Kitail En Dehr Kesehla Atail Pwoson Oh Lekdekla!
“Eri, kaidehk kitail soangen aramas me kin kesehla ar pwoson, re ahpw kin lekdekla.”—IPRU 10:39, New World Translation.
1. Ia ekei irair kan me kahrehong wahnpoaron Piter en salohda?
WAHNPOARON KAN inenen pwuriamweila ni ahnsou me ahr Soumas kompoak, Sises, padahkiong irail me re pahn tangpeseng oh kesehla Sises. Pwehki met iei ahnsou me Sises anahne sawas sang rehrail—iaduwen met kak wiawi? Piter ngidingidki koasoia met: “Maing, mehnda ma koaruhsie pahn keseikomwihla, a ngehite soh.” Ni mehlel, Piter emen ohl me eimah oh kommwad. Ahpw ni ahnsou me Sudas pangala Sises oh Sises ketin selidi, wahnpoaron ko—iangahki Piter—tangpeseng. Mwurin met, nan imwin Samworo Lapalap, Kaiapas, tohn mwoalen kopwung lapalapo koaros song en rapahki sapwung kan en Sises, ahpw ni ahnsowohte, Piter pwunopwunodki met oh mihmihseli nan kehlen imwin Samworo Lapalapo. Pwongo inenen kopou oh Piter ahpw tepida masakada me Sises pahn pwoula iangahki irail me kin utungada Sises. Ni ahnsou me ekei me kesikesihnen wasao kasawihada me Piter me emen iengen Sises ko, Piter ahpw salohkihda. Pak siluh Piter kahmahmkihla me ih iengen Sises. Piter pil kahmahmkihla me e ese Sises!—Mark 14:27-31, 66-72.
2. (a) Dahme kahrehda ni ahnsou me Piter salohda ni pwong me aramas selidi Sises sohte wehwehki me Piter wiahla “soangen aramas me kin kesehla arail pwoson oh lekdekla”? (b) Dahme kitail anahne akadeiong?
2 Met ehu ahnsou kansensuwed laud nan mouren Piter, ahnsou ehu me, ni mehlel, e koluhkihla oh ele irair wet mihmi nan kapehde erein ah mour. Ahpw irair me Piter lelohng pwongo, e wia kadehde ieu me ih aramas masepwehk men? Met kin wehwehki me e wie “soangen” aramas me wahnpoaron Pohl kawehwehda ni ahnsou me e ntingihdi met: “Kaidehk kitail soangen aramas kan me kin kesehla ar pwoson, re ahpw kin lekdekla?” (Ipru 10:39, NW) Pali moron en kitail pahn pwungki me mahsen kan en Pohl sohte pahn pidada Piter. Dahme kahrehda? Pwehki Piter salohda ni ahnsoukiste nan eh mour, ahpw, pali laud en eh mour e kin kasalehda eimah oh pwoson kehlail. Duwehte pali laud en kitail, kitail kak tamanda ekei pak mahso me kitail lelohng kahpwal ehu oh pwuriamwekihla oh uhd salohda oh masepwehkada, mwein kitail sohte ni eimah kesihnenda teng ong padahk mehlel ni uwen me kitail kak. (Pil kilang Rom 7:21-23.) Kitail kak kamehlele me soangen kisin ahnsou pwukat sohte kin wehwehki me kitail wiahla soangen aramas me kin kesehla ahr pwoson oh lekdekla. Ahpw, kitail anahne nantihong en dehr wiahla soangen aramas pwukat. Pwekihda? Oh iaduwen kitail kak liksang en dehr wiahla soangen aramas pwukat?
Ia Wehwehn Kesehla Ahr Pwoson oh Lekdekla
3. Iaduwen soukohp Elaisa oh Sona masepwehkada?
3 Ni ahnsou me Pohl ntingihdi duwen “soangen aramas me kin kesehla ahr pwoson,” met sohte kin wehwehki ong irail aramas akan me kin ahnsoukiste sohte kasalehda eimah. Pohl uhdahn wehwehki dahme Piter lelohng oh pil duwen wiewia en aramas teikan me duwehte met. Elaisa, emen soukohp me kin eimah, masepwehkada ehu ahnsou oh tangasang Nanmwarki Lih Sesepel pwehki e men kemehla Elaisa. (1 Nanmwarki 19:1-4) Mie ehu ahnsou me soukohp Sona kin uhdahn masepwehkada. Siohwa padahkiong ih en seiloaklahng kahnimw suwed Ninipe. Sona mwadangete douda pohn sohp ehu me pahn kohla Tarshish—mwail 2,200 dohsang Ninipe! (Sona 1:1-3) Ahpw, soukohp lelepek pwukat oh pil wahnpoaron Piter kaidehn soangen aramas me kin kesehla arail pwoson oh lekdekla. Pwekihda?
4, 5. (a) Iaduwen Ipru irelaud 10 kak sewese kitail en wehwehki ia wehwehn ahn Pohl koasoi ni ahnsou me e doadoahngki lepin lokaia wet “lekdekla” nan Ipru 10:39? (b) Ia wehwehn sapwellimen Pohl mahsen: “Eri, kaidehk kitail soahngen aramas kan me kin kesehla ahr pwoson, re ahpw kin lekdekla”?
4 Tehk duwen lepin lokaia kan koaros me Pohl doadoahngki: “Kaidehk kitail soangen aramas akan me kin kesehla ar pwoson, re ahpw kin lekdekla.” Ia wehwehn lepin lokaia wet “lekdekla”? Lepin lokaia me e doadoahngki, ni lokaiahn Krihk, kin wehwehki mehla soutuk. Kawehwehn lepin lokaia wet kin konehng oh pwung ong iren Paipel wet me kin mihmi nan irelaud wet. Pohl ahpwtehn wia mahsen en kaweid wet: “Pwe ma kitail pahn nsenkihte wiewia dihp, mwurin atail marainkilahr padahk mehlel kan, solahr meirong ehu me pahn kak kamwakelehsang kitail nan dihp. Ihte, kitail en kasikasik ni masak Kadeiko oh angin kisiniei me pahn kamwomwala irail kan me kin pelianda Koht.”—Ipru 10:26, 27.
5 Eri, ni ahnsou me Pohl padahkiong ienge me pwoson akan oh mahsanih: “kaidehk kitail soangen aramas akan me kin kesehla ahr pwoson, re ahpw kin lekdekla,” e wehwehki me ih oh ienge Kristian lelepek kan koasonehdier me re sohte pahn sohpeiweisang Siohwa oh uhdi sang ahr kin papah Siohwa. Ma emen pahn sohpeiweisang Siohwa, e pahn lelohng mehla soutuk. Sudas Iskariot iei emen me kesehla ah pwoson oh lekdekla, duwehte imwintihti kan en padahk mehlel me kin nsenkihda uhwong sapwellimen Siohwa ngehn sarawi. (Sohn 17:12; 2 Deselonika 2:3) Soangen aramas pwukat iei irail me “masepwehk kan” me kin lelohng kasohrala nan lehn kisiniei ni karasaras. (Kaudiahl 21:8) Soh, kitail sohte men wiahla soangen aramas pwukat!
6. Dahme Sehdan men kilang kitail en wia?
6 Sehdan me Tepil men kitail en kesehla atail pwoson oh lekdekla. Ih emen me kin samanih wia “widing suwed kan,” oh e ese me wiewia suwed pwukat kin tepkihda mehkot tikitik. (Episos 6:11, footnote) Ma kalokolok sohte kin pweida, e kin nantihong song en kaluwetala pwoson en Kristian mehlel akan ni ahl me sohte sansal. E men kilang Sounkadehdehn Siohwa kan me kin eimah oh ngoangki arail doadoahk en sohlahr papah Siohwa. Kitail pahn kilang soahngen mehn widing dah kei e doadoahngkier ong mehn Ipru Kristian akan me Pohl ntingwong irail kisinlikou.
Kasongosong Dah Kei me Kristian akan Lelohng Pwehn Kasonge Irail en Kesehla Ahr Pwoson kan
7. (a) Dahme wiawiong mwomwohdiso me mihmi nan Serusalem? (b) Oh ia irairen pali ngehn en irail Kristian akan me wadekehr kisinlikou en Pohl?
7 Mehn kadehde kan kin kasansalehda me Pohl ntingihdi nah kisinlikou ong mehn Ipru kan mpen pahr 61 C.E. Mwomwohdiso me mih nan Serusalem kin lelohng kahpwal laud erein arail miehla. Mwurin pwoulahn Sises, kalokolok laud kan kin tepida wiawi, oh met kahrehong Kristian tohto nan kahnimwo en tangpeseng. Ahpw mie ahnsoun popohl me wiawi ahnsoukiste, oh met kin kahrehong Kristian akan en tohtohla. (Wiewia 8:4; 9:31) Erein sounpar kan me dower powe, kalokolok kan oh kahpwal akan kin wiawi ekei pak. Ni ahnsou me Pohl ntingihwong mehn Ipru kan nah kisinlikowo, tohnmwomwodiso pwurehng paiekihda ahnsoun popohl ehu. Ahpw, mie kasongosong teikan me kin wiawi. Mpen sounpar silisek dower powe, Sises kohpadahr duwen ohlahn Serusalem. Sansal me mie ekei me kin lemeleme me imwio nohn pwand en leledo oh sohte pahn kohdo nan ahr ahnsou. Meteikan, keieu irail akan me kapw nan pwoson, saikinte lelohng kalokolok laud oh irail sohte nohn wehwehki duwen anahnpen irairen dadaur pahn kasongosong kan. (Ipru 12:4) Sehdan kin nantihong doadoahngki ahnsou pwukat. Mehnia “widing suwed kan” e kin doadoangki?
8. Ia madamadau en irail mehn Suhs tohto ong mwomwohdisohn Kristian kapw wet?
8 Mehn Suhs akan me mih nan Serusalem oh Sudea kin kailongki mwomwohdisohn Kristian kapw wet. Ni ahnsou me kitail kin tehk audepen nein Pohl kisinlikou, e kin sansal ong kitail duwen dahme kaun en pelien lamalam aklapalap akan en mehn Suhs kin kauwehki irail Kristian akan. Ele mwein, re kin nda met: ‘Tehnpas Sarawi lapalap miehr reht nan Serusalem, oh e mihmihkier pahr epwiki kei! Se ahnekier samworo lapalap men me kin wia eh pwukoah nan Tehnpas Sarawio iangahki samworo kan me kin sewese ih. Meirong kan kin wiawi rahn koaros. Se ahnekier Kosonnedo, me tohnleng kan kihong Moses oh me kilel kapwuriamwei kan kin wiawi pohn Nahna Sainai. Pwihn kapw wet, Kristian pwukat, me kin uhwong padahk kan en Mehn Suhs akan, sohte kin ahneki mehpwukat duwehte kiht!’ Kauwe wet kin pweida? Eri, ekei mehn Ipru Kristian akan kin nsensuwedki kauwe pwukat. Ihme, nein Pohl kisinlikoun mahsen en kaweid kan kin kasain mwahu ahnsoun kihong irail sawas me re anahne.
Dahme Kahrehda E Sohte Konehng en Kesehla Atail Pwoson oh Lekdekla
9. (a) Oaralap dahieu mihmi nan sapwellimen Pohl kisinlikou ong mehn Ipru kan? (b) Ni ahl dahieu Kristian akan kin papah nan Tehnpas Sarawio me mwahusang Tehnpas Sarawio me mihmi nan Serusalem?
9 Kitail en kasawiahda kahrepe riau me Pohl kihong rie kan nan Sudia ren dehr kesehla ahr pwoson oh lekdekla. Keieu—mouren ileilahn koasoandi en kaudok en Kristian—kin mihmi nan kisinlikou ong mehn Ipru kan. Pohl wiahda oaralap wet nan sapwellime kisinlikou. Tehnpas Sarawio nan Serusalem kin mwete mehkot me pahn lapalapasang oh lingansang, iei Sapwellimen Siohwa Tehnpas Sarawi ni pali ngehn, ihmw wet “sohte wiawihkihda pehn aramas.” (Ipru 9:11) Kristian pwukat ahneki pwais kaselel ehu en papah nan koasoandi ni pali ngehn ong kaudok min. Re kin papah pahn kosonned ehu me mwahusang, oh ahneki Sounkadokepe laudsang Moses, iei Sises Krais.—Seremaia 31:31-34.
10, 11. (a) Dahme kahrehda ire mehlelo me Sises sohte kohsang peneinei en Aaron sohte irehdi ih en wiahla Samworo Lapalap en Tehnpas Sarawi en pali ngehn? (b) Ni ahl dah kei me Sises wiahla Samworo Lapalap me ileilesang irail samworo lapalap kan me kin papah nan Tehnpas Sarawi nan Serusalem?
10 Kristian pwuko pil ahnekier Samworo Lapalap me mwahusang me iei Sises Krais. E sohte kohsang peneinei en Aaron. Ahpw, e wiahla Samworo Lapalap men “nin duwen koasoandien samworo Melkisedek.” (Melkahka 110:4) Peneinei en Melkisedek sohte kilelehdi, ahpw e wia nanmwarki men oh samworo lapalap men en Salem en mahs. Ihme Melkisedek kin mwete Sises, pwe e wiahla emen samworo me sohte kin pid kadaudok en aramas soh-unsek kan, ahpw ong mehkot mwahu sang—sapwellimen Siohwa Koht inou. Duwehte Melkisedek, Sises kin papah kaidehn ihte nin duwen Samworo Lapalap men ahpw pil nin duwen Nanmwarki men me sohte pahn kak pwoula.—Ipru 7:11-21.
11 Eri, Sises sohte duwehte samworo lapalap teikan nan Tehnpas Sarawi en Serusalem, pwe Sises sohte anahne wia meirong kan ehu ehu pahr. Meirong me Sises wia, iei pein eh mour unsek me e ketin meirongkihlahr pahn mehpak. (Ipru 7:27) Meirong kan koaros me kin wiawi nan Tehnpaso kin mwete dahme Sises Krais kihda. Meirong tomw unsek en Sises kin wia mahkpen dipen aramas koaros me kin pwoson. Dahme Pohl koasoia kin kasalehda limpoak, ni ahnsou me e koasoia duwen Samworo Lapalap menet me iei Sises, oh Sises sohte wukwukseli, e duwehte mahs ni ahnsou me Kristian akan nan Serusalem kin ese ih. Ih emen me aktikitik, kadek, oh emen me kin “pehmada atail tungoal luwet akan.” (Ipru 4:15; 13:8) Irail Kristian keidi kan ahneki koapworopwor en wiahla samworo kan me pahn papah pahn kaundahn Krais! Iaduwen irail pahn kak medemedewe duwen kesehla ahr pwoson oh “pwuralahng pahn manaman en ngehn samin oh luwet akan” en pelian lamalam suwed en mehn Suhs akan?—Kalesia 4:9.
12, 13. (a) Nin duwen me Pohl kin kihda, ia kahrepe keriau me kitail en dehr kesehla atail pwoson? (b) Dahme kahrehda arail dadaurete mahs pahn kak kangoange irail mehn Ipru Kristian akan en dehr kesehla ahr pwoson oh lekdekla?
12 Met kahrepe itar ong irail en dehr kesehla ahr pwoson, ahpw Pohl kihong irail kahrepe keriau—pein ahr mehn kahlemeng mwahu en dadaurete. E ntingihdi: “Kumwail tamanda duwen kumwail mahso. Ni ahnsowo, mwurin marain en Koht eh dakerkumwaildahr, apwal tohto lelohng kumwail, ahpw kumwail sohte lohdiong.” Pohl katamankinirail me re kin lelohng kalokolok kan duwehte “nan wasahn mwadong ehu.” Ekei me selidi; oh ekei kin utungada irail pwukat me selidi. Ei, re kin wia mehn kalemeng mwahu pwe irail kin kasalehda pwoson oh dadaurete pahn kalokolok kan. (Ipru 10:32-34) Ahpw dahme kahrehda Pohl kin idek rehrail en “tamanda” apwal tohto me re kin lelohng? Met soh pahn kansensuwedihala irail?
13 Soh, pwe “tamanda duwen dahme wiawi mahs” pahn sewese mehn Ipru kan ong iaduwen Siohwa sewese irail pahn kasongosong kan. Ki sapwellime sawas, irail kin uhwong widing kan en Sehdan. Pohl ntingihdi: “Koht me uhdahn pwung; e sohte pahn ketin meliehla amwail wiewia kan de amwail limpoak ong ih ni sawas me kumwail kasalehdahr oh pil kin kasalehiong riamwail Kristian kan.” (Ipru 6:10, NW) Ei, Siohwa kin tamanda arail wiewia lelepek kan. Kitail kin ale kataman ehu me kin pid duwen kaweid en Sises en nekidala pai en nanleng. Aramas lipirap akan sohte kak pirapasang soangen pai pwukat; mer oh loangenmwet sohte kak kauwehla. (Madiu 6:19-21) Ni mehlel, pai pwukat pahn kak ohla, ihte ma emen Kristian pahn kesehla ah pwoson. Met pahn kesehla pai kan koaros me e nekidala nanleng. Kahrepe kehlail ehu me Pohl kihong Mehn Ipru Kristian akan en dehr kekeid nan soangen ahl wet! Ia katepen kesehla doadoahk lelepek me irail kin wia ni erein sounpar tohto? E pahn konehng en dadaurete.
Dahme Kahrehda Kitail en Dehr Kesehla Atail Pwoson oh Lekdekla
14. Ia ekei kahpwal akan me kitail kin lelohng me duwehte dahme irail Kristian akan nan tepin senturi kin lelohng nan arail ahnsou?
14 Kristian akan nan rahnpwukat pil kin ahneki kahrepe mwahu kan en dehr kesehla arail pwoson. Keieu, kitail en tamanda me kitail ahneki pai kaselel en kaudok min me Siohwa ketkihong kitail. Duwehte irail Kristian akan nan tepin senturi, tohn mwomwohdiso kan en pelien lamalam ndand kan nan atail ahnsou pil kin kauwe oh kapailoke kitail, oh re kin suweiki ihmw sarawi laud oh kaselel kan oh me arail tiahk tepida sangete mahs mahsie. Ahpw, Siohwa kin kamehlelehong kitail me e kin ketin kupwurki atail kaudok ong ih. Ni mehlel, kitail kin paiekihda kapai kan nan rahnpwukat me irail Kristian akan nan tepin senturi sohte ahneki. Ele mwein ke kin wahpwonki peidek wet, ‘Iaduwen met kak wiawi?’ Pwe irail momour ni ahnsou me Tehnpas Sarawi en pali ngehn tepida. Krais wiahla Samworo Lapalap en Tehnpas Sarawi en pali ngehn ni ahnsou me e papidais nan pahr 29 C.E. Ekei aramas pein kilangada manaman kan me sapwellimen Koht Ohl wiahda. Pil, mwurin Sises pwoula, mie manaman kan me wiawi. Ahpw nin duwen me kokohpehr, kisakis pwukat solahr wiawi.—1 Korint 13:8.
15. Kristian mehlel akan nan rahnpwukat kin momour ni ahnsoun pweidahn kokohp dahieu, oh ia wehwehn met ong kitail?
15 Ahpw kitail kin mihmi nan ahnsou me kokohp me pid Tehnpas Sarawio nan pwuhken Esekiel irelaud 40-48 kin wie pweipweida.a Eri, kitail kilangehr kapwurpwurdohn koasoandi en Koht ong kaudok min. Tehnpas sarawio en pali ngehn kamwakeldahr sang soangen kaudok samin koaros oh dikedik en eni. (Esekiel 43:9; Malakai 3:1-5) Medemedewe kapai kan me kitail kin ale sang kamwakel wet.
16. Dahme wiawi nan tepin senturi me sohte wia mehkot kaperen ong Kristian akan ni ahnsowo?
16 Nan tepin senturi, ong irail pwihn en mwomwohdiso en Kristian, mwomwen dahme pahn wiawi ni ahnsou kohkohdo pahn sohte mwahu. Sises kohpadaier me e pahn rasehng aramas men me kamwerediong kisin war wihd nan eh mwaht, ahpw weren dihpw suwed kei pil pwarada, oh met kahrehong apwal en kilang wekpeseng en wihd kan oh dihpw suwed kan. (Madiu 13:24-30) Oh kokohp wet pweidaher. Ni imwin keieun senturi, ni ahnsou me wahnpoaron mah Sohn kin kerempwahla soahng wet en dehr wiawi, irail me kin lahlahwe pwoson mehlel wie kehlailla. (2 Deselonika 2:6; 1 Sohn 2:18) Mwurinte pwoulahn wahnpoaron kan, pwihn en kaun en lamalam tohrohr ehu miehla, oh irail kin lemei oh mwahuki doadoahngki likou kan me pahn katohrohr irail sang tohnmwomwohdiso kan. Irail kan me kin lahlahwe padahk mehlel kin tohtohla rasehng soumwahu lusulus. Ia uwen kansensuwed ong irail Kristian lelepek kan! Re kilangada koasoandi kapw en kaudok min uhd saminla. Met wiawi mwadang sang sounpar epwiki mwurin Krais tepida kauwada mwomwohdiso.
17. Ni ahl dahieu mwomwohdisohn Kristian akan nan rahnpwukat kin werei sang mwomwohdisohn Kristian akan nan mwehin wahnpoaron ko?
17 Ahpw, kitail pahn kilang wukpeseng en arail ahnsou oh atail ahnsou. Nan rahnpwukat, kaudok min mihmihkiher ahnsou werei sang ni ahnsoun wahnpoaron kan lao irail pwoulahr. Sang ni ahnsou keieun makisihn wet wiawihda nan pahr 1879, Siohwa ketin kapaiada kitail nan kaudok min wet. Siohwa oh Krais Sises pedolongehr nan Tehnpas Sarawi en pali ngehn nan pahr 1918 pwehn kamwakelehda Tehnpas Sarawio. (Malakai 3:1-5) Sang nan pahr 1919, koasoandi ong kaudokiong Siohwa Koht kin kekeirada oh pwungla. Atail kin wehwehkihla kokohp kan oh padahk kan en Paipel kin wie mwamwahula. (Lepin Padahk 4:18) Kaping pahn kohwong ihs? Kaidehn ong aramas sohunsek kan. Kaping konehng en kohwong Siohwa kelepw, iangahki Sapwellime Ohl me Tapwin mwomwohdiso, oh ihte ira pahn kak perehla sapwellimen Siohwa aramas akan sang padahk likamw akan nan ahnsou suwed pwukat. Eri, kitail en dehr manokehla en kasalehda atail kalahngan ong Siohwa pwe e kin ketin mweidong kitail en iang kaudok min. Oh kitail en koasoanehdi loalatail en dehr kesehla atail pwoson oh lekdekla!
18. Kahrepe dahieu kitail ahneki en dehr kesehla atail pwoson oh lekdekla?
18 Duwehte irail mehn Ipru Kristian akan, kitail pil ahneki kahrepe keriau en dehr wiahla soangen aramas me kin masepwehk oh kesehla atail pwoson iei pein atail mehn kahlemeng mwahu en dadaur. Mendahki kitail ahpwtehn tepida papah Siohwa erein sounpahr keite de ni lelepek erein sounpar tohto, kitail koaros kin wiahda mehn kahlemeng mwahu ong wiewiahn Kristian kan. Tohto rehtail me kin dadaur pahn kalokolok, selidiher, koperment kan me irehdi kitail en dehr wia atail doadoahk en kalohk, kamakam, de aramas me kin kihsang sapwatail kan. Tohto rehtail me kin lelohng kalokolok sang tohn arail peneinei kan, aramas kin mwamwahleki irail, kapailoke irail, oh aramas akan me kin soukautih ong irail. Kitail koaros kin dadaurete, pousehlahte atail papah Siohwa ni lelepek mendahki kahpwal akan en mour oh kasongosong kan. Sang ni atail kin wia met, kitail kin wiahda mehn kahlemeng mwahu en dadaurete, oh met Siohwa sohte pahn kak likidmeliela, ma kitail ngoangki kepwehpwehkihla paien nanleng. Ni mehlel, met kaidehn ahnsou en kesehla atail pwoson oh pwuralahng koasoandi suwed mering wet me kitail kesehlahr! Ia kahrepe kitail en kesehla atail doadoahk laud kan? Keieu nan atail ahnsou, pwe “ahnsou tehr kis” me luhwe mwohn imwio.—Ipru 10:37.
19. Dahme kitail pahn sukuhliki nan artikel en mwuhr?
19 Ei, kitail en koasoanehdi loalatail me kitail sohte pahn “wiahla soahngen aramas me kin kesehla ahr pwoson oh lekdekla”! Ahpw, kitail en “wiahla soangen aramas me ahneki pwoson.” (Ipru 10:39, NW) Iaduwen kitail kak ese ma kitail kin wiahla soahngen aramas duwehte met, oh iaduwen kitail kak sewese iengatail Kristian akan en pil wia met? Artikel en mwuhr pahn koasoia duwen met.
[Nting tikitik me mi pah]
a Pil kilang The Watchtower [lokaiahn wai] en March 1, 1999, pali 8-23.
Komw kin Tamanda?
◻ Ia wehwehn kesehla pwoson oh lekdekla?
◻ Kasongosong dah kei me mehn Ipru Kristian akan kin lelohng ni ahnsou me Pohl ntingwong irail?
◻ Ia ekei kahrepe kan me Pohl padahkiong mehn Ipru en dehr kesehla ahr pwoson oh lekdekla?
◻ Ia ekei kahrepe kan kitail kin ahneki pwehn sewese kitail en koasoanehdi loalatail en dehr kesehla atail pwoson oh lekdekla?
[Kilel nan Pali 23]
Ni ahnsou me Piter salohda ahnsoukiste, met sohte kin wehwehki me ih “soangen aramas me kesehlahr eh pwoson oh pahn lekdekla”