Komw Kin Doadoahngki Ahmw Ahnsou En Mihmi Rehn Ahmw Peneinei?
“IRAIL Papah en Sapahn Akan Kin Ale Limpoak Laud—Mendahki Re Kedirepwki Doadoahk En Mwohni oh Sohte Kin Iang Neirail Seri Kan Mwadong.” Sounpahr kei samwalahro, oaralap wet pwarada nan nuhs en Mainichi Shimbun. Artikel wet ripohtki me persent 87.8 en seri en Sapahn kan me iang pidada nan roporop en koperment ehu kasalehda arail men apwalih arail pahpa kan ni ahnsou me ahr pahpa kan mahla. Ahpw, nan nuhspehpa Mainichi Daily News [lokaiahn wai], artikelohte pwarada pahn oaralap ehu me wekisang met. E koasoia “Pahpa kan Sohte Kin Apwalih Mwahu Neirail Pwutak kan.” Me wekisang artikel en lokaiahn Sapahno, artikel kasalehda pil ehu ire en roporopohte: Nan ehuehu rahn en doadoahk, pahpa en Sapahn kan kin mihmikihte rehn neirail seri kan minit 36. Kapahrekiong met, pahpa kan nan West Germany kin mihmihkihte rehn neirail seri kan minit 44 nan ehu rahn, oh nan United States, minit te 56.
Kaidehn pahpa kante me sohte kin kalapw mih rehn neirail seri kan. Nohno tohto kin doadoahk en mwohni. Karasepe ehu, nohno kiripw tohto anahne doadoahk en mwohni pwehn apwalih arail peneinei. Imwilahn met, ahnsou me pahpa kan oh nohno kan kin mihmihki rehn neirail seri kan kin tikitikla.
Ehu roporop (1997) en me pwulopwul (sounpar 13-19) en Amerika me tohtohki meh 12,000 samwa diarada me irail me pwulopwul kan me ahneki nanpwung keren rehn arail pahpa oh nohno kan sohte pahn kalapw pwunod, men kemehla pein irail, iang wia tiahk lemei kan, de doadoahngki wini en kasahliel kan. Oh emen sounroporop kan koasoia: “Ke sohte pahn kak ahneki nanpwung keren ehu rehn noumw seri kan ma ke sohte kin mih rehrail.” Mih rehn noumw seri kan oh kapehse ong irail kin mie katepe.
Ohlahn Kapehse
Keieu me kin kahrehda ohlahn kapehse nan peneinei iei ma emen pahpa de nohno kin doadoahk en mwohni dohsang peneinei. Ni mehlel, ohlahn kapehse sohte kin ihte kohsang en pahpa de nohno sohte kin kousoan nan ihmw. Ahpw, ekei pahpa oh nohno kan, mendahki re kousoan nan ihmw, re kin kohla doadoahk mwohn neirail seri kan pirida ni menseng oh re kin pwurodo nan ihmw mwurin seri kan meirlahr. Pwehn kapwungala arail sohte kalapw mih rehn neirail seri kan, ekei pahpa oh nohno kan kin koasoanehdi en mih rehn seri kan ni imwin wihk kan oh ni rahn en holiday kan. Re kin koasoia duwen ahr pahn doadoahngki ahnsou “katapan” rehn neirail seri kan.
Ahpw, kisin ahnsou kan me pahpa oh nohno mihki rehn neirail seri kan kak kapwungpwungkihla ahnsou kan me dene audepan? Sounroporop Laurence Steinberg koasoia: “Pak tohto, seri kan me kalapw mih rehn arail pahpa/nohno kin keirada mwahu sang seri kan me sohte kalapw mih rehn pahpa/nohno. E inenen apwal en pwurehng kapwurehdo ahnsowo me ke sohte mih rehn seri ko. Pahpa oh nohno kan nohn kesempwalkihla en doadoahngki ahnsou me dene audepan ong seri kan.” Ih met pepehm en emen lih en Burma. Ah pwoud—emen ohlen Sapahn—kin pwuresang doadoahk kuloak ehu de riau ni menseng koaros. Mendahki e kin mih rehn ah peneinei ni imwin wihk kan, ah pwoudo kosoia: “Mih rehn peneinei Rahn Kaunop kan oh Rahn Sarawi kan sohte kak kapwungala ahnsou kan me e sohte kin mih rehn peneinei erein wihko. . . . Ke kak sohte mwenge erein wihk kan oh mwengehte Rahn Kaunop kan oh Rahn Sarawi kan?”
Anahne En Nannanti
E mengei en nda me peneinei en kolokolte arail kapehsehpene sang en kapwaiada met. Pwehki mie anahn en kadoahkehda mwohni oh apwalih peneinei, met kin kahrehda e apwal ong pahpa men de nohno men me kin doadoahk en kak doadoahngki arail ahnsou en mih rehn neirail seri kan. Me tohto me kin doadoahk en mwohni dohsang peneinei kin kapehse ong arail peneinei kaukaule ni ahr kin telepohnpene de nting kisinlikoupene. Ahpw mendahki ma pahpa oh nohno kin mih rehn neirail seri kan de soh, re anahne en nantiong wiahda pwe peneinei en kolokolte arail kapehse mwahupene.
Pahpa oh nohno kan me kin soukauti en kapehse ong arail peneinei kin anahne kilang imwilahn met. Emen pahpa me sohte kin kalapw doadoahngki ah ahnsou en mih rehn ah peneinei, sohte kin iang irail mwenge, pahn lelohng imwila suwed. Nah pwutako kin uhd tiahk lemeila, nah serepein kin pirap nan sidohwa. Ehu rahn, ni ahnsou me pahpao kin kaunopada en kohla wasahn mwadong en golf ni menseng en Rahn Sarawi, nah pwutako mwehlda. “Nohno kelehpw nan ihmwet?” e weriki. “Nohno me kin koasoanehdi soahng koaros nan peneinei. Ipa, ke sohte . . . ,” pwutako kaulimki.
Lokaia ko kahrehong pahpao en medemedewe met. Mwurin rahno, e koasoanehdi me, e pahn tepiada iang ah peneinei mengehn ni menseng. Nin tepio, ihte ih oh ah pwoudo me kin mwengepene ni menseng. Kedekedeo, seri ko iangehr ira, oh tehpel en mwengehn ni menseng kin wialahr wasahn koasokoasoipene. Met kahluwalahng peneineio en mwengepene ni soutik kan. Met, e sansal me ohlo kin nannanti en doarehla ah peneinei en dehr uhdahn ohla douluhl.
Sawas Sang Sapwellimen Koht Mahsen
Paipel kin kangoangehki pahpa oh nohno kan en wiahda ahnsoun kapehse ong neirail seri kan. Ki soukohp Moses, kaweid kohieng mehn Israel kan: “Israel, ke en tamataman met! Kauno [“Siohwa,” New World Translation], atail Koht ihete me Koht. Eri, ke en poakohng Kauno [“Siohwa,” NW] omw Koht sang nan mohngiongomw unsek, ni ngehnomw unsek, oh ni omw kehl koaros. Dehr manokehla kosonned pwukat me I kihong kumwail rahnwet. Padahkihong noumwail seri kan. Kataman kin irail ahnsou me kumwail kin mihmi nan imwamwail oh pil ni ahnsou me kumwail kin mihmihseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.” (Deuderonomi 6:4-7) Ehi, kitail me naineki seri anahne en tiengla mwowe en koasoanehdi atail ahnsou en mih rehn atail peneinei ma kitail pahn katengehdi nan lamalam oh mohngiong en neitail seri kan Mahsen en Koht.
Kitail en tehk me, roporop en 1997 me pid me pwulopwul en Amerika 12,000 samwa me kitail tehkpene mwowe kasalehda me “nanpwungen kereniong persent 88 . . . en irail kan me koasoia me mie arail pelien lamalam, kesempwalpen pelien lamalam oh kapakap kin wia mehn pere ehu.” Kristian mehlel kan kin pohnese me kaweid pwung en kaudok nan ihmw kin pere me pwulopwul kan sang soahng kan me duwehte doadoahngki wini suwed, pwunod, kemehla pein irail, tiahk lemei, oh soahng suwed teikan.
Ekei pahpa oh nohno kan kin pepehm me e apwal en rapahkihda ahnsou en mih rehn arail peneinei. Met kin keieu mehlel rehn nohno kiripw kan, me men doadoahngki arail ahnsou en mihmi rehn neirail seri kan ahpw re anahne doadoahk en mwohni. Iaduwen re kak rapahkihda ahnsou kesempwal en mihmi rehn arail peneinei? “Katengehdiong loalomw omw loalokong oh erpit,” Paipel kangoangehki. (Lepin Padahk 3:21) Pahpa kan oh nohno kan kak doadoahngki “erpit” en koasoanehdi ahnsou en mih rehn peneinei. Iaduwen?
Ma komwi emen nohno me kin doadoahk en mwohni me kin pwangada mwurin omw doadoahk, ke soh peki rehn noumw seri kan en iang uhk kaunopada mwenge? Soahngen ahnsowo me kumwail ehupene pahn kihda ahnsou mwahu pwe kumwail en kerenihla emenemen. Nin tepio, ke pahn pil anahne ahnsou laud en koasoanehiong noumw seri kan en iang uhk wia mehkan. Ahpw, ni ahnsou keren, ke pahn diarada me e kaperen oh kin pil kasohtikih ahnsou.
Ele komwi emen pahpa me pahn wia soahng tohto ni imwin wihk. Dahme ke soh mweidohng noumw seri kan en iang uhk wia soahng pwukat? Komw kak kapehse ong irail ni ahnsou me kumwail doadoahkpene oh ni ahnsowohte kihong irail kaiahn kesempwal kan. Kaweid en Paipel en katengehdi Mahsen en Koht rehn noumw seri kan kin kangoangehkin uhk en koasoiong irail ‘ni amwail mihmi nan imwamwail, ni ahnsou me kumwail kin mihmihseli ekis wasa tohrohr’—ni mehlel ahnsou koaros. E kin “loalokong” en kapehse ong noumw seri kan ni amwail doadoahkpene.
Doadoahngkihla ahnsou mihmi rehn omw peneinei kin wahdo kating poatopoat kan. Ehu Lepin Padahk en Paipel mahsanih: “Me kin peki kaweid, ih me loalokong.” (Lepin Padahk 13:10) Ni omw koasoanehdi ahmw ahnsou en kapehse ong ahmw peneinei, komw pahn kak kihong irail kaweid erpit kan ong kahpwal en mour en ehuehu rahn. Soahngen kaweid pwukat me kin kohda ahnsouwet kak katikiala ahnsou oh mohngiong ohla nan ahnsou kohkohdo. Pil ehu, e pahn wahdohng uhk oh ahmw peneinei peren. Pwehn kihda soahngen kaweid wet, komw anahne alehda loalokong wet me dierek nan sapwellimen Koht Mahsen, Pwuhk Sarawi. Doadoahngki pwehn padahki noumw seri kan oh en kahre mour en ahmw peneinei.—Melkahka 119:105.
[Kilel nan pali 4]
Me pwulopwul kan me kin ahneki nanpwung keren rehn arail pahpa oh nohno kan sohte kin kalapw lelohng kahpwal kan
[Kilel nan pali 5]
Kapehse mwahu kin wahdo kapai tohto nan mouren peneinei
[Kilel nan pali 6]
Ni ahnsou me komw kin iang noumw seri kan doadoahkpene, komw kak kapwehseiong irail oh kihda kaiahn kesempwal