Iaduwen—Lepin Lokaia “Kristian” Soh Salongasangehr Uhdahn Wehwehpe?
IA wehwehn en wia emen Kristian? Iaduwen ke pahn sapeng met? Peidek wet wiawihong aramas kei me re pilada sang nan soangsoangen sahpw tohto, oh iet akan arail pasapeng:
“En idawehnla Sises oh kahlemengih ih.”
“En wia aramas mwahu men oh ehuohng mehteikan.”
“En alehda Krais me iei Kaun oh Sounkomour.”
“En kohla iang sarawi, wia kapakap en rosario, oh ale kamadipw sarawi.”
“I sohte kamehlele me ke anahne kohla sarawi pwehn wia emen Kristian.”
Pil dikseneri kan kin pil kihda soangsoangen kawehwe kan me wekpeseng. Ni mehlel, ehu pwuhk kin kihda kawehwe eisek pahn lepin lokaiao “Kristian,” me tepikihda “kamehlele de iangala pelien lamalam en Sises Krais” lellahng “en wia aramas mwahu men.” E sohte kapwuriamwei me aramas tohto kin apwaliki kawehwehda ia wehwehn en wiahla emen Kristian.
Madamadau Saledek en Rahn Pwukat
Rahnwet, nanpwungen irail kan me dene irail Kristian—pil nanpwungen irail ko me kin iang sarawi ohte—arail madamadau ong soangsoangen oaralap kan me duwehte Paipel pwilisang ni ngehnen Koht, oh padahk en evolution (me aramas kohsang mahn monkey), pelien lamalama kin pidada pelien politik, oh ehukihong mehteikan dahme emen kamehlele kin wekpeseng. Oaralap kan me pid tiahk mwakelekel me pid kemehla seri nan kapehden ine, ohl mwahuki ohl oh lih mwahuki lih, oh ohl oh lih me kin mihmipene ahpw sohte pwopwoud, kin kalap wiahla oaralap kei me aramas kin uhkihpene. Soangen madamadau saledek duwehte mehpwukat adaneki “liberism.”
Karasepe ehu, ehu pwihn en wia koasoandi en pelien sarawi en Prohs, ni ahnsou keren pilada en utungada pwung en ehu sarawi “en pilada emen elder me kin wia tiahk en ohl mwahuki ohl de lih mwahuki lih en iang pwihn en kaweid,” ripohtki makasihno Christian Century. Ekei sounpadahk kan en pelien lamalam kin ahneki madamadau me pwoson Sises sohte kesempwal en komourla emen. Re kamehlele me mehn Suhs kan, oh Muslim kan, oh mehteikan “kakete kohla nanleng [duwehte Kristian akan],” ripoht ehu koasoia nan The New York Times.
Medewehla ma ke kak, emen Marxist me kin utungada capitalism de emen democrat me kin utungada dictatorship de emen environmentalist me kin utungada peldi en tuhke kan. “Aramas meno kaidehn uhdahn emen Marxist de emen democrat de emen environmentalist,” ke pahn nda—oh ke pwung. Ahpw, ni ahnsou me ke pahn tehkada duwen madamadau wekpeseng kan me irail kan me dene irail Kristian en rahnwet kin kamehlele, ke pahn kilang duwen padahk pwukat ahr wekpeseng douluhl oh kin kalap uhwong dahme Sounpoahsoan en pelien lamalam en Kristian, Sises Krais kin padahngki. Dahme met kin koasoiahki arail kilel en Kristian?—1 Korint 1:10.
Ineng en wekidala padahk kan en pelien Kristian pwehn mwahu ong ngehnin ahnsowo kin wiawi sangete mahso erein poadoapoad en aramas, nin duwen me kitail pahn kilang. Ia pepehm en Koht oh Sises Krais ong soangen wekidekla pwukat? Pelien sarawi kan me kin utungada padahk kan me sohte utuhtkihda Krais kak ni pwung wiahkin pein irail Kristian? Peidek pwukat pahn pasapengla nan artikel en mwuri.