Ripoht En Sounkalohk Kan En Wehio
Ni Aktikitik Mourki Sapwellimen Siohwa Ahlo
“RAPAHKI Siohwa, kumwail me aktikitik koaros en sampah.” Luhk wet, me soukohp en Ipru Sepanaia kalohkihda pohnangin sounpar 2,600 samwalahro, kin pil wiawiohng aramas koaros nan sampah rahnwet. (Sepanaia 2:3, New World Translation) Ia wehwehn en rapahki Siohwa? Wia met kin tepkihda en loalokongkihla Koht mehlel oh ieias emente, me iei Siohwa.—Seremaia 10:10; Sohn 17:3.
Ahpw, alehda loalokong wette, sohte kin kahluwalahng nanpwung mwahu rehn Koht. Pwe Koht en kupwurki emen, aramaso anahne pil doadoahngki loalokong wet. Iaduwen? Ni ah pahn, ni aktikitik, kapahrekiong ah madamadau oh wiewia en duwehte kosonned en Koht akan, nin duwen me eksperiens wet sang Suriname kasalehda.—Episos 4:22-24.
Eddy, emen sounpadahk en sukuhl me mahki sounpahr 30 samwa, kin inengieng pasepeng pwung kan ong soahngen peidek kan duwehte: ‘Ia pwukoah en pelien lamalam nan koasoandi en aramas rahnwet?’ oh ‘Paipel, me wia pwuhk mering ehu, kin pahrekiong pelien sains en ahnsouwet?’ Ni ahnsou me Sounkadehdehn Siohwa kan pwarek ih oh kihda pasepeng kan me poahsoanda pohn Paipel ong peidek pwukat, Eddy kin rongorong kanahieng arail pasepeng kan. E pil ntingihdi arail kawehwe kan pwehn kak pein kadehde ma met mehlel.
Mahso, Eddy kin iang ehu pelien lamalam me padahkiohng ih me aramas tepisang mahn mongki me Koht doadoahngki pelien evolution (aramas tepsang mahn mongki) pwehn kapingkihda aramas. Ihme ni ahnsou me Sounkadehde kan kihong ih pwuhken Life—How Did It Get Here? By Evolution or by Creation? e perenkihda oh ale. E inenen pwuriamweikihla en pwuhko kawehwehda ni sansal sapwellimen Koht kapikipik kan. Sang ni ah onop Paipel, e kamehlele me e diaradahr padahk mehlel!
Ahpw ahnsouwet e mihmi pahn ehu kasongosong. Eddy kin kousoan nan ihmw ehu me towe kan kin mourki mouren pirap oh likamw. Ihme kahrehda, e anahne wiahda ah pilipil: en idawehnla en tohnihmwo mour samin de soikala soahngen wiewia wet pwehn mourki ehu mour me kin kalinganahda Koht. Ni elen loalokong, Eddy pilada en mourki mour me pahn kalinganahda Koht. E uhdisang werek suwed koaros oh kosousang nan ihmwo.—1 Korint 15:33, 34.
Eddy kekeirada mwadang mwurin ah tepiada towehda mihding kan nan Kingdom Hall. E pil kamwahuwiala mwomwen ah likou oh kapwat oh tepiada koasoiaiong kompoakepah kan oh ah peneinei kan duwen soahng kan me e sukusukuhlki. Mwuri, ah peren pil laudla ni ahnsou me e warohngehr en iang kalohngki “rongamwahuwo” ong wehipokon. (Madiu 24:14; Wiewia 20:20) Rahn me e kin kasikasik nan December 1996 leledo ni ah kasalehda ah inou ong Siohwa oh papidaisla nan pihl.
Pahr koaros, aramas mohngiong mehlel lop kei kin kapwaiada luhko en “rapahki Siohwa.” Ni arail wia met, re kin lelohng mehlel en Lepin Padahk 22:4, NW, me mahsanih: “Lemmwiki Siohwa oh aktikitik, eri, ke ahpw pahn kepwehpwehla, waunla, oh pil mour werei.” Ehi, ni arail ni aktikitik mourki sapwellimen Siohwa ahlo, irail kan me kin poakohng padahk mehlel kin paiekihda soahngen kapai pwukat ahnsouwet, oh ki koapworopwor kilikilangwohng kapai soutuk kan wasaht nan sampah.—Melkahka 37:29.
[Map nan pali 18]
(Pwehn kilang nting kan ni soandi mwahu, kilang pwuhk wet)
Caribbean Sea
SURINAME
GUYANA
FRENCH GUIANA
BRAZIL
[Credit Line]
Globe: Mountain High Maps® Copyright © 1997 Digital Wisdom, Inc.