Pwulopwul Kan​—Soikeweisang Kumwail Ngehnen Sampah

“Eri, kitail sohte ale ngenen sampah wet, pwe Ngehn Sarawi me Koht ketin poaronehdo pwe en ketin kehsehkin kitail mehkoaros me Koht ketikihong kitail.”​—1 KORINT 2:12.

1, 2. (a) Ia wekpeseng nanpwungen me pwulopwul kan en sampah wet oh me pwulopwul kan nan mwomwohdiso kan en Sounkadehdehn Siohwa? (b) Kaping dahieu pahn kak kohieng pali moron me pwulopwul kan en Sounkadehde kan en Siohwa?

NUHSPEPA en Australia, The Sun-Herald koasoia: “Atail dih pwulopwul en ahnsouwet kin mih nan pahtou laud, oh re pehm me re sohte kesempwal, oh re kin pelianda koasoandi kan.” E pil kapataiong me: “Rekohd en mwoalen kopwung kan kin kasalehda nempe en irail me pwulopwul kan me kin wiahda dihp laud kan kohkihda persent 22 [sang pahr me ahpwtehn nek] . . . Irail me pwulopwul kan me kin kemehla pein irail tohtokihla pak 3 sangehr nan pahr 1960 samwa . . . Oh wekpeseng en tiahk me miehlahr nanpwungen me pwulopwul oh me mah kan kin nok laud me kahrehda me pwulopwul tohtolahr me pwupwudier nan irair en doadoahngki wini suwed, sakau en wai, oh pil kauwehkilahr pein irail madamadau likamw tohto.” Irair pwukat sohte kin dokedoke ehute sahpw. Ahpw wasa koaros nan sampah, pahpa oh nohno kan, sounpadahk kan, oh irail semen kan en palien madamadau kin inenen poakehla irair en me pwulopwul kan nan rahnpwukat.

² Ia uwen wekpeseng laud me mie nanpwungen pali moron me pwulopwul kan rahnpwukat oh me pwulopwul kan me kin iang mwomwohdiso kan en Sounkadehdehn Siohwa kan! Kaidehn pwehki me pwulopwul kan en Sounkadehdehn Siohwa kan me unsek. Re pil anahne powehdi “ineng en me pwulopwul kan.” (2 Timoty 2:22, New World Translation) Ahpw nin duwen pwihn ehu, irail Sounkadehde pwulopwul pwukat kin, ni eimah, kesinenda teng ong dahme pwung oh re sohte men lohdi pahn kasongosong kan en sampah wet. Sang mohngiongaht unsek, se men wia aht kaping ong kumwail, me pwulopwul kan, me kin kanaiehr nan mahwen wet ni amwail peliandahr “widing suwed kan” en Sehdan! (Episos 6:11, footnote) Duwehte wahnpoaron Sohn, se pil men ndaiong kumwail met: “I ntingkiwohng kumwail, mwahnakapw akan [oh peinakapw kan], pwehki amwail kalowedier Me Suwedo.”​—1 Sohn 2:14.

3. Ia wehwehn lepin lokaia “ngehn”?

³ Ahpw, ma ke men pelianda Me Suwedo oh pweida, ke anahne nantihong soikala “ngehnen sampah wet.” (1 Korint 2:12) Nin duwen aramas emen me samanih lokaiahn Krihk kawehwehda me lepin lokaia “ngehn” kin wehwehki “irair me kin kaunda mour en emen.” Karasepe ehu, ma ke kin kilang me emen me kin kalap lingeringerda, ke kak nda me e ahneki “ngehn” suwed. “Ngehn” me mih rehmw, ahmw irair kan oh ahmw madamadau kan kin kamwekid pilipil kan me ke kin wia oh kin kaweid ahmw mwekid kan oh ahmw koasoi. Emen emen kitail kin ahneki “ngehn” oh pil pwihn en aramas akan kak ahneki “ngehn.” Wahnpoaron Pohl ntingwong pwihn en Kristian: “Kalahngan en atail Kaun Sises Krais pahn ketin ieiang ngehn me kumwail kin kasalehda.” (Pailimwon 25, NW) Eri, soangen ngehn dahieu me sampah wet kin kasansalehda? Pwehki “sampah unsek mih pahn manaman en Me Suwedo,” iei Sehdan me Tepil, ngehn en sampah wet sohte kak wia mehkot me min, kaidehn?​—1 Sohn 5:19.

Ia Wehwehn Ngehnen Sampah

4, 5. (a) Soangen ngehn dahieu me kin kaluwetala aramas akan nan mwomwohdiso en Episos mwohn re wiahla Kristian kan? (b) Ihs me kin “kaun manaman en nan wehwe,” oh ia wehwehn “wehwe”?

⁴ Pohl ntingihdi: “Mahs sohte mourimwail ni pali ngehn pwehki amwail sapeik kan oh dipamwail kan. Ni ahnsowo kumwail kin weweidki ahl suwed en sampah wet; kumwail kin peikiong kaun manaman en nan wehwe, iei ngehn me kin kamwakamwakid oh kakaun irail kan me kin uhwong Koht. Kitail koaros pil iang duwehte irail mahso nan atail mour, ni atail kin weweidki ineng en paliwarail kan oh kin kapwaiadahte mehkot me paliwaratail de pein atail lamalam pahn kin nsenki. Kahrehda kitail pil uhdahn iang tohn sampah koaros mi pahn engieng en Koht.”​—Episos 2:1-3.

⁵ Mwohn irail Kristian akan nan Episos sukuhliki duwen elen Kristian, re sohte wehwehki me irail kin idawehn “kaun manaman en nan wehwe” iei Sehdan me Tepil. “Wehwe” wasaht sohte kin wehwehki wasa me Sehdan oh nah ngehn saut akan kin mihmi ie. Ni ahnsou me Pohl koasoia mahsen pwukat, Sehdan me Tepil oh nah ngehn saut akan kin mihmi nanleng. (Pil kilang Sohp 1:6; Kaudiahl 12:7-12.) Lepin lokaia “wehwe” kin wehwehki ngehn, de madamadau, me kin kaunda ahn Sehdan sampah. (Pil kilang Kaudiahl 16:17-21.) Ngehnen sampah kin mihmi wasa koaros duwehte ahng me kin kapilpene kitail.

6. Ia wehwehn “manaman en nan wehwe,” oh iaduwen e kin kaunda pwulopwul tohto?

⁶ Ahpw ia wehwehn “manaman en nan wehwe”? Met kin pid kehl de manaman me “wehwe” de “ahng” kin wia pwehn powehdi aramas akan. Pohl kawehwehda me ngehn wet kin “kamwakamwakid oh kakaun irail kan me kin uhwong Koht.” Eri, ngehnen sampah kin kakairada sapeik oh uhwong, oh ehu ahl me ngehn wet kin kaunda aramas iei sang aramas akan me kin kamwekid iengarail kan en wia dahme sapwung. Emen serepein pwulopwul me iang Sounkadehdehn Siohwa kan koasoia me: “Ni ahnsou ke mih nan wasahn sukuhl, koaros tohnsukuhl kan kin kangoangekin uhk en aklapalap de uhwong koasoandi kan en sukuhl. Tohnsukuhl kan kin wadek uhk ma ke pahn wia mehkot me keper.”

Kasalepen Ngehnen Sampah

7-9. (a) Kihda ekei ahl akan me ngehnen sampah kin sansalda rehn irail me pwulopwul kan nan rahnpwukat. (b) Komw kin kilang soahng pwukat kin wiawi nan pein ahmw wasa?

⁷ Iaduwen ngehnen sampah kin sansalda nanpwungen me pwulopwul kan rahnpwukat? Ehu, pali laud en me pwulopwul kan sohte kin mehlel ong meteikan oh, pil ehu, re kin aklapalap oh kin uhwong koasoandi kan. Ehu makisihn koasoia me persent 70 en irail tohnsukuhl kan en sukuhl laud kan (junior oh senior kan) wehkada me re sohte kin mehlel ong arail test kan ni ahnsou me re iang high sukuhl. Me pwulopwul kan pil kin doadoahngki lokaia kan me sohte kin kasalehda wahu ong aramas, iangahki lokaia kan me kin kamedek oh sohte konehng, oh soahng pwukat kin rekla nan sampah rahnpwukat. Ni mehlel, ekei aramas ele mwein kin lemeleme me Sohp oh wahnpoaron Pohl kin doadoahngki lokaia kamedek kan, pwehn kasansalehda ahr pwung. (Sohp 12:2; 2 Korint 12:13) Ahpw, kapit kamedek kan me pwulopwul tohto kin doadoahngki rahnpwukat kin kalap imwikihla lokaiahn loaumwohmw oh kamwamwahlih meteikan.

⁸ Ngehnen sampah pil kin sansalda nan mehn kamweit kan. Me pwulopwul kan kin perenki kohla nan imwen kang sakau en wai, oh re pil kin perenki “raves” (lokaiahn wai​—kilang footnote)a oh pil soangsoangen kamadipw suwed teikan. Soangen sidail en likou oh keriker me daulihla me konehng kin rek wasa koaros. Me pwulopwul tohto kin doadoahngki sidail en likou walek oh wiepe kapwuriamwei kan me duwehte kapwoareseli paliwararail kan pwehn kasalehda me irail utung ngehnen pelian me mih nan sampah rahnpwukat. (Pil kilang Rom 6:16.) Ngehnen sampah pil kin sansal ahnsou me aramas kin kedirepwki arail men ahneki kepwe kan en sampah. Ehu makisihn en kasukuhl koasoia, “sounwia pisnes kan kin men koledi seri kan ni uwen me re kak sang ni ahr kin doadoahngki advertisement kan de commercial kan pwehn kaselehong me pwulopwul kan soangsoangen dipwisou kan me pahn kahrehong irail en men ahnekihda.” Ni ahnsou me irail me pwulopwul kan nan United States kin kasapwil sang high sukuhl, re kilangehr commercial 360,000 nan TV. Iengomw kan mwein kin nantihong kamwekid uhk en pwainda soahng kan me tohto pwulopwul kan ahneki de naineki rahnpwukat. Emen serepein me sounpar 14 koasoia: “Koaros kin kalapw ididek, ‘Ia eden kompani me wiahda ahmw sweater, sekit, de dankiri?’”

⁹ Sangete mahs nan poadoapoad en Pwuhk Sarawi, Sehdan kin doadoahngki koul kan me sohte konehng ong kaluwetala aramas akan en wia tiahk samin kan. (Pil kilang Eksodus 32:17-19; Melkahka 69:12; Aiseia 23:16.) E sohte kapwuriamwei me koul kan me aramas kin lelki kin kainengihada irail en wia dipen nenek sangete ni lokaiahn koulo oh ngihl en dirom kan. Eri, ehu kasalepen ngehn samin en sampah iei wiewia samin en wia nenek. (1 Korint 6:9-11) The New York Times, ripohtki: “Mwahnakapw oh peinakapw tohto kin kilangwong dipen nenek nin duwen mehkot re anahne wia ma re mwahuki iengarail kan en perenkin irail . . . Tohto sang silikis riau en irail senior kan nan high sukuhl iangehr wia dipen nenek.” Ehu artikel ehu nan The Wall Street Journal koasoia me mie mehn kadehde kan me kasalehda me seri kan nanpwungen sounpar 8 lel 12 me kin “kalap wia dipen nenek kin wie tohtohla.” Emen sounkaweid en tohnsukuhl akan me ahpwtehn kommoal sang eh doadoahk koasoia me: “Kitail tepidaier kilang tohtohn irail akan me kin mih nan pwihn keweneu kin liseianda.”b

Soikeweisang Kumwail Ngehnen Sampah

10. Iaduwen ekei pwulopwul kan me kohsang peneinei en Kristian akan lohdi pahn ngehnen sampah wet?

¹⁰ E kin inenen kansensuwed pwe ekei me pwulopwul kan en Sounkadehdehn Siohwa kan kin lohdi pahn ngehnen sampah wet. Emen serepein en Sapahn wehkada, “Mwohn ahi pahpa oh nohno oh iengei Kristian akan, I kin mwomwehda me ngehi aramas mwahu men. Ahpw I kin mourki mour riau.” Emen serepein pwulopwul me kohsang Kenya koasoia me: “Ni ahnsou werei, I kin mour riau: I kin werek suwed, iang irail ahnsou me re kin kohpene, oh pil rong koul en sampah kan. I ese me met sapwung, ahpw I nantihong pohnsehse met, oh I kin koapworopworki me ehu rahn I pahn uhdi. Ahpw I sohte uhdi. I wie susuwedla.” Pil emen serepein pwulopwul me kohsang Germany koasoia: “I tepida werekiong aramas suwed akan. Mwuhr I tepida simwoak. I men kamedekih ahi pahpa oh nohno, ahpw, ni mehlel, pein ngehi me kamedeihala ni ahi lelohng kahpwal kan.”

11. Dahme kahrehda Kalep sohte idawehn lipoahrok ehk oh mweidong irail en kamasepwehki ih oh Sosua ahnsou me lipoahrok ehk pwurodo oh kihda ripoht suwed?

¹¹ Ahpw, ni mehlel, kitail kakete soikeweisang kitail ngehnen sampah. Tehk duwen mehn kahlemeng mwahu en mahs, Kalep. Ni ahnsou me lipoahrok masepwehk ehk pwurodo rehn mehn Israel kan oh kihda ripoht suwed duwen Sapwen Inou, Kalep oh Sosua sohte idawehn irail oh mweidong irail en kamasepwehkih ira. Ni eimah, ira koasoia: “Sahpw me se dawihero iei sahpw mwahu ehu. Ma Kauno [“Siohwa,” NW] ketin kupwurei kitail, e pahn ketin kahluweikitaillahng nan sahpw kaselel wet oh ketikihong kitail.” (Nempe kan 14:7, 8) Dahme sewese Kalep en sohte lohdi pahn kasongosong en idawehn meteikan? Siohwa mahsanih: “Ei ladu Kalep kin kasalehda ehu soangen ngehn tohrohr.”​—Nempe kan 14:24, NW.

Kaselehda “Ehu Soangen Ngehn Tohrohr”

12. Dahme kahrehda e wia mehkot kesempwal en kasalehda “ehu soangen ngehn tohrohr” me pid duwen ahn emen lokaia?

¹² Rahnwet, emen anahne ahneki eimah ma e men kasalehda “ehu soangen ngehn tohrohr” de “mour tohrohr” de madamadau kan me kin weksang madamadau oh mour en sampah wet. Ehu ahl ke kak weksang sampah ni ahmw pahn liksang lokaia kamedek kan oh lokaia kan me sohte kasalehda wahu. Lepin lokaia “lokaia kamedek kan” ni lokaiahn Krihk kin wehwehki “tehrsang uduk ni tih duwehte me kidi kan kin wia.” (Pil kilang Kalesia 5:15.) Duwehte ngihn kidi kan me kak tehrsang uduk ni tih, “kamwan kan” me kin wiawi ni lokaia kamedek pahn kak pil tehrasang wahu en aramas emen. Dahme ntingihdi nan Kolose 3:8 kin wie mehn kangoang ong kitail en “mweisang soahng pwukat koaros: iei lingeringer, ineng suwed oh kailok. Lokaiahn kailok de samin en dehr pwilisang nan awamwail kan.” Oh Lepin Padahk 10:19 mahsanih: “Me kin lokaia tohto kin kalaudehla dipe. Ma ke me loalokong, eri, ke pahn nennenla.” Ma emen pahn kauwe iuk, ken kanengamahiong, oh ‘kihong pali teio pwe en pil pohr,’ oh mwein ehu ahnsou tohrohr, ke kak koasoiong ih kelepw ni meleilei oh popohl.​—Madiu 5:39; Lepin Padahk 15:1.

13. Iaduwen me pwulopwul kan kak ahneki madamadau toupahrek ong dipwisou kan en sampah?

¹³ Pil ehu ahl en kasalehda “ehu soahngen ngehn tohrohr” iei en ahneki madamadau pwung oh pahrek ong kepwe en sampah. Ni mehlel, kitail men ahneki kepwe kaselel kan. Sises Krais ahneki ehu likou kaselel. (Sohn 19:23, 24) Ahpw e sansal me ngehnen sampah powehiukedi ma ahmw men ahneki kepwe tohto kin wiahla mehkot me keieu kesempwal nan ahmw mour oh ma ke kin ahnsou koaros peki rehn ahmw pahpa oh nohno kan en pwainda mehkot me re sohte kak pwainda. Paipel mahsanih: “Pwe mepwukat koaros kisehn sampah​—dipen ineng en uduk, oh mehkan me aramas kin kilang oh ahnehda, oh mehkoaros me mi nin sampah me aramas kin pohnmwahsohkihda—​mepwukat koaros sohte kohsang rehn Sahm, re kohsang nin sampah.” Ei, menlau dehr mweidong ngehnen sampah me kin pid noahrok kepwehn sampah kan en poweiukedi! Nantihong itarki dahme ke ahnekier oh nainekier.​—1 Sohn 2:16; 1 Timoty 6:8-10.

14. (a) Iaduwen sapwellimen Koht aramas akan ni mwehin Aiseia kasansalehda ahr sohte kin toupahrek ong mehkan me kin pid mehn kamweit? (b) Soangen keper dah kei me ekei Kristian pwulopwul kan lelohng nan wasahn sakau kan oh kamadipw kan me sakanakan?

¹⁴ Oh pil, e kesempwal en koasoanehdi atail ahnsou ong mwadong kan oh mehn kamweit kan pwehn toupahrek. Soukohp Aiseia kohpadahr: “Meid suwediong kumwail! Kumwail kin pirida ni menseng oh tapihada nim sakau, oh kin sakasakau lel ni pwong. Kumwail kin kesekesengki arp oh dampwurin oh keseng pepeuk, oh niminim wain ni amwail kamadipw kan. Ahpw kumwail sohte wehwehki dahme Kauno [“Siohwa,” NW] ketin wiewia.” (Aiseia 5:11, 12) E inenen kansensuwed pwe ekei irail Kristian pwulopwul kan pil kin iang ahnsou me aramas me kin wie soangen tiahk suwed duwehte me ntingihdi nan Aiseia 5:11, 12 kin tuhpene. Ni ahnsou me ekei pwulopwul kan me iang Sounkadehdehn Siohwa kin kawehwehda duwen dahme kin wiawi nan wasa kan me pwulopwul kan kin tuhpene, emen sister pwulopwul koasoia me: “Pei kin kalap wiawi. I pil kin iang pei.” Emen brother pwulopwul pil kapataiong oh wehkada: “Re kin sakau, simoak, oh wia tiahk suwed teikan.” Pil emen brother pwulopwul wehkada: “Aramas kin sakaula. Irail kin mwomwen pweipwei! Oh re pil kin doadoahngki wini suwed. Tiahk suwed kan kin wiawi. Ma ke pahn kohla wasao oh lemeleme me ke sohte pahn iang pidada wiewia suwed pwukat, eri, ke sapwung.” Eri, sang ni kahrepe mwahu me Paipel kin koasoiahki me kamadipw mwahl pwukat kin wia ehu kisehn “doadoahk en uduk.”​—Kalesia 5:19-21; Byington; Rom 13:13.

15. Kaweid dah me Paipel kin kihda me kin pid ahneki madamadau toupahrek ong mehn kamweit?

¹⁵ Ma ke pahn liksang mehn kamweit keper kan, met sohte pahn wehwehki me ahmw mour pahn kapwang. Kitail kin kaudokiong “Koht peren men” me kin kupwurki me pwulopwul kan en perenki ahr wie pwulopwulte! (1 Timoty 1:11; Eklesiasdes 11:9) Ahpw Paipel kin kihda kaweid wet: “Ih me kin mourenki [“kamweit,” Lamsa] kamadipw, wain, oh kisin tungoal kaselel kan pahn kahrehong pein ih en samwemwehla.” (Lepin Padahk 21:17) Ei, ma mehn kamweit pahn keieu nan ahmw mour, ke pahn dupekla ni pali ngehn. Eri, idawehn kaweid kan en Paipel ni ahmw pahn wia pilipil kan ong mehn kamweit. Mie ahl tohto en kakehleiukada oh sohte pahn kaluwetalaiukala.c​—Eklesiasdes 11:10.

16. Iaduwen Kristian pwulopwul kan kak kasalehda me re weksang meteikan?

¹⁶ Ma ke pahn doadoahngki likou konehng kan oh soikeweisang uhk sidail en sampah wet, met pahn kahrehong uhk en pil weksang sampah wet. (Rom 12:2; 1 Timoty 2:9) Oh pil, ken pilada mwahu mehnia koul kan ke kin rongorong. (Pilipai 4:8, 9) Emen Kristian pwulopwul wehkada, “I naineki soangen koul kan me I wehwehki me I anahne en kesehla, ahpw koul pwukat kin inenen ngihlamwahu!” Emen pwutak pwulopwul pil wehkada: “Ong ngehi, koul me ahi luwet, pwehki I kin inenen perenki rong koul kan. Ma I pahn diarada koul ehu me suwed, de ahi pahpa oh nohno padahkiong ie duwen suwed kan en koulo, I kin anahne nantihong powehdi ahi mohngiong pwe nan mohngiongi I kin perenki koulo.” Kumwail me pwulopwul kan: dehr pohnsehsehla “eh [ahn Sehdan] koasoandi kan”! (2 Korint 2:11) Sehdan kin doadoahngki koul en sampah kan pwehn kahrehong Kristian pwulopwul kan en sohpeiweisang Siohwa! Mie artikel kan me kin pwarada nan makasihn kan me Watch Tower Society ntingda me kin pid duwen rap, heavy metal, oh koul en rock.d Ahpw, makisihn pwukat sohte kak koasoia duwen soangsoangen sidail kapw en koul kan koaros me kin kohda. Eri, pein emen emen kitail anahne doadoahngki “atail loalokong” oh iangahki atail koahiek en “dehdehki” pwehn pilada mehnia koul kan kin mwahu oh mehnia koul kan kin suwed ong kitail en rong.​—Lepin Padahk 2:11.

17. (a) Ia wehwehn lepin lokaia por·neiʹa, oh met kin pidada wiewia dah kan? (b) Ia kupwuren Koht me kin pid tiahk kan?

¹⁷ Ni kaimwisekla, ke anahne en tiahk mwakelekel. Paipel kin kangoange kitail: “Eri, kumwail kadohwaneweisang kumwail tiahk en nenek.” (1 Korint 6:18) Lepin lokaiahn Krihk ong dipen nenek, por·neiʹa, kin wehwehki wiewia suwed kan me kin pid doadoahngki dipwisou en kaparapar likin pwopwoud. Met pahn iangahki doadoahngki ewe oh doakeseli nein emen dipwisoun kaparapar kan. Ekei Kristian pwulopwul kan kin iang wia tiahk suwed pwukat, oh re kin medemedewe me met kaidehn dipen nenek. Ahpw ni sansal sapwellimen Koht Mahsen mahsanih met: “Eri, iet kupwuren Koht ong kumwail: e ketin kupwurki kumwail en sarawihla oh uhdahn mweisang douluhl tiahk samin kan. Emenemen kumwail ohl akan en uhdahn ese duwen eh pahn pwoudikihda lih emen nin duwen mwohmw ehu me sarawi oh wahu.”​—1 Deselonika 4:3, 4.

18. (a) Iaduwen pwulopwul men kak liksang saminkihla ngehnen sampah wet? (b) Dahme kitail pahn koasoiada nan artikel en mwuhr?

¹⁸ Ei, ki sapwellimen Siohwa sawas, ke kak irehiukasang ngehnen sampah wet! (1 Piter 5:10) Sehdan kin kalap wekwekid pwe ah lidip keper kan en mwomwen mehkot mwahu oh met anahne emen en pehmtik pwehn kehnda keper kan me pahn leledo. Artikel en mwuhr pahn sewese me pwulopwul kan en kaiahneda arail kehlen pilada dahme mwahu.

[Nting tikitik me mi pahs]

Peidek kan ong Kousapahl

◻ Ia wehwehn “ngehnen sampah,” oh iaduwen ngehnen sampah kin ahneki “manaman” pohn aramas akan?

◻ Ia ekei kasalepen ngehnen sampah me sansal nanpwungen me pwulopwul kan rahnpwukat?

◻ Iaduwen Kristian pwulopwul kan kin kasalehda “ehu soahngen ngehn tohrohr” me kin pid ahr lokaia kan oh mehn kamweit kan?

◻ Iaduwen Kristian pwulopwul kan kasalehda “ehu soangen ngehn tohrohr” me kin pid tiahk oh koul?

[Kilel nan Pali 17]

Me pwulopwul tohto kin kasalehda sang arail tiahk kan me re kin mih pahn “manaman” en ngehnen sampah

[Kilel nan Pali 18]

Ken pilada koul mwahu kan

[Kilel nan Pali 19]

Emen anahne en eimah ma e men soikeweisang ngehnen sampah