Kitail En Wiahla Soahngen Aramas Me Kin Pwoson

“Kitail en . . . wiahla soangen aramas me kin pwoson oh aleier komourpatail.”​—IPRU 10:39, New World Translation.

1. Dahme kahrehda kitail kak nda me pwoson en pein emenemen sapwellimen Siohwa ladu lelepek kan me kesempwal?

EHU rahn ni ahnsou me ke mihmi nan Kingdom Hall me direhki aramas akan me kin kaudokiong Siohwa, uhdi mahs oh kilangseli oh tehk irail akan me mihmi limwahmw. Medemedewe duwen ahl tohto me re kin kasalehda ahr pwoson. Ele mwein ke kin kilang irail me mah kan me kin papah Koht erein sounpar tohto, pwulopwul kan me kin tengeteng nan pwoson ehu ehu rahn pahn kasongosong kan me kin kohsang iengarail tohnsukuhl akan, oh pahpa oh nohno kan me kin doadoahk laud en kakairada neirail seri kan en lemmwiki Koht. Pil mie elder kan oh ministerial servant kan nan mwomwohdiso me kin ahneki pwukoah tohto. Ei, ele ke kin kilang irail brother oh sister kan ni pali ngehn oh sohte lipilipil sounpar depe irail, ahpw irail kin powehdi soangen kahpwal kan koaros pwehn papah Siohwa. Ia uwen kesempwal pwoson en emen emen irail koaros!​—1 Piter 1:7.

2. Dahme kahrehda kaweid en Pohl nan Ipru irelaud 10 oh 11 kin pwungong kitail nan rahnpwukat?

² Aramas sohunsek malaulau keite me kin wehwehki duwen kesempwalpen pwoson mwahu sang wahnpoaron Pohl. Pwe e kin kamehlele me ma emen ahneki pwoson mehlel, pwoson wet kak kahluwalahng “aramas en aleier komourparail.” (Ipru 10:39, NW) Ahpw Pohl wehwehki me emen me ahneki pwoson wet pahn kak lelohng kahpwal oh luwetala nan sampah seupwoson wet. E kin nsenohkin irail mehn Ipru Kristian akan me kin mihmi nan Serusalem oh Sudia, pwe irail kin apwaliki en kolokolte ahr pwoson. Ni ahnsou me kitail kin wadek ekei iretikitik kan nan pwuhken Ipru irelaud 10 oh 11, tehk duwen wiepen padahk kan en Pohl me e kin doadoahngki en kakehlailda ahr pwoson. Ni ahl wet kitail pahn sukuhliki iaduwen kitail kak kakehlailda pein atail pwoson oh pwoson en meteikan.

Kasalehda me Kitail kin Likih Meteikan

3. Iaduwen sapwellimen Pohl mahsen me dierekda nan Ipru 10:39 kin kasalehda me e kin likih rie brother oh sister kan nan pwoson?

³ Keieu kitail kin tehk duwen lamalam en ehi me Pohl ahneki ong irail kan me kin rong eh padahk. E ntingihdi met: “Kitail kaidehn soangen aramas me kin kesehla ar pwoson, re ahpw kin lekdekla. Pwe kitail soangen aramas me kin aleier komourpatail.” (Ipru 10:39) Pohl kin medemedewe mehkot mwahu kaidehn mehkot suwed duwen ienge Kristian lelepek kan. Menlau tehk me Pohl doadoahngki lepin lokaia wet: “kitail.” Pohl kin wia aramas pwung men. Ahpw, e sohte kin mwamwahleki irail kan me kin rong sapwellime padahk kan, de lemeleme me ih me pwung sang irail koaros. (Pil kilang Eklesiasdes 7:16.) Ni ah koasoi kan, e kin kapatapene ih oh meteikan. E kin kasansalehda sang eh mohngiong me e kin likih me ih oh Kristian lelepek kan me wadek sapwellime kisinlikou pahn lelohng kasongosong laud kan me mihmi mwohrail, ahpw irail koaros pahn ni eimah sohte pahn kesehla arail pwoson oh lekdekla, oh re pahn kasalehda me irail soangen aramas kan me kin ahneki pwoson.

4. Mehnia kahrepe kan me Pohl ahneki me kin sewese ih en likih ienge pwoson akan?

⁴ Iaduwen Pohl kak likih irail? E sohte kak kilang sapwung kan en mehn Ipru Kristian akan? Ei, e wehwehki duwen arail luwet kan, eri ihme e kihda kaweid konehng kan pwehn sewese irail en powehdi ahr luwet akan ni pali ngehn. (Ipru 3:12; 5:12-14; 6:4-6; 10:26, 27; 12:5) Pohl ahneki kahrepe riau me inenen mwahu en likih rie kan. (1) Pohl kin kahlemengih Siohwa, ihme e kin nantihong en kilangwong sapwellimen Koht aramas nin duwen me Siohwa kin kilangwong irail. Met sohte kin pid ahr sapwung kan ahpw ahr irair kaselel kan oh ahr kakong en pilada wiewia mwahu ni ahnsou kohkohdo. (Melkahka 130:3; Episos 5:1) (2) Pohl pil kin pwoson manaman en ngehn sarawi. E ese me sohte mehn kerempwa kan, de luwet en aramas akan pahn kak irehdi Siohwa en ketkihong Kristian akan me kin nantihong papah ih ni lelepek “manaman lapalap.” (2 Korint 4:7; Pilipai 4:13) Eri, ahn Pohl kin likih rie brother oh sister kan kin poahsoanda pohn mehkot tengeteng. E kin poahsoanda pohn iren Paipel kan.

5. Iaduwen kitail kak kahlemengih ahn Pohl kin likih tohnmwomwohdiso kan, oh met kin imwikihla dah?

⁵ Likilik me Pohl kin kasalehda kahrehda meteikan kin mwadangete men kahlemengih ih. Met kin kihda kangoang laud ong tohnmwomwohdiso kan nan Serusalem oh Sudia ni ahnsou me Pohl kin koasoiong irail. Ni ahnsou me mehn Suhs akan kin mwamwahliki oh aklapalap ong irail mehn Ipru Kristian akan, irail mehn Ipru Kristian akan kin kehlailkihda koasoia pwukat oh met kin sewese irail en koasoanehdi nan pein mohngiongarail kan en wiahla soangen aramas me kin pwoson. Kitail kak wia met ong meteikan nan rahnpwukat? E mengei en kilang sapwung tohto en aramas teikan. (Madiu 7:1-5) Ahpw, kitail kak sawaspene ma kitail pahn tehk oh kesempwaliki pwoson me emenemen irail kan koaros kin ahneki. Kangoang wet pahn kak sewese atail pwoson en kehlailda.​—Rom 1:11, 12.

Doadoahngki Mahsen en Koht ni Ahl me Konehng

6. Pohl kin kihsang ia mahsen kan me ntingihdi nan Ipru 10:38?

⁶ Pohl pil kin kakehlailda pwoson en ienge kan sang ni e doadoahngki iren Paipel kan ni koahiek. Karasepe ieu, e ntingihdi met: “‘Nei aramas pwung kan pahn momourki pwoson,’ oh, ‘a ma emen irail pahn kesehla eh pwoson, I sohte pahn kupwurperenki.’” (Ipru 10:38) Dahme Pohl kin koasoia nan iren Paipel wet kin kohsang nan kokohp en Apakuk.a Irail mehn Ipru Kristian akan me kin wadek sapwellimen Pohl kisinlikou ele mwein kin wehwehki mahsen pwukat, pwe re kin esehla pwuhk en kokokp pwukat. Medemedewe duwen dahme Pohl kin akadeiong​—e men kakehle pwoson en Kristian akan me kin kousoan nan Serusalem oh karanih Serusalem mpen pahr 61 C.E.​—mehn kahlemeng mwahu en Apakuk me inenen konehng en doadoahngki. Dahme kahrehda?

7. Iahd Apakuk ntingihdi ah kokohp, oh ia irair kan nan Suda ni ahnsowo?

⁷ Apakuk ntingihdi nah pwuhk, ekis daulih sounpar riesek mwohn ohlahn Serusalem nan pahr 607 B.C.E. Soukohp menet kilangada nan kasansalo mehn Kaldia kan (de, mehn Papilon kan), ehu “wehi lemei oh loallap,” oh irail kalowehdi Suda oh kauwehla Serusalem, oh ni ahnsowohte irail pil kalowehdi aramas akan oh wehi kan. (Apakuk 1:5-11) Ahpw, daulih sounpar epwiki mwowe, ni mwehin Aiseia, kokohp me pid duwen kahpwal wet wiawiehr. Ni mwehin Apakuk, Sehoiakim uhd wiliandi nanmwarki mwahu men, Sosaia, oh me suwed uhd kekeirada nan sapwen Suda. Sehoiakim kin kaloke oh pil kemehla irail akan me kin doadoahngki mwaren Siohwa. (2 Kronikel 36:5; Seremaia 22:17; 26:20-24) Ihme kahrehda soukohp Apakuk likweriong Siohwa: “Maing Kauno [“Siohwa,” NW], ia erein ei kin patohwan liklikweriong komwi oh peksawas?”​—Apakuk 1:2.

8. Dahme kahrehda mehn kahlemeng mwahu en Apakuk pahn kak sewese Kristian akan nan tepin senturi oh pil rahnwet?

⁸ Apakuk sohte ese iahd ohlahn Serusalem pahn wiawi. Duwehte irail Kristian akan nan keieun senturi, irail pil sehse iahd imwin koasoandi en mehn Suhs akan pahn wiawi. Nan atail ahnsou, kitail pil sehse “rahno de awao” me sapwellimen Siohwa kadeik pahn wiawi ong koasoandi suwed wet. (Madiu 24:36) Kitail tehk duwen pasepeng riau me Siohwa ketkihong Apakuk. Keieu, e kamehlelehiong soukohpo me imwio pahn pweida nan sapwellimen Siohwa ahnsou. “E sohte pahn pwand,” Koht mahsanih, mendahki ong aramas akan e mwomwen. (Apakuk 2:3) Keriau, Siohwa katamankin Apakuk: “Me pwung kan pahn momourte pwehki ar loalopwoatohng Koht.” (Apakuk 2:4) Ia uwen kaselel padahk mehlel pwukat! Dahme kin keieu katapan, kaidehn iahd imwio pahn leledo, ahpw ma kitail pahn momourki mour en pwoson.

9. Iaduwen sapwellimen Siohwa ladu peik kan kolokolte ahr lelepek ong Siohwa (a)nan pahr 607 B.C.E.? (b) mwurin pahr 66 C.E.? (c) Dahme kahrehda e kesempwal kitail en kakehle atail pwoson?

⁹ Ni ahnsou me Serusalem ohla nan pahr 607 B.C.E., Seremaia oh nah sekretari Paruk, oh iangahki Epedmelek, oh irail mehn Rekap lelepek kan, irail koaros kilangada mehlel en sapwellimen Siohwa inou ong Apakuk. Re ‘momourte’ pwe re pitsang ohlahn Serusalem. Pwekida? Siohwa kapaiada irail pwehki ahr lelepek ong ih. (Seremaia 35:1-19; 39:15-18; 43:4-7; 45:1-5) Duwehte nan tepin senturi, irail mehn Ipru Kristian akan kin kapwaiada kaweid en Pohl, pwe ni ahnsou me karis en mehn Rom kan mahweniong Serusalem nan pahr 66 C.E. oh ni soh kahrepe sansal ehu re pwurala sang Serusalem, irail Kristian lelepek kan kapwaiada mahsen en Sises oh tangasang kahnimwo. (Luk 21:20, 21) Re momourte pwehki ahr lelepek ong Siohwa. Duwehte kitail, kitail kak momourte ma kitail kin lelepek ni ahnsou me imwi pahn leledo. Met wie kahrepe kesempwal ehu en kakehlail atail pwoson ni ahnsouwet!

Kasansalehda Mehn Kahlemeng Mwahu kan

10. Ia mwomwen en Pohl kin kawehwehda duwen ahn Moses pwoson, oh iaduwen kitail kak kahlemengih Moses?

¹⁰ Pohl pil kin kakehlailda pwoson en aramas akan sang ni e kin koasoia duwen aramas me kin wia mehn kahlemeng mwahu kan. Ni ahnsou me ke pahn wadek pwuhken Ipru irelaud 11, tehk duwen ni ahl dahieu Pohl kin koasoiahki mehn kahlemeng mwahu kan en Paipel. Karasepe ieu, e koasoia duwen Moses me e “wonlahte mwowe nan eh seiloak, likamwete e kilang Koht me soh sansal.” (Ipru 11:27) Met kin kasalehda uwen laud en ahn Moses kin kamehlele Siohwa, likamwete e kin kak kilang Koht me soh sansal. Kitail pil kak ndahki met ong pein kitail? E mengei en koasoi duwen atail nanpwungmwahu rehn Siohwa, ahpw en kakehlail atail nanpwung mwahu rehn Siohwa kin wia doadoahk laud. Oh iei ih soangen doadoahk wet me kitail anahne wia! Kitail kin uhdahn likih Siohwa oh met kin kahrehong kitail en medemedewe duwen ih ni ahnsou me kitail kin wiahda atail pilipil kan nan mour, iangahki atail pilipil kan me sohte nohn kesempwal? Soangen pwoson wet pahn sewese kitail en dadaurete pahn kalokolok kehlail kan.

11, 12. (a) Pahn soangen irair dah kan me kin kasonge Inok? (b) Kating dahieu me Inok aleier me kin kangoange ih laud?

¹¹ Nna, medemedewe duwen pwoson en Inok. Kahpwal me lelohng ih, e pahn apwal ong kitail en wehwehki. Inok anahne pakairkihong aramas suwed akan me kadeik pahn kohwong irail. (Suhd 14, 15) Kalokolok me lelohng ohl lelepek menet me mihmi ni irair en lemei oh suwed, ihme kahrehda Siohwa “kasauwada ih,” oh wahsang ih ni irair en mour oh kohlahng ni irair en mehla mwohn ah imwintihti kan ah kak koledi ih. Eri, Inok sohte kilang pweidahn kokohp me e wiahda. Ahpw, e aleier kisakis ehu me mwahusang.​—Ipru 11:5; Senesis 5:22-24.

¹² Pohl kawehwehda: “Mwohn eh souda sang mour wet, mie ahn Inok mehn kadehde me e kaperenda kupwuren Koht.” (Ipru 11:5, NW) Ia wehwehn met? Mwohn e pwoula, Inok ele kilangada kasansal ehu, me pid duwen ehu rahn me e pahn mourada nan Paradais nin sampah. Ahpw, Siohwa kehsehkin Inok me e kin kupwurki eh lelepek ong Siohwa. Inok kin kaperenda mohngiong en Siohwa. (Pil kilang Lepin Padahk 27:11.) Ahnsou kitail kin medemedewe duwen mouren Inok, met soh kin kamwekidada kitail? Ke men ahneki soangen pwoson duwehte Inok? Eri, doudouloale duwen mehn kahlemeng mwahu en Moses oh Inok; oh kitail en kamehlele me irail uhdahn aramas kei me memour mahs. Kitail en ngoangki momourki pwoson ni ehu ehu rahn. Tamanda, aramas akan me ahneki pwoson sohte kin papah Siohwa pwehki irail kin tehk ahnsou me Koht pahn kapwaiada sapwellime inou kan koaros. Ahpw, kitail kin koasoanehdi nan pein mongiongatail kan en papah Siohwa kohkohlahte! En wia met iei ahl en mour me keieu mwahu nan koasoandi wet oh pil nan koasoandi kapw.

Iaduwen Kitail Kak Kehlailda nan Pwoson

13, 14. (a) Iaduwen mahsen kan en Pohl me ntingihdi nan Ipru 10:24, 25 kin sewese kitail en perenkihda atail mihding kan? (b) Ia kahrepe keieu kesempwal ong iang towehda mihding en Kristian akan?

¹³ Pohl kin padahkiong irail mehn Ipru Kristian akan dahme re kak wia pwehn en kakehlailda ahr pwoson. Kitail en koasoiapene ahl riaute. Kitail eseiehr kaweid nan pwuhken Ipru 10:24, 25, me kin kangoange kitail en kaukaule pokonpene nan mihding en Kristian kan. Ahpw tamanda, kaweid en Pohl, me kin kohsang Siohwa, sohte kin wehwehki me kitail pahn ihte rongorong nan mihding pwukat. Soh, Pohl kin kawehwehda duwen mihding pwukat me iei ahnsou mwahu kan en pehsepene, kangoangepene oh sawaspene en kalaudehla atail kin papah Koht ni unsek. Kitail kin iang towehda mihding kan pwehn kihkihwei kaidehn ihte en ale. Met kin sewese atail mihding kan en wiahla ahnsoun kaperen kan.​—Wiewia 20:35.

¹⁴ Atail kin kaudokiong Siohwa iei kahrepe keieu kesempwal kitail kin iang towehda mihding en Kristian kan. Kitail kin wia met ki kapakap oh koul kan, rongorong mwahu, oh sang ni atail “tungoal meirong en kaping”​—kapingahki Siohwa atail pasepeng kan oh pwais kan nan mihding kan. (Ipru 13:15) Ma kitail kin medemedewe mehn akadei pwukat ahnsou koaros oh kapwaiada ni ahnsou me kitail kin iang towehda mihding kan koaros, atail pwoson pahn kehlailda.

15. Dahme kahrehda Pohl kangoange irail Mehn Ipru Kristian akan en kolokolete ahr doadoahk en kalohk, oh dahme kahrehda kaweid wet pil konehng nan rahnpwukat?

¹⁵ Pil ehu ahl en kakehle atail pwoson iei sang atail doadoahk en kalohk. Pohl ntingihdi: “Kitail kolokol tengeteng koapworopwor me kitail kin kadehdehda, pwe Koht, me kitail kin koapworopworki uhdahn pahn ketin kapwaiada sapwellime inou.” (Ipru 10:23) Ele mwein ke kak kangoange meteikan en kolokol tengeteng mehkot ni ahnsou me re kin lelohng keper oh ahnsou me re kin nsensuwed. Sehdan me kasonge irail mehn Ipru Kristian akan en kesehla ahr doadoahk en kalohk, oh e pil kin kasonge sapwellimen Koht aramas akan nan rahnpwukat. Dahme kitail anahne wia ni ahnsou me kitail kin lelohng soangen kasongo song kan? Eri, tehk duwen dahme Pohl kin wia.

16, 17. (a) Iaduwen Pohl alehdi irairen eimah ong doadoahk en kalohk? (b) Dahme kitail anahne wia ma kitail kin ekis pweiek de masak wia ehu irairen doadoahk en kalohk en Kristian?

¹⁶ Pohl ntingwong irail Kristian akan nan Deselonika: “Kumwail pil ese duwen at ale kalokolok oh mwamwahllahr nan Pilipai mwohn at pwarowohng kumwail nan Deselonika. Eri, soh, atail Koht ketin kakehlailkitada pwe se en padahkihong kumwail Rongamwahuwo me pwarodo sang reh, mehnda ma se diarada apwal laud.” (1 Deselonika 2:2) Ia mwomwen Pohl oh ienge kan “mwamwahllahr” nan Pilipai? Nin duwen me ekei me samanih kan koasoia, lepin lokaia me Pohl doadoahngki ni lokaiahn Krihk, kin wehwehki kauwe, kanamenek, de tiahk me inenen lemei. Kaun akan nan Pilipai kin wokih irail, oh keseiraillahng nan imweteng, oh saliehdiong nehra ko nin tuhke toutou kei. (Wiewia 16:16-24) Dahme ekspiriens kamedek wet wiaiong mour en Pohl? Aramas akan nan kahnimw en Deselonika, wasa me Pohl mwemweitla mwuri, kilang me Pohl kin tepida masak? Soh, e “kehlailkihda oh eimah.” E powehdi irairen masak oh pousehla kalohk ni eimah.

¹⁷ Sang iawasa Pohl kin ale irairen eimah? Sang pein ih? Soh, e koasoiahda me “atail Koht ketin kakehlailla ih.” Ehu kawehwehn Paipel kan kin kawehwehda me koasoi wet kak pil ntingihdi duwehte met, “Koht kihsang irairen masak sang nan mongiongatail kan.” Eri, ma ke kin lemeleme me ke sohte kin eimah ong wia doadoahk en kalohk, de ehu irairen kalohk me apwal ong iuk, dahme ke soh pahn peki sawas sang rehn Siohwa? Peki reh en kihsang irairen masak sang nan mohngiongomw. Peki reh en kakehlailukada nan doadoahk en kalohk. Oh pil patehng met, ke kak pil wia elen sawas teikan. Karasepe ieu, ke kak koasonehdi en iang emen sounkalohk koahiek. Met kak pidada kalohk nan wasahn pisnes kan, kalohk nanial kan, kalohk ni ahnsou sohte lipilipil kan, de kalohk doadoahngki telephone. Mwein iengomw koahiek men pahn perenki tiengala mwowe oh koasoi. Ma ei, rong kanahieng oh sukuhliki sang ih. Ahpw, mwurin e koasoiong tohnihmw, ke pahn kakehlada kapehdomw oh komwi uhd song en wia duwehte.

18. Kapai dah kan kitail pahn kak ale ma kitail pahn eimah nan atail doadoahk en kalohk?

¹⁸ Ma ke pahn kalaudehla irairen eimah, medemedewe duwen dahme e kak imwikihla. Ni ahnsou me ke pahn nannanti oh dehr mworusala, ke pahn kak ale ekspiriens mwahu kan sang ni omw kin ehukihong meteikan duwen padahk mehlel, ekspiriens kan me ke sohte pahn ale ma ke sohte nantihong en wia doadoahk wet. (Kilang pali 4.) Ke pahn nsenamwahukihla en ese me ke wia uwen me ke kak en kaperenda Siohwa edetehn e wia mehkot me apwal ong komwi. Ke pahn alehdi sapwellimen Siohwa kapai kan oh sawas kan en powehdi omw irairen masak. Omw pwoson pahn kehlailda. Ni mehlel, ke sohte kak kakehlailda pwoson en meteikan ahpw pein komwi sohte pahn kehlailkihda pein omw pwoson ni ahnsowo.​—Sud 20, 21.

19. Kating kesempwal dahieu pahn kohwong “aramas akan me kin pwoson”?

¹⁹ Eri, komw pahn uhd doula oh kakehlailada omw pwoson oh pwoson en irail ako me mih limwahmw. Ke kak wia met ni ahmw pahn kakehlaka pein kowe oh pil meteikan sang ni omw pahn koahiekiongala doadoahngki Mahsen en Koht, oh pil sang ni omw pahn sukuhliki mehn kahlemeng mwahu en pwoson akan oh kapwaiada ni omw pahn kaunopada oh iang kisehn mihding en Kristian akan, oh kolokolete tengeteng pwais kaselel en doadoahk en kalohk. Ni omw pahn wia mehpwukat koaros, ke kak kamehlele me komwi iei emen “aramas me kin ahneki pwoson.” Tamanda, aramas pwukat kin ahneki kating kesempwal ehu. Irail iei “soangen aramas me kin pwoson oh aleier komourparail.”b Omw pwoson en kekeirada oh kehlailda, oh Siohwa Koht en ketin nekidala komwi ni ahnsou kohkohlahte!

[Nting tikitik me mi pahs]

Iaduwen Komw Pahn Sapeng?

◻ Iaduwen Pohl kin kasansalehda me e kin likih irail mehn Ipru Kristian akan, oh dahme kitail kak sukuhliki sang met?

◻ Dahme kahrehda ahn Pohl kin koasoiahki duwen soukohp Apakuk inenen konehng?

◻ Ia ekei mehn kahlemeng mwahu kan en pwoson me Pohl kasansalehda?

◻ Sawas konehng dah kei en kakehlailda atail pwoson me Pohl kihda?

[Kilel nan Pali 29]

Mwurin ahn Pohl lelohng ekspiriens kamedek nan Pilipai, e kin nan kapehd kehlailda oh wonowei nan doadoahk en kalohk

[Kilel kan nan Pali 30]

Komw kak kakehlailihada kapehdomw oh song wia soangsoangen wiepen kalohk kan?