Sises Ketin Pwuradahla Nanleng

Sises ketin tuhwong sapwellime tohnpadahk ko nan Kalili. E ketikihong irail kehkehlik ehu me uhdahn kesempwal: ‘Kumwail kohwei oh katohnpadahkihala aramas akan nan sahpw koaros. Padahkihong irail soahng kan me I padahkihongkumwailehr, oh papidaisihirailla.’ Ih eri ketin inoukihong irail: ‘Kumwail en tamataman me I pahn ieiang kumwail ahnsou koaros.’

Erein rahn 40 mwurin eh ketin iasada, Sises ketin pwarehng sapwellime tohnpadahk epwiki kei nan Kalili oh Serusalem. E ketin padahkihong irail ire kesempwal kan oh ketin wiahda manaman tohto. Sises eri ketin tuhwong sapwellime wahnpoaron ko pohn Nahna Olip oh met wia kaimwiseklahn eh tuhwong irail. E mahsanih: ‘Kumwail dehr kohkohlahsang Serusalem. Kumwail awiawihte dahme Sahmo ketin inoukidahr.’

Sapwellime wahnpoaron ko sohte wehwehki ia wehwehn sapwellime mahseno. Irail eri idek reh: ‘Komwi pahn wiahla Nanmwarki en Israel ahnsou wet?’ Sises eri mahsanih: ‘E saikinte lel ahnsou me Siohwa kupwurki ien wiahla Nanmwarki. Ni ahnsou keren kumwail pahn alehdi kehl sang sapwellimen Koht manaman, oh kumwail pahn wiahla nei sounkadehde kei. Kumwail kohla oh kalohkseli nan Serusalem, Sudia, Sameria, oh wasa me keieu doh kan nan sampah.’

Sises eri ketiketdahla nanleng oh pelien depwek pali ahpw perehla ih. Sapwellime tohnpadahk ko kilikilengdahlahte, a e sohla mie.

Tohnpadahk ko eri kohkohlahsang Nahnahn Olip oh kohla Serusalem. Irail kin kaukaule tuhpene nan pere poweo oh kapakap. Irail kin awiawih Sises en ketikihong irail pil ekei kaweid kan.