Wauneki Irail me Kaun akan Dahme E Sohte Wiawihki?
“Sapeikihong irail me kaun a kan, ni pelien sarawi oh wehi, koasoandi en aramas, oh pelien politik, nin duwen mehkot me kapwuriamwei kakete ehu rahn wia wiewia deila en sounpar eisek samwalahro.”
IHME Hannah Arendt koasoia duwen aramas akan me memour nanpwungen 1960 lel 1970, oh sounpahr tohto dower powe sangete ahnsowo. Rahnwet, sohte wauneki irail akan me ahneki manaman kin kekeiradahte wie kehlailte.
Karasepe ehu, ripoht ehu me ahpwtehn wiawi nan The Times en London koasoia: “Ekei pahpa oh nohno kan sohte pwungki manaman me sounpadahk kan ahneki pohn neirail seri oh ni ahnsou me sounpadahk kan kin song en kaiahne neirail seri kan re kin sapwungki met.” Pak tohto, ni ahnsou me neirail seri kan kin ale kaiahn ni sukuhl, pahpa oh nohno kan kin kohla ni imwen sukuhl kaidehn pwehn kamasepwehkte sounpadahk kan ahpw en pei ohng irail.
Emen sounlokaia en pwihn me adaneki National Association of Head Teachers nan Britain koasoia: “Wehipokon kin koasoia ‘Mie ahi pwung,’ ahpw re sohte kin nda ‘Mie ahi pwukoa kan.’” Likin ahr sohte kin katengehdi rehn neirail seri kan ren wauneki irail me kaun akan, ekei pahpa oh nohno kan sohte kin kapwungala neirail seri kan—oh re sohte mweidohng meteikan en kapwungala neirail seri kan. Seri kan me kin ahneki arail “pwung” kin mweimweiohng en tateki manaman en pahpa oh nohno oh sounpadahk kan, oh imwilahn met kin sansal—“dih kapw ehu me sohte kin wauneki irail me ahneki pwukoah laud akan oh sohte kin wehwehki dahme pwung oh dahme sapwung,” soun nting en nuhspehpa Margarette Driscoll ntingihdi.
Nan artikel ehu nan Time makasihn me oaralap koasoia “Lost Generation” kasalehda mworusalahn me pwulopwul tohto en Russia ni ah koasoia dahme emen sounkoul en rap ndand koasoia: “Iaduwen emen kak ipwidi nan sampah wet, wasa me sohte mehkot kin kak mihmi werei oh sohte mehkot kin pahrek, en likih koasoandi en aramas?” Sociologist Mikhail Topalov ntingihdi pepehm wet: “Seri pwukat sohte pweipwei. Re kilangehr duwen wehi kin pitih arail pahpa oh nohno, re kilang arail pahpa oh nohno luhsang neirail saving kan oh arail doadoahk. Kitail kak kasik me ren wauneki irail me kaun akan?”
Ahpw, e pahn sapwung en nda me dih en aramas pwulopwulte me sohte kin likih irail me kaun akan oh ahneki pwukoa laud akan. Rahnwet, aramas en dih koaros kin kilangwohng soangen manaman koaros ki irair en soh likilik, pil iangahki akatat. Met wehwehki me kitail sohte kak likih irail me kaun akan? Ma manaman kin wiawi ni ahl me pwung, e kak wehwehki “manaman de pwung en kaunda, kopwung, de keinapwih wiewia en meteikan,” eri manaman kak wia kehl ehu ong me mwahu. E kak wia kating ehu ong aramas kan oh pwihn en aramas kan. Artikel en mwuri pahn kasalehda iaduwen met kin wiawi.