Kehl En Kapakap
Ketipino wie kikihrla pohn kahnimw en Nahor nan Middle East. Emen ohl en Siria me adaneki Elieser kohdo wasao iangahki nah kamel ehk ni pwarer ehu likin kahnimwo. Ahpw, mendahki e pwangada oh men nimpilda, Eliezer kin nsenohki anahn en mehteikan. E kohsang sapwen liki ehu kohdohng rapahkihda en eh soumaso nah pwutak emen ah pwoud. Pil ehu, e anahne rapahkihda lih menet nanpwungen eh soumaso ah peneinei kan. Iaduwen e pahn wiahda pwukoa apwal wet?
ELIESER kin kamehlele duwen kehl en kapakap. Ki pwoson, e wiahda kapakap karakarahk wet: “Maing Kaun [“Siohwa,” New World Translation], Koht en ei soumas Eipraam, komw ketin kupwure ie rahnwet oh kapwaiada sapwellimomwi inou ong ei tungoal soumaso. Iet ngehi patopato limwahn pwarer wet, wasa me serepein kan en kahnimw wet pahn patohdohng idipil ie. Eri, serepein pwulopwul men me I pahn ndahng, ‘Menlau kaidi omw sahen pwe I en nimpil mahs.’ Ma e pahn nda, ‘Nna, ale oh nim; oh I pil pahn kanimpile noumw kamel kan,’ iei ih me komw ketin piladahr ong sapwellimomwi ladu Aisek. Ma met pahn pweida, I pahn patohwan esehki me komw ketin kapwaiada sapwellimomwi inou ong ei soumaso.”—Senesis 24:12-14.
En Elieser likih kehl en kapakap sohte sapwungala. Pwe tepin serepein me kohdo ni pwarero iei nein nein rien Eipraam pwutak! Ede iei Repeka, oh e kiripw, tiahk mwakelekel, oh kaselel. Kapwuriamwei pwe, e sohte ihte kanimpile Elieser ahpw e ni kadek kanimpile nein laduwo nah kamel kan koaros. Mwuri, mwurin ah koasoiong ah peneinei, Repeka pwungki en iangada Elieser kohlahng nan sahpw doh ehu pwehn wiahla en nein Eipraam pwutako Aisek ah pwoud. Ia uwen met wia pasepeng sansal ehu ong en Elieser kapakapo ni ahnsou ehu me Koht kin ekei pak ni manaman kamwekid wiewia kan!
Kitail kak sukuhliki soahng tohto sang en Elieser kapakap. Kapakap wet kin kasalehda ah pwoson, karakarahk, oh ah soh roporop nsenohki anahn en meteikan. En Elieser kapakap pil kasalehda ah kin uhpaiong sapwellimen Siohwa elen wiewia ong tohnsampah. Ni soh peikidpe e kin pohnese limpoak tohrohr me Koht sapwellimaniki ong Eipraam iangahki sapwellime inou me kapai kan en ahnsou kohkohdo pahn kohwohng tohnsampah koaros sang rehn Eipraam. (Senesis 12:3) Ihme kahrehda, Elieser tepikihda ah kapakap ki mahsen pwukat: “Maing Kauno [“Siohwa,” NW], Koht en ei soumas Eipraam.”
Sises Krais iei kadaudok en Eipraam me pahn kapaiada tohnsampah peik kan koaros. (Senesis 22:18) Ma kitail men atail kapakap kan en pasapengla rahnwet, kitail anahne kasalehda atail ni karakarahk pohnese sapwellimen Koht elen wiewia ong tohnsampah ki sapwellime Ohlo. Sises Krais mahsanih: “Ma kumwail kin poadidiong ie, oh ei padahk kan kin poadidiong kumwail, eri, kumwail pahn peki mehkot me kumwail anahne, e ahpw pahn pweiong kumwail.”—Sohn 15:7.
Emen werek en Krais me kin pehm mehlel en mahsen pwukat en Sises iei wahnpoaron Pohl. En Pohl kin kamehlele kehl en kapakap sohte kin sapwungala. E kangoangehki ienge Kristian kan en kapakapkihong Koht arail kapwunod kan koaros oh kadehdehda: “I kakohng mehkoaros sang ni manamano me Krais kin ketikihong ie.” (Pilipai 4:6, 7, 13) Met kin wehwehki me en Pohl pekipek kan koaros ong Koht kin pweida? Kitail en kilang.
Kaidehn Pekipek Koaros E kin Ketin Sapeng
Nan ah doadoahk en kalohk soh roporop, Pohl kin lokolongki mehkot me e kahdaneki “kisin tek kamedek kis kohieng ni paliwereiet.” (2 Korint 12:7) Met kak wehwehki kapwunod en lamalam oh pepehm me soun uhwong kan oh “kompoakepah likamw kan” kin kahrehda. (2 Korint 11:26; Kalesia 2:4) De e pil kak kohsang kamedek en soumwahu en mese me e kin kohwahki. (Kalesia 4:15) Mendahki dahkot met, “kisin tek kamedek kis me kohieng ni paliwereiet” kin kak kaluwetehla Pohl. E ntingihdi: “Pak silipak I ahpw ngidingidkihong Kauno oh peki en ketikihsang ei kisin tek kiset.” Ahpw, Koht sohte sapeng en Pohl pekipek. Koht ketin kawehwehong Pohl me kapai kan en pali ngehn me e alehier sang rehn Koht, duwehte manaman en dadaurete pahn kasongosong kan, me itar. Patohngete met, Koht mahsanih: “Ei kalahngan itarohng uhk; pwe ei manaman kin sansalda mehlel rehn me luwet akan.”—2 Korint 12:8, 9.
Dahme kitail sukuhlikihsang mehn karasaras kan en Elieser oh Pohl? Siohwa Koht kin uhdahn karonge kapakap kan en irail ko me ni karakarahk men papah Ih. Ahpw met sohte wehwehki me e kin ahnsou koaros sapengala arail pekipek kan pwehki Koht kak ese dahme pahn wiawi ahnsou kohkohdo. E mwahngih dahme pahn keieu mwahu ong kitail laud sang pein kitail. Me kesempwal sang met, e kin ahnsou koaros mwekid ni ahl akan me pahrekiong sapwellime kupwur kan nin duwen me kileledi nan Paipel.
Ahnsoun Kamwahula ni Pali Ngehn
Koht ketin inoukihda en kamwahuwiala tohnsampah koaros sang soumwahu en paliwar, lamalam, oh pepehm erein Kaundahn Pahr Kid en sapwellime Ohlo pohn sampah. (Kaudial 20:1-3; 21:3-5) Kristian mehlel kan kin kasikasik ahnsou kohkohdo wet me e ketin inoukihda, ni arail kin pwoson unsek sapwellimen Koht manaman en kapwaiada met. Nindoken re sohte kin kasik me kamwahula pwukat pahn ni manaman wiawi ahnsouwet, re kin kapakap ong Koht peki sapwellime kamweit oh kehl en kak powehdi kasongosong kan. (Melkahka 55:22) Ni ahnsou me re kin soumwahuda, re kin kak kapakapki sapwellimen Koht kaweid pwe ren kak pilada soangen wiepen wini me keieu mwahu iten me re kak pwainda.
Ekei pelien lamalam kin kangoangehki me soumwahu kan en kapakapki pwe ren mwahula ahnsouwet, ni arail kin koasoiahki soumwahu kan me Sises oh sapwellime wahnpoaron kan kin kamwahuwikihla manaman. Ahpw soangen manaman kapwuriamwei pwukat kin wiawihda ong kahrepe tohrohr ehu. Re kin wiawi pwehn kadehdehda me Sises Krais iei Mesaia mehlel oh en kasalehda me sapwellimen Koht kupwur sohla mih rehn wehin mehn Suhs akan ahpw uhd mihla rehn mwomwohdisohn Kristian kapw me ahpwtehn kokouda. Ni ahnsouwo, kisakis manaman kan kin anahn pwehn kakehlailla pwoson en mwomwohdisohn Kristian kapwo me ahpwtehn kokouda. Ni ahnsou me mwomwohdiso kapw wet kehlailda, oh mahla, kisakis manaman kan “solahr kin wiawi.”—1 Korint 13:8, 11.
Ni ahnsou kesempwal wet, Siohwa Koht kin ketin kahre sapwellime tohnkaudok nan doadoahk me keieu kesempwal en kamwahula ni pali ngehn. Nindoken re pahn ahneki ahnsou, aramas akan ni karuwaru anahne en peikiong pekipek wet: “Kumwail sohpeiong Kauno [“Siohwa,” NW] oh kapakapohng nindoken eh sohte kin ketin dohsang kumwail. Aramas suwed kan en sohpeisang ar mour suwed, oh wekidala ar lamalam. Re en sohpeiong Kauno [“Siohwa,” NW], atail Koht; pwe ih me kupwurkalahngan oh kin mwadang mahkikihong kitail dipatail kan.”—Aiseia 55:6, 7.
Kamwahula wet en pali ngehn en irail me dipan akan me koluhla kin pweida sang ni kalohk en rongamwahu en Wehin Koht. (Madiu 24:14) Ni a kin kakehle sapwellime ladu kan en kapwaiada doadoahk en komour wet, Siohwa Koht kin sewesehda aramas rar kan sang nan wehi koaros en koluhkihla diparail kan oh en ahnekihla nanpwung mwahu reh mwohn koasoandi suwed wet imwisekla. Irail kan koaros me kin ni mehlel kapakapki soangen kamwahula wet ni pali ngehn oh irail kan koaros me kin kapakapki sawas en wiahda doadoahk en kamwahula wet kin ni mehlel ale pasapengpen arail kapakap kan.
[Credit Line]
Elieser oh Repeka/The Doré Bible Illustrations/Dover Publications