Mohn Lihpw akan en Mahwen

“NAN mahwen sohte me kin kana,” koasoia emen me mahso kin iang wia sounpei nan Mahwen Keriau en Sampah. “Ihte irail kan me kin luhs.” Me tohto pahn pwungki ohl menet. Imwilahn mahwen me suwed; irail kan me kana iangahki irail kan me luhs kin luhskihla pweipwei laud ehu. Pil mwurin mahwen kin imwisekla, me rar kan kin ale lokolongki laud ohl kan en mahwen ni paliwar oh ni pali en pepehm.

Soangen mohn lihpw dah kan? Mahwen kak kamalaulaula tohn wehi ehu, luhwekihdi seri seupwoupwou tohto oh liohdi tohto. Me tohto me kin pitla sang mahwen kin alehdi ohla kan ni paliwar iangahki lipwen ohla sang ni pali en pepehm. Me rar kan kin semwehmwehla de wiahla irail kan me kin pokousang nan sapwarail. Kitail kak medewehla duwen kailok oh nsensuwed me kin mihmi nan mohngiong en irail kan me pitla sang soangen mahwen kan?

Mohn Lihpw akan me Sohte Kak Mwohdi

Nsensuwed kan me kin mihla nan mohngiong en aramas sang ni mahwen kin kaukaulehte kahrehda kailok mwurin mahwen sohla kin wiawi, oh kesik kan uhdi, oh sounpei kan kohla ni imwarail kan. Dih kan kohkohdo pahn kokoute imwintihti ong emenemen. Ni ahl wet nsensuwed kan en ehu mahwen kak wiahla utupen mahwen mwurin met.

Karasepe ehu, Treaty of Versailles, me sainla nan 1919 pwehn kaimwisekla Mahwen Keieu en Sampah, wiahda kosonned kan pohn Sehmen me tohn Sehmen leme me lemei oh ikidek. Nin duwen me The Encyclopædia Britannica koasoia, me kosonned en koasoandi en popohl kin “kahrehda kailok nanpwungen mehn Sehmen kan oh met sewesehda arail men ikih.” Sounpar kei mwuri, “kailongki koasoandi en popohlo kihong Hitler mehkot me e pahn tepkihda” oh wiahla ehu kahrepe me imwikihla Mahwen Keriau en Sampah.

Mahwen Keriau en Sampah tepida nan Poland oh doula iangahkihla sapwen Balkan kan. Ohla kan me soangsoangen keinek en aramas kan wahdohng emenemen nan pahr kan en 1940 sewese kaunopada mahwen me wiawi nan sapwen Balkan kan nan pahr kan en 1990. “Kailok oh akdupuk kin doudoulahte lao lel atail ahnsou,” kosoia nuhspehpa en Sehmeno Die Zeit.

Ni mehlel, ma tohnsampah pahn kousoanpene ni popohl, mohn lihpw akan en mahwen anahne en kamwahula. Iaduwen met kak wiawi? Met kak wiawi ihte sang ni sapwellimen Koht Wehin Mesaia. Paipel inoukihda me sang ni koperment wet, Koht “kin ketin katokehdi mahwen wasa koaros nin sampah.”​—Melkahka 46:9.

[Credit Line]

COVER: Fatmir Boshnjaku

[Credit Lines]

U.S. Coast Guard photo; UN PHOTO 158297/J. Isaac