Mie Mour Mwurin Mehla?
MPEN pahr 3,500 samwalahr oko, Sohp wia peidek wet: “Ma aramas emen pahn mehla, e kak pwurehng mourda?” (Sohp 14:14) Peidek wet wia mehkot kapwonopwon ong aramas ki erein pahr kid kid kei. Sangete mahs leledo met, soangsoangen aramas kin medewe laud pasapeng en peidek wet oh eri ahnekihda soangen kawehwe tohto.
Aramas tohto me dene irail Kristian kin kamehlele me mie nanleng oh nan ehl. Hindu kan kin kamehlele me mwurin emen mehla, ah mour kin kosoula nan paliweren pil emen aramas de mahn (reincarnation). Sounsawas en sarawi en Islam me ede Emir Muawiyah koasoia dahme Muslim kan kin kamehlele oh koasoia: “Se kamehlele me pahn mie rahn en kadeik mwurin mehla, ahnsou ke pahn pwarada mwohn silangin Koht, Allah, me pahn duwehte ahmw pidelong nan mwoalen kopwung.” Nin duwen sarawi en Islam kamehlele, Allah pahn tenekih mour en emen emen aramas oh eri kilelehiong me e pahn mih nan paradais de nan kisiniei.
Nan Sri Lanka, irail koaros me iang pelien sarawi en Buddhist oh pil Kadolik kin langahda arail wenihmw kan oh wenihmwtok koaros ma aramas pahn mehla nan imwarail kan. Lamp oil ieu pahn isihsda oh kohpwahn mehla pahn pwilidi neh kan uhlang wenihmw en pidelongodo. Irail kamehlele me wiewia pwukat pahn pwakiala ngenen aramas me mehlahr.
Me Ronald M. Berndt sang University of Western Australia koasoia me irail Aborigines en Australia kin kamehlele me “aramas ahneki ngehn me sohte kak mehla.” Ekei mehn Aperika kin kamehlele me mwurin mehla, aramas me sohte lapalap pahn wiahla eni, oh aramas lapalap akan pahn wiahla ngehn mwahu oh aramas pahn wauneki irail oh pekipek rehrail pwehki irail pahn wia kaun en kousoan ekei me sohte sansal.
Nan ekei sahpw kan, dahme re kamehlele duwen mehla—irail kin doaloapene madamadau me kin uhdahn mie rehrail mahs oh iangahki padahk en arail pelien lamalam. Rehn irail Kadolik oh Pros tohto nan West Africa, e kin wia tiahk ieu en pwainla neirail kilahs en irongin kan ma mie aramas mehla rehrail pwe aramas dehpa kilangada ngenen me mehlahro nan kilahso.
Pasapeng kan kin inenen wekpeseng laud ni arail kin kihda pasapeng en peidek wet, ‘Dahme kin wiawi ong aramas ahnsou me re mehla?’ Ahpw, pali laud en aramas kin ahneki madamadau ieu me duwepenehte iei met: Mie mehkot nan aramas me sohte kak mehla mehnda ma aramaso mehla. Ekei aramas kin kamehlele me “mehkoto” kin wia ngehn. Karasepe, nan ekei wasa nan Aperika oh Eisia oh wasa kan nan Pacific duwehte Polynesia, Melanesia, oh Micronesia, aramas tohto kamehlele me ngenen aramas sohte kak mehla.
Mie ngehn loalen aramas momour emen? Ngehn wet uhdahn kin pedoi sang paliweren aramas ahnsou me aramaso mehla? Ma iei, eri dahme kin wiawi ong ngehno, oh soangen koapworopwor dah me mie ong aramas me melahro? Peidek pwukat kitail en dehr mwamwahleki. Sohte lipilipil mehnia tiahk de sarawi me ke iang, mehla kin wiawi ong kitail koaros. Ire kan me pid dahme kin wiawi mwurin mehla kin pidada laud pein ahmw mour. Se kangoange iuk en kasawih mwahu ire pwukat.