Tiahk Mwakelekel Wie Sohsohrasang Nan Mour en Aramas
“SOAHNGO sohte kin wiawi sangete mahs,” koasoia Helmut Schmidt, ohl me wia chancellor en Sehmen mahs. E nsensuwedkihla wiewia mwersuwed kan me aramas lapalap kan ahpwtehn wiahda me pwarada nan nuhs kan. “Koasoandi en tiahk mwakelekel salongkihla noahrok,” e koasoia.
Me tohto pahn pwungki met. Tiahk mwakelekel me poahsoankihda Mahsen en Koht, Paipel, oh me aramas tohto ahnsou reirei kin pwungki me iei mehn kaweid en dahme pwung oh dahme sapwung sohla kin doadoahk. Met ihme kin pil wiawi nan sahpw akan me pidada pelien Kristian.
Tiahk Mwakelekel me Paipel Mahsanih Mwahu ong Kitail?
Tiahk mwakelekel me poahsoankihda padahk kan en Paipel kin oarepene mehlel oh loalopwoat. Ahpw, pirap, mwersuwed, oh likamw kin wiawi wasa koaros nan sampah. Makisihn me oaralap koasoia The Times en London ripohtki me ekei irail me kin rapahki mwersuwed kan “kin uhd wia tiahk en mwersuwed: re kin ale mwohni (£100,000) pwe ren kak ale wini suwed kan me polis kin kolokol (ong mehn kadehde pwe ehu rahn ren kak kopwung irail me kin mwersuwed) oh re kin netikihong irail me mwersuwed kan de re kin ale mwohni pwehn kauwehla mehn kadehde me kak kahrehong irail en kak selidi nan imweteng.” Nan Austria, mwersuwed me pid insurance kin kalap wiawi. Oh nan Sehmen palien sains kin pwuriamweikihla arail ahpwtehn diarada “irair en likamw laud nan palien sains nan Sehmen.” Emen sounpadahk, “me wadawad nan Sehmen nanpwungen irail me kin onopki palien ‘gene’ me mihmi nan paliwar,” alehdi karaun me dene e kin kinehda likamw kan de pein wiahda ire kesempwal tohto.
Tiahk mwakelekel me poahsoankihda Paipel pil kin pidada loalopwoatpene nan pwopwoud, me wehwehki me pwopwoudo pahn poatopoat. Ahpw, tohtohn pwopwoud kan kin imwikihla mweipeseng. Nuhspepa en Kadolik Christ in der Gegenwart (me wehwehki: The Contemporary Christian) ripohtki me ”pil nan Switzerland, me pali laud en aramas kin kamehlele me pwopwoud kin wia koasoandi poatopoat, pwopwoud tohto kin mweipeseng nan rahn pwukat.” Nan Netherlands, persent 33 en pwopwoud koaros kin imwikihla mweipeseng. Emen lih me tehkada duwen wekideklahn mouren aramas nan Sehmen nan pahr samwalahr ako ntingihdi duwen eh pwunodki met: “Aramas kin kilangwohng koasoandi en pwopwoud me e wia tiahk en mehn mahs oh sohte katapan nan rahn pwukat. Aramas sohla kin pwoudki emen erein mour.”
Ni pali teio, aramas rar kan kin medemedewe me kosonned en tiahk mwakelekel me Paipel kin padahngki me likilik oh katapan ong mour nan atail sampah en ahnsou wet. Pwopwoud ehu me kin koukousoan ni irepen sapwen Switzerland oh Germany diarada me sukuhliki pwehn mour pahrekiong tiahk mwakelekel me poahsoankihda padahk kan en Paipel kahrehong ren nsenamwahu. Nin duwen me re keieu nsenohki, “mie mehn kaweid ehute ong irair kan koaros en mour. Mehn kaweid wet iei Paipel.”
Dahme ke lemeleme? Paipel kak wia mehn kaweid katapan ehu? Tiahk mwakelekel me poahsoankihda Paipel kak doadoahk rahnwet?