Tohnpadahk ko Alehdi Sapwellimen Koht Manaman

Rahn eisek mwurin Sises eh ketidahla nanleng, sapwellime tohnpadahk ko alehdi sapwellimen Koht manaman. Met wiawi nan Pendekos pahr 33, oh aramas akan sang sahpw tohto kohpene Serusalem pwe ren wia kasarawih. Mpen sapwellimen Sises tohnpadahk 120 me pokonpene nan pere ehu me mi powe nan ehu ihmw. Ni ahnsowohte, mehkot kapwuriamwei ehu pa wiawi. Mehkot me duwehte mpwulen kisiniei pwarada pohn moangen emenemen tohnpadahk ko, oh irail koaros eri tepida lokolokaiahki ehu soangen lokaia. Ngihl laud ehu me duwehte ngilen kisinieng pa kohpeseng nan ihmwo.

Ekei me kohdohsang nan sahpw teikan kohdo Serusalem pil rongada ngihlo oh tangala ni ihmwo pwe ren kilang dahme wiewiawi. Irail pwuriamweila ni ar rongada tohnpadahk ko arail lokolokaiahki soangsoangen lokaia kan. Irail eri nda: ‘Aramas pwukat mehn Kalili kei. Ia duwen arail kak lokaiahki atail lokaia kan?’

Piter oh wahnpoaron teiko ahpw kesihnenda mwohn pokono. Piter eri ndaiong aramas ako mwomwen Sises eh ketin kamakamala oh me Siohwa ketin kaiasadahr ih sang rehn me melahr akan. Piter pil doula koasoia: ‘Met Sises ketiket nanleng ni palimaun en Koht, oh ketikidier sapwellimen Koht manaman me e ketin inoukidahro. Ihme kahrehda kumwail kilangehr oh rongehr manaman pwukat.’

Aramas ako uhdahn mwekidkihda en Piter koasoi ko, oh nda: “Dahme se pahn wia?” E ndaiong irail: ‘Koluhkihla dipamwail kan oh papidaisla ni mwaren Sises. Kumwail pil pahn alehdi kisakis en sapwellimen Koht manaman.’ Rahnohte, mpen aramas 3,000 papidaisla. Sangete ahnsowo kohla, tohnpadahk ko mwadangete wie tohtohla nan Serusalem. Pwehki sawas en sapwellimen Koht manaman, wahnpoaron ko katohtohwehla mwomwohdiso kan pwe ren kak padahkihong tohnpadahk kan soahng koaros me Sises ketin kehkehlikihong irail.