Kolokol Ahmw Peren Ni Ahmw Kin Wia Doadoahk En Siohwa

“Kumwail en pereperen ahnsou koaros nan amwail miniminiong Kauno. I pil pahn pwurehng koasoia: kumwail en pereperen!”​—PILIPAI 4:4.

1, 2. Iaduwen emen brother oh eh peneinei kolokolete ahr peren edetehn soahng koaros me re kin ahneki oh naineki ohkihla kisiniei?

SEIMS, emen Kristian me mahki sounpar 70 oh kin kousoanla nan Sierra Leone, wia doadoahk laud erein eh mour. Medewehla uwen laud eh peren ni ahnsou me e nekidala nah mwohni kan oh met e kak pwainda ihmw ehu me mie pere pahieu! Ahnsoukis mwurin Seims oh eh peneinei tepida kousoanla nan ihmw kapwo, mahwen nanpwungen tohnwehi kan nan wehio me e kin mihmi loale tepida wiawi, oh imwarail isihsla douluhl. Edetehn imwarail ohlahr, arail peren sohte tikitikala. Dahme kahrehda?

² Seims oh eh peneinei sohte kin pwunodkihla laud medemedewe duwen kepwe kan me ohkihlahr kisiniei, ahpw re kin medemedewe duwen dahme mihmihte. Seims kawehwehda: “Ni ahnsou me kiht lelohng kahpwalo, se kin pousehla iang towehda mihding kan, wadek Pwuhk Sarawi, kapakap, oh kihong meteikan mehkan me se kin ahneki oh naineki mehnda ma tikitik. Se kak kolokolte aht peren pwehki se kin medemedewe duwen aht nanpwung mwahu rehn Siohwa.” Pwehki re kin medemedewe duwen mehkan me mwahu me re kin paiekihda, keieu, arail kin karanih oh ahneki nanpwung mwahu rehn Siohwa, Kristian lelepek pwukat kin “pousehlahte pereperen.” (2 Korint 13:11) Ahpw, ni mehlel, e sohte mengei ong irail en dadaurete pahn irair apwal pwukat. Ahpw, met sohte kin kahrehong irail en sohlahr peren ni arail kin miniminiong Siohwa.

3. Iaduwen ekei tepin Kristian akan kolokolete arail peren?

³ Irail tepin Kristian akan lelohngehr kasongosong kan oh arail kasongosong kan kin duwehte dahme Seims oh eh peneinei lelohngehr. Ahpw, wahnpoaron Pohl ntingwong Mehn Ipru Kristian akan mahsen pwukat: “Ni ahnsou me amwail kepwe kan koaros pehdsang oh kulsang, kumwail kin kanengamah ni peren iang ale lokolok.” Pohl eri kawehwehda duwen utupen ahr peren: “Pwehki amwail ese me kumwail pil ahneki soahng kei me mwahusang kowahlap, me pahn mihmihte kohkohlahte.” (Ipru 10:34) Ei, irail Kristian akan nan keieun senturi kin ahneki koapworopwor kehlail ehu. Re kin ahneki koapworopwor kehlail ehu me re pahn ale mehkot me sohte pahn kak ohla​—“nihnen mour soutuk” nan sapwellimen Koht Wehin nanleng. (Kaudiahl 2:10) Rahnwet, atail koapworopwor nin duwen Kristian akan​—koapworopwor en kohla nanleng de mih nin sampah wet—​pahn kak sewese kitail en kolokolete atail peren edetehn kitail kin lelohng kahpwal akan.

“Perenkihda Koapworopworo”

4, 5. (a) Dahme kahrehda sapwellimen Pohl kaweid en “perenkihda koapworopworo” kin wiawi ni ahnsou konehng ong mehn Rom akan? (b) Dahme pahn kak kahrehong Kristian emen en solahr ahneki eh koapworopwor?

⁴ Wahnpoaron Pohl kangoange ienge me pwoson akan nan Rom en “perenkihda koapworopwor” en mour soutuk. (Rom 12:12) Met iei kaweid me wiawi ni ahnsou konehng ong mehn Rom akan. Pwe sohte lel sounpar eisek mwurin Pohl ntingwong irail, re tepida lelohng kalokolok laud ehu, oh Emperor Nero ruwese sapwellime kan en kaloke ekei Kristian akan oh kemeirailla. Arail pwoson me Koht pahn ketikihong irail nihn en mour soutuk me sewese irail en daudaurete pahn kalokolok kan. Iaduwen kitail nan rahnpwukat?

⁵ Nin duwen Kristian akan, kitail pil ese me kitail pahn lelohng kalokolok kan. (2 Timoty 3:12) Oh pil, kitail ese me “paisuwed kin lelohng aramas koaruhsie.” (Eklesiasdes 9:11) Emen tohn atail peneinei de emen kompoakpatail kak mehkihla aksident ehu. De emen pahpa de nohno de emen me kitail karanih kak mehkihla soumwahu ehu. Ma kitail sohte pahn kolokolete atail koapworopwor en Wehio, kitail pahn kak luwetala ni pali ngehn ni ahnsou me soangen kasongosong kan kin wiawi. E mwahu en wia peidek pwukat ong pein kitail, ‘I kin “perenkihda koapworopworo”? I kin kalapw doudouloale duwen koapworopworo? I kin uhdahn kamehlele koapworopwor en Paradais me pahn wiawi? I kak medewehong me I iang mih wasao? Ahi ngoang ong imwin koasoandi wet en wiawi kin kehlail duwehte ni ahnsou me I tepin sukuhliki duwen padahk mehlel?’ Kitail anahne medemedewe laud duwen kaimwiseklahn peidek pwukat. Dahme kahrehda? Pwe, ma kitail kin ahneki roson mwahu, oh mie neitail mwohni laudsang dahme anahn, oh kin kousoan nan ehu sahpw me sohte kin lelohng kahpwal akan en mahwen, lehk, de kahpwal teikan duwehte melimel, lapake, rerrer en sahpw, oh soangen kahpwal pwukat, kitail pahn kakete​—mwein ong ni ahnsouwet—​solahr ngoangki sapwellimen Koht sampah kapw en pweida.

6. (a) Ni ahnsou Pohl oh Sailas lelohng kalokolok, dahme ira kin medemedewe duwen? (b) Iaduwen mehn kahlemeng mwahu kan en Pohl oh Sailas kangoange kitail rahnwet?

⁶ Pohl pil pousehla kaweidih mehn Rom kan en “kanengamahiong amwail apwal akan.” (Rom 12:12) Pohl kin lelohng kalokolok kan. Ehu ahnsou, e kilangada kaudiahl ehu, oh nan kaudiahlo, e kilangada emen ohl me luhke ih en “kohdo Masedonia” pwehn sewese aramas akan wasao en sukuhliki duwen Siohwa. (Wiewia 16:9) Mwurin met, Pohl, iangahki Luk, Sailas oh Timoty, mwesellahng Iurop. Dahme irail misineri ngoang kei pahn lelohng? Kalokolok! Mwurin Pohl oh Sailas kalohk nan kahnimw Pilipai nan Masedonia, re aleier kamakam laud, oh lekdekiong nan imweteng. Ni sansal, ekei tohn Pilipai kan sohte kin ihte sohte perenki rong duwen Rongamwahu en Wehio​—irail kin inenen uhwongada laud. Wekideklahn irairo kin kahrehong misineri ngoang pwukat en sohlahr ahneki ahr peren? Soh. Mwurin Pohl oh Sailas ale kamakam oh lekdekiong nan imweteng, “nin lukepen pwong, Pohl oh Sailas ahpw kapakap oh kokoulki koul kei ong Koht.” (Wiewia 16:25, 26) Ni mehlel, medek sang kamakam sohte kin kaperen ong Pohl oh Sailas, ahpw misineri riemen pwukat sohte kin medemedewe duwen ahr medek kan. Ira kin medemedewe duwen Siohwa oh sapwellime ahl akan me e kin ketin kapaiada ira. Sang ni ara kin pereperen ‘kanengamahiong ara apwal akan,’ Pohl oh Sailas kin wia mehn kahlemeng mwahu ong riarail brother kan nan Pilipai oh pil nan wasa teikan.

7. Dahme kahrehda kitail anahne kasalehda atail kalahngan kan nan atail kapakap kan?

⁷ Pohl ntingihdi met: “Poadidiong kapakap.” (Rom 12:12) Ke kin kapakap ni ahnsou me ke kin pwunod? Dahme ke kin kapakapki? Mwein ke kin koasoia duwen kahpwalo ni oaritik oh peki sawas sang rehn Siohwa. Ahpw, ke pil kak kasalehda ahmw kalahnganki kapai kan me ke kin paiekihda. Ni ahnsou me kahpwal akan kin pwarada, medemedewe duwen sapwellimen Siohwa kadek me e kin ketin wiaiong kitail pahn kak sewese kitail en “pereperenki koapworopworo.” Depit kin lelohng kahpwal tohto nan eh mour oh e ntingihdi met: “Maing Kaun, at Koht, ia uwen tohtohn soahng kapwuriamwei kan me komw ketin wiahiong kiht; sohte emen mie me duwehte komwi! Ia uwen tohtohn koasoandi kan me komw ketin wiahiong kiht! Ma I pahn song en kasalehda koaros—re uhdahn pahn tohtohsang me I kak kasalehda!” (Melkahka 40:5) Ma kitail pahn kahlemengih Depit, oh kaukaule doudouloale duwen kapai kan me kitail kin ale sang rehn Siohwa, kitail pahn uhdahn kolokolete atail peren.

Kolokolete Ahmw Madamadau me Soahng Koaros Pahn Pweida Mwahu

8. Dahme kin sewese Kristian men en kolokolete eh peren ni ahnsou e kin lelohng kalokolok?

⁸ Sises kangoangehki sapwellime tohnpadahk kan en kolokolete madamadau me soahng koaros pahn pweida mwahu ni ahnsou me re kin lelohng kasongosong kan. E mahsanih: “Meid pai kumwail ma aramas akan pahn lahlahwei kumwail oh kalokei kumwail oh karaunkin kumwail soangen suwed oh likamw koaros pwehki ngehi.” (Madiu 5:11) Dahme kahrehda kitail kak pereperen edetehn kitail pahn lelohng soangen irair pwukat? Pwehki atail kakong dadaurete pahn kahpwal akan kin wia ehu mehn kadehde me sapwellimen Siohwa ngehn kin ieiang kitail. Wahnpoaron Piter padahkiong ienge Kristian akan: “Meid pai kumwail ma aramas akan lahlahwei kumwail pwehki mwaren Krais; pwe met wehwehki me Ngehn lingalingo, Ngehnen Koht, ketidiongehr rehmwail.” (1 Piter 4:13, 14) Ki sapwellime ngehn, Siohwa pil pahn sewese kitail en dadaurete oh met pahn imwikihla atail kin kak kolokolete atail peren.

9. Dahme kin sewese ekei brother kan en diarada ahr peren ni ahnsou re kin mih nan imweteng pwehki ahr pwoson?

⁹ Mendahki kitail kin mihla pahn irair suwed akan, kitail kak diarada kahrepe mwahu kan en pereperen. Emen Kristian me adaneki Adolf me diarada kahrepe pwukat. E kousoanla nan ehu wehi me keinapwihdi Sounkadehdehn Siohwa kan en dehr wia arail doadoahk en kalohk oh dehr tuhpene ong mihding kan erein sounpar tohto. Adolf oh ienge kan me selidier oh ale kadeik en mih nan imweteng ni ahnsou werei pwehki irail kahng en kesehla arail pwoson me kin poahsoankihda Paipel. Mour nan imweteng me apwal, ahpw duwehte Pohl oh Sailas, Adolf oh ienge kan diarada kahrepe kan en kasalehda arail kalahngan ong Koht. Dahme irail lelohng nan imweteng me sewese irail en kakehle ahr pwoson oh kekeirada loalarail irairen Kristian akan, duwehte kadek sapan oh limpoak. Karasepe ieu, ni ahnsou me emen tohn imweteng pahn alehdi ehu koakon sang rehn eh peneinei, e kin pil ehukihong ienge pwoson akan audepe kan, oh irail kin kilangwong sawas pwukat nin duwen kisakis kan me kin pwilsang rehn Siohwa, pwe Ih me kin ketikihong kitail “soangen wiawi sapan koaros oh kisakis mwahu koaros.” Soangen wiawi kadek pwukat kin kahrehong ih me kin kihda kisakis kan oh pil aramas akan me kin ale kisakis kan en ahneki peren. Eri, dahme irail lelohng nan imweteng me wiawi pwen kauwehla ahr pwoson kin uhd kakehlahda irail ni pali ngehn!​—Seims 1:17; Wiewia 20:35.

10, 11. Iaduwen emen sister kin dadaurete mendahki irail kin kalapw kapeidek ih oh mwurin mwo e selidi nan imweteng ahnsou werei?

¹⁰ Ella kin kousoanla nan ehu wehi me keinapwidi Sounkadehdehn Siohwa kan en dehr wia arail doadoahk en kalohki Wehio erein sounpahr tohto, oh Ella selidi pwehki e kin padahkiong aramas akan duwen eh koapworopwor en Kristian. Erein sounpwong waluh, irail kin kapeipeidek reh oh sohte uhdi. Ni ahnsou kopwung wiawi, irail kadeikada ih en selidi nan imweteng ong ni sounpar eisek nan wasa me sohte tohnkaudok kan en Siohwa iang selidi ie. Ella mahki sounpar 24 ahnsowo.

¹¹ Ni mehlel, Ella sohte men mih nan imweteng pali laud en ahnsou me e pwulopwul. Ahpw, pwehki e sohte kak kawekila met, e medemedewe en kawekila eh madamadau. E tepida medemedewe me imwetengo iei pein eh wasahn kalohk. E koasoia met: “Mie aramas tohto me I kalohkong nan imweteng oh met kahrehong sounpar kan en mwadang dowe power.” Mwurin sounpar limau, irail pwurehng kapeipeidek reh. Irail akan me kin wiawia peidek kan reh, kin tepida pohnese me e selidi nan imweteng sohte pahn kak kauwehla e pwoson, oh irail padahkiong ih: “Kiht sohte kak mweidong uhk en sapwadeksang imweteng; pwehki ke sohte wekila.” Ahpw, Ella sapengki irail ni kehlail, “Ahpw, I wekila! Ai madamadau me mwahu sang mahs ni ahnsou me I tepin selidi nan imweteng, oh ai pwoson me kehlail sang mahs!” E kapataiong met: “Ma kumwail sohte men kasaledek ie sang imweteng, I pahn mihmihte nan imweteng lao lel Siohwa kin kupwurki en ketin doarehla ie.” Sounpar limau elep e mihmi nan imweteng ahpw met sohte kin kihsang rehn Ella eh peren! E sukuhliki me e kak ahneki peren, sohte lipilipil soangen irair dah kei me e pahn lelohng. Ke kak sukuhliki sang eh mehn kahlemeng mwahu?​—Ipru 13:5.

12. Dahme pahn kak kameleileidi Kristian emen me pahn lelohng kahpwal akan?

¹² Ken dehr lemeleme me Ella kin ahneki ehu soangen manaman kehlail me kin sewese ih en powehdi kahpwal pwukat. Ella koasoia duwen ahnsou me irail me kin peipeidek reh sounpwong kei mwohn e ale kadeiko: “I tamanda me ngih kan kin rerrer, oh I pehm me ngehi duwehte kisin mehnpihr masepwehk men.” Ahpw, Ella kin pwoson kehlail Siohwa. E sukuhliki en likih Ih. (Lepin Padahk 3:5-7) Imwilahn met, e pwoson Koht me kehlailda sang mahs. E kawehwehda met: “Ahnsou koaros me I kin pedolong nan pere wasa me irail kin peipeidek rehi, I kin meleileidi. . . . Ma irairo me I pahn lelohng me inenen kamasepwehk, ahi meleilei pil laudla.” Siohwa kin wia utupen popohl oh meleilei me Ella kin ahneki. Wahnpoaron Pohl kawehwehda: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahl kalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.”​—Pilipai 4:6, 7.

13. Dahme kin kamehlelehong kitail ma kitail anahne lelohng kahpwal akan kitail pahn kak dadaurete?

¹³ Ni ahnsou wet, Ella sapwadeksangehr imweteng, ahpw ni ahnsou me e lelohng kahpwalo, e kolokolete eh peren. E kin kak wia met pwehki kehl me Siohwa ketikihong ih, kaidehn sang pein ih. Wahnpoaron Pohl pil kin wia met, oh e ntingihdi met: “Ihme I kin perenki oh suweiki ei luwet akan, pwe I en kin pehm manaman en Krais rehi. . . . Pwe ni ei kin luwet, iei ahnsou me I kin kehlail.”​—2 Korint 12:9, 10.

14. Kihda ehu karasaras ong iaduwen emen Kristian pahn kak kolokolete madamadau me soahng koaros pahn pweida mwahu ni ahnsou e pahn lelohng kahpwal ehu oh met pahn kak imwikihla dah.

¹⁴ Kahpwal akan me ke kin lelohng rahnwet ele mwein pahn weksang dahme kitail ahpwtehn koasoia. Ahpw, sohte lipilipil soangen mwomwen kasongosong dah kan kin mie, irail kin wia mehkan me apwal en powehdi. Karasepe ieu, ahmw kaun en doadoahk mwein kin nohn daulihla tehk ahmw doadoahk​—e kin wia met laudsang tohndoadoahk teikan me kin iang pelien lamalam teikan. Ahpw, mwein ke sohte kak rapahki pil ehu doadoahk. Iaduwen ke kak kolokolete ahmw peren? Tamanda Adolf oh kompoakepah kan me irail sukuhliki irair kesempwal kan ni ahnsou re mihmi nan imweteng. Ma ke pahn ni mehlel nantihong en kaperenda omw kaun en doadoahk​—mendahki ih emen kaun me “apwal en kaperenda”—​ke pahn kakairada irairen en Kristian akan duwehte dadaur oh kanengamah. (1 Piter 2:18) Oh pil, ke pahn wiahla tohndoadoahk mwahu men, oh ele met pahn kak sewese iuk en ale ehu doadoahk katapan ni ahnsou kohkohdo. Ni ahnsouwet, kitail pahn koasoia ahl teikan me kitail kak kolokolete atail peren nan sapwellimen Siohwa doadoahk.

Kihong Kamengeipen Ahmw Mour Kin Imwikihla Peren

15-17. Dahme pwopwoud ehu sukuhliki ong kihsang pwunod kan edetehn utupen pwunodo sohte pahn kak kohsang douluhl?

¹⁵ Mwein sohte ahmw pilipil laud en pilada soangen doadoahk dahieu ke kin wia de iawasa ke men doadoahk, ahpw mwein mie mehkan me ke kak wia de koasoanehdi nan ahmw mour. Tehk duwen ekspiriens wet.

¹⁶ Kristian pwopwoud ehu me luhke emen elder en iang ira mwenge nan imwara. Ni soutuko, brother menet oh eh pwoudo wehkada me ni ahnsou kerendo ira kin tepida tihwokihla ara kahpwal akan nan mour. Edetehn ira ahneki doadoahk ong mwohni kaukaule, ira sohte kin mihla nan irair ehu en rapahki pil ehu wasahn doadoahk. Ira kin medemedewe ia uwen werei ira pahn kak dadaurete pahn irair apwal wet.

¹⁷ Ni ahnsou me ira peki rehn elder menet en kaweidih ira, elder menet sapengki, “Kamengeila amwa mour.” Iaduwen? Ohl oh lih pwopwoud riemenet kin doadoahngki awa siluh en kohla ara wasahn doadoahk oh pil pwurala ni imwara ni rahn koaros. Elder menet, me inenen esehla pwopwoudo, kihda iren sawas wet: ira en medemedewe en kosoula nan wasa ehu me karanih ara wasahn doadoahk, pwe sang ara pahn wia met ira pahn kak kohla oh pwurodo sang ara wasahn doadoahk ni ahnsou mwotomwot. Ira kak doadoahngki ahnsou me pahn luwehdi en wia mehkan me kesempwal​—de doadoahngki ahnsowo pwehn kommoal. Ma pwunod akan me kin kohsang kahpwal akan me ke kin lelohng ni ehu ehu rahn kin kihsang ahmw peren, dahme ke soh kasawihada mwahu en kawekila ahmw koasoandi kan?

18. Dahme kahrehda e kesempwal en medemedewe mwahu mwohn kitail pahn wiahda atail pilipil kan?

¹⁸ Pil ehu ahl en katikitikala rehtail pwunod akan me kin kohsang kahpwal akan iei en medemedewe mwahu mwohn kitail pahn wiahda atail pilipil kan. Karasepe ieu, emen Kristian wiahda eh pilipil en kauwada ihmw ehu. Edetehn e saikinte wiahda ihmw nan eh mour, e pilada en wiahda soangen ihmw me apwal en kauwada. Ni ahnsou wet e esehier me e pahn kakete sohte lelong kahpwal akan ma e kin ‘kanahieng e kahk koaros’ mwohn e pilada en wiahda ehu pilahn ong wiahda ihmwo. (Lepin Padahk 14:15) Emen Kristian pwungki me e pahn pwain pweipwand ehu ma ienge Kristian men sohte pahn pwain. Nin duwen inou me re wiahda, ma brothero me ale pweipwand sohte kak kapwungala pweipwando, brother teio nda me e pahn kihda sawas pahn anahne kapwungala pweipwando. Nin tepio, soahng koaros pweida, ahpw ni ahnsou dower powe brothero me wiahda pweipwand sohla kak pwain. Aramaso me mweidohng brothero en pweipwand reh pwuriamweikihla oh idingkihong brother teio me inoukihda me e pahn sawas en kapwungala pweipwando pwon. Met kin kihong kahpwal laud ehu ong ih me inoukihda me e pahn sawas. Ahpw, kahpwal wet pahn wiawi ma e pahn medemedewe mwahu mwohn e wiahda inouwo en pwukoahki pweipwando ma brothero me wiahda pweipwando sohte pahn pwain?​—Lepin Padahk 17:18.

19. Ia ekei ahl akan me kitail pahn kak katikitikihala pwunod sang atail mour?

¹⁹ Ni ahnsou me kitail kin pwang, kitail en dehr lemehda me ma kitail pahn katikitikla ahnsoun wadawad en Paipel, kalohk, oh iang towehda mihding kan, met pahn kak kihsang atail pwunod kan oh kahpwal akan me kitail kin lelohng. Eri, kitail en tamataman me mehpwukat kin wia ahl kesempwal kan me kitail kak ale sapwellimen Siohwa ngehn sarawi, oh peren iei kisehn wahn ngehn kan. (Kalesia 5:22) Doadoahk kan en Kristian kin ahnsou koaros wia kommoalpen ngenatail kan oh sohte kin kahrehong kitail en pwangadahr. (Madiu 11:28-30) Kahrepen kitail kin pwangadahr pali laud en ahnsou, kaidehn pwehki doadoahk kan en Kristian ahpw doadoahk ong mwohni oh mwadong kan. Ma kitail pahn mwadang meirla met pahn pil kak sewese kitail en kehlailda. Kommoal kan pahn kin katapan ong mour en aramas akan. N. H. Knorr, me iang pwihn en Governing Body en Sounkadehdehn Siohwa kan lao lel e mehla, e kin kalapw padahkiong misineri kan: “Ni ahnsou ke pahn nsensuwed, ken ekis kommoal. Ke pahn pwuriamweikihla kilang me e pahn mengei en powehdi kahpwalo mwurin ke pahn meir mwahu!”

20. (a) Kousapahlih ekei ahl akan me kitail pahn kak kolokolete atail peren. (b) Ia ekei kahrepe kan ke lemeleme me kak kahrehong kitail en pereperen? (Kilang koakon nan pali 23.)

²⁰ Kristian akan kin ahneki pwais kaselel en papah “Koht peren.” (1 Timoty 1:11) Nin duwen kitail sukuhlikiher, kitail kak kolokolete atail peren mendahki kitail kin lelohng kahpwal laud akan. Kitail en kolokolete atail koapworopwor ong Wehio, kapwungala atail madamadau kan ni ahnsou me konehng, oh kamengeila wiewia kan en atail mour. Eri, sohte lipilipil irair akan me kitail pahn lelohng, kitail pahn mwekidkihda mahsen kan en wahnpoaron Pohl: “Kumwail en pereperen ahnsou koaros nan amwail miniminiong Kauno. I pil pahn pwurehng koasoia: kumwail en pereperen!”​—Pilipai 4:4.

Doudouloale Duwen Peidek Pwukat:

• Dahme kahrehda Kristian akan anahne en kolokolete arail koapworopwor en Wehio?

• Dahme pahn kak sewese kitail en kolokolete atail peren ni ahnsou kitail kin lelohng kahpwal akan?

• Dahme kahrehda kitail anahne song en kamengeila atail mour?

• Ni ahl dah kei ekei aramas kin kamengeila arail mour?

[Box/​Kilel kan nan pali pwukat 23]

Pil Ekei Kahrepe kan en Ahneki Peren

Nin duwen Kristian akan, kitail ahneki kahrepe kan en peren. Kilang dahme ntingihdi pah:

1. Kitail esehla Siohwa.

2. Kitail sukuhlikier duwen mehlelo en sapwellimen Koht Mahsen.

3. Kitail kak ale mahkpen dipatail kan ki atail pwoson meirong en Sises.

4. Wehin Koht kin kakaun—sampah kapwo kerendohr!

5. Siohwa me kapokonepene kitail nan paradais en ngehn.

6. Kitail paiekihda werekiong iengatail Kristian akan.

7. Kitail ahneki pwais kaselel en iang doadoahk en kalohk.

8. Kitail kin momour, oh kitail kin ahneki kehl en wia soahng tohto.

Kahrepe depe me ke kak nda likin kahrepe pwukat me kitail kak ahneki peren?

[Kilel nan pali 19, 2]

Pohl oh Sailas kin peren edetehn ira mih nan imweteng

[Kilel kan nan pali pwukat 21]

Ke kin akadeiong oh medemedewe duwen koapworopwor kaperen en mih nan sapwellimen Koht sampah kapwo?