwohdiso kihsang nanpwungarail, kitail kin uhdahn kasalehiong irail kadek. Atail koasoanehdi teng en dehr patehng irail kak sewese irail en esehda me re anahne pwurodo rehn Siohwa. Ma irail wia met, kitail kin iang Siohwa oh sapwellime tohnleng kan perenda.—Luk 15:7.

16. Ni ahl dah kan me ke pahn nantihong alasang tohnleng kan?

¹⁶ E wia pai kaselel ehu me Siohwa ketin mweidohng kitail en sukuhlki duwen tohnleng kan oh iang irail doadoahk! Kitail en alasang arail irair kaselel kan, me iei aktikitik, poakohng aramas, dadaurete, oh nsenohki mwomwohdiso en mwakelekelte. Ma kitail kin alasang tohnleng lelepek kan, kitail pil kak wia kisehn sapwellimen Siohwa peneinei me kin kaudokiong ih kohkohlahte.