March

Sampah kapwo saikinte leledo. Ahpw medewehla ekei soahng kan me mie—usu kan, tuhke kan, mahn akan, oh aramas akan. Sohte me pahn peikasalki me soahng pwukat koaros uhdahn mie, mendahki mie ahnsou ehu me re sohte mie. Irail mie ahnsou wet ihte pwehki Siohwa ketin kapikirailda. (Sen. 1:​1, 26, 27) Atail Koht pil ketin inoukihda en wiahda sampah kapw ehu. E pahn ketin kapwaiada met. Nan sampah kapwo, aramas pahn ahneki roson unsek oh mour kohkohlahte. Kitail kak kamehlele me sampah kapwo pahn pweida ni ahnsou me Koht ketin koasoanehdi. (Ais. 65:17; Kaud. 21:​3, 4) Erein atail awiawih en pweida, wia uwen omw kak koaros pwehn kakehlaka omw pwoson. Ahnsou koaros kalahnganki pweinen pweipwei sapahlo. Medemedewe sapwellimen Siohwa manaman. Wia soahng kan me pahn kakaranihiukala rehn Siohwa. Ni omw wia met, ke kak iang “irail kan me sohsohkiher inou kan sang ni arail pwoson oh kanengamah.”—Ipru 6:​11, 12. w23.04 31 ¶18-19

Sises eri ketin sarada oh loulou mwohn pokono. E men patohwanohng Siohwa wahu koaros pwehki dahme pahn wiawi mwurin mwo. Sises eri kapitie laudida mahsanih: “Lasarus, pedoido!” (Sohn 11:43) Lasarus eri pedoisang nan sousowo! Sises ketin wiadahr dahme ekei medewe uhdahn sohte kak wiawi. Koasoipen Paipel wet kin kakehlakahda atail pwoson koapworopwor en kaiasada. Ia duwen? Sises ketin inoukihong Marda: “Riomw pwutako pahn pwurehng mourda.” (Sohn 11:23) Duwehte Semeo, Sises kupwurki oh pil sapwellimanki manaman en kapwaiada inou wet. Ni Sises eh tentenihr, met kasalehda me e uhdahn kupwurki kaiasada aramas akan oh ketikihsang mehla oh pahtou me kin kahrehiong aramas akan en nsensuwed. Oh ni ahnsou me Lasarus pedoisang nan sousowo, Sises ketin kasalehda me e sapwellimanki manaman en kaiasada me melahr kan. Pil medewehla dahme Sises ketin katamankihong Marda me pwarada nan iren rahn en rahn wet. Kitail ahneki kahrepe mwahu en kamehlele me sapwellimen Koht inou en kaiasada pahn uhdahn wiawi. w23.04 11-12 ¶15-16

Ele kitail anahne wekidala dahme kitail en kapakapki ni atail esehla mwahu kupwuren Siohwa. Kitail anahne tamataman me mie kahrepe ehu me Siohwa sapwellimanki, oh e pahn ketin kapwaiada met ni ahnsou me e ketin koasoanehdi. Kupwureo iei me iangahki en ketikihsang douluhl kahpwal kan koaros me kin kahrehda lokolok laud rahnwet, kahpwal kan me duwehte rerrer en sahpw, melimel ape, soumwahu, oh mehla. Siohwa pahn ketin kapwaiada kupwure sang ni eh pahn ketin doadoahngki sapwellime Wehi. (Dan. 2:44; Kaud. 21:​3, 4) Ahpw lao lel ahnsowo, Siohwa ketin mweidohng Sehdan en kaunda sampah. (Sohn 12:31; Kaud. 12:9) Ma Siohwa ketin kamwahwihala ahn aramas kahpwal koaros ahnsou wet, e pahn mwomwen me ahn Sehdan kaunda sampah uhdahn mwahu. Eri erein atail awiawih Siohwa en ketin kapwaiada ekei sapwellime inou kan, met sohte wehwehki me e sohte kin ketin sewese kitail. Siohwa pahn ketin wia pwehn sewese kitail. w23.05 8 ¶4; 9-10 ¶7-8

Ia duwen atail kak sewese meteikan en paiekihda Katamano? Ni mehlel, keieun kahk iei en luke irail. Patehng irail kan me kitail kin tuhwong nan kalohk, kitail kak ntingihdi ekei eden aramas me kitail kak luke. Irail pwukat kakete atail peneinei, iengatail tohndoadoahk, tohnsukuhl, oh meteikan. Mehnda me sohte itar doaropwehn luhk, kitail kak ehukihong irail link en Katamano. Kitail pahn pwuriamweikihla uwen tohto me kakete pilada en iang! (Ekl. 11:6) Tamataman me irail kan me kitail luke kakete ahneki peidek kan—ahpw mehlel ma irail saikinte iang towehda. Kitail kak medemedewe duwen peidek kan me re ahneki oh onopada pwehn sapengala peidek pwukat. Mwurin arail towehda Katamano, me kapw kan kakete ahneki peidek teikan. Kitail men wia dahme kitail kak—mwohn, erein, oh mwurin Katamano—pwehn sewese irail me “ahneki mohngiong mwahu” en paiekihda Katamano.—Wiewia 13:48. w24.01 12 ¶13, 15; 13 ¶16

Nan Paipel, mi koasoiepen aramas welimen me iasada. Ke sou onopki mwahu koasoiepen kaiasada pwukat? Ni omw wia met, tehk mehn kasukuhl kan me ke kak sukuhlkihsang. Medemedewe ia duwen ehuehu karasaras pwukat ar kasalehda duwen Koht eh ketin kupwurki oh sapwellimanki manaman en kaiasada me melahr kan. Kesempwalsang kaiasada pwukat, medemedewe kaiasadahn Sises. Tamataman me me tohtohie me kilang eh ketin iasada oh met wia poahsoan mwahu ehu ong atail pwoson. (1 Kor. 15:​3-6, 20-22) Kitail uhdahn kalahnganki sapwellimen Siohwa inou en kaiasada! Kitail kak uhdahn kamehlele me inou wet pahn pweida pwehki Siohwa ketin kupwurki oh pil sapwellimanki manaman en kapwaiada met. Kitail en koasoanehdi teng en kakehlakahda atail pwoson koapworopwor kesempwal wet. Ni atail wia met, kitail pahn uhdahn karanihala Kohto me ketin inoukihong emenemen kitail, ‘Irail kan me ke poakohng pahn iasada!’—Sohn 11:23. w23.04 8 ¶2; 12 ¶17; 13 ¶20

Mpahi oh aktikitik kereniong duwepenehte. Kitail kin kasalehda me kitail mpahi sang ni atail kin ahneki madamadau pwung duwen pein kitail oh wehwehki me mie soahng kan me kitail sohte kak wia. Ma kitail aktikitik, kitail kin wauneki meteikan oh wiahki me irail kesempwalsang kitail. (Pil. 2:3) Aramas mpahi men pil kin wia aramas aktikitik men. Kidion iei ohl emen me kin mpahi oh aktikitik. Ni sapwellimen Koht tohnleng men eh ndaiong Kidion me ih me pilipilda en kapitasang mehn Israel kan sang mehn Midian kan, ohl aktikitik menet nda: “Ei peneinei me keieu luwet nan kadaudok en Manase, oh ngehi me keieu sohte wadei rehn ei peneinei.” (Sounkopwung 6:15) E pehm me e sohte warohng wia pwukoa wet, ahpw Siohwa ketin mwahngih me Kidion kak wia met. Pwehki sapwellimen Siohwa sawas, Kidion kapwaiada eh pwukoa kan. Elder kan kin wia uwen ar kak en kasalehda mpahi oh aktikitik ni soahng koaros me irail kin wia. (Wiewia 20:​18, 19) Irail sohte kin suweiki dahme re kak wia de wiadahr. Oh re sohte kin medewe me sohte kateparail pwehki sapwung kan me re wiahda. w23.06 3 ¶4-5

Kamwutepene moangen Sehdan pahn wiawi daulih sounpar 1,000 sang ahnsou wet. (Kaud. 20:​7-10) Mwohn met eh pahn wiawi, Paipel kohpada duwen mwekid kapwuriamwei pwukat. Keieu, wehi kan pahn pakairki “popohl oh sohte keper!” (1 Des. 5:​2, 3) Kahn kamakam kowahlapo pahn “mwadangete” tepida ni ahnsou me wehi kan pahn uhwongada pelien lamalam likamw koaros. (Kaud. 17:16) Mwurin mwo, Sises pahn ketin kadeikada aramas akan, oh katohrepeseng sihpw kan sang kuht kan. (Mad. 25:​31-33, 46) Erein ahnsowo, Sehdan pahn doulahte pelian Siohwa. Pwehki e uhdahn kailongki sapwellimen Koht aramas akan, e pahn kamwakid pwihn en wehi kan me Paipel kahdaneki Kok en sapwen Makok pwehn uhwongada sapwellimen Siohwa aramas akan. (Esek. 38:​2, 10, 11) Ahnsou ehu erein mepwukat ar wiewiawi, luhwen me keidi kan pahn pwekipwekdahla nanleng pwehn iang Krais oh sapwellime karis en nanleng kan en pei nan mahwen en Armakedon, me pahn kaimwisekala kahn kamakam kowahlapo. (Mad. 24:31; Kaud. 16:​14, 16) Mwurin mwo, Kaundahn Krais Pahr Kido pahn tepida kaunda sampah pwon.—Kaud. 20:6. w23.10 20-21 ¶9-10

Rahnwet, sapwellimen Siohwa ladu tohto kin kousoan nan sahpw kan me atail doadoahko keinapwidi. Irail kin kasalehda arail wauneki kaun en koperment kan, ahpw duwehte Opadaia, riatail Kristian kan sohte kin uhdihsang kaudokiong Siohwa. (Mad. 22:21) Irail kin kasalehda arail lemmwiki Koht sang ni arail peikiong ih a kaidehn aramas. (Wiewia 5:29) Irail kin wia met sang ni arail kin pousehlahte kalohki rongamwahwo oh iang towehda mihting kan ni rir. (Mad. 10:​16, 28) Irail kin song en tehk mwahu me riarail Kristian kan kin alehdi soahng kan me irail anahne pwehn karanihte Siohwa. Medewehla mehn kahlemeng en Henri, me kousoan nan ehu sahpw en Aperika kan me atail doadoahko keinapwidi erein ahnsou ehu. Erein ahnsowo, Henri toukihda eh ahnsou pwehn wahla sawasepen Paipel kan ong rie Sounkadehde kan. E ntingihedi: “I kin namenek. . . . Siohwa . . . ketikihong ie eimah me I anahne.” Ke medewe me ke kak ahneki eimah me Henri ahneki? Ke kak ma ke kakairada irair en lemmwiki Koht ni ahl me pwung. w23.06 16 ¶9, 11

Ni ahnsou me Adam oh Ihp uhwongada Koht, e pahn mwomwen me aramas unsek kan me pahn peikiong Siohwa sohte kak kadirehla sampah. Ele Sehdan medewe me Siohwa sohte kak ketin kapwaiada sapwellime inou. E kakete medewe me Koht pahn ketin kemehla Adam oh Ihp oh kapikada ehu pwopwoud tohrohr me unsek pwehn ketin kapwaiada kupwureo ong aramas akan. Ahpw ma Koht ketin wia met, Tepilo pahn karaunehki me e ketin likamw. Dahme kahrehda? Pwehki nin duwen me Senesis 1:28 mahsanih, Siohwa ketin mahsanihong Adam oh Ihp me kadaudokara kan pahn kadirehla sampah. De ele Sehdan medewe me Siohwa pahn ketin mweidohng Adam oh Ihp en naineki seri, ahpw re sohte pahn unsekla. (Ekl. 7:20; Rom 3:23) Oh ma nein Adam oh Ihp seri kan sohte kak unsekla, Tepilo pahn kak nda me Siohwa sohte ketin kapwaiada kupwureo. Sampah sohte pahn direkihla aramas unsek kan. w23.11 6 ¶15-16

Siohwa ketikihong kitail kaweid sansal sang sapwellime Mahsen oh sang sapwellime pwihn. Sohte kahrepen atail en kapatahiong soahng kan ong kaweid me e ketikidahr. (Lep. Pad. 3:​5-7) Eri, kitail sohte kin wia daulihala dahme ntingdier nan Paipel de wiahda kosonned kan ong riatail kan duwen dahme pein kitail mwahuki. Sehdan kin doadoahngki “widing mwahl” oh “madamadau oh tiahk en sampah wet” pwehn pitih oh katohrohrpeseng aramas akan. (Kol. 2:8) Ni mwehin tepin Kristian kan, soahng pwukat kin pidada padahk erpit kan me kohsang madamadau en aramas, padahk en mehn Suhs kan me sohte poahsoankihda Paipel, oh padahk kan me dene Kristian kan anahne idawehn Kosonned en Moseso. Padahk pwukat wia widing kei pwehki e kahrehiong aramas akan en sohpeisang Siohwa, me ketin wia Utupen erpit mehlel. Rahnwet, Sehdan kin doadoahngki TV, nuhs, makasihn kan, de redio ape, oh social network pwehn kihpeseng koasoi oh rohng likamw kan me kaun en politik kan kin kihda. w23.07 16 ¶11-12

Sehdan uhdahn sohte kak medewehda dahme Siohwa pahn ketin wia. Siohwa sapwellimanki koasoandi me keieu mwahu pwehn kapwaiada kupwure mendahki Sehdan, Adam, oh Ihp uhwongada ih. Siohwa ketin mweidohng Adam oh Ihp en nainekihda seri, oh ni ahl wet, sapwellime mahsen kan pweida. E sohte ketin likamw. Oh Siohwa ketin kasalehda me ni eh mahsanih me e pahn ketin wia mehkot, sohte mehkot kak kauhdi. E ketin tehk mwahu me kupwureo pahn pweida ni eh ketikihda “kadaudoke” men me pahn doarehla kadaudok en Adam oh Ihp me peik kan. (Sen. 3:​15, NW; 22:18) Sehdan sohte mwahn kasik sapwellimen Siohwa koasoandi en pweinen pweipwei sapahlo! Dahme kahrehda? Pwehki koasoandi wet poahsoankihda limpoak me sohte kin roporop. (Mad. 20:28; Sohn 3:16) Sehdan sohte ahneki irair wet pwehki e roporop. Eri dahme pahn wiawi pwehki koasoandi en pweinen pweipwei sapahlo? Ni imwin pahr Kido, kadaudok en Adam oh Ihp me unsek oh peik kan pahn sohsohki paradais nin sampah—duwehte me Siohwa ketin kupwurki nin tapio. w23.11 6 ¶17

Kitail kin peikiong sapwellimen Siohwa kosonned me pid wauneki mour oh nta. Dahme kahrehda? Pwehki Siohwa ketin mahsanih me mour mi ni nta. Mour iei kisakis kesempwal ehu sang ih. (Lip. 17:14) Ni Siohwa eh tepin ketin mweidada aramas en tungoale uduk en mahn, e ketin kaweid irail en dehr tungoale ntao. (Sen. 9:4) E pil pwurehng ketikihda kehkehlik wet ong mehn Israel ko ni eh ketikihong irail Kosonned en Moseso. (Lip. 17:10) Oh e ketin kaweid pwihn me kin apwalih mwomwohdiso ni mwehin wahnpoaron ko en padahkihong Kristian koaros ren “kin liksang . . . nta.” (Wiewia 15:​28, 29) Kitail kin peikiongete kehkehlik wet ni atail kin pilada epwelpen wini dah me kitail pahn ale. Kitail pil kin tengediongete sapwellimen Siohwa koasoandi kan me pid tiahk. Wahnpoaron Pohl kaweidki kitail en “kemehla” ineng en paliwaratail kan. Met wehwehki me kitail en wia uwen atail kak en kihsang ineng sapwung kan. Kitail kin soikala kilang de wia soahng sohte lipilipil me kak kahrehiong kitail en wia tiahk samin.—Kol. 3:5; Sohp 31:1. w23.07 15 ¶5-6

Ia duwe, Samson uhdahn poakepoake Dilehla me kahrehda e sohte kak kasawihada dahme Dilehla men wia? Eri Dilehla kin pwurupwurehng peki Samson en ndaiong ih kahrepen eh uhdahn kehlail, oh kedekedeo Samson padahkihong. E kansensuwed me Samson mweidohng pein ih en lelohng irair ehu me kahrehiong en sohla eh kehl oh Siohwa sohla ketin kupwurperenki ih erein ahnsou ehu. (Sounkopwung 16:​16-20) Samson lelohng imwila suwed pwehki e likih Dilehla a kaidehn Siohwa. Mehn Pilisdia ko parokedi Samson oh pwadikasang pwoaren mese ko. E selidi nan Kasa, oh e wiahla soun ngidar krein men. Mehn Pilisdia ko eri walahng ih ni arail kamadipw ehu. Irail wiahda lapalahn meirong ehu ong arail koht likamwo Dakon pwehki re medewe me ih me sewese irail en koledi Samson. Irail wahsang Samson nan imwetengo oh walahng ni kamadipwo pwe ren “kapailoke.”—Sounkopwung 16:​21-25. w23.09 5-6 ¶13-14

Ele iengatail tohndoadoahk de tohnsukuhl men peidengki dahme kahrehda kitail kin peikiong kosonned en Paipel kan. Kitail pahn wia uwen atail kak en kawehwehiong kahrepen atail kamehlele me kaweid en Paipel iei me keieu mwahu. Ni ahnsowohte, kitail en wauneki eh madamadau. (1 Pit. 3:15) Eri, dehr medewe me eh peideko pahn kauwe kitail, ahpw medewe ia duwen peideko eh kak seweseiuk en esehda dahme e kin kesempwalki. Sohte lipilipil soangen kahrepe dah me emen kin idek peidek, e mwahu kitail en kin sapeng ni meleilei oh kadek. Atail pasapeng ele pahn kamwakid ih en pwurehng medewe dahme e kin kamehlele. Karasepe, ma iengatail tohndoadoahk men idek dahme kahrehda kitail sohte kin wia ipwidi, medewehla met: Ia duwe, e kakete medewe me e sohte mweimwei kitail en kin ahneki ahnsou en peren? Ele kitail pahn tepte kapinga iengatail tohndoadoahko pwehki e kin nsenohki meteikan. Met kakete elehieng kitail ahnsou mwahu en koasoiong ih ni kadek duwen dahme Paipel kasalehda duwen rahnen ipwidi kan. w23.09 16-17 ¶10-11

E uhdahn wia pwais kaselel ehu en doadoahngki ahnsou me luhluhwe pwehn kalohk ong aramas akan nan sampah pwon. Wahnpoaron Piter kangoange kitail en “tamatamante” rahnen Siohwa. (2 Pit. 3:​11, 12) Ia duwen? Ehuehu rahn kitail kak doudouloale ia uwen kaselel en ahnsowo me kitail pahn mi nan sampah kapwo. Medewehla pein kowe ni omw pahn esingengki ahng mwakelekel, kang mwenge me mwahu ong roson en war, kasamwo me ke poakohng kan ni ar pahn iasada, oh padahkihong aramas akan sang mahsie duwen pweidahn kokohp en Paipel kan. Ma ke medemedewe soahng pwukat, e pahn seweseiuk en awiawihete ahnsowo oh kamehlele me kitail miher ni imwin rahn akan. Pwehki kitail “eseier loalokong wet” duwen ahnsou kohkohdo, kitail sohte pahn ‘idawehnla’ sounpadahk likamw kan. w23.09 27 ¶5-6

Me pwulopwul kan kin mi nanpwungen irail kan me “sohte pahn kin peikiong pahpa nohno kan.” (2 Tim. 3:​1, 2) Dahme kahrehda me tohto kin sapeik? Ekei seri kin medewe me pahpa nohno kan kin mwalaun. Pahpa nohno kan kin kasik me seri kan en wia dahme pein irail sohte kin wia. Ekei seri kin medewe me kaweid en arail pahpa nohno solahr kadoadoahk, kesempwal, de kin nohn kakos. Ma kowe emen me pwulopwul, ke kin ahneki soangen pepehm wet? Me tohto kin apwalki kapwaiada sapwellimen Siohwa kehkehliko me dierek nan iren rahn en rahnwet. Dahme kak seweseiuk en wia met? Ke kak sukuhlki en peik sang mehn kahlemeng me keieu mwahu—Sises. (1 Pit. 2:​21-24) E wia aramas unsek men me eh pahpa nohno sohte unsek. Ahpw Sises kin wauneki eh pahpa nohno mendahki ira wiahda sapwung kan oh ekei pak sohte wehwehki ih.—Eks. 20:12. w23.10 7 ¶4-5

Wahnpoaron Pohl koasoia me meirong kan me mi nan Kosonnedo sohte douluhl kak kihsang dihp. Pwehki kahrepe wet, Kosonnedo “kasohralahr.” Eri Pohl padahkihong irail ekei padahk loal kan. E katamankihong ienge Kristian kan duwen “koapworopwor me . . . mwahusang” me poahsoankihda sapwellimen Sises meirongo. Met uhdahn kak sewese irail en “karanihala Koht.” (Ipru 7:19) Pohl kawehwehiong rie mehn Ipru ko dahme kahrehda arail kaudok en ahnsou wet uhdahn mwahusang arail kaudok en mahso. Mwomwen mehn Suhs ko ar kin kaudok kin wiahte “mwetehn soahng kan me pahn kohdo, ahpw me mehlelo iei Krais.” (Kol. 2:17) Mwetehn soahng ehu kin kasalehdahte mwomweu. Ahpw e sohte uhdahn mehlel. Duwehte met, mwomwen ahn mehn Suhs ko kin kaudok mahso kin wiahte mwetehn dahme mehlel me pahn kohdo. Kitail anahne wehwehki koasoandi me Siohwa ketikihong kitail pwehn ale mahkpen dipatail kan oh pwe kitail en kak kaudokiong ih ni ahl me e ketin kupwurki. w23.10 25 ¶4-5

Daniel irelaud 11 koasoiahda duwen nanmwarki riemen, de kaundahn koperment riau, me kin sihsiaipene nanpwungara. Ni atail kapahrekihpene kokohp wet ong kokohp teikan nan Paipel, kitail kak kasawihada me “nanmwarkien paliepeng” iei Russia oh ienge kan, oh “nanmwarkien palieir” iei Kaunda Kehlail en Britain-Amerika. Sapwellimen Koht aramas akan me mi pahn kaundahn “nanmwarkien paliepeng” kin lelohng kalokolok sang nanmwarki menet. Ekei Sounkadehde kan kin ale kamakam oh pil selidi nan imweteng pwehki arail pwoson. Kalokolok kan sang “nanmwarkien paliepeng” kin kalaudehla arail pwoson Siohwa oh sapwellime Mahsen. Dahme kahrehda? Pwehki riatail kan ese me kalokolok kan me kin wiawihong sapwellimen Koht aramas akan kin kapwaiada kokohp en Daniel. (Dan. 11:41) Atail ese duwen met kak sewese kitail en kolokolete atail pwoson en kehlail oh lelepekte ong Siohwa. w23.08 11 ¶15-16

Pwehki e ketin poakohng kitail, Siohwa ketin mwahngih atail pepehm oh kupwurki perei kitail. E kin ketin kupwurtoutoula ni atail medekla. Eri kitail kak kamehlele me e pahn ketin sapengkitailla ni atail kapakapki: “Komw ketin sinsile ie duwen omwi kin ketin sinsile pein silangomwien.” (Mel. 17:8) Mese wia wasa kesempwal ehu ni paliwar. Eri ni Siohwa eh ketin kapahrengkihong kitail silangio, e mwomwen me e kin ketin mahsanih, ‘Mehmen me kamedekeikumwailla, nei aramas akan, kin kamedekihala dahme kesempwal ong ie.’ Siohwa ketin kupwurki ken kamehlele me e ketin poakohng uhk. Ahpw e mwahngih me pwehki soahng kan me wiawihong uhk mahso, ke kakete medewe ma e ketin poakohng uhk. De ele ke kin lelohng irair kan ahnsou wet me kin kasonge omw likih sapwellimen Siohwa limpoak. Dahme pahn sewese omw likih met? Sang ni omw sukuhlki ia duwen Siohwa eh ketin kasalehiong Sises, me keidi kan, oh kitail koaros sapwellime limpoak. w24.01 27-28 ¶6-7

Esra kilangehr ia duwen Siohwa eh ketin sewese sapwellime aramas akan ni ahnsou apwal. Sounpar kei mwowe, nan pahr 484 Mwohn Krais, Esra ele mi Papilon ni ahnsou me Nanmwarki Ahasuerus ruwese me mehn Suhs koaros nan Wehin Persia pahn kamakamala. (Est. 3:​7, 13-15) Mouren Esra oh mehn Suhs koaros mihla nan keper! Ni arail rongada met, re uhdahn nsensuwedla me kahrehda re sohla mwenge oh kin mwahmwahiei ni ar peki sapwellimen Siohwa sawas. (Est. 4:3) Medewehla ia ahn Esra oh ienge mehn Suhs ko pepehm ni ahnsou me irail kan me pilahn en kemehla mehn Suhs ko uhd kamakamala a kaidehn mehn Suhs ko! (Est. 9:​1, 2) Dahme wiawi ahnsowo ele kaunopada Esra ong ahnsou apwal kan mwuhr oh kalaudehla eh likih me Siohwa pahn ketin pere sapwellime aramas akan. w23.11 17 ¶12-13

Wahnpoaron Pohl koasokoasoia duwen peikiong Kosonned en Moseso me kohieng mehn Israel ko. (Rom 3:​21, 28) E mwomwen me ni mwehin Pohlo, ekei Kristian en Suhs ko kamehlele me irail anahnehte idawehn Kosonned en Moseso. Eri Pohl doadoahngki en Eipraam mehn kahlemeng pwehn kadehdehda me aramas emen sohte anahne idawehn Kosonnedo pwehn pwungla rehn Koht. Ahpw, Pohl kawehwehda me kitail anahne pwoson. Met wia mehn kangoang pwehki e padahkihong kitail me ma kitail pwoson Koht oh Krais, kitail kak pwungla rehn Koht. Ahpw, “wiewia kan” me Seims irelaud 2 koasoia duwe sohte duwehte soahng kan nan Kosonned en Moseso me re anahne peikiong. Seims koasokoasoia wiewia kan me Kristian men kin wia rahn koaros nan eh mour. (Seims 2:24) Soangen wiewia pwukat kin kadehdehda ma Kristian men uhdahn pwoson Koht de soh. w23.12 3 ¶8; 4-5 ¶10-11

Sister kan me medemedewe en pwopwoudla anahne pilada mwahu ihs me re pahn pwoudiki. Tamataman, ke pahn anahne idawehn kaweid en ohl me ke pilada en pwoudiki. (Rom 7:2; Ep. 5:33) Eri pein idek rehmw: ‘E kin song en alasang Sises ni eh madamadau oh wiewia? E kin mwohneki mahs kupwuren Siohwa nan eh mour? E kin wiahda pilipil mwahu kan? E kin pohnese eh sapwung kan? E kin wauneki lih akan? E pahn kak sewese ie kolokol ei nanpwungmwahu rehn Siohwa en kehlail, apwalih ie, oh wia kompoakepahi mwahu men?’ Ei mehlel, ma ke men diarada omw pwoud mwahu, ke pahn anahne onopada en wia lih pwopwoud mwahu. Lih pwopwoud mwahu men kin wia ‘sawasepen’ eh pwoud oh wia “eh werek.” (Sen. 2:18) Oh pwehki e poakohng Siohwa, e kin wia dahme e kak pwehn sewese meteikan en kilang en eh pwoudo irair mwahu kan. (Lep. Pad. 31:​11, 12; 1 Tim. 3:11) Ke kak kaunopada ahnsou wet sang ni omw kalaudehla omw poakohng Siohwa oh sang ni omw sewese meteikan nan peneinei oh nan mwomwohdiso. w23.12 22-23 ¶18-19

Siohwa ketin inoukihda en ketikihong kitail erpit me kitail anahne pwehn wiahda pilipil mwahu kan. Kitail uhdahn anahne erpit sang rehn Siohwa ni atail kin wiahda pilipil kan me kak wekidala atail mour. E pil ketikihong kitail kehl pwehn dadaur. Duwehte me e ketin wiahiong wahnpoaron Pohl, Siohwa pil pahn ketikihong kitail kehl me kitail anahne pwehn dadaur pahn atail kahpwal kan. (Pil. 4:13) Ehu sawas me e kin ketin doadoahngki iei riatail Kristian kan. Pwohngo mwohnte Sises eh ketin tounmeteikihla eh mour, e ketin kapakap ni ngidingid. E patohwan peki Siohwa en dehr ketin mweidohng meteikan en medewe me ih sounlahlahwe men oh kadeikada. Siohwa sohte ketin wia met, ahpw e ketin sewese Sises sang ni eh ketin poaronehdo emen rien Sises tohnleng ko pwehn kakehlakahda. (Luk 22:​42, 43) Siohwa ele pil pahn ketin sewese kitail sang ni eh pahn ketin doadoahngki emen riatail Kristian kan en call de mwemweitdo rehtail pwehn kangoange kitail. Kitail koaros kak isaneki ahnsou mwahu koaros en “lokaia kadek” ong riatail Kristian kan.—Lep. Pad. 12:25. w23.05 10-11 ¶9-11

Ele irail kan me sohla iang kalohk oh mihting me iang towehda Katamano pahn perki dahme meteikan nan mwomwohdiso pahn ndaiong de ndahki duwen irail. Eri, dehr idek rehrail peidek kan me pahn kanamenekihala irail de nda mehkot me kak kamedekihala irail. Irail pwukat iei iengatail tohnkaudok kan. Kitail kin perenki arail pwurehng iang kitail kaudok! (Mel. 119:176; Wiewia 20:35) Kitail wehwehki dahme kahrehda Sises mahsanihong kitail en wia Katamanpen eh pwoula nan pahr koaros. Ma kitail iang towehda Katamano, kitail oh meteikan kin paiekihda ni ahl tohto. (Ais. 48:​17, 18) Kitail kin kalaudehla atail poakohng Siohwa oh Sises. Kitail kin kasalehda uwen atail kalahnganki dahme ira ketin wiadahr ong kitail. Kitail kin karanihala riatail kan. Kitail kak sewese meteikan en sukuhlki ia duwen arail kak perenki oh ahneki kapai kan me pweinen pweipwei sapahlo kak kihda. Kitail wia uwen atail kak koaros en onopadahng Katamano ong pahret—rahn me keieu kesempwal nan pahr ehu! w24.01 14 ¶18-19

Ia duwen Siohwa kin ketin kaweid kitail? Keieu sang sapwellime Mahsen Paipel. Ahpw, e pil kin ketin doadoahngki aramas akan en kaweid kitail. Karasepe, e kin ketin doadoahngki “ladu lelepek oh loalokong” pwehn kihda padahk mehlel me rasehng mwenge me pahn sewese kitail wiahda pilipil mwahu. (Mad. 24:45) Siohwa pil kin ketin doadoahngki ohl koahiek teikan pwehn kaweid kitail. Karasepe, sounapwalih me kin seiloak kan oh elder kan nan mwomwohdiso kin kihda kangoang oh kaweid me kak sewese kitail dadaurete erein ahnsou apwal kan. Ia uwen atail kalahnganki atail kak likih kaweid pwukat erein ahnsou apwal pwukat mwohn imwio leledo! Met sewese kitail en wiahte kompoakepahn Siohwa pwe kitail en kak perenki mour ahnsou wet oh pil kohkohlahte. Ahpw, ekei pak e kakete apwal ong kitail en idawehn sapwellimen Siohwa kaweid, ni mehlel ma e kohsang aramas soh unsek men. Nan soangen ahnsou pwukat, kitail kin keieu anahne likih me Siohwa me kin ketin kaukaweid sapwellime aramas akan oh met kin ahnsou koaros mwahu ong kitail. w24.02 20 ¶2-3

Atail poakohng Koht kak wie kekeirda sang ni atail kin pwerisekiong onopki sapwellime Mahsen. Ni omw kin wadek Paipel, song en wehwehki dahme ehuehu ire ko kasalehda duwen Siohwa. Pein idek rehmw: ‘Ia duwen ire wet eh kasalehda me Siohwa kin ketin poakohng ie? Kahrepe dah kan me met kihong ie pwehn poakohng Siohwa?’ Pil ehu ahl me atail poakohng Siohwa kak kekeirda iei sang ni atail kin kaukaule kapakap ong ih sang mohngiongitail. (Mel. 25:​4, 5) Siohwa eri pahn ketin sapengala atail kapakap kan. (1 Sohn 3:​21, 22) Atail poakohng meteikan pil anahne kekeirda. Sounpar kei mwurin eh wekidala pelien lamalam, wahnpoaron Pohl tuhwong mwahnakapw mwahu men me adaneki Timoty. Timoty kin poakohng Siohwa oh pil aramas akan. Pohl padahkihong mehn Pilipai ko: “Sohte emen me mi rehi me duwehte [Timoty] me uhdahn pahn nsenohkin kumwail.” (Pil. 2:20) Pohl kak kilang me Timoty uhdahn poakohng rie Kristian kan. Ihme kahrehda mwomwohdiso kan me Timoty kin papah kin kasikasik eh kin mwemweitla rehrail.—1 Kor. 4:17. w23.07 9 ¶7-10

Mwohn mehn Israel ko pedolong nan Sapwen Inowo, Moses mehla. Ia duwe, Siohwa sohla ketin sewese sapwellime aramas ko mwurin Moses mehla? Soh. Erein arail kin lelepekte, Siohwa kin ketin apwalih irail. Mwohn Moses eh mehla, Siohwa ketin padahkihong en idihada Sosua pwehn kaweid aramas ako. Erein sounpar tohto Moses kin kaiahne Sosua. (Eks. 33:11; Deud. 34:9) Patehng met, mie ohl koahiek tohto kei me kin tiengla mwowe—ekei kaun kan kin pwukoahki aramas kid, aramas epwiki, aramas limehk, oh pil aramas ehk. (Deud. 1:15) Sapwellimen Siohwa aramas akan kin alehdi epwel mwahu. Met pil wiawihong Elaisa. E kin doadoahk laud erein sounpar tohto pwehn sewese mehn Israel ko en kaudokiong Siohwa. Ahpw mwuhr Siohwa ketin idihada en papah palieir en Suda. (2 Nan. 2:1; 2 Kron. 21:12) Ia duwe, aramas lelepek kan nan keinek en wehin Israel kelehpwla? Soh. Elaisa kin kaiahne Elisa erein sounpar tohto. Siohwa kin ketin pousehlahte kapwaiada kupwure oh kin apwalih sapwellime tohnkaudok lelepek kan. w24.02 5 ¶12

Kristian kan nan Episos kin mour pahrekiong sapwellimen Siohwa mahsen, me duwehte marain ehu me kin kaweid irail. (Mel. 119:105) Mehn Episos pwukat kesehla arail tiahk me kohsang pelien lamalam likamw oh pil arail tiahk samin kan. Irail kin “kahlemengih Koht” oh kin wia uwen arail kak koaros en kaudokiong Siohwa oh kaperenda ih. (Ep. 5:1) Ni ahlohte, mwohn atail esehla padahk mehlel, kitail mi nan rotorot pwehki pelien lamalam likamw oh atail tiahk kan. Ekei kitail kin kasarawi rahn akan; ekei kitail kin wia tiahk suwed kan. Ahpw ahnsou me kitail sukuhlki sapwellimen Siohwa koasoandi kan ong dahme pwung oh sapwung, kitail wiahda wekidekla kan. Kitail tepida wekidala atail mour pwehn mour pahrekiong sapwellime koasoandi pwung kan. Oh pwehki met, mie kapai tohto me kitail ahneki. (Ais. 48:17) Ahpw met kitail pil kin lelohng kahpwal kan. E sohte kin ahnsou koaros mengei en soikala rotoroto oh “pousehlahte weweid nin duwen seri en marain.” w24.03 21 ¶6-7

Ele ke pehm me ke saikinte onopada en wiahda inou oh papidaisla. Mwein ke pehm me ke anahnehte wiahda wekidekla kan nan omw mour pwehn peikiong sapwellimen Siohwa koasoandi kan, de mwein ke anahnehte ahnsou pwehn kakehlakahla omw pwoson. (Kol. 2:​6, 7) Kaidehn tohnsukuhl en Paipel koaros kin kekeirda ni ahnsou tehieu, oh kaidehn me pwulopwul koaros kin onopada en wiahda inou oh papidaisla ni ahnsou tehieu. Song en wehwehki soahng kan me ke anahne kamwahwihala oh eri wia dahme ke kak, ahpw kaidehn en kapahrekiong uhk meteikan. (Kal. 6:​4, 5) Mehnda ma ke saikinte onopada en inoukihong Siohwa omw mour, wiahki met omw mehn akadei. Kapakapki sapwellimen Siohwa sawas pwehn wiahda wekidekla kan nan omw mour. (Pil. 2:13) Ke kak kamehlele me e pahn ketin sapengala omw kapakap oh seweseiuk.—1 Sohn 5:14. w24.03 5 ¶9-10

Ehu pak, Sara uhdahn pwunodada, oh ndaiong Eipraam eh pepehm, pil kapwukoahki kahpwalo. Eipraam ese me eh pwoudo Sara kin uhpa oh utung ih. E rong Sara oh song en kapwungala kahpwalo. (Sen. 16:​5, 6) Dahme kitail kak sukuhlkihsang met? Ohl pwopwoud kan, kumwail ahneki manaman en wiahda pilipil kan ong amwail peneinei. (1 Kor. 11:3) Ahpw e wia mwekid en limpoak ma ke pahn rong kanahieng oh medewe mahs en omw pwoudo madamadau mwohn omw wiahda pilipil, ahpw mehlel ma pilipilo pahn pidada ih. (1 Kor. 13:​4, 5) Pil ehu pak, Eipraam kasamwo ohl riemen me mwemweitdo reh ni eh sohte kasik. E peki Sara en mwadang umwunda uwen pilawa laud. (Sen. 18:6) Sara mwadangete wiahda dahme Eipraam peki en wia. Lih pwopwoud kan, kumwail kak alasang Sara sang ni amwail kin utung pilipil kan me amwail pwoudo wiahda. Ni amwail wia met, kumwail kin kakehlailih amwail pwopwoud.—1 Pit. 3:​5, 6. w23.05 24-25 ¶16-17

Mwurin Kidion alehdi pwukoa en kahluwa mehn Israel ko, e anahne peik oh eimah. E ale pwukoa keper ehu en kauwehla pei sarawi en Paal me eh pahpao kin kaudokiong. (Sounkopwung 6:​25, 26) Mwurin eh kihpene nah sounpei ko, Siohwa mahsanihong Kidion pak riau me e anahne kamalaulauiala nan sounpei ko. (Sounkopwung 7:​2-7) Mwuhr, Siohwa eri mahsanihong ih en mahweniong eh imwintihti kan nan lukepen pwohngo.(Sounkopwung 7:​9-11) Elder kan anahne “kin men peik.” Elder peik men kin men mwadang en uhpah dahme Paipel mahsanih oh kaweid me kohsang sapwellimen Koht pwihn. Eri, e kak wiahda mehn kahlemeng mwahu ong meteikan. Ahpw e pil kak apwal ong ih en peik. Karasepe, ele e ale kaweid tohto, de kaweid ko mwadang wekila oh e apwalki kapwaiada koaros. Ele ekei pak, e kin medewe ma kaweido uhdahn mwahu ong irairo. De e alehdi pwukoa ehu me kakete kahrehiong ih en selidi. Ia duwen elder kan ar kak alasang ahn Kidion peik nan soangen irair ko? Rong kanahieng kaweid oh doadoahngki. w23.06 4-5 ¶9-11