Awiawih Nan Serusalem

ARAMAS pwukat werek en Sises. Irail peikiong ih oh mihmihte Serusalem. Oh ni arail kin awiawih pokopokon, ngihl laud ehu kadirehla ihmwo pwon. Ngihlo duwehte engemah. Eri ni ansouo kisiniei mwomwen loh tapiada pwarada pohn mwoangen emenemen tohnpadahk ko. Ke kak kilang kisiniei pohn emenemen irail? Ia wehwehn mehpwukat?

Met manaman ehu! Sises miehr nanleng rehn Seme, oh ihme wudekihdi ngehn sarawi en Koht pohn sapwellime werek kan. Ke ese dahme ngehn wet kahreong irail en wia? Irail koaros tapiadahr lokaia ni lokaia tohrohr.

Aramas tohto nan Serusalem rong ngihlo me rasehng engemah, oh irail kohdohng kilang dahme wiawi. Ekei aramas pwukat kohsang nan wehi teikan oh kohdohng Serusalem pwen iang mehn Israel ko katamanda kataman en Pentikost. Irail uhdahn pwuriamweikihla! Irail rong tohnpadahk ko lokaiahki pein arail lokaia duen me kasehlel oh kapwuriamwei kan me Koht ketin wia.

‘Aramas pwukat kohsang Kalilih,’ mehn keiru kan inda. ‘Eri, iaduen irail kak koasoai ni soahngen lokaia tohrohr kan en wehi kan wasa kan me kitail kohsang?’

Piter eri kesihnenda oh kawehwe ong irail. E ngihl laudeda oh padahkiong aramas kan duen Sises me kamakamalahr oh me Siohwa kaiasada ih sang mehla. ‘Ansouwet Sises ketiket nan lahng ni pali maun en Koht,’ Piter inda. ‘Oh e ketin wudekihdiehr me e inoukihdi, ngehn sarawi. Ihme kahrehda kumwail kilang oh rong duen manaman pwukat.’

Ni en Piter ah koasoaia mehpwukat, irail aramas tohto pahtoukihlahr duen me wiawiehr ong Sises. ‘Dahme se pahn wia?’ irail idek. Piter padahkiong irail: ‘Kumwail anahne en wekid omwail mour oh pepdaisla.’ Eri ni rahnohte me 3,000 pepdaisla oh wiahla werek en Sises.